ចិន-ផ្សារភាគហ៊ុន

ផ្សារ​ភាគហ៊ុន​ចិន​ដាំ​ក្បាល​ចុះ ​អូស​ដោយ ​ទូទាំង​អាស៊ី

តារាង​តម្លៃ​នៅផ្សារ​ភាគហ៊ុន ក្រុង​សៀងហៃ ដែលបាន​ធ្កាក់ថ្លៃ​ យ៉ាង​គំហុក ចំនួន ៨,៥% នៅ​ថ្ងៃ​ចន្ទ​ ទី ២៤ សីហា ២០១៥
តារាង​តម្លៃ​នៅផ្សារ​ភាគហ៊ុន ក្រុង​សៀងហៃ ដែលបាន​ធ្កាក់ថ្លៃ​ យ៉ាង​គំហុក ចំនួន ៨,៥% នៅ​ថ្ងៃ​ចន្ទ​ ទី ២៤ សីហា ២០១៥ REUTERS/Aly Song

នៅ​ថ្ងៃ​ចន្ទ​ទី​ ២៤ ​សីហា ​អាច​ចាត់​ទុក​ថា​ជា​ថ្ងៃ​ ដ៏​ខ្មៅ​ងងឹត​ សម្រាប់​ទីផ្សារ​ភាគ​ហ៊ុន​ចិន​ និង​នៅ​អាស៊ី​ទាំងមូល។ ផ្សារ​ភាគហ៊ុន​ក្រុង​សៀងហៃ ​បាន​ដាំក្បាល​ចុះ​ ដល់​ទៅ​ ៨,៥% ​ដែល​នេះ​ គឺ​ជា​ការ​ធ្លាក់​ថ្លៃ ​ដ៏​ច្រើន​បំផុត​ មិន​ធ្លាប់​មាន ​ចាប់​តាំង​ពី​ឆ្នាំ​២០០៧។ ដូច​គ្នា​នេះ ​ដែរ​ ផ្សារ​ភាគហ៊ុន ​នៅ​ហុងកុង ​តៃវ៉ាន់ ​និង​ជប៉ុន ​ក៏​បាន​បន្ត​ធ្លាក់​ថ្លៃ ​យ៉ាង​គំហុក ​ធ្វើឲ្យ​អ្នក​វិនិយោគទុន​ទាំង​អស់​ មាន​ការ​ព្រួយ​បារម្ភ​ ខ្លាច​ទ្វីប​អាស៊ី​ ត្រូវ​ធ្លាក់​ទៅ​ក្នុង​វិបត្តិ​សេដ្ឋកិច្ច ​ដូច​កាល​ពី​ឆ្នាំ​៩៧​-​៩៨។

ផ្សាយពាណិជ្ជកម្ម

សម្រាប់​អ្នក​វិភាគ​ទីផ្សារ​នៅ​អឺរ៉ុប ​គ្រាន់តែ​បើក​ភ្នែក​ឡើង ​ឃើញ​តួលេខ​ទីផ្សារ​ភាគ​ហ៊ុន​នៅ​អាស៊ី ​គឺ​នាំ​គ្នា​ភ័យ​តែម្តង ដោយសារ​គេ​ខ្លាច​ថា ​វិបត្តិ​សេដ្ឋកិច្ច​នៅ​អាស៊ី ​នឹង​អាច​កើត​ឡើង​ សា​ជា​ថ្មី ​ ដោយ​ចៀស​​មិន​រួច​ ដូច​កាល​​ពីឆ្នាំ​៩៧-៩៨។ នៅ​ថ្ងៃ​ចន្ទ​ទី ​២៤ ​សីហា​នេះ ​​ផ្សារ​ភាគហ៊ុន​ក្រុង​សៀងហៃ ​បាន​ធ្លាក់​ថ្លៃ​ដល់​ទៅ​៨,៥​%​ ដែល​ការ​ធ្លាក់​ចុះ ​ក្នុង​កំរិត​ខ្ពស់​បែប​នេះ ​មិន​ធ្លាប់​មាន​ទេ​​តាំង​ពីឆ្នាំ​២០០៧ ​មក​ ពោល​គឺ​មុន​ពេល​ មាន​វិបត្តិ​សេដ្ឋកិច្ច​​​ពិភពលោក។

 
ផ្សារភាគ​ហ៊ុន​ចិន​បាក់ស្រុត ​ រញ្ជួយ​ទូទាំង​អាស៊ី៖
តាម​ពិត​ទៅ ​ទៅ​ផ្សារ​ភាគហ៊ុន​ចិន​ បាន​បន្ត​ធ្លាក់​ថ្លៃ ​ជាង​ពីរ​ខែ​មក​ហើយ ​ដោយ​កាល​ពី​ដើម​ខែ​វិច្ឆិកា ​ម្ចាស់​ភាគហ៊ុន នៅ​ផ្សារ​ភាគហ៊ុន​ក្រុង​សៀងហៃ ​ខាត​ប្រាក់​ចំណេញ​ដល់​ទៅ ​៣០០ម៉ឺន​លាន​ដុល្លារ​ឯណោះ។ សម្រាប់​ការ​ធ្លាក់​ថ្លៃ​ នា​ពេល​នេះ ​លុយ​ដែល​ចំណេញ​ទាំង​ប៉ុន្មាន ​ក្នុង​ឆ្នាំ​២០១៤​កន្លង​ទៅ ​គឺ​រលាយ​ដូច​អំបិល​ត្រូវ​ទឹក។ ដូច​គ្នា​នឹង​ផ្សារ​សៀងហៃ ​ផ្សារ​ភាគ​ហ៊ុន​ក្រុង​ឈិនចិន ​ជា​ផ្សារ​ធំ​លំដាប់​ទី​ពីរ ​បាន​ខាត​តម្លៃ ​ចំនួន​ ៧,៦% ​នៅ​ពេល​បិទ​ទ្វារ ​ថ្ងៃ​ចន្ទ​នេះ។ ការ​ដាំ​ក្បាល​ចុះ​ នៃ​ទីផ្សារ​ភាគ​ហ៊ុន ​របស់​ចិន ​ បាន​រាល​ដាល​ទូទាំង​ទីផ្សារ​ភាគ​ហ៊ុន​ធំៗ ​របស់​អាស៊ី ​ដូច​ជា​ហុងកុង​ តៃវ៉ាន់ ​និង​ជប៉ុន​ជាដើម។

ផ្សារ​ហ៊ុន​ហុងកុង ​ធ្លាក់ថ្លៃ​ចំនួន ៥%  ​ឯ​តៃវ៉ាន់វិញ ​ខាត​ដល់​ទៅ​ ៧,៤៦%។ ចំណែក​ផ្សារ​ហ៊ុន​ជប៉ុន​ ក៏​ធា្លក់​​ចំនួន ៤,៦១%​ផង​ដែរ ​ស្រប​ពេល​ដែល​មាន​ការ​ប៉ះពាល់​បន្តិច​បន្តួច​ ដល់​ផ្សារ​ហ៊ុន ​ក្រុង​ស៊ីដនី ​ចំនួន​ ២,៩% ​និង​ផ្សារ​ហ៊ុន​កូរ៉េ​ ចំនួន​១,៨៨%។ ការ​រាលដាល​នេះ ​មិនមែន​មាន​ត្រឹមតែ​នៅ​អាស៊ី​ទេ ​សូម្បី​តែ​ផ្សារ​ហ៊ុន​នៅ​អឺរ៉ុប ​ក៏​រញ្ជួយ​ផង​ដែរ ​ដោយ​នៅ​ពេល​បើក​ទ្វារ​ផ្សារ​ព្រឹក​ថ្ងៃ​ចន្ទ​ នេះ ​គឺ​ផ្សារ​CAC40​ របស់​បារាំង​ ផ្សារ​ហ៊ុន​ក្រុងឡុងដ៍​ និង​ក្រុង​ហ្វ្រង់ហ្វដ ​របស់​អាល្លឺម៉ង់​ ម្នាក់ៗ ​សុទ្ធតែ​ខាត​ជាង ​៣%។

តួលេខ​ទាំង​អម្បាលម៉ាណ​នេះ ​គឺ​ជា​តម្លៃ​ភាគហ៊ុន​វិនិយោគ។ ប៉ុន្តែ​ការ​ធ្លាក់​ថ្លៃ​នេះ ​ក៏​បាន​ផ្តល់​ផល​ប៉ះ​ពាល់​ ដល់​តម្លៃ​​វត្ថុ​ធាតុ​ដើម​ធំៗ ​នៅ​លើ​ទីផ្សារ​អន្តរជាតិ​ផង​ដែរ ​ដូច​ជា​តម្លៃ​ប្រេង ​តម្លៃ​ស្ពាន់ ​និង​តម្លែ​មាស​ជា​ដើម។ ប្រេងឆៅ ​បាន​ធ្លាក់​​មក​នៅ​ត្រឹម​តែ ​៤០ដុល្លារ​ប៉ុណ្ណោះ ​ក្នុង​មួយ​ធុង​បារីស។ ស្ពាន់ ដែល​ជា​វត្ថុ​ធាតុដើម​ លំដាប់​ទីមួយ​ សម្រាប់​​ឧស្សាហកម្ម ​បាន​ធ្លាក់​តម្លៃ​ខ្លាំង ​ហើយ​តម្លែ​មាស​វិញ ​មួយ​តំឡឹង​សល់​តែ​ ប្រមាណ​ជា ១១៥០​ដុល្លារ​តែ​ប៉ុណ្ណោះ។

សេដ្ឋកិច្ច​ចិន​ដាំ​ក្បាល  ​រដ្ឋាភិបាល​គ្មាន​ដំណោះ​ស្រាយ៖

អ្នក​លេង​ភាគហ៊ុន​នៅចិន កំពុង​អង្កូយ​ផ្ទៀង តារាង​តម្លៃភាគហ៊ុន នៅ​ផ្សារ​សៀងហៃ
អ្នក​លេង​ភាគហ៊ុន​នៅចិន កំពុង​អង្កូយ​ផ្ទៀង តារាង​តម្លៃភាគហ៊ុន នៅ​ផ្សារ​សៀងហៃ REUTERS/Stringer

សេដ្ឋកិច្ច​ចិន ​ក្នុង​ឆ្នាំ​២០១៤ ​និង​ ២០១៥ ​នេះ ​មាន​កំណើន​តិច​ខ្លាំង​ណាស់ ​បើ​ប្រៀបធៀប​ ទៅ​នឹង​តួលេខ​ឆ្នាំ​មុនៗ។ ​ភាព​នៅ​នឹង​ថ្កល់​របស់​សេដ្ឋកិច្ច​ចិន​នេះ ​គឺ​វា​ជា​កត្តា​ដែល​ធ្វើ​អ្នក​វិនិយោគ ​ដែល​ជា​ម្ចាស់ហ៊ុន​នៅ​តាម​ទីផ្សារ​​ហ៊ុន​​នានា​ហ្នឹង ​មាន​ការ​មិន​ទុក​ចិត្ត។ នេះ​ជា​ចំណុច​ទីមួយ។ ចំណុច​មួយ​ទៀត ​គឺ​ថា​ផ្សារ​ហ៊ុន​នៅ​ចិន​មាន​លក្ខណៈ​ផុយ​ស្រួយ​​ណាស់ ​បើ​ប្រៀបធៀប​ទៅ​ហ្នឹង​ទីផ្សារ​ហ៊ុន​ផ្សេងៗ ​នៅ​អឺរ៉ុប ​និង​នៅ​អាមេរិក។ ផុយ​ស្រួយ​យ៉ាង​ម៉េច ​ គឺ​ថា ​ អ្នក​វិនិយោគ​ចិន​ភាគ​ច្រើន ​ដែល​ទិញ​ដូរ​ភាគ​ហ៊ុន ​គឺ​ជា​ឯកជន ​បុគ្គល​សាមញ្ញ​ ដែល​ម្នាក់​លក់​ចេញ ​ទិញ​ចូល​ដោយ​បង្វិល​ប្រាក់​កម្ចី ជាមួយ​នឹង​អ្នក​គួកជេ។ ដូច្នេះ ​ពេល​មាន​ការ​អី​ភ្លាម​ គឺ​ឆាប់​ផ្អើល ​ចលាចល ​ធ្វើឲ្យ​ទីផ្សារ​មាន​ភាព​មិន​នឹងនរ។

មួយទៀត​ ​ក្នុង​រវាង​មួយ​ឆ្នាំ​កន្លង​មក​នេះ ​ផ្សារ​ហ៊ុន​ក្រុង​សៀងហៃ ​ឡើង​ប៉ោង ​ដល់​ទៅ​១៥០%។ ឡើង​ប៉ោង​យ៉ាង​ម៉េច ​គឺ​មាន​ន័យ​ថា ​តម្លែ​ភាគហ៊ុន ​វា​បាន​ឡើងថ្លៃ ​ខុស​ពី​តថៈភាព​ជាក់​ស្តែង ​នៃ​ដំណើរ​សេដ្ឋកិច្ច។ មាន​ន័យ​ថា ​អ្នក​គួកជេ ​ចេះ​តែ​បំប៉ោង​តម្លៃៗ ​ខុស​ពី​ភាព​ជាក់​ស្តែង ​ដែល​តាម​ការ​ពិត ​សេដ្ឋកិច្ច​កំពុង​តែ​ជួប​វិបត្តិ។ ទើប​តែ​ឥឡូវ​ម្នាក់ៗ​នាំគ្នា​ភ័យ ​ពួក​អ្នក​គួក​ជេ ​​នាំ​គ្នា​លក់​ចេញ​ទាំង​ខាត ​ធ្វើ​ឲ្យ​មាន​ចលាចល​ ពេញ​ហ្នឹង​តែ​ម្តង។

ចិន​នឹង​ត្រូវ​ទម្លាក់​តម្លៃ​ប្រាក់​យាន់៖

អត្រាតម្លៃប្រាក់យាន់ របស់ចិន ប្រហែលជា​អាច​ត្រូវ​ទម្លាក់​ចុះ ដើម្បី​ជំរុញ​ការនាំ​ចេញ
អត្រាតម្លៃប្រាក់យាន់ របស់ចិន ប្រហែលជា​អាច​ត្រូវ​ទម្លាក់​ចុះ ដើម្បី​ជំរុញ​ការនាំ​ចេញ

កាល​ពី​ខែ​មុន ​រដ្ឋាភិបាល​ចិន ​ បាន​ចាក់​បញ្ចូល​សាច់​ប្រាក់​ ទៅ​ក្នុង​ទីផ្សារ ​ហើយ​បាន​ស្នើរ​ឲ្យ​ក្រុម​ហ៊ុន​រដ្ឋ​ធំៗ​ ប្រមូល​ទិញ​ហ៊ុន​តូចៗ ​ដើម្បី​រក្សា​លំនឹង​ទីផ្សារ។ បន្ថែម​ពី​នេះ ​ចិន​បាន ​ទាំង​បន្ថយ​តម្លៃ​ប្រាក់​យាន់ ​ដើម្បី​បន្ថយ​តម្លៃ​ផលិតកម្ម​​ក្នុង​ស្រុក ​ហើយ​ជំរុញ​ការ​នាំ​ចេញ​ទៅ​ក្រៅ ​ព្រោះ​តែ​កាល​ណា ​លុយ​ក្នុង​ស្រុក​ថោក ​មាន​ន័យ​ថា ​អ្នក​នាំ​ចេញ​ បាន​ចំណេញ​ច្រើន។ បន្តែ​ដូច​យើង​ឃើញ​ស្រាប់​ថា ​ វិធានការ​ទាំង​អស់​នេះ ​មិន​បាន​ពង្រឹង​ ទីផ្សារ​ហ៊ុន​ទេ ​ផ្ទុយ​ទៅ​វិញ ​គឺ​វា​កាន់តែ​​ បង្ក​ឲ្យ​មាន​ភាព​ចលាចល ​នៅ​លើ​ទីផ្សារ។

កាល​ពីថ្ងៃ​ ចុង​សប្តាហ៍​មុន​នេះ ​គេ​នឹក​ស្មាន​ថា ​រដ្ឋាភិបាល​ចិន​ ដាក់​វិធានការ​ថ្មី ​ដោយ​ឲ្យ​ធនាគារ​កណ្តាល​ចិន ​ដោះលែង​ប្រាក់​តំកល់​ មួយ​ចំនួន ​ដើម្បី​យក​ទៅ​បំរុង​ ក្នុង​ទីផ្សារ ​ដែល​កំពុង​តែ​ខ្វះ​សាច់​ប្រាក់​ តែ​ទី​បំផុត ​អត់​មាន​នរណា​កំរើក​ សោះ ​ហើយ​ស្ថានការណ៍​ ក៏​កាន់តែ​ធ្ងន់ធ្ងរ​បែប​នេះ។ តាម​ការ​ស្មាន ​រដ្ឋាភិបាល​ចិន​ ប្រហែល​ជា​ត្រូវ​បន្ថយ​តំលៃ​ប្រាក់​យាន់ ​បន្ថែម​ទៀត​ហើយ​ ដើម្បី​ផ្តល់​សន្ទុះ​ ដល់​ការ​នាំ​ចេញ ​និង​ការ​វិនិយោគ។

ផល​ប៉ះពាល់​ ដល់​សេដ្ឋកិច្ច​កម្ពុជា៖
ស្ថិត​ក្នុង​ប្រព័ន្ធ​សេដ្ឋកិច្ច​ទីផ្សារ​សកល​ភាវូបនីយកម្ម​ កម្ពុជា​ប្រាដក​ជា​រង​ផល​ប៉ះពាល់​  ​ដោយ​ចៀស​មិនរួច ​ដោយ​សារ​តែ​វិបត្តិ​សេដ្ឋកិច្ច​ចិន។ មិន​ថា​តែ​កម្ពុជា​ទេ ​ទ្វីប​អាស៊ី ​ទាំង​មូល ​និង​សេដ្ឋកិច្ច​ពិភពលោក​ទាំង​មូល ​កំពុង​ជួប​ភាព​មិន​ប្រាកដ​ប្រជា។ កុំភ្លេច​ថា ​ចិន​ជា​មហា​អំណាច​សេដ្ឋកិច្ច​ពិភពលោក ​លំដាប់​ទី២។ អ្វី​ដែល​អ្នក​វិនិយោគ​ព្រួយ​បារម្ភ​ គឺ​ប្រព័ន្ធ​សេដ្ឋកិច្ច​ចិន ​​កំពុង​តែ​ដើរ​ដល់​ទី​បញ្ចប់​ហើយ។ ឆ្លង​កាត់​ការ​ដាំក្បាល​កន្លង​មក​នេះ ​បង្ហាញ​ថា ​កំណែ​ទម្រង់​របស់​រដ្ឋាភិបាល​ចិន ​នៅ​មិន​ទាន់​ឆ្លើយតប​ ទៅ​នឹង​តថៈភាព​ជាក់​ស្តែង​  ​ដែល​សេដ្ឋកិច្ច​ចិន​ត្រូវ​ការ​នោះ​ទេ។
 

ទិដ្ឋភាព​ក្នុង​រោង​ចក្រ​កាត់ដែរ​ នៅកម្ពុជា
ទិដ្ឋភាព​ក្នុង​រោង​ចក្រ​កាត់ដែរ​ នៅកម្ពុជា Getty Images/Brent Lewin

សម្រាប់​សេដ្ឋកិច្ច​កម្ពុជា ​យើង ​ដូច​យើង​ដឹង​ស្រាប់​ គឺ​រំពឹង​សឹង​តែ​ទាំង​ស្រុង ​ទៅ​លើ​ការ​វិនិយោគ ​ពី​បរទេស ​ដែល​ភាគ​ច្រើន ​គឺ​ក្រុមហ៊ុន​វិនិយោគ​ចិន​ និង ​កូរ៉េ។ ជាក់​ស្តែង​វិស័យ​វាយនភណ្ឌ ​រោង​ចក្រ​កាត់​ដេរ​ ដែល​បាន​ផ្តល់​ការងារ​ ​ដល់​កម្មករ​ កម្មការី ​រាប់​សែន​នាក់​ទូទាំង​ប្រទេស។ ផលិត​ផល​ដែល​ផលិត​នៅ​កម្ពុជា​យើង ​ដោយ​រោងចក្រ​ទាំង​នោះ គឺ​ចិន​​នាំ​ចេញ​ទៅ​លក់ ​នៅ​ក្រៅ​បន្ត​ទៀត។ ដូច្នេះ​បើ​សេដ្ឋកិច្ច​ចិន​ជួប​បញ្ហា ​ការ​នាំ​ចេញ​ក៏​មាន​ចំនួន​ថយ​ចុះ​ ទៅ​តាម​នោះ​ដែរ។​ អញ្ចឹង​មាន​ន័យ​ថា​​ចង្វាក់​នៃ​ការ​ផលិត  ​នៅ​តាម​រោងចក្រ​នៅ​កម្ពុជា ​ដែល​ផ្គត់ផ្គង់​ឲ្យ​ថៅកែ​ចិន​ គឺ​អាច​នឹង​ថយ​ចុះ​ដែរ។ ដូច្នេះ​រោងចក្រ ​កុំ​ថា​ឡើយ ​ដល់​ទៅ​រើស​បុគ្គលិក​ថ្មី​បន្ថែម ​ជួន​កាល ​អាច​ត្រូវ​បញ្ឈប់​បុគ្គលិក​ច្រើន​នាក់​ផង​​ ក៏​ថា​បាន។

មួយ​វិញ​ទៀត ​គម្រោង​វិនិយោគ​រាប់​លាន ​រាប់​សែន​ដុល្លារ​ របស់​ក្រុមហ៊ុន ​ចិន​ រឺ​ក្រុមហ៊ុន​បរទេស​ផ្សេងៗ ​អាច​នឹង​ជាប់​គាំង​ ដោយ​សារ​តែ​គ្មាន​ប្រាក់ ​ព្រោះ​ទីផ្សារ​ភាគ​ហ៊ុន​ដាំ​ក្បាល​ចុះ ​ហើយ​គ្មាន​នរណា​ផ្តល់​ប្រាក់ ​ដើម្បី​ឲ្យ​ក្រុមហ៊ុន​ទាំង​នោះ​ យក​មក​វិនិយោគ​នៅ​កម្ពុជា​ទេ។ ទាំង​នេះ ​យើង​គ្រាន់​តែ​និយាយ​ត្រួសៗ​ ពី​វិស័យ​ធំៗ ​នៃ​សេដ្ឋកិច្ច​យើង ​ដែល​អាច​នឹង​រង​ផល​ប៉ះពាល់ ​ដោយសារ​តែ​វិបត្តិ​សេដ្ឋកិច្ច​ចិន។ សកល​ភាវូបនីយកម្ម ​សេដ្ឋកិច្ច​ទីផ្សារ​សេរី ​វា​ល្អ​មែន​ហើយ​ សម្រាប់​អភិវឌ្ឍន៍​សេដ្ឋកិច្ច ​បង្កើន​ការ​វិនិយោគ​បរទេស ​បង្កើត​ការងារ  ​តែ​កំភ្លេច​ថា ​តែ​យើង​រំពឹង​គេ​ទាំង​ស្រុង​ពេក ​គឺ​ថា​ វា​គ្រោះ​ថ្នាក់​ណាស់។ កាល​ណា​គេ​រលំ ​យើង​ក៏​ដាច់​ខ្យល់​ដែរ។ សេដ្ឋកិច្ច​របស់​ប្រទេស​នីមួយៗ ​ត្រូវ​តែ​ស្ថាបនា​សរស​ទ្រូង​ខ្លួន​ឯង​ ឲ្យ​រឹងមាំ ​ទើប​អាច​ទប់ទល់ ​នឹង​ខ្យល់​ព្យុះ​ពី​ខាង​ក្រៅ​បាន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI