កូរ៉េខាងត្បូង

តុលាការ​កូរ៉េខាងត្បូង​ផ្តន្ទាទោស​អតីត​ប្រធានាធិបតី លោក​លី​ម្យុងបាក់ ឲ្យជាប់គុក ១៥ឆ្នាំ

អតីត​ប្រធានាធិបតី​កូរ៉េខាងត្បូង​លោក លី ម្យុងបាក់​ Lee Myung-Bak (ស្តាំ) នៅក្នុង​សវនាការ​នៅសេអ៊ូល ថ្ងៃទី២៣​ខែ​ឧសភា ២០១៨
អតីត​ប្រធានាធិបតី​កូរ៉េខាងត្បូង​លោក លី ម្យុងបាក់​ Lee Myung-Bak (ស្តាំ) នៅក្នុង​សវនាការ​នៅសេអ៊ូល ថ្ងៃទី២៣​ខែ​ឧសភា ២០១៨ ©Chung Sung-Jun / POOL / AFP

អតីត​ប្រធានាធិបតី លោក​លី ម្យុងបាក់  ដែល​ដឹកនាំ​កូរ៉េខាងត្បូង​ពី​ឆ្នាំ ២០០៨ ដល់​ឆ្នាំ ២០១៣ ត្រូវ​បាន​តុលាការ​កូរ៉េខាងត្បូង នៅ​ថ្ងៃ សុក្រ​នេះ ប្រកាស​ផ្តន្ទាទោស​ឲ្យ​ជាប់គុក ១៥​ឆ្នាំ ពី​បទ​ប្រព្រឹត្ត​អំពើពុករលួយ។ លោក លី ម្យុងបាក់  ជា​ប្រធានាធិបតី កូរ៉េខាងត្បូង ទី​២ បន្ទាប់​ពី​លោកស្រី ប៉ាក់ គុនហេ ដែល​ទើប​ត្រូវ​បាន​តុលាការ​ផ្តន្ទាទោស ឲ្យ​ជាប់គុក ២៥​ឆ្នាំ។ អាច​ថា នៅក្នុង​រយៈពេល​តែ​មួយឆ្នាំ អតីត​ប្រធានាធិបតី​កូរ៉េខាងត្បូង ដល់​ពី​រូប​ត្រូវ​បាន​តុលាការ​កាត់ទោស ឲ្យ​ជាប់ពន្ធាគារ ក្នុង​បទ​ចោទប្រកាន់ ប្រព្រឹត្ត​អំពើ​ពុករលួយ។ 

ផ្សាយពាណិជ្ជកម្ម

តុលាការ​នៅទីក្រុងសេអ៊ូល នៅ​ថ្ងៃ​នេះ សុក្រ បាន​ប្រកាស​ផ្តន្ទាទោស​អតីត​ប្រធានាធិបតី​កូរ៉េខាងត្បូង លោក​លី ម្យុងបាក់ ឲ្យ​ជាប់​ពន្ធនាគារ​១៥ឆ្នាំ និង​បង់ប្រាក់​ពិន័យ ១៣ពាន់លាន​វ៉ុន ស្មើ​នឹង​១១លាន​ដុល្លារ។ លោក​លី ម្យុងបាក់ ដែល​រង​បទ​ចោទប្រកាន់ ចំនួន ១៦​ករណី ពី​រដ្ឋអាជ្ញារ​កូរ៉េខាងត្បូង កាលពី​ខែ​មេសា​កន្លងទៅ ត្រូវ​បានចៅក្រម​តុលាការ​ក្រុង​សេអ៊ូល​ផ្តន្ទាទោស ឲ្យ​ជាប់ពន្ធនាគារ ក្នុង​បទចោទប្រកាន់​ពីរ គឺ​ប្រព្រឹត្ត​អំពើពុករលួយ ហើយ​និង​កេងបន្លំ​លុយរដ្ឋ។

តាម​សេចក្តីប្រកាស​របស់​តុលាការ ដែល​ត្រូវ​បាន​ចាក់ផ្សាយ​បន្តផ្ទាល់​តាមទូទស្សន៍​កូរ៉េខាងត្បូង លោក​លី ម្យុងបាក់ កាលនៅ​កាន់តំណែង​ជា​ប្រធានាធិបតី ពី​ឆ្នាំ ២០០៨ ដល់​ឆ្នាំ ២០១៣ បាន​ទទួល​សំណូកសូកប៉ាន់ ពី​ម្ចាស់​ក្រុមហ៊ុន​សាំស៊ុង ជាថ្នូរ​នឹង​ការប្រកាស​លើកលែង​របស់​ប្រធានាធិបតី សម្រាប់​អគ្គនាយកក្រុមហ៊ុន​សាំស៊ុង ដែល​កាលណោះ​ត្រូវ​បាន​តុលាការ​កាត់ទោស ពីបទ​បន្លំ​គេចមិន​បង់ពន្ធ​រដ្ឋ។ សម្រាប់​ការចោទប្រកាន់​ទី២ តុលាការ​បាន​រកឃើញថា លោក លី ម្យុងបាក់ នៅ​ពេល​ជា​ប្រធានាធិបតី បាន​លួច​បង្កើត ក្រុមហ៊ុន ផលិតគ្រឿងរថយន្ត​មួយ ប៉ុន្តែ ដាក់​ឈ្មោះ​ប្អូនប្រុស​របស់លោក វិញ ដើម្បី ងាយ​ស្រួល​លួច​បន្លំ​បង្វែរលុយ រដ្ឋ​ចូល​ក្រុមហ៊ុន។

ក្នុង​វ័យ ៧៦​ឆ្នាំ លោក​លី ម្យុងបាក់ គ្មាន​វត្តមាន នៅតុលាការ ដើម្បី​ស្តាប់​ការប្រកាស​សាលក្រម​នោះទេ ក្នុង​ហេតុផលថា លោក​មាន​សុខភាព​មិនល្អ និង​ម្យ៉ាង ដើម្បី ជំទាស់​នឹង​តុលាការ ដែល​បាន​សម្រេច​ឲ្យ​មាន​ការចាក់ផ្សាយ​បន្ត​ផ្ទាល់ អង្គ​ជំនុំជម្រះ នៅ​តាមទូទស្សន៍ នៅថ្ងៃ​សុក្រ​នេះ។ ប៉ុន្តែ រហូត​មក លោក លី ម្យុងបាក់ បានទាត់ចោល​ការចោទប្រកាន់ និងថា ករណី​ប្តឹង​លោក ធ្វើ​ឡើង​ក្នុង​ហេតុផល​នយោបាយ។ នៅក្រោយ​ការប្រកាស​សាលក្រម មេធាវី​របស់​លោកលី ម្យុងបាក់​បាន​សំដែង​ការសោកស្តាយ និង​ថា លោក​នឹង​ពិចារណា​ជាមួយ​កូនក្តីរបស់​លោក ដើម្បី​សម្រេចថា​នឹង​ប្តឹង​ទៅ​សាលាឧទ្ធរណ៍​ដែរ​ឬទេ។

នៅ​កូរ៉េខាងត្បូង វា​សឹង​ក្លាយ​ជា​ប្រពៃណី ដែល​ប្រធានាធិបតី​អស់​តំណែង ត្រូវ​តុលាការ​កាត់ទោស ឲ្យ​ជាប់​ពន្ធនាគារ ពី​បទ​ទទួល​សំណូកសូកប៉ាន់ ជាពិសេស នៅ​ក្នុងពេល​ដែល​គណបក្ស​គូប្រជែង ឈ្នះឆ្នោត ចូល​កាន់កាប់​វិមាន​ប្រធានាធិបតី។ ជាក់ស្តែង ប្រធានាធិបតី​កូរ៉េខាងត្បូង ទាំង​៤​រូប​ដែល​កំពុង​មាន​ជីវិត សុទ្ធតែ​ត្រូវ​បាន​តុលាការ​ថ្កោលទោស ទាំង​ក្នុង​រឿងប្រព្រឹត្ត​អំពើពុករលួយ។ នៅ​មុន​លោក​លី ម្យុងបាក់ លោកស្រី​ប៉ាក់ គុនហេ ដែល​ត្រូវ សភា​បោះឆ្នោត​ទម្លាក់​ចេញពី​តំណែង​ប្រធានាធិបតី​មុន​អាណត្តិ ត្រូវ​បាន​តុលាការ​កាត់ទោស កាលពី​ខែ​មេសា ឆ្នាំនេះ ឲ្យ​ជាប់​ពន្ធនាគារ ២៥​ឆ្នាំ ក្នុង​បទ​ទទួល​សំណូក​ពីក្រុមហ៊ុន សាំស៊ុង ហើយនិង​រំលោភ​អំណាច​ប្រធានាធិបតី។ ចំណែក​អតីត​ប្រធានាធិបតី​ពីរ​រូប​ផ្សេងទៀត ដែល​ត្រូវជាប់​ពន្ធនាគារ​ដោយសារ​រឿង​ពុករលួយ ហើយ​និង​ក្បត់ជាតិ កាលពី​ទសវត្សរ៍​ឆ្នាំ ១៩៨០ បានរួចទោស​មកវិញ ដោយសារ​ក្រឹត្យ​លើកលែង​ទោស ពី​ប្រធានាធិបតី នាពេល​កន្លងមក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI