អានតួអត្ថបទ

ហ្វីលីពីនប្តូរ​ចិត្ត​ សុំ​​ចរចា​ជាមួយ​ប៉េកាំង​រឿង​សមុទ្ទ​ចិន​ខាង​ត្បូង

លោក​Fidel Ramos ថ្លែង​ទៅកាន់​អ្នក​សារព័ត៌មាន​ក្រោយ​ជំនួប​ជាមួយ​អនុរដ្ឋមន្ត្រីការបរទេស​ចិន នៅ​ទីក្រុង​ហុងកុង
លោក​Fidel Ramos ថ្លែង​ទៅកាន់​អ្នក​សារព័ត៌មាន​ក្រោយ​ជំនួប​ជាមួយ​អនុរដ្ឋមន្ត្រីការបរទេស​ចិន នៅ​ទីក្រុង​ហុងកុង © Reuters
ដោយ៖ អៀង សុខម៉ិញ
១១ នាទី

ហ្វីលីពីន បាន​បញ្ជូន​បេសកជន​ពិសេស​ទៅ​ប្រទេស​ចិន។ នៅ​ថ្ងៃសុក្រ​ ពី​ទីក្រុង​ហុង​កុង លោក ហ្វីដែល រ៉ាម៉ូស បាន​អះអាង​ប្រាប់​ភាគី​ចិន ថា ក្រុង​ម៉ានីល ចង់ ចាប់​ផ្តើម​បើក​ការចរចា​ផ្លូវការ​ជាមួយ​ប៉េកាំង ដើម្បី​ត្រួសត្រាយ​ផ្លូវ​​ នាំ​ប្រទេស​ទាំង​ពីរ​ទៅ​​រក​សន្តិភាព និង​កិច្ចសហប្រតិបត្តិការ​ល្អ ក្នុង​សមុទ្ទ​ចិន​ខាង​ត្បូង។

ផ្សាយពាណិជ្ជកម្ម

ជំនួប​​ពិភាក្សា​រវាង​​​អនុរដ្ឋមន្ត្រីការបរទេស​ចិនលោក ហ្វូ យីង និង​ ​លោកហ្វីដែល រ៉ាម៉ូស បេសកជន​ពិសេស​របស់​ហ្វីលីពីន នៅ​ក្រុង​ហុងកុង ធ្វើ​ឡើង​ក្នុង​បំណងភ្ជោច​ទំនាក់ទំនង​ចិន​ហ្វីលីពីន ដែល​អាប់​អួរ​និង​​​ធ្លាក់​ចុះ​ដុនដាបខ្លាំង ដោយ​ហេតុ​តែ​វិបត្ត​សមុទ្ទចិន​ខាង​ត្បូង។ ប៉ុន្តែ​វា​ក៏​ជា​ឱកាស​មួយ​សម្រាប់​ភាគី​ហ្វីលីពីន ​ក្នុង​ការ​បង្ហើប​ចេតនា​ ចង់​បើក​ការ​ចរចា ដែល​មាន​លក្ខណៈ​ផ្លូវការ​ ជាមួយ​ចិន ឡើង​វិញ។

 
​​ការ​ប្តូរ​ចិត្តនេះអាច​ចាត់​ទុក​ថា ជា​កាយវិការ​បន្ធូរ​បន្ថយ​សម្ពាធ របស់​​​ហ្វីលីពីន ដែល​កាលពី​ខែ​មុន រដ្ឋាភិបាល​ហ្វីលីពីន​ បាន​ច្រាន​ចោល​សំណើ​របស់​​សុំ​ចរចា​ទ្វេ​ភាគីរបស់​ចិន។ កាលណោះ ក្រុង​ម៉ានីល នៅ​ត្រឡោត​ខ្លាំង​ដាក់​ប៉េកាំង បាន​ផ្តល់​ហេតុផល​នៃ​ការ​បដិសេធ ថា​មក​ពី​​ចិន​មិន​ព្រម​ទទួល​ស្គាល់​​សេចក្តី​សម្រេច​ចិត្ត​របស់​តុលាការ​អចិន្ត្រៃយ៍​ក្រុង​ឡាអេ ឱ្យ​ក្រុង​ម៉ានីល​ឈ្នះ​ប៉េកាំង។

ប៉ុន្តែ​សម្រាប់​អាមេរិក ដែល​ជា​សម្ព័ន្ធមិត្ត​​ជា​ប្រវត្តិសាស្ត្រ​របស់​ហ្វីលីពីន មិន​យល់​ស្រប​តាម​គំនិត​របស់​រដ្ឋាភិបាល​ក្រុង​ម៉ានីល​ឡើយ។ លោកចន ឃែរី ប្រមុខ​ការ​ទូត​អាមេរិក បាន​ធ្វើ​ដំណើរ​ទៅ​ជួប​សមភាគី​ហ្វីលីពីន និង​បាន​ចេញ​សេចក្តី​ថ្លែងការណ៍​មួយ​កាលពី​ចុង​ខែ​កក្កដា ជំរុញនិង​លើក​ទឹកចិត្ត​​ឱ្យ​ហ្វីលីពីន ត្រូវ​តែ​​ចាប់​ផ្តើម​បើក​កិច្ចចរចា​ជាមួយ​ចិន ព្រោះ​ជា​មធ្យោបាយ​តែ​មួយ​គត់ សម្រាប់​​បញ្ចៀស​ភាព​ប្រឈម​គ្នា​នៅ​ក្នុង​សមុទ្ទ​ចិន​ខាង​ត្បូង។

សូម​បញ្ជាក់ថា ចិន​ដែល​អះអាង​ជា​អ្នក​គ្រប់​គ្រង​សមុទ្ទ​ចិន​ខាង​ត្បូង​ ចំនួន​៨៥% មាន​ជម្លោះ​ ​ជាមួយ​​​ហ្វីលីពីន និង​បណ្តា​ប្រទេស​ជិត​ខាង​ក្នុង​តំបន់​មួយ​ចំនួន​ទៀត​ដូចជា​ វៀតណាម ម៉ាឡេស៊ី តៃវ៉ាន់ និង​ព្រុយណេ ដែល​ក៏​​ទាមទារ​ចំណែក​គ្រប់គ្រង​បូរណភាព​ដែន​ទឹក​ប្រកប​ដោយ​ធនធាន​ធម្មជាតិ និង​ជា​ផ្លូវ​ចរាចរណ៍​​អន្តរជាតិ​ដ៏​សំខាន់​មួយ ទំហំ​ដល់​ជាង​៤៥០០​លាន​ក្នុង​មួយ​ឆ្នាំៗ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ