ក្រុមហ៊ុនអាកាសចរណ៍ម៉ាឡេស៊ីប្រកាសក្ស័យធន និងរុះរើ កាត់បន្ថយបុគ្គលិក
ចុះផ្សាយនៅថ្ងៃ៖ កែប្រែថ្ងៃទី៖
ថ្ងៃទី ១មិថុនា ត្រូវចាត់ទុកជាថ្ងៃងងឹតអន្ធកាលសម្រាប់បុគ្គលិកបម្រើការឲ្យក្រុមហ៊ុនអាកាសចរណ៍ម៉ាឡេស៊ី អ៊ែរឡាញ Malaysia Arilines។ កាលពីថ្ងៃចន្ទ ម្សិលមិញ លោក Christoph Mueller អគ្គនាយកគ្រប់គ្រងក្រុមហ៊ុនបាននិយាយប្រាប់អ្នកកាសែតថា ក្រុមហ៊ុនMalaysia Arilinesដែលកំពុងជួបក្ស័យធន ត្រូវកាត់បន្ថយបុគ្គលិក ប្រមាណ ៦ពាន់នាក់ នៅក្នុងផែនការរុះរើ រៀបចំរចនាសម្ព័ន្ធថ្មីរបស់ក្រុមហ៊ុនអាស៊ីមួយនេះ។
នៅក្រោមការគ្រប់គ្រងរបស់មេដឹកនាំថ្មី ជនជាតិអាល្លឺម៉ង់ ក្រុមហ៊ុនអាកាសចរណ៍ម៉ាឡេស៊ី អ៊ែរឡាញបានបង្ហាញជាលើកទីមួយ ផែនការរុះរើរចនាសម្ព័ន្ធក្រុមហ៊ុន ក្នុងទ្រង់ទ្រាយធំ។ កាលពីថ្ងៃ ចន្ទ ប្រធានក្រុមហ៊ុនលោក Christoph Mueller បានប្រកាសផ្លូវការ ពីដំណឹងកាត់បន្ថយបុគ្គលិក រាប់ពាន់នាក់។ គោលដៅហោះហើររបស់យន្តហោះម៉ាឡេស៊ី អ៊ែរឡាញ ក៏ត្រូវកាត់បន្ថយ ចំណែករចនាសម្ព័ន្ធរបស់ក្រុមហ៊ុនក៏ត្រូវរៀបចំ សាជាថ្មីឡើងវិញ។
តាមលោក Christoph Mueller ម៉ាឡេស៊ីអ៊ែរឡាញក្ស័យធន និងដំណើរការល្អមិនសូវ តាំង ពីមុនពេលដែលយន្តហោះរបស់ក្រុមហ៊ុន (MH 370 MH 17) ជួបគ្រោះថ្នាក់ពីរលើក នៅឆ្នាំ ២០១៤ ដែលបានសម្លាប់ជីវិតមនុស្ស ៥៣៧នាក់ ទៅទៀត។
នៅថ្ងៃចន្ទ សំបុត្របញ្ឈប់ពីការងារត្រូវបានផ្ញើទៅដល់ដៃបុគ្គលិក២ម៉ឺននាក់របស់ក្រុមហ៊ុន។ ជាមួយគ្នានេះ កិច្ចសន្យាការងារថ្មីត្រូវបានស្នើទៅឲ្យបុគ្គលិកតែចំនួន ១ម៉ឺន ៤ពាន់នាក់ប៉ុណ្ណោះ។ មានន័យថា មនុស្ស៦ពាន់នាក់នឹងត្រូវកាត់ចេញពីបញ្ជីរបុគ្គលិករបស់ក្រុមហ៊ុន។ សម្រាប់លោកMueller ការកាត់បន្ថយចំនួនបុគ្គលិកគឺជារឿងចាំបាច់ ព្រោះថា ក្រុមហ៊ុនត្រូវរ៉ាប់រងចំណាយខ្ពស់ ដល់ទៅ ២០% ច្រើនជាងក្រុមហ៊ុនប្រកួតប្រជែង។ តាមរយៈ ការរុះរើ រៀបចំក្រុមហ៊ុនឡើងវិញ លោក Christoph Muellerសង្ឃឹមថា នឹងអាចរកស្ថិរភាពឲ្យក្រុមហ៊ុននៅឆ្នាំក្រោយ ហើយនឹងកំណើនសេដ្ឋកិច្ចចាប់ពីពេលនេះ ដល់ចុងឆ្នាំ ២០១៧។
លោក Christoph Muellerដែលចូលដឹកនាំក្រុមហ៊ុនម៉ាឡេស៊ី អ៊ែរឡាញ តាំងពីដើមខែ ឧសភា បាននិយាយដែរថា ទៅតាមផែនការថ្មី ឈ្មោះរបស់ក្រុមហ៊ុនក៏អាចត្រូវផ្លាស់ប្តូរដែរ។ ផែនការរុះរើរបស់លោក Christoph Muellerបានទទួលការរិះគន់យ៉ាងខ្លាំងពីក្រុមសហជីពបុគ្គលិកបម្រើការលើយន្តហោះ ដែលអះអាងថា ពួកគេទទួលថ្មបាក់ ដោយសារការគ្រប់គ្រងមិនល្អរបស់ថ្នាក់ដឹកនាំក្រុមហ៊ុនកន្លងមក។
តាមអ្នកវិភាគមួយចំនួន ក្រុមហ៊ុនម៉ាឡេស៊ី អ៊ែរឡាញខាតបង់ថវិកា អស់ជាច្រើនឆ្នាំ ដោយសារតែការគ្រប់គ្រងមិនល្អ និងអសមត្ថភាពរបស់ថ្នាក់ដឹកនាំ ដើម្បីប្រឈមមុខនឹងក្រុមហ៊ុនប្រកួតប្រជែងអន្តរជាតិ។ ក្រៅពីមុខមាត់ និងកេរ្តិ៍ឈ្មោះ ក្រុមហ៊ុនម៉ាឡេស៊ី អ៊ែរឡាញ ជួបការខាតបង់កាន់តែច្រើន ដោយសារតែគ្រោះថ្នាក់ ធ្លាក់យន្តហោះ នៅអ៊ុយក្រែន ក្នុងពេលដែលគេនៅមិនទាន់រកឃើញ នៅឡើយ យន្តហោះ 370ដែលធ្លាក់បាត់ ស្រមោល ទៅក្នុងសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ