អាមេរិក-ចិន

លោក អូបាម៉ា ថា​ចិន​មាន​ភាព​រឹងរូស​កាន់តែ​ខ្លាំង ក្នុង​សំណុំរឿង​នុយក្លេអ៊ែរ កូរ៉េខាងជើង

ជំនួបរវាង លោក បារ៉ាក់ អូបាម៉ា និង ស៊ី ជីងពីង​ នៅទីក្រុង​ California​ ថ្ងៃទី៧ មិថុនា ឆ្នាំ២០១៣
ជំនួបរវាង លោក បារ៉ាក់ អូបាម៉ា និង ស៊ី ជីងពីង​ នៅទីក្រុង​ California​ ថ្ងៃទី៧ មិថុនា ឆ្នាំ២០១៣ REUTERS/Kevin Lamarque

ប្រធានាធិបតី​អាមេរិក បារ៉ាក់ អូបាម៉ា បាន​ចោទ​ចិន​ថា កំពុង​​តែ​​ប្រកាន់​​យក​​នយោបាយ​​កាន់តែ​តឹងរ៉ឹង​​ចំពោះ​​កម្មវិធី​​នុយក្លេអ៊ែរ​​របស់​​កូរ៉េខាងជើង។ ការ​​ចោទ​​ប្រកាន់​​បែប​នេះ​​បាន​​ធ្វើ​​ឡើង​ស្រប​​ពេល​​ដែល​​បេសកជន​​ជាន់ខ្ពស់​​កូរ៉េខាងត្បូង​​គ្រោង​​ជួប​​ប្រជុំ ជា​​មួយ​​សហរដ្ឋអាមេរិក និង​ជប៉ុន​​នៅ​​ទីក្រុង​វ៉ាស៊ីនតោន​​នា​​ថ្ងៃ​​អង្គារ​​នេះ​ស្តី​ពី​​បញ្ហា​​កូរ៉េខាងជើង។  

ផ្សាយពាណិជ្ជកម្ម

ប្រធានាធិបតី​អាមេរិក បារ៉ាក់ អូបាម៉ា បាន​និយាយ​ជា​ចំហថា ចិន​កំពុង​តែ​ប្រកាន់​យក​ចរិត​កាន់តែ​តឹងតែង​ឡើង​ចំពោះ​សេចក្តី​ប្រកាស​បង្កហេតុ​អំពី​បញ្ហា​នុយក្លេអ៊ែរ​របស់​កូរ៉េខាងជើង។ លោក បាន​ប្រកាស​បែបនេះ​តាម​រយៈ​បទសម្ភាស ក្នុង​ទូរទស្សន៍ PBS។ បើ​តាម​លោក អូបាម៉ា កាល​ពី​មុន ចិន​ហាក់​ដូច​ជា​លាក់លៀម​អំពី​បំណង​របស់​ខ្លួន​ចំពោះ​បញ្ហា​កូរ៉េខាងជើង ប៉ុន្តែ​បច្ចុប្បន្ន ចិន​កំពុង​បង្ហាញ​ឱ្យ​ឃើញ​កាន់តែ​ច្បាស់​ហើយ ពី​ភាពរឹងរូស​ក្នុង​បញ្ហា​នុយក្លេអ៊ែរ កូរ៉េខាងជើង​នេះ។ លោក អូបាម៉ា ​បាន​សុំ​ឱ្យ​ចិន​បង្ហាញ​ឆន្ទៈ​ក្នុង​ការ​ពិភាក្សា​ក្នុង​លក្ខណៈ​ជា​យុទ្ធសាស្ត្រ​ជា​មួយ​សហរដ្ឋអាមេរិក​ដើម្បី​ដោះស្រាយ​បញ្ហានុយ​ក្លេអ៊ែរកូរ៉េខាងជើង។

 
សូម​បញ្ចាក់​ថា ចិន​គឺ​ជា​សម្ពន្ធ័មិត្ត​ដ៏​ជិតស្និទ្ធ​ទាំង​ផ្នែក​សេដ្ឋកិច្ច និង​ការទូត​របស់​របប​ដឹកនាំ​ក្រុង​ព្យុងយ៉ាង។ យ៉ាង​ណា​ក៏​ដោយ ទីក្រុង​ប៉េកាំង​ក៏​បាន​សម្តែង​ការ​ខកចិត្ត​ចំពោះ​អាកប្បកិរិយា​របស់​កូរ៉េខាងជើង​ដែរ​នៅ​ពេល​​ដែល​ប្រទេស​នេះ បាន​សាកល្បង​នុយក្លេអ៊ែរ ជា​លើក​ទី៣​កាល​ពី​ខែកុម្ភៈកន្លងទៅ។

ចិន​បាន​សម្រេច​ចិត្ត​ដ៏កម្រ​មួយ​ក្នុង​ការ​ដាក់​ទណ្ឌកម្ម​ទៅ​លើកូរ៉េខាងជើង​ក្នុង​ក្របខណ្ឌ​នៃ​ទណ្ឌកម្ម​របស់​អង្គការ​សហប្រជាជាតិ ដោយ​បិទ​ខ្ទប់​គណនីយ​ធនាគារ​របស់​ក្រុងព្យុងយ៉ាង។ ប៉ុន្តែ​ក្រុម​អ្នក​តាម​ដាន​បញ្ហា​នេះ​មិន​ជឿ​ថា​ទីក្រុង​ប៉េកាំង​គ្មាន​បំណង​ធ្វើ​ឱ្យ​របប​ដឹកនាំ​កុំម្មុយនិស្ត​កូរ៉េខាងជើង​រលំ​រលាយ​នោះ​ទេ។

យ៉ាង​ណា​ក៏​ដោយ លោក​អូបាម៉ា បាន​កត់​សម្គាល់​ថា ចាប់​តាំង​ពី​ការ​ឡើង​កាន់​តំណែង​របស់​លោក ស៊ី ជីនពីង មក ទីក្រុង​ប៉េកាំង ក៏​ហាក់​បាន​បង្ហាញ​អំពី​ការ​ទទួល​ខុសត្រូវ​ជាង​មុន​ចំពោះ​កិច្ចការ​របស់​ពិភពលោក។ លោកអូបាម៉ា​ដែល​បាន​ជួប​សមភាគី​ចិន លោក ស៊ី ជីនពីង កាល​ពី​ថ្ងៃ​ទី៧ និង​ទី៨ មិថុនា កន្លង​ទៅ​នៅ​កាលីហ្វ័ញ៉ា​នោះ បាន​ពិពណ៌នា​លោក ស៊ី ជីន​ពីង ថា ជា​មេដឹកនាំ​ដែល​អាច​ពង្រឹង​អំណាច​បាន​ឆាប់​រហ័ស​នៅ​ក្នុង​ប្រទេស​ចិន ហើយ​ជា​មនុស្ស​ដែល​មាន​វ័យក្មេង មាន​ថាមពល​មាំមួន និង​ច្បាស់លាស់​ជាង​មេដឹកនាំ​ចិន​មុនៗ។
 

ការ​ដំឡើង​សរសៃក​ដាក់​ចិន​ពី​សំណាក់​លោក អូបាម៉ា បាន​ធ្វើ​ឡើង​ស្រប​ពេល​ដែល​មាន​សេចក្តីរាយការណ៍​ថា បេសកជន​ជាន់ខ្ពស់​របស់កូរ៉េខាងត្បូង​បាន​ចេញដំណើរ​នៅ​ថ្ងៃ​អង្គារ​នេះ​ដើម្បី​ទៅ​ចូល​រួម​ប្រជុំ នៅ​ទីក្រុង​វ៉ាស៊ីនតោន ជា​មួយ​សហរដ្ឋអាមេរិក និង​ជប៉ុន។ កិច្ច​ប្រជុំ​នេះ​បាន​ធ្វើ​ឡើង​តែ២ថ្ងៃ​ប៉ុណ្ណោះ​ក្រោយ​ពី​កូរ៉េខាងជើង បាន​ស្នើ​សុំ​ជួប​ចរចា​ជា​មួយ​សហរដ្ឋអាមេរិក ដើម្បី​និយាយ​ពី​បញ្ហា​នុយក្លេអ៊ែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI