ព្រឹត្តិការណ៍អន្តរជាតិប្រចាំថ្ងៃ

ប្រធានាធិបតី​កូរ៉េខាងត្បូង​បដិសេធ​មិន​ធ្វើ​ជំនួប​កំពូល​ជាមួយ​នាយក​រដ្ឋមន្រ្តី​ជប៉ុន

សំឡេង ០៦:៣៩
ប្រធានាធិបតី​កូរ៉េខាងត្បូង (ស្តាំ) និង​លោកនាយករដ្ឋមន្រ្តី​ជប៉ុន (ឆ្វេង) កាលនៅប្រជុំអាស៊ីប៉ាស៊ីហ្វិក​នៅ ឥណ្ឌូណេស៊ី​
ប្រធានាធិបតី​កូរ៉េខាងត្បូង (ស្តាំ) និង​លោកនាយករដ្ឋមន្រ្តី​ជប៉ុន (ឆ្វេង) កាលនៅប្រជុំអាស៊ីប៉ាស៊ីហ្វិក​នៅ ឥណ្ឌូណេស៊ី​ ©REUTERS/Dita Alangkara
ដោយ៖ ឈាង បុប្ផា
៣៤ នាទី

នៅថ្ងៃអង្គារ​ទី ៥​វិច្ឆិកា ប្រទេសជប៉ុន តាមរយៈ​អនុអគ្គលេខាធិការ​រដ្ឋាភិបាល​បាន​សំដែង​ការសោកស្តាយ ខកចិត្ត បន្ទាប់​ពី ​លោកស្រី ប្រធានាធិបតី​កូរ៉េខាងត្បូង ប៉ាក់​ គុនហឺ បាន​បដិសេធ​មិន​ទទួល ធ្វើ​ជំនួបកំពូល​ជាមួយ លោក​ស៊ីនហ្សូ អាបេ។ កាលពីថ្ងៃ​ចន្ទ នៅក្នុងអំឡុង​ទស្សនកិច្ច នៅប្រទេស​អង់គ្លេស លោកស្រីប្រធានាធិបតី​កូរ៉េខាងត្បូង​បាន​និយាយ នៅក្នុង​បទសម្ភាសន៍​មួយ​ជាមួយ​ទូរទស្សន៍​អង់គ្លេស BBC​ថា ជំនួប​កំពូល​ទ្វេភាគី ជប៉ុន កូរ៉េខាងត្បូង​នឹង​ជារឿង​គ្មានប្រយោជន៍។ 

ផ្សាយពាណិជ្ជកម្ម

 

តាមប្រសាសន៍​របស់លោកស្រី ប៉ាក់ គុនហឺ ជំនួប​កំពូល​ជប៉ុន កូរ៉េខាងត្បូង​មិនគួ​កើត​មាន ដរាបណា ជប៉ុន​នៅ​តែប្រកាន់ជំហរ​ប្រវត្តិសាស្រ្ត​របស់ខ្លួន ដោយមិន​ព្រម​សុំទោស និង​មិនព្រម​ទទួលស្គាល់​ឧក្រិដ្ឋកម្ម​សង្រ្គាម​ដែល​ខ្លួន​បាន​ធ្វើ នៅក្នុង​អតីតកាល។ ចាប់តាំងពី​ចូលកាន់តំណែង​ជាប្រធានាធិបតី​កូរ៉េខាងត្បូង លោកស្រី​ប៉ាក់ គុនហឺ​មិនដែល​បាន​ជួប ទល់​មុខ ជាផ្លូវការ ជាមួយ​នាយករដ្ឋមន្រ្តី​ជប៉ុនទេ។ ជប៉ុន​ដែល​ត្រូវការ​កូរ៉េខាងត្បូង​ដើម្បី​ប្រឈម​មុខ​​នឹង​កូរ៉េខាងជើង បាន​ស្នើ​ឲ្យ​មាន​ជំនួប​កំពូល​រវាង​មេដឹកនាំ​ប្រទេស​ទាំងពីរ។ ប៉ុន្តែ នឹង​មិនអាចធ្វើទៅបាន

គួរដឹងថា កូរ៉េខាងត្បូង និង​ជប៉ុន​ធ្លាប់មាន​ប្រវត្តិសាស្រ្ត​ជូរចត់ជាមួយគ្នា ដោយ​កូរ៉េខាងត្បូង​ធ្លាប់រងគ្រោះ​ដោយសារ​អាណានិគមរបស់​ជប៉ុន អស់​ជាង​បីទសវត្សរ៍ គឺ​ពីឆ្នាំ ១៩១០ ដល់​ឆ្នាំ ១៩៤៥ នៅពេល​ជប៉ុន​ចាញ់សង្រ្គាម​លោកលើកទីពីរ។ រហូតមក​ដល់​ពេលនេះ កូរ៉េខាងត្បូង​នៅតែ​ទាមទារ​ឲ្យ​ជប៉ុន​សុំទោស​ចំពោះឧក្រិដ្ឋកម្ម​របស់ទាហានជប៉ុន​ទៅលើ​ប្រជាជន​កូរ៉េ ជាពិសេស ទៅលើ​ស្រ្តី​កូរ៉េ ដែល​ជប៉ុន​បាន​ចាប់យក​ទៅធ្វើ​ជា​ទាសករ​ផ្លូវភេទ​របស់​ទាហាន​ជប៉ុន នៅក្នុង​សម័យ​សង្រ្គាម​លោក​លើក​ទីពីរ។ តាមការប៉ាន់ស្មាន នៅក្នុង​អំឡុង​សង្រ្គាម​លោកលើកទីពីរ ជប៉ុន​បាន​ចាប់បង្ខំ​ស្រ្តីអាស៊ី ​ប្រមាណ ២សែននាក់ ឲ្យ​ធ្វើ​ជានារី​លក់ខ្លួន សម្រាប់​ទាហានជប៉ុន ហើយ​ដែលពួកគេ​ភាគច្រើន​ជា​ស្រ្តីវ័យក្មេង​មក​ពី​ប្រទេស​កូរ៉េ។

រឿងអតីតកាល​ដែល​ប្រទេស​ទាំងពីរ​នៅមិនទាន់​ដោះស្រាយ​ឲ្យចប់​ជ្រះស្រឡះ ហើយ​ដែល​នៅតែ​បន្ត​ធ្វើ​ឲ្យ​កូរ៉េខាងត្បូង និងជប៉ុន នៅមើលមុខគ្នា មិនចំ​រហូតមកដល់សព្វថ្ងៃនេះ។ ថ្វីដ្បិតតែ ជប៉ុន​ធ្លាប់​បាន​សុំទោស​ជាច្រើន​ដង​មកហើយ ​ក៏ធ្លាប់​បាន​សង​ជម្ងឺផ្លូវចិត្ត​ដល់​ស្រ្តី​ជនរងគ្រោះ ដោយសារ​ទាហានជប៉ុន ប៉ុន្តែ ជប៉ុន​មិន​ដែល​បាន​និយាយ​សុំទោស​ចំៗ​ដល់​ស្រ្តីរងគ្រោះ​កូរ៉េខាងត្បូង​ទេ។

តាម​កូរ៉េខាងត្បូង រហូតមកដល់​បច្ចុប្បន្ននេះ ជប៉ុន​នៅតែប្រកាន់​ឥរិយាបថ​ជាតិនិយម មិន​ទទួល​ស្គាល់​ឧក្រិដ្ឋកម្ម​របស់ខ្លួន នៅក្នុង​សម័យ​សង្រ្គាម។ ជាក់ស្តែង កាលពីពេល​ថ្មីៗនេះ មន្រ្តី​ជាន់ខ្ពស់​របស់​រដ្ឋាភិបាល និង​អ្នកនយោបាយ​ជប៉ុន​ទើបតែ​ទៅ គោរព​វិញ្ញាណក្ខន្ធ​សាកសព​ទាហាន​នៅ​វិហារ​យ៉ាស៊ូគូនី ដ៏ចម្រូងចម្រាស។ កូរ៉េខាងត្បូង​តែងតែ​ប្រឆាំង​នឹង​សកម្មភាព​ទៅ​គោរពសព​នៅ​វិហារយ៉ាស៊ូគូនី ព្រោះ​តាម​កូរ៉េខាងត្បូង វិហារនេះ​មាន​កប់​សាកសព​​ទាហាន​ជប៉ុន​ដែល​បាន​ប្រព្រឹត្ត​ឧក្រិដ្ឋកម្ម​ទៅលើ​ប្រជាជន​កូរ៉េខាងត្បូង។

មួយវិញទៀត កូរ៉េខាងត្បូង​អន់ចិត្ត​ខ្លាំងណាស់ដែរ​​នឹង​ជប៉ុន ព្រោះ នៅក្នុង​សៀវភៅសិក្សា​ប្រវត្តិសាស្រ្ត​របស់​ជប៉ុន គេ​មិន​បាន​បង្រៀន​ពី​សកម្មភាព​ឃោឃៅ​របស់​ទាហាន​ជប៉ុន​ទៅលើ​ប្រជាជន​របស់​ប្រទេស​ដទៃទេ។ ផ្ទុយទៅវិញ កូនសិស្ស​ជប៉ុន​បាន​រៀនសូត្រ​តែពី​វីរភាព​ក្លាហាន​របស់​ទាហាន​ជប៉ុន ដែល​បាន​បូជាជីវិត​សម្រាប់​ប្រទេសជាតិ នៅសម័យ​សង្រ្គាម​លោកលើក​ទីពីរ។

ដំបៅ​ឈឺចាប់​ដោយសារ​អាណានិគម​របស់ជប៉ុន​បាន​លេចឡើង​ម្តងទៀត នៅក្នុង​ចំណោម​ប្រជាជន​កូរ៉េខាងត្បូង នៅពេល​ដែល​ជប៉ុន​បាន​ទាមទារ​ដីកោះ ដុកដូ ដែល​កូរ៉េខាងត្បូង​បាន​ទទួល​សិទ្ធិ​កាន់កាប់ នៅក្រោយ​សង្រ្គាម​លោកលើកទីពីរ ប៉ុន្តែ ជប៉ុន​នៅតែ​ទាមទារ​ថា ជាទឹកដី​របស់ខ្លួន។ តាមកូរ៉េខាងត្បូង ការទាមទារ​របស់​ជប៉ុន បាន​បង្ហាញ​យ៉ាង​ច្បាស់​ក្រឡែត​អាណានិគម​​ផ្តាច់ការ​​របស់​ជប៉ុន ក្នុង​សម័យ​សង្រ្គាម។

នៅក្នុង​ជម្លោះ​ដណ្តើមកោះ​ជាមួយជប៉ុន លោកស្រី ប្រធានាធិបតី​ប៉ាក់ គុនហឺ ធ្លាប់បាន​ប្រកាស​ នៅក្នុង​ពិធី​ចូលកាន់តំណែងរបស់លោកស្រី ហើយថា លោកស្រី​នឹង​បន្ត​នយោបាយ​បន្ត​ពី​ប្រធានាធិបតី​មុន គឺ​ស្វះស្វែងរកការផ្សះផ្សារ កិច្ចសហប្រតិបត្តិការ និង​សន្តិភាព នៅ​សមុទ្រចិនខាងកើត ក៏ប៉ុន្តែ ស្ថិរភាព និង​ការជឿទុកចិត្ត​គ្នា ត្រូវតែ​ឈរ​ទៅលើ​មូលដ្ឋាន​ត្រឹមត្រូវ​នៃ​ប្រវត្តិសាស្រ្ត។

តាម​អនុអគ្គលេខាធិការ​រដ្ឋាភិបាល​ជប៉ុន កូរ៉េខាងត្បូង​ជា​ប្រទេស​ជិតខាង​ដ៏​សំខាន់ ដែល​មាន​ផលប្រយោជន៍​រួម ជាមួយ​ជប៉ុន។ ជប៉ុន​នឹង​បន្ត​កិច្ចប្រឹងប្រែង​ដើម្បី​ស្វែងរក​ការសហការ​ជាមួយ​កូរ៉េខាងត្បូង។ នាយករដ្ឋមន្រ្តី​ជប៉ុន Shinzo Abe ត្រូវការ​ជួប​ប្រជុំ​កំពូល​ជាមួយ​លោកស្រី ប្រធានាធិបតី​កូរ៉េខាងត្បូង ក៏​ដើម្បី​ដោះស្រាយ​បញ្ហា​ដែរ។

ភាពតានតឹង​រវាង​ប្រទេស​ទាំងពីរ​ក៏ធ្វើ​ឲ្យ​អាមេរិក ​ព្រួយបារម្ភ​មិនតិច​ដែរ។ អាមេរិក​ដែល​កំពុង​បែរនយោបាយ យុទ្ធសាស្រ្ត​យោធា​ទៅ​អាស៊ី​ដើម្បីទប់ទល់​នឹង​ការពង្រីក​ឥទ្ធិពល​របស់​ចិន បាន​សង្ឃឹម​ទុកចិត្ត​លើ​សម្ព័ន្ធមិត្ត​កូរ៉េខាងត្បូង និង​ជប៉ុន។

អាមេរិក​ចាប់បារម្ភ តាំងពី​ចុងឆ្នាំមុនម្ល៉េះ ពីជម្លោះដែល​អាច​កើតមាន​រវាង​ប្រទេស​សម្ព័ន្ធមិត្ត​ទាំងពីរ​របស់ខ្លួន។ ពោល គឺ​នៅពេល​កូរ៉េខាងត្បូង​បាន​ធ្លាក់​ក្រោម​ការដឹកនាំ​របស់​គណបក្ស​អភិរក្សនិយម ចំណែក​ជប៉ុន​ក៏​បាន​បោះឆ្នោត​ឲ្យ​លោក​Shinzo Abe ដែល​ជាអ្នកអភិរក្សនិយម និង​ជាតិនិយម ឲ្យ​ឡើង​ធ្វើ​ជានាយករដ្ឋមន្រ្តីជប៉ុន។ អ្នកនយោបាយ​អភិរក្សនិយម ឡើង​កាន់កាប់​ប្រទេស ធ្វើ​ឲ្យ​គេ​ខ្លាចថា ជម្លោះ​រវាង​កូរ៉េខាងត្បូង និង​ជប៉ុន នឹង​កាន់តែមាន​ភាពតឹងតែង​ខ្លាំងឡើង​ថែមទៀត។ ឥលូវនេះ ជម្លោះ​នេះ​ពិតជាមានមែន នឹង​កាន់តែតឹងតែង ដោយសារ​ជំហរ​របស់លោកស្រី​ប្រធានាធិបតី​កូរ៉េខាងត្បូង ដែល​មិន​ចង់​ធ្វើជំនួបកំពូល​ជាមួយ​ជប៉ុន។

រហូតមក​ដល់​ពេលនេះ អាមេរិក​ខំប្រឹង​​បញ្ចុះបញ្ចូល​ឲ្យ​ជប៉ុន និង​កូរ៉េខាងត្បូង ឲ្យ​ធ្វើការរួមគ្នា ព្រោះពួកគេ​មាន​សត្រូវ​រួមគ្នា តែមួយ គឺ​អាវុធនុយក្លេអ៊ែរ​របស់កូរ៉េខាងជើង។ ក្នុង​យុទ្ធសាស្ត្រ​យោធា កូរ៉េខាងត្បូង​យល់ព្រម​ធ្វើ​សមយុទ្ធ​ជាមួយ​ជប៉ុន ក្រោមការដឹកនាំ​របស់​អាមេរិក។ ប៉ុន្តែ នៅក្នុង​ផ្នែកនយោបាយ​ការទូតវិញ ទាំងអស់គ្នា​សង្ឃឹមថា បើសិន​ជា​ជំនួប​កំពូល​ទ្វេភាគីរវាង កូរ៉េខាងត្បូង និង​ជប៉ុន ពិតជាកើតមានមែន នោះ​វានឹងក្លាយ​ជាសញ្ញា​នៃការរួបរួមគ្នា​តែមួយ ដើម្បី​ប្រឈមយ៉ាង​មាន​ប្រសិទ្ធិភាព​​នឹង​កូរ៉េខាងជើង៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI