អានតួអត្ថបទ
ទស្សនៈព្រឹត្តិការណ៍ពិភពលោក

កូរ៉េខាង​ជើង ៖ ត្រកូល​គីម​ បែក​​មែក​សាខា​ល្អ តែ​ងាយ​បាក់

សំឡេង ០៤:៣២
លោក Kim Jong-Nam (ឆ្វេង)និង គីមជុងអ៊ុន (ស្តាំ)
លោក Kim Jong-Nam (ឆ្វេង)និង គីមជុងអ៊ុន (ស្តាំ) Toshifumi KITAMURA, Ed JONES / AFP
ដោយ៖ អៀង សុខម៉ិញ
២៧ នាទី

កើត​ជា​សមាជិក​គ្រួសារ​ក្នុង​ត្រកូល​អ្នក​កាន់​អំណាច នៅ​កូរ៉េខាង​ជើង ពិត​ជាភព្វ​ល្អ និង​​មាន​អភ័យឯកសិទ្ធិ​ខ្ពស់ណាស់ ! ប៉ុន្តែ​ទន្ទឹម​នឹង​សំណាង​ដ៏​ត្រដែតត្រដឹមនោះ ក៏​មាន​សមាជិក​គ្រួសារ​ជា​ច្រើននាក់​​ផ្សេង​ទៀត ត្រូវ​បាន​ព្រលះ​ចេញ​​ មិន​ឱ្យរស់​រៀន​ក្បែរ បែក​សាខា​ជា​ត្រកូល​គ្រួសារ​ដ៏​ធំ​ឡើយ។ ការ​កម្ចាត់​គ្នា​ក្នុង​ត្រកូល​ ដែល​បង្ហាញ​ថា រស់ក្នុង​ត្រកូល “គីម” ក៏​ជាការ​​ប្រឈម​នឹង​គ្រោះ​ហានិភ័យ​ខ្លាំង​ដែរ។

ផ្សាយពាណិជ្ជកម្ម

ឃាតកម្ម​សម្លាប់ លោក គីម ជុង​ណាម បង​ប្រុស​ម្តាយ​ទីទៃ របស់​ប្រមុខ​គីម ជុងអ៊ុន កាលពី​ថ្ងៃចន្ទ​ទី ១៣​កុម្ភៈ នៅ​ក្រុង​គូឡាឡាំពួរ ត្រូ​វ​បាន​សេអ៊ូល​ចាត់​ទុក​ជា​ស្នាដៃ​​របប​ព្យុងយ៉ាង។ ប្រសិន​បើ​កូរ៉េខាងជើង ពិត​ជា​នៅ​ពីក្រោយ​អំពើ​ឃាតកម្ម​នេះ​មែន នោះ​កូន​ចៅ​ត្រកូល​គីម ផ្សេង​ទៀត គួរ​តែ​ព្រួយ​បារម្ភ​នឹង​អាយុ​ជីវិត​របស់​ខ្លួន​ហើយ ! គីម ជុងអ៊ុន ​ផ្ទាល់​ ក៏​ភ័យ​ខ្លួនដែរ ! ព្រោះ​ជាមួយ​នឹង​ការ​ដឹកនាំ​បែប​ផ្តាច់ការ​របស់​គីម ជុងអ៊ុន ឥស្សរជន​​កំពូលៗ​របស់​ព្យុងយ៉ាង​មួយ​ចំនួន ទំនង​ជា​ចាប់​ផ្តើម​នឹក​ផ្អួចៗចង់​ប្តូរ​ប្រមុខដឹកនាំ​ប្រទេស។ នេះ​បើ​តាម​ការ​អះអាង​របស់​អតីត​អ្នកការទូត​កូរ៉េខាង​ជើង​ម្នាក់ ដែល​បច្ចុប្បន្ន​បាន​ក្លាយ​ជា​អ្នក​ជំនាញ​ស្តីពី​កិច្ចការ​កូរ៉េខាង​ជើង​ ប្រចាំ​ទីក្រុង​សេអ៊ូល។

ប៉ុន្តែ​ក្នុង​ដំណាក់កាល​ជាក់​ស្តែង​ពេល​នេះ មនុស្ស​ដំបូង​គេប​ង្អស់ ដែល​ត្រូវ​ព្រួយ​បារម្ភ​ គឺ​កូន​ប្រុស​របស់​លោក គីម ជុងណាម ឈ្មោះ​ថា គីម ហានសុល ដែល​បើគិត​ពី​ការ​​បន្ត​ត្រកូល គឺ​ជា​គូប្រជែង​សំខាន់​បំផុត​របស់​ប្រមុខ​គីម ជុងអ៊ុន។

ពេល​នេះ គីម ជុងណាម ជា​ឪពុក​បាន​ស្លាប់ គេ​ពិត​ជា​អាច​គិត​ថា​កូនប្រុស​គាត់​ក៏​កំពុង​ស្ថិតក្នុង​​គ្រោះ​ថ្នាក់ដែរ។ គេ​មិន​ដឹង​ថា​សព្វ​ថ្ងៃ​នេះ ហានសុល ដែល​មាន​អាយុ​២១​ឆ្នាំ ធ្លាប់​ទៅ​សិក្សា​នៅបូស្នី និង​នៅ​សាលាវិទ្យាសាស្ត្រ​នយោបាយ​បារាំង ​រស់​នៅ​ទីណា​ទេ។ តែ​​គ្រួសារ​គាត់​បាន​មក​រស់​នៅ​យូរ​ហើយ​លើ​ទឹក​ដី​ចិន ម៉ាកាវ។

អ្នក​វិភាគ​ជំនាញ​កូរ៉េខាង​ជើង​ខ្លះ យល់​ថា ចិន​ការពារ​គ្រួសារ​ គីម ជុងណាម នេះ​ខ្លាំងណាស់ ក្នុង​គំនិត​មួយ​ថា​ជា​អ្នក​បន្តតំណែង​ពី​គីមជុងអ៊ុន ក្នុង​ករណី​... ចិន​ការពារ​ គីម ជុងណាម និង​កូន​ចៅ ! ការ​នេះ​រឹត​តែ​ធ្វើ​ឱ្យ​ប្រមុខ​គីមជុងអ៊ុន កាន់​កាន់​តែ​ស្អប់​ខ្ពើម​បង​ខ្លាំង​ថែម​ទៀត។

គីមជុងណាម កូន​ប្រុស​ច្បង​របស់ប្រមុខ​គីមជុងអ៊ីល ធ្លាប់​ត្រូវ​បាន​គេ​ប្រមើល​ឃើញ​ថា​អ្នក​ត្រូវ​ស្នង​តំណែង​បន្តពី​ឪពុក និង​ទំនងជា​បាន​សាកល្បង​សុំ​សិទ្ធិ​ជ្រកកោន​នយោបាយ​នៅ​កូរ៉េ​ខាង​ត្បូង ឬ​សហរដ្ឋ​អាមេរិក ដែល​ព្យុងយ៉ាង​ពិត​ជា​មិន​អាច​អនុគ្រោះ​ឱ្យ​បាន​ឡើយ។ កាលពី​ពីរ​បី​ឆ្នាំ​មុន គីម ជុងណាម ធ្លាប់​បាន​និយាយ​រិះគន់​របប​ព្យុងយ៉ាង​ទៅ​កាន់​អ្នកកាសែត​បរទេស​ទេ។ ចំណែក​ គីម ហានសុល ជា​កូន​ប្រុស ក៏​ធ្លាប់​បាន​ផ្តល់​បទ​សម្ភាសន៍​ឱ្យទូរទស្សន៍ហ្វាំងឡង់ ជា​ភាសា​អង់គ្លេស​ ថា គីមជុងអ៊ុន ​ជា​ឪពុកមា ជា​មនុស្ស​ផ្តាច់ការ ! ហើយ​ឪពុក​លោក​មិន​ចាប់​អារម្មណ៍​នឹង​នយោបាយ​ទេ តែ​លោក​ចង់​ទៅ​ជួយ​ពលរដ្ឋ​ណាស់ និង​ស្រមៃ​ចង់​ត្រលប់​ទៅ​ប្រទេស​កំណើត​វិញ​ដើម្បី​ជួយ​សម្រួល​ជីវិត​ប្រជាជន។

ក្រោយ​បទ​សម្ភាសន៍​នេះ លោក គីម ហានសុល បាន​បាត់​មុខ សំងំ​លាក់​ខ្លួន​ឈឹង។ តែ​ពេល​នេះ ​មាន​គេ​ធ្វើ​ឃាតឪពុក គីមហានសុល នឹង​ចេញ​មុខ​រិះគន់​របប​ព្យុងយ៉ាង​ជា​ថ្មី។ គីម ​ហានសុល ​ដឹងច្បាស់​ដែរ​ថា​អាយុជីវិត​ខ្លួន​រង​ការ​គំរាមកំហែង។ ប៉ុន្តែ​ឃាតកម្ម​សម្លាប់​ គីម ជុងណាម មិនមែន​ជា​ករណី​ដំបូង​ក្នុង​ត្រកូល​គីម​ឡើយ។

ឪពុកមាថ្លៃ​ដែល​ជាអ្នក​ចិញ្ចឹម​បីបាច់​អប់​រំ គីម ជុងអ៊ុន​ លោកចង់សុងថែក ត្រូវ​បាន​កាត់ទោស​ប្រហារជីវិត កាលពី​ថ្ងៃទី ១២​ធ្នូ ២០១៣ ពី​បទ​ក្បត់​ និង​ពុក​រលួយ។ លោក ចង់​សុងថែក​នេះ ក៏​ធ្លាប់​ការពារ និង​លួច​ជួប​ឧបត្ថម្ភ​​ថវិកា​គីមជុងណាម ពេលរស់​និរទេស​នៅ​ចិន។ នៅ​ឆ្នាំ​១៩៩៧ ជីដូន​មួយ​របស់​គីមជុងណាម ម្នាក់ត្រូវ​ឃាតករ​ពីរ​នាក់​វាយ​សម្លាប់​នៅ​មុខ​ផ្ទះ នា​ក្រុង​សេអ៊ូល ព្រោះ​តែ​បាន​ផ្តាច់​ខ្លួន​មក​កូរ៉េខាង​ត្បូង និង​បាន​សរសេរ​សៀវភៅ​លម្អិត​​ពី​ជីវិត​ឯកជន​នៃ​ត្រកូល​គីម។

សមាជិក​គ្រួសារ​ត្រកូល​គីម ដែល​មិន​មែន​​ជា​គ្រោះ​ថ្នាក់ មិនមែន​ជា​អ្នក​ប្រជែង​អំណាច ត្រូវ​បាន​បញ្ជូន​ឱ្យ​ទៅ​រស់​នៅ​ឆ្ងាយ។ លោកគីម ព្យុងអ៊ីល អាយុ​៦២​ឆ្នាំ​ ជា​ប្អូន​ប្រុស​ពៅ​របស់​លោក គីមជុងអ៊ីល រស់​នៅ​តែបរទេស​ទេ ក្នុង​រយៈ​ពេល​៣០​ឆ្នាំ​ចុងក្រោយ​នេះ។ លោក​ក៏​ធ្លាប់​ត្រូវ​បាន​គេ​គិត​ជា​ស្នង​តំណែង​ពី​បងប្រុស​ម្នាក់​ដែរ ហើយ​បច្ចុប្បន្ន​លោក​ជា​ឯកអគ្គរដ្ឋទូត​ប្រចាំ​សាធារណរដ្ឋ​ឆែក។ ប៉ុន្តែ​សូម​កុំ​និយាយ​ពី​ឈ្មោះ​នេះ​ឱ្យ​សោះ នរណា​ហ៊ាន​រាប់​អាន​ល្អូកល្អើន​ជាមួយ គីម ព្យុងអ៊ីល ពិត​ជា​ប្រថុយ​ប្រថានពេក​ណាស់។

គីមជុងអ៊ុន មាន​បង​ប្រុសបង្កើត​​ម្តាយ​រួម​គ្នាម្នាក់ អាយុ​៣៥​ឆ្នាំ ឈ្មោះ ជុងចល ដែល​ក៏​រស់​នៅ​បរទេស​ដែរ។ គេ​ទើប​បាន​ស្គាល់​មុខ​កូន​ម្នាក់​នេះ​នៅ​ឆ្នាំ​២០១៥ ប៉ុន្តែ​ ជុងចល រស់​និរទេស​ខ្លួន​ក្រោមការ​ឃ្លាំមើលឥតដាច់​ ប្រព្រឹត្ត​គ្រឿង​ស្រវឹង​ និង​មានរោគចិត្ត។ ជា​បង​ប្រុសមែន ​ប៉ុន្តែ​គ្មាន​ថ្ងៃ​ចូល​ប្រលូក​នយោបាយ​ទេ អតីត​មន្ត្រី​ទូត​កូរ៉េខាង​ជើង​ប្រចាំ​ក្រុង​ឡុងដ៍​ទើប​ផ្តាច់​ខ្លួន​ទៅ​កូរ៉េខាង​ត្បូង បានអះអាង​​ថា បើ​ គីម ជុងចល កើត​ក្នុង​ត្រកូល​ធម្មតា គេ​អាច​ក្លាយ​ជា​អ្នក​ភ្លេង​ហ្គីតា​ដ៏ល្បី៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ