ភ្លើងឆេះព្រៃកំពុងខិតជិតរករដ្ឋធានី ស៊ីដនី
ភ្លើងឆេះព្រៃកំពុងរីករាលដាល នៅក្នុងប្រទេសអូស្ត្រាលី។ នៅប៉ុន្មានថ្ងៃក្រោយ អាកាសធាតុអំណោយផល អ្នកពន្លត់ភ្លើងអូស្ត្រាលីកំពុងចាប់ព្រួយបារម្ភ ពីគ្រោះមហន្តរាយនៃអគ្គិភ័យដែលនឹងអាចធ្ងន់ធ្ងរ នៅសប្តាហ៍ក្រោយ បន្ទាប់ពីអាកាសធាតុក្តៅខុសពីធម្មតា ចាប់មានឡើងវិញ ជាមួយខ្យល់ បក់ ក្នុងល្បឿន ១០០គីឡូម៉ែត្រក្នុងមួយម៉ោង នៅថ្ងៃអាទិត្យទី ២០ តុលា។
ចុះផ្សាយនៅថ្ងៃ៖
រដ្ឋNew South Wales ដែលមានទីក្រុងស៊ីដនី តាំងនៅ ត្រូវបានប្រកាសដាក់ក្នុងស្ថានភាពប្រកាសអាសន្ន ចាប់ពីថ្ងៃអាទិត្យនេះ បន្ទាប់ពីភ្លើងឆេះព្រៃកាន់តែរីករាលដាល នៅឧទ្យានជាតិ Blue mountains។ ការប្រកាសដាក់រដ្ឋក្នុងស្ថានភាពប្រកាសអាសន្ន ជាឱកាសផ្តល់សិទ្ធិដល់អាជ្ញាធរ ជំនាញពន្លត់អគ្គិភ័យ ដែលនឹងមានអំណាចជម្លៀសប្រជាជនចេញពីតំបន់គ្រោះថ្នាក់ និងពិន័យដល់អ្នកដែលបដិសេធចាកចេញពីផ្ទះសម្បែង។ ដើម្បីជៀសវាងការឆេះផ្ទុះធុងឧស្ម័ន អ្នកពន្លត់អគ្គិភ័យនឹងមានសិទ្ធិផងដែរ ក្នុងការកាត់ផ្តាច់ ឧស្ម័ន និងភ្លើង សម្រាប់ទីប្រជុំជន ដែលនឹងប្រឈមនឹងភ្លើងឆេះព្រៃ។
រហូតមកដល់ពេលនេះ ភ្លើងឆេះព្រៃបានបំផ្លាញលំនៅឋានជាង២០០ខ្នង នៅរដ្ឋ New South Wales។ អ្នកឧតុនិយមបានព្យាករអាកាសធាតុឡើងក្តៅខុស ពីធម្មតា ដល់៣០អង្សារសេ និងខ្យល់បក់ខ្លាំង ចាប់ពីថ្ងៃអាទិត្យ។ កត្តាអាកាសធាតុមិនអំណោយផលនេះធ្វើឲ្យគេបារម្ភខ្លាំងថា ភ្លើងឆេះព្រៃបីកន្លែងផ្សេងគ្នា នៅឧទ្យានភ្នំ Blue mountains នឹងអាចរួមគ្នាតែមួយ បង្កទៅជាមហាអគ្គិភ័យ រាលដាលទៅទីប្រជុំជន និងទីក្រុងស៊ីដនី។ ស៊ីដនី ដែលមានប្រជាជនរស់នៅប្រមាណ ៤លាន ៤សែននាក់។
ភ្លើងឆេះព្រៃសឹងកើតមានជាទម្លាប់ នៅរដូវក្តៅ ក្នុងប្រទេសអូស្ត្រាលី ដែលមានចាប់ពីខែធ្នូ ដល់ខែកុម្ភៈ។ ប៉ុន្តែ អាកាសធាតុប្រែប្រួល និងក្តៅខ្លាំង ជាមួយនឹងខ្យល់បក់លឿនចម្លែក បានកើតឡើងឆាប់ មុនពេលកំណត់ ដែលធ្វើឲ្យអាជ្ញាធរពិបាកនឹងគ្រប់គ្រង និងពន្លត់ភ្លើងបានជោគជ័យ។ គួររលឹកដែរថា កាលពីឆ្នាំ ២០០៩ ភ្លើងឆេះព្រៃនៅអូស្ត្រាលី ធ្លាប់ បានសម្លាប់ជីវិតមនុស្ស១៧៣នាក់ និងបំផ្លាញផ្ទះសម្បែងរាប់ម៉ឺនខ្នង ក្នុងរដ្ឋVictoria ដែលស្ថិតនៅភាគខាងត្បូងអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ