ចិន

ចិន​បង្ហាញ​សាច់ដុំ​យោធា​នៅ​ក្នុង​មហាក្បួន​ព្យុះហយាត្រា​យោធា​​​ក្នុង​ក្រុង​ប៉េកំាង

Reuters
៤៦ នាទី

នៅ​ថ្ងៃ​ព្រហស្បតិ៍ ទី៣ កញ្ញា​នេះ ប្រទេស​ចិន​បាន​រៀបចំ​មហាក្បួន​ព្យុះហយាត្រា​យោធា​នៅ​ទីលាន​ធានអាន់មេន ក្នុង​ទីក្រុង​ប៉េកំាង​ដើម្បី​ចូលរួម​អបអរសាទរ​ខួប​ទី៧០ឆ្នំា​នៃ​ជ័យជំនះ​លើ​ប្រទេស​ជប៉ុន​ក្នុង​សង្រ្គាមលោក​លើកទី២។ នៅ​ក្នុង​មហាក្បួន​ព្យុះហយាត្រា​យោធា​ថ្ងៃ​នេះ គេ​ឃើញ​មាន​វត្តមាន​ចូលរួម​ពី​ប្រមុខរដ្ឋ និង​ប្រមុខ​រដ្ឋាភិបាល​បរទេស​ប្រមាណ​ជា ២០នាក់ ដែល​ភាគច្រើន​ជា​សម្ព័ន្ធមិត្ត​ស្និទ្ធ​នឹង​ចិន ដូច​ជា​លោក​ប្រធានាធិបតី​រុស្ស៊ី​ពូទីន ឬ​មួយ​ក៏​លោកស្រី​ប្រធានាធិបតី​កូរ៉េខាងត្បូង​ប៉ាក់ គុនហេ​ជា​ដើម។ ចំណែក​ថ្នាក់ដឹកនំា​បស្ចិមលោក​មាន​​ត្រឹម​ប្រមុខការទូត ឬ​មួយ​ក៏​ថ្នាក់​ឯកអគ្គរដ្ឋទូត។ ថ្លែង​នា​ឱកាស​នោះ លោក​ប្រធានាធិបតី​ចិន​ស៊ី ជីនពីង​បាន​បញ្ជាក់​ពី​មហិច្ឆតា​របស់​ចិន​ដែល​ស្រឡាញ់​សន្តិភាព និង​មិន​ដែល​ស្វែង​រក​អនុត្តរភាព និង​ការ​វាតទី។

ផ្សាយពាណិជ្ជកម្ម

រូបភាព​ដ៏​អស្ចារ្យ​ជាង​គេ និង​ដែល​មិន​អាច​លាក់បំាង​បាន​នៅ​ក្នុង​ទីក្រុង​ប៉េកំាង​ថ្ងៃ​នេះ គឺ​ការ​ដែល​ចិន​បាន​បង្ហាញ​សាច់ដុំ​យោធា​ចំពោះ​ពិភពលោក។ នៅ​ក្នុង​មហា​ក្បួន​ព្យុះហយាត្រា​យោធា​ថ្ងៃ​នេះ ចិន​បាន​ដង្ហែ​ទ័ព​ចម្រុះ​ជាង ១២ ០០០នាក់​ដែល​បំពាក់​ដោយ​អាវុធ​ទំនើបៗ​ក្នុង​ដៃ ក្បួន​រថក្រោះ គ្រាប់មីស៊ីល​អន្តរទ្វីប​ឈ្មោះ « Dongfeng ២១D »។ « Dongfeng ២១D » អាច​រត់​បាន​ក្នុង​ល្បឿន​ជិត ៣ ៥០០គីឡូម៉ែត្រ​ក្នុង​មួយ​ម៉ោង និង​អាច​បាញ់​បាន​ចម្ងាយ​ពី ៩០០ ទៅ ១ ០០០គីឡូម៉ែត្រ។ « Dongfeng ២១D » មាន​បំពាក់​ដោយ​គ្រឿង​អេឡិចត្រូនិច​ទំនើបៗ​ដែល​អាច​ហោះ​ទៅ​កម្ទេច​គោលដៅ​បាន ១០០%។ នៅ​លើ​អាកាស​វិញ ចិន​បាន​បញ្ចេញ​យន្តះហោះ​ចម្បំាង យន្តហោះ​ទម្លាក់គ្រាប់បែក និង​ឧទ្ធម្ភាគចក្រ​ជំនាន់ក្រោយ​សរុប​ទំាង​អស់​ជាង ២០០គ្រឿង។

គ្រឿងសព្វាវុធ​ដែល​ចិន​បាន​សម្តែង​នៅ​ក្នុង​ក្បួនព្យុះហយាត្រា​ថ្ងៃ​នេះ មាន​ភាគច្រើន​ជា​គ្រឿងសព្វាវុធ​ថ្មី​ស្រឡាង​ដែល​គេ​មិន​ធ្លាប់​បាន​ឃើញ និង​ដែល​ចិន​បាន​បញ្ចេញ​ឲ្យ​ឃើញ​ជា​សាធារណៈ​ជា​លើកទី១។ គួរ​រម្លឹក​ជូន​ថា ចិន​ជា​ប្រទេស​ដែល​មាន​ចំនួន​ទ័ព​ច្រើន​ជាង​គេ ពោល​មាន ២លាន ៣សែន​នាក់។ តែ​នៅ​ក្នុង​សុន្ទរកថា​នា​ឱកាស​ខួប​ទី៧០ឆ្នំា​នៃ​បរាជ័យ​របស់​ជប៉ុន​ក្នុង​សង្រ្គាមលោក​លើកទី២ ថ្ងៃ​នេះ លោក​ប្រធានាធិបតី​ចិន​ស៊ី ជីនពីង​បាន​ប្រាប់​ឲ្យ​ដឹង​ពី​គម្រោង​កាត់​បន្ថយ​កម្លំាង​ទ័ព​ចិន​ចំនួន ៣០០ ០០០នាក់​នៅ​ពេល​ខាង​មុខ។

មហា​ក្បួន​ព្យុះហយាត្រា​យោធា​នៅ​ទីលាន​ធានអាន់មេន ក្នុង​ទីក្រុង​ប៉េកំាង​ថ្ងៃទី៣ កញ្ញា ២០១៥
មហា​ក្បួន​ព្យុះហយាត្រា​យោធា​នៅ​ទីលាន​ធានអាន់មេន ក្នុង​ទីក្រុង​ប៉េកំាង​ថ្ងៃទី៣ កញ្ញា ២០១៥ Reuters

កាត់​បន្ថយ​បរិមាណ​ដើម្បី​បង្កើន​គុណភាព

គេ​អាច​និយាយ​បាន​ទេ​ថា ការ​ដែល​លោក​ស៊ី ជីនពីង​បាន​ប្រកាស​ពី​ការ​កាត់​បន្ថយ​ចំនួន​ទ័ពចិន ជា​រឿង​គួរ​ឲ្យ​ភ្ញាក់ផ្អើល និង​មិន​ភ្ញាក់ផ្អើល។ ភ្ញាក់ផ្អើល ព្រោះ​ចិន​ដែល​កំពុង​បង្កើន​ឥទ្ធិពល​របស់​ខ្លួន​នៅ​ក្នុង​សមុទ្រ​ចិន​នោះ បែរ​ជា​ប្រកាស​កាត់​បន្ថយ​ចំនួន​ទ័ព​របស់​ខ្លួន។ ចូរ​កុំ​ភ្លេច​ថា មាន​ប្រទេស​អាស៊ី​ជា​ច្រើន​កំពុង​ប្រឈម​មុខ​ទល់​នឹង​ចិន​ទាក់ទង​នឹង​ជម្លោះ​ដំណ្តើម​ទីប្រជុំកោះ​នៅ​ក្នុង​សមុទ្រ​ចិន​ខាង​ត្បូង និង​ខាង​កើត ហើយ​ជានិច្ចកាល រដ្ឋអំណាច​ចិន​បាន​ប្រើ​អំណាច​សេដ្ឋកិច្ច និង​យោធា​របស់​ខ្លួន​ដើម្បី​ព្រមាន​កំញើញ​បណ្តា​ប្រទេស​ទំាង​នោះ។ តែ​ជា​រឿង​មិន​ភ្ញាក់ផ្អើល ព្រោះ​ការ​កាត់​បន្ថយ​ចំនួន​ទ័ព​ត្រូវ​បាន​ចិន​ដាក់​ជំនួស​វិញ​នូវ​គ្រឿង សព្វាវុធ​ទំនើបៗ​ទាន់សម័យ។

គួរ​ជម្រាប​ជូន​ថា ការ​កាត់បន្ថយ​ចំនួន​ទ័ព​ចិន​មិនមែន​ទើប​តែ​មាន​នៅ​ក្នុង​សម័យ​លោក​ប្រធានាធិបតី​ស៊ី ជីនពីង​ទេ តែ​មាន​តំាង​ពី​សម័យ​លោក​ប្រធានាធិបតី Jiang Zemin។ តែ​ស្រប​នឹង​ការ​កាត់​បន្ថយ​ចំនួន​ទ័ព ចិន​តែងតែ​បាន​ដំឡើង​ថវិកា​យោធា​ដើម្បី​ធ្វើ​ទំនើបកម្ម​កងទ័ព ឬ​អាច​និយាយ​បែប​ម្យ៉ាង​ទៀត​ថា បង្កើន​គុណភាព​កងទ័ព និង​ធ្វើ​ទំនើបកម្ម​គ្រឿង​សព្វាវុធ។ សម្រាប់​ក្រុង​ប៉េកំាង ការ​បង្កើន​គុណភាព​នឹង​អាច​ធ្វើ​បាន លុះត្រា​ណា​តែ​មាន​ការ​កាត់បន្ថយ​បរិមាណ។

មហាក្បួនព្យុះហយាត្រាយោធានៅទីលានធានអាន់មេន ក្នុងទីក្រុងប៉េកំាង​ថ្ងៃទី៣ កញ្ញា ឆ្នំា ២០១៥
មហាក្បួនព្យុះហយាត្រាយោធានៅទីលានធានអាន់មេន ក្នុងទីក្រុងប៉េកំាង​ថ្ងៃទី៣ កញ្ញា ឆ្នំា ២០១៥ REUTERS/Xinhua/Pang Xinglei

ចិន​ចំាបាច់​ធ្វើ​ទំនើបកម្ម និង​អភិវឌ្ឍន៍​វិស័យ​យោធា​របស់​ខ្លួន

បន្ទាប់​ពី​បាន​ក្លាយ​ជា​មហា​អំណាច​សេដ្ឋកិច្ចទី២ ក្នុង​លោក ចិន​ក៏​ចង់​ក្លាយ​ជា​មហា​អំណាច​យោធា​នៅ​ថ្ងៃ​ខាង​មុខ។ តែ​គោលដៅ​នៅ​ចំពោះ​មុខ​របស់​ចិន​មាន ៣ ទី១ ការពារ​ខ្លួន​ទប់​នឹង​ការ​វាយប្រហារ​ពី​អ្នក​ដទៃ មាន​ដូច​ជា​អាមេរិក ទី២ ដើម្បី​ទប់ទល់​នឹង​ដង្កូវ​ចេញ​ពី​សាច់​​ឯង ពោល​ទប់ទល់​នឹង​ចលនា​បះបោរ​របស់​អ្នក​ទាមទារ​ផ្តាច់ទឹកដី​និយម ដូច​​ជា​នៅ​ទីបេ នៅ​ស៊ីងជាំង ឬ​ក៏​ទប់​តៃវ៉ាន់​កុំ​ឲ្យ​ប្រកាស​ឯករាជ្យ​ជា​ដើម និង​ទី៣​ដែល​ចិន​មិន​ដែល​និយាយ​ជា​ចំហ​នោះ គឺ​ចង់​ធ្វើ​ឲ្យ​មាន​ជញ្ជីង​តុល្យភាព​ក្នុង​ពិភពលោក ពិសេស​នៅ​តំបន់​អាស៊ីប៉ាស៊ីហ្វិក​ដោយ​ធ្វើ​យ៉ាង​ណា កុំ​ឲ្យ​ផ្អៀង​ទៅ​តែ​ខាង​អាមេរិក​ខ្លាំង​ពេក។

ចិន​យល់​យ៉ាង​ច្បាស់​ថា ដើម្បី​អាច​មាន​ទឹកមាត់​ប្រៃ​បាន ទាល់​តែ​ខ្លួន​មាន​កងទ័ព​ខ្លាំង និង​បំពាក់​ដោយ​គ្រឿងសព្វាវុធ​ទំនើប​ទាន់សម័យ។ គឺ​ក្នុង​ន័យ​នេះ​ហើយ​បាន​ជា​ចិន​មិន​ញញើត​នឹង​បង្កើន​ថវិកា​យោធា​របស់​ខ្លួន​ពី​១ឆ្នំា​ទៅ​១ឆ្នំា។ ជា​ផ្លូវការ ចិន​ជា​ប្រទេស​ឋិត​នៅ​​លំដាប់ទី ៤​ ក្នុង​លោក​ដែល​មាន​កញ្ចប់​ថវិកា​យោធា​ធំ​ជាង​គេ។ ចំណាត់ថ្នាក់លេខ១ គឺ​អាមេរិក លេខពីរ គឺ​អង់គ្លេស និង​ប្រទេស​បារាំង​ជាប់ចំណាត់​ថ្នាក់​លេខ៣។ តែ​ក្រៅ​ផ្លូវការ​ត្រូវ​បាន​ក្រុម​អ្នក​ជំនាញ​អះអាង​ថា ចិន​ជា​ប្រទេស​ស្ថិត​ចំណាត់ថ្នាក់​ទី២ បន្ទាប់​ពី​អាមេរិក​ដែល​ចាយ​ប្រាក់​ច្រើន​ជាង​គេ​នៅ​ក្នុង​វិស័យ​ការពារជាតិ។

លោក​ប្រធានាធិបតី​ចិន​ស៊ី ជីនពីង
លោក​ប្រធានាធិបតី​ចិន​ស៊ី ជីនពីង Reuters

លោកស៊ី ជីនពីង៖ ចិន​ជា​ប្រទេស​ស្រឡាញ់​សន្តិភាព និង​គ្មាន​បំណង​វាតទី

ទោះ​បី​ជា​ចិន​មាន​មហិច្ឆតា​យោធា​កម្រិត​ណា​ក៏​ដោយ ក៏​ចិន​មិន​អាច​និយាយ​ថា ខ្លួន​ជា​អ្នក​ស្រឡាញ់​សង្រ្គាម​ដែរ។ សម្រាប់​លោក​ស៊ី ជីនពីង វា​ជា​រឿង​មួយ​ធម្មតា​ដែល​លោក​ត្រូវ​តែ​និយាយ​ថា ពលរដ្ឋ​ចិន​ជា​អ្នក​ស្រឡាញ់​សន្តិភាព ហើយ​ចិន​នឹង​មិន​ស្វែង​រក​អនុត្តរភាព និង​ការ​វាតទី​ជា​ដាច់​ខាត។ ការ​ថ្លែង​របស់​ប្រមុខរដ្ឋ​ចិន​របៀប​នេះ គឺ​ចង់​និយាយ​សំដៅ​ទៅ​កាន់​ប្រទេស​ជប៉ុន​ដែល​បាន​ធ្វើ​អាណានិគម​នៅ​អាស៊ី និយាយ​ជា​រួម និង​នៅ​ប្រទេស​ចិន និយាយ​ដោយឡែក​កាល​ពី​ជាង ៧០ឆ្នំា​មុន។ តែ​នា​ឱកាស​ប្រារព្ធ​ខួប​ទី៧០ឆ្នំា​នៃ​ជ័យជំនះ​របស់​ចិន​លើ​ជប៉ុន ឬ​បរាជ័យ​របស់​ជប៉ុន​នៅ​ក្នុង​សង្រ្គាមលោក​លើកទី២ ថ្ងៃ​នេះ លោក​​ស៊ី ជីនពីង​មិន​ភ្លេច​និយាយ​ទេ​ថា​ចិន​បាន​រក​ឃើញ​ជា​ថ្មី​នៅ​កន្លែង​របស់​ខ្លួន​ក្នុង​នាម​ជា​មហាប្រទេស​មួយ​នៅ​ក្នុង​ពិភពលោក។

ក្នុង​ន័យ​នេះ លោក​ស៊ី ជីនពីង​ក៏​បាន​ឆ្លៀត​បញ្ជាក់​ជា​ថ្មី​ពី​គោលការណ៍​នៃ​អំណាច​ដាច់ខាត​របស់​គណបក្ស​កុម្មុយនិស្ត​ចិន និង​ថា ចិន​ត្រូវ​តែ​បោះជំហាន​ទៅ​មុខ​ក្រោម​ការ​ដឹកនំា​របស់​គណបក្ស​កុម្មុយនិស្ត​តែ​មួយ​ដូច​ដែល​បុរស​ម្នាក់​បាន​ដើរ​ទៅ​មុខ​ដើម្បី​សម្រេច​គោលដៅ​របស់​ខ្លួន។ ជា​រួម​គេ​សង្កេត​ឃើញ​ថា សុន្ទរកថា​របស់​លោក​ស៊ី ជីនពីង​ហាក់​ដូច​ជា​មិន​សូវ​មាន​លក្ខណៈ​យោធា​និយម​ដូច​ដែល​គេ​បាន​គិត​ទេ ពិសេស​លោក​បាន​សង្កត់​ធ្ងន់​លើ​ផ្លូវអភិវឌ្ឍន៍​ដើម្បី​សន្តិភាព​នៅ​លើ​ពិភពលោក។
 

ប្រសាសន៍​លោក​ស៊ី ជីនពីង​ប្រែសម្រួល​ដោយ គួច គន្ធារ៉ា

« ផលប៉ះពាល់ ការ​រើសអើង ការ​ស្អប់គ្នា និង​សង្រ្គាម​បាន​ត្រឹម​តែ​បង្ក​ឲ្យ​មាន​វិនាសកម្ម និង​ទុក្ខសោក។ ចំណែក​ការ​គោរព​គ្នា​ទៅ​វិញ ទៅ​មក សមភាព ការ​អភិវឌ្ឍន៍​ដោយ​សន្តិវិធី និង​សេចក្តី​រុងរឿង គឺ​ជា​ផ្លូវ​ដ៏​ល្អ​ដែល​ត្រូវ​ជ្រើស​យក។ ប្រទេស​ទំាង​អស់​ក្នុង​លោក​ត្រូវ​តែ​គោរព​គ្នា​ដោយ​ផ្អែក​លើ​ធម្មនុញ្ញ​របស់​អង្គការ​សហប្រជាជាតិ និង​បង្កើត​ឲ្យ​មាន​ទំនាក់ទំនង​ល្អ​ដោយ​ផ្អែក​លើ​គោលការណ៍​ឈ្នះៗ​ដើម្បី​ធ្វើ​ដំណើរ​រួម​គ្នា​ក្នុង​បុព្វហេតុ​សន្តិភាព និង​ការ​អភិវឌ្ឍន៍​រួម​គ្នា »៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI