អង្គការ​Walkfree

ប្រជាជន​ក្នុង​ពិភពលោក​ជិត​៣០លាន​នាក់​ធ្លាក់​ខ្លួន​ជា​ទាសករ

កុមារ​ជាច្រើន​នៅ​ឥណ្ឌាកំពុង​រស់នៅ និង​ធ្វើការ​ជាទាសករ
កុមារ​ជាច្រើន​នៅ​ឥណ្ឌាកំពុង​រស់នៅ និង​ធ្វើការ​ជាទាសករ ©cathohumanity

មនុស្ស​ជិត​៣០​លាន​នាក់​កំពុង​រស់នៅ និង​ធ្វើការ​ជា​ទាសករ នៅក្នុង​ពិភពលោក។ អង្គការ​Walk Free ដែល​មាន​ទីតាំង​នៅ​ទីក្រុង​ឡុងដ៍ និង​ដែល​បង្កើត​ឡើង​ដោយ​លោកស្រី​ហ៊ីឡារី គ្លីនតុន និង​មហាសេដ្ឋី ប៊ៀលហ្គេត បាន​បង្ហាញ​យ៉ាងដូច្នេះ នៅក្នុង​របាយការណ៍​មួយ ដែល​ចេញផ្សាយ កាលពី​ល្ងាច​ថ្ងៃ​ព្រហស្បតិ៍ ទី ១៧ តុលា។

ផ្សាយពាណិជ្ជកម្ម

 

នៅក្នុង​ប្រភេទ​របាយការណ៍​ដែល​មិនធ្លាប់​មាន​ពីមុនមក អង្គការ​Walk Free បាន​ផ្តល់​និយមន័យ​ទាសករ​សម័យ​បច្ចេកវិទ្យា និង​ចាត់ចំណាត់​ថ្នាក់​ប្រទេស​ដែល​មាន​មនុស្ស​ធ្លាក់ខ្លួន រស់នៅ​ក្នុង​ទាសភាព។

តាមរបាយការណ៍ អាស៊ី សំបូរ​អ្នករស់នៅក្នុង​ទាសភាព​ច្រើនជាងគេ គឺ​តំណាង​ឲ្យ​​បីភាគបួន នៃ​ទាសករ​សរុប​ក្នុង​ពិភពលោក។ ជាក់ស្តែង ឥណ្ឌា​នាំមុខ ក្នុង​ចំណាត់ថ្នាក់​ប្រទេស​១០​ដែល​សំបូរ​ទាសករ ពោល​គឺ​ឥណ្ឌា​មាន​ទាសករ​ប្រមាណ ១៤​លាននាក់។ ប្រទេស​ចិន​ជាប់​លេខ​ពីរ ដោយ​មាន​ទាសករ​ជាង​២​លាននាក់។ ចំណែក​ប្រទេស​៨​ទៀត ដែល​ស្ថិតនៅក្នុង​ចំណោម​ប្រទេស​ទាំង​១០​សម្បូរ​ទាសករ​ច្រើន​ជាងគេ​មាន​ដូចជា​ប៉ាគីស្ថាន នីហ្សេរីយ៉ា អេត្យូពី រុស្ស៊ី ប្រទេសថៃ សាធារណរដ្ឋ​ប្រជាធិបតេយ្យ​កុងហ្គោ ភូមា និង​បង់ក្លាដែស។ ប្រទេស​ទាំង​១០ មាន​ទាសករ​ប្រមាណ​២២លាន​នាក់ ក្នុង​ចំណោម​ទាសករ​សរុប​២៩លាន ៨សែននាក់។

ទ្វីបអាហ្វ្រិក​នៅ​តែ​ល្បី​ខាង​ជាប់​កំអែល​ទាសភាព។ ឧទាហរណ៍ នៅប្រទេស​ម៉ូរីតានី គេ​នៅ​ឃើញ​មាន​កេរមរតក​ទាសភាព ពោល​គឺ​កូនត្រូវ​ធ្វើ​ជា​ទាសករ បន្ត​ពី​ឪពុកម្តាយ ដោយ​ត្រូវ​ប្រើ​ឲ្យ​ធ្វើការ​បម្រើ​នៅផ្ទះ ឬ​នៅ​ចំការ។

តាម​លោក​Nick Grono អគ្គនាយក​អង្គការ​ Walk Free មាន​មនុស្ស​ជាច្រើន​មាន​ការភ្ញាក់ផ្អើល​នៅពេល​លឺ​និយាយ​ពី​របាយការណ៍​ស្តីពី​ទាសករ ព្រោះ​គេ​បាន​ជឿថា ទាសភាព​បាន​ផុត​រលត់ តាំងពីយូរមកហើយ (នៅ​អាមេរិក នៅ​ដើមសតវត្សរ៍​ទី ១៩)។ ប៉ុន្តែ ក្នុង​ការពិត​ជាក់ស្តែង ទាសភាព​មិន​ទាន់​ផុត​រលត់​ទៅណាទេ គ្រាន់តែ​និយមន័យ​ទាសភាព​បច្ចុប្បន្ន​ខុសពី​អតីតកាល។ ក្នុង​និយមន័យ​របស់ខ្លួន អង្គការ​ Walk Free​ចាត់ចូល​ជនរងគ្រោះ​ដោយ​អំពើជួញដូរមនុស្ស កុមារ​ដែលត្រូវ​គេ​បង្ខំ​ឲ្យធ្វើការ និង​មនុស្ស​ធ្វើការ​ធ្ងន់ធ្ងរ ដើម្បី​ដូរ​នឹង​ប្រាក់ខែ​តិចតួច និង​កុមារ​ដែល​គេប្រើ​នៅក្នុង​សង្រ្គាម ថា មនុស្ស​រស់នៅក្នុង​ទាសភាព៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI