អាមេរិក-ម៉ាឡេស៊ី

អាមេរិក​ពង្រីក​ដែន​រុករក​យន្តហោះ​ម៉ាឡេស៊ី​បាត់ខ្លួន ទៅក្នុង​មហាសមុទ្រ​ឥណ្ឌា

នាវាចម្បាំង​របស់​អាមេរិក USS Kidd and USS Pinckney នៅក្នុង​មហាសមុទ្រ​ប៉ាស៊ីហ្វិក ដែល​ត្រូវ​ចេញ​ទៅ​រុករក​យន្តហោះ​បាត់ខ្លួន​របស់​ក្រុមហ៊ុន​ម៉ាឡេស៊ី​អ៊ែរឡាញ​នៅ​មហាសមុទ្រ​ឥណ្ឌា
នាវាចម្បាំង​របស់​អាមេរិក USS Kidd and USS Pinckney នៅក្នុង​មហាសមុទ្រ​ប៉ាស៊ីហ្វិក ដែល​ត្រូវ​ចេញ​ទៅ​រុករក​យន្តហោះ​បាត់ខ្លួន​របស់​ក្រុមហ៊ុន​ម៉ាឡេស៊ី​អ៊ែរឡាញ​នៅ​មហាសមុទ្រ​ឥណ្ឌា ©REUTERS/US Navy/Seaman Apprentice Carla Ocampo

៧​ថ្ងៃ​មកហើយ យន្តហោះ​ប៊ូអ៊ីង ៧៧៧ របស់​ក្រុមហ៊ុន​ម៉ាឡេស៊ី បាន​បាត់ខ្លួន គ្មាន​ដំណឹង។ កាលពី​ថ្ងៃ​ម្សិលមិញ អាជ្ញាធរ​ម៉ាឡេស៊ី​ទើប​បញ្ជាក់ថា វត្ថុ​ក្នុង​រូបភាព​ដែល​ផ្កាយរណប​ថត នោះ មិនមែន​ជា​បំណែក​របស់​យន្តហោះ​ប៊ូអ៊ីង​៧៧៧ទេ។ នៅ​ថ្ងៃ​នេះវិញ ​សេតវិមាន​បញ្ជាក់​ថា ការរុករក​បាន​​​ពង្រីក​ចូល​ទៅដល់​មហាសមុទ្រ​ឥណ្ឌា បន្ទាប់​ពី ដំណឹង​ចុងក្រោយ​បង្ហាញ​ថា យន្តហោះ​របស់​ក្រុមហ៊ុន​ម៉ាឡេស៊ី​បាន​ហោះហើរ​បន្ត​រយៈពេល​៤​ម៉ោង បន្ទាប់​ពី​បាត់សញ្ញា​ពី​រ៉ាដា​របស់​ម៉ាឡេស៊ី។ ដំណឹង​បញ្ច្រាស​ទិស​គ្នា នៅប៉ុន្មានថ្ងៃនេះ ស្តីពី​ការរកឃើញ​យន្តហោះ បានធ្វើ​ឲ្យ​ក្តីសង្ឃឹម​មាន​កាន់​តិច​សម្រាប់​ក្រុមគ្រួសារ​របស់​អ្នកធ្វើដំណើរ ដែល​នៅជាប់​ក្នុង​យន្តហោះ

ផ្សាយពាណិជ្ជកម្ម

 

ដំណឹង​ស្តីពី​ការរុករក​យន្តហោះ​ម៉ាឡេស៊ី​បាត់ខ្លួន នៅ​មហាសមុទ្រ​ឥណ្ឌា ត្រូវ​បាន​សេតវិមាន​បញ្ជាក់​ឲ្យ​ដឹង កាលពី​ថ្ងៃ​ព្រហស្បតិ៍​ម្សិលមិញ។ ​អ្នកទទួលខុសត្រូវ​ម្នាក់​របស់​កងទ័ព​ជើងទឹក​អាមេរិក ដែល​សុំ​មិន​បញ្ចេញឈ្មោះ បាននិយាយថា នាវា មួយគ្រឿង និង​យន្តហោះ​មួយ​គ្រឿង​របស់​អាមេរិក​បាន​ចេញ​ដំណើរ រួចហើយ ទៅ​កាន់​មហាសមុទ្រ​ឥណ្ឌា ជា​ទី​ដែល​ផ្កាយរណប​របស់​ក្រុមហ៊ុន​ប៊ូអ៊ីង​ចាប់​បាន​សញ្ញាចុងក្រោយ​របស់​យន្តហោះ​ប៊ូអ៊ីង​៧៧៧។

នៅប៉ុន្មាន​ថ្ងៃ​នេះ ប្រព័ន្ធផ្សព្វផ្សាយ​អាមេរិក បាន​ដកស្រង់​សំដី​របស់​មន្រ្តីជាន់ខ្ពស់​អាមេរិក​ដែល​ថា យន្តហោះ ប៊ូអ៊ីង​របស់​ក្រុមហ៊ុន​ម៉ាឡេស៊ី អ៊ែរឡាញ នៅ​បន្ត​ហោះហើរ​រយៈពេល​ជាច្រើន​ម៉ោងទៀត បន្ទាប់​ពី​បាត់ខ្លួន​ពី​រ៉ាដា របស់​រដ្ឋាភិបាល​ម៉ាឡេស៊ី។ តាម​មន្រ្តីអាមេរិក ក្នុង​ពេល​បាត់​សញ្ញា​ពី​រ៉ាដា ប្រព័ន្ធ​ផ្តល់​ព័ត៌មាន​ជា​ស្វ័យប្រវត្តិ​របស់​យន្តហោះ បាន​ព្យាយាម​ចាប់ ទាក់ទង ទៅ​ផ្កាយរណប​ដែល​នៅ​ក្បែរ​ខ្លួន។

តាមទីភ្នាក់ងារ​ព័ត៌មាន​អាមេរិក AP សញ្ញា​ចេញ​ពី​យន្តហោះ​ម៉ាឡេស៊ី​បាត់ខ្លួន ត្រូវ​បាន​ក្រុមហ៊ុន​ប៊ូអ៊ីង​ថតទុក​បាន។ ក្រុមហ៊ុន​ប៊ូអ៊ីង​តែងតែ​ប្រើប្រាស់​កម្មវិធី​ផ្កាយរណប របស់ខ្លួន ដើម្បី​តាមដាន​ថតទុក​ទិន្នន័យ​ស្តីពី​ដំណើរការ​ល្អ​របស់​យន្តហោះ​ក្នុងពេល​ហោះហើរ។ មាន​ន័យថា រាល់យន្តហោះ​ប៊ូអ៊ីង​តែងតែ​ផ្តល់​សញ្ញា​ជា​ស្វ័យប្រវត្តិ​ទៅ​ឲ្យ​ផ្កាយរណប​របស់​ម្ចាស់​ផលិត​របស់វា គឺ​ក្រុមហ៊ុន​ប៊ូអ៊ីង។ អ្នកជំនាញ​បាន​ពន្យល់​តាមបែបសាមញ្ញថា យន្តហោះ​គឺ​ប្រៀបបាន​នឹង​ទូរស័ព្ទ​មួយ​ដែល​​ត្រូវ​គេ​បិទ​ចោល ប៉ុន្តែ ទូរស័ព្ទ​នៅតែ​អាច​ផ្តល់​សញ្ញា​ទីតាំង​របស់​វា ទៅ​បណ្តាញ​ទូរស័ព្ទ។

ដោយពឹងផ្អែក​លើ​ព័ត៌មាន​ខាងលើ ការរុករក​យន្តហោះ​បាត់ខ្លួន​ត្រូវ​ពង្រីក ចូល​ទៅដល់​មហា​សមុទ្រ​ឥណ្ឌា ជាទី​ដែល​យន្តហោះ​ប៊ូអ៊ីង​ផ្តល់​សញ្ញា​ចុងក្រោយ។ ការរុករក​នៅក្នុង​​មហាសមុទ្រ​ឥណ្ឌា​នឹង​ត្រូវការ​ពេលវេលា​កាន់តែច្រើន ព្រោះថា មហាសមុទ្រ​ឥណ្ឌា ដែល​ជា​មហាសមុទ្រ​ធំទីបី​ក្នុងពិភពលោក មាន​ជម្រៅទឹក​៣៩០០​ម៉ែត្រ គឺ​ជ្រៅ​ជាង​សមុទ្រ​ចិន​ខាង​ត្បូង ដែល​ប្រទេស​ចំនួន ១២​ដូចជា​ចិន អាមេរិក និង​ជប៉ុន​បាន​ចូលរួម​រុករក អស់​រយៈពេល ៧​ថ្ងៃ​មកហើយ និង​គ្មាន​ផ្តល់​លទ្ធផល​អ្វីនោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI