ឧបទ្វីប​កូរ៉េ

កូរ៉េ​ទាំងពីរ​រក​ឃើញ​កិច្ចព្រមព្រៀង​ដើម្បី​បន្ធូរ​បន្ថយ​ភាពតានតឹង

មន្រ្តី​យោធា​ជាន់ខ្ពស់​របស់​កូរ៉េខាងជើង (ឆ្វេង) ចាប់ដៃ​ជាមួយ​ទីប្រឹក្សា​ក្រសួង​សន្តិសុខ​ជាតិ​កូរ៉េខាងត្បូង នៅថ្ងៃ​រកឃើញ​កិច្ចព្រមព្រៀង ថ្ងៃ​អង្គារ​ទី ២៥ សីហា ២០១៥
មន្រ្តី​យោធា​ជាន់ខ្ពស់​របស់​កូរ៉េខាងជើង (ឆ្វេង) ចាប់ដៃ​ជាមួយ​ទីប្រឹក្សា​ក្រសួង​សន្តិសុខ​ជាតិ​កូរ៉េខាងត្បូង នៅថ្ងៃ​រកឃើញ​កិច្ចព្រមព្រៀង ថ្ងៃ​អង្គារ​ទី ២៥ សីហា ២០១៥ ©REUTERS/the Unification Ministry/Yonhap

កូរ៉េខាងជើង និង​កូរ៉េខាងត្បូង នៅ​បាន​សម្រេច​រកឃើញ កិច្ចព្រមព្រៀង មួយ​នៅ​ព្រឹក​ព្រលឹម​ថ្ងៃ​អង្គារនេះ ដើម្បី ឈាន​ទៅ​បន្ធូរបន្ថយ​ភាពតានតឹង ដែល​ប្រទេស​ទាំងពីរ​កំពុង​មាន​ជាមួយ​គ្នា។ ទាំង លោក​បាន គីមូន អគ្គលេខាធិការ​អង្គការ​សហប្រជាជាតិ និង​ទីក្រុង​វ៉ាស៊ីនតោន​បាន​ស្វាគម ដំណឹង​នេះ។ 

ផ្សាយពាណិជ្ជកម្ម

បន្ទាប់ពី​បើក​ការចរចា យ៉ាង​ស្វិតស្វាញ តាំង​ពី​ថ្ងៃ​សៅរ៍ ប្រទេស​បងប្អូន​សត្រូវ​នឹងគ្នា កូរ៉េខាងជើង និង​កូរ៉េខាងត្បូង បាន​ស្វែងរក​ឃើញ កិច្ចព្រមព្រៀង​មួយ​នឹង​គ្នា ដែល​នៅក្នុង​នោះ កូរ៉េខាងជើង​បាន​សំដែង​ការសោកស្តាយ ចំពោះ​ព្រឹត្តិការណ៍ ផ្ទុះ​គ្រាប់មីន ដែល​បាន​ធ្វើ​ឲ្យ​របួស​ឆ្មាំ​ព្រំដែន​កូរ៉េខាងត្បូង ពីរនាក់ កាលពី​ថ្ងៃ​ទី ៤​សីហា​កន្លងទៅ។ នៅ​ក្នុង​ភាសា​ការទូត ការសោកស្តាយ​របស់​កូរ៉េខាងជើង មានន័យ​ស្មើ​នឹង​ការសុំទោស ដែល​កូរ៉េខាងត្បូង ធ្លាប់​បាន​ទាមទារ​ចង់បាន​ពី​កូរ៉េខាងជើង។ ការសំដែង​ការសោក​ស្តាយ​ពី​សំណាក់​កូរ៉េខាងជើង នេះ ក៏​ជា​រឿង​មិន​ធ្លាប់​មាន​ពីមុន​មក ព្រោះថា ទីក្រុង​ព្យុងយ៉ាង​​​តែង​បដិសេធ ជានិច្ច នឹង​ការចោទ​ប្រកាន់​របស់ របស់​កូរ៉េខាងត្បូង​ដែលថា កូរ៉េខាជើង បាន​ប្រើ​ទាហាន​ឲ្យ​លួច ចូល​ទៅ​បង្កប់​គ្រាប់មីន ក្បែរ​កន្លែង​ល្បាត​របស់​ទាហាន​កូរ៉េខាងត្បូង នៅ​ក្នុង​តំបន់​គ្មាន​កងទ័ព ដែល​ស្ថិតនៅ​ចន្លោះ​ប្រទេស​ទាំងពីរ។

 
នៅក្នុង​កិច្ច​ព្រមព្រៀង កូរ៉េខាងជើង សុខចិត្ត​សំដែង​ការសោកស្តាយ ប៉ុន្តែ ជាថ្នូរ​នឹង​ការសន្យា​ពី​កូរ៉េខាងត្បូង ដែល​ថា នឹង​ឈប់​ចាក់​ផ្សព្វផ្សាយ​សំឡេង​ឃោសនា បែបញុះញង់ នៅ​តាម​ព្រំដែន​កូរ៉េ​តទៅទៀត។ ឧឃោសន​ស័ព្ទ​ឃោសនា នៅ​តាម​ព្រំដែន ត្រូវ​បាន​កូរ៉េខាងត្បូង ផ្អាក​សកម្មភាព​រាប់ឆ្នាំ​មកហើយ ប៉ុន្តែ ទើប​នឹង​កម្រើក​ធ្វើ​សកម្មភាព​ឡើងវិញ នៅ២​សប្តាហ៍​ចុងក្រោយនេះ គឺ​បន្ទាប់ពី​ព្រឹត្តិការណ៍​ផ្ទុះគ្រាប់មីន ដែល​ធ្វើ​ឲ្យ​របួស​ទាហាន​កូរ៉េខាងត្បូង​តែប៉ុណ្ណោះ។ នៅក្នុង​កិច្ចព្រមព្រៀង ទីក្រុង​ព្យុងយ៉ាង និង​សេអ៊ូល​បាន​យល់ស្រប​គ្នា​ផងដែរ ថា នឹង​បើក​ឡើងវិញ នៅ​ខែ​កញ្ញា​ក្រោយ ឲ្យ​មាន​ការជួបជុំ​គ្រួសារ​កូរ៉េ ដែល​បែកបាក់​គ្នា ដោយសារ​តែ​សង្រ្គាមកូរ៉េ​ចន្លោះ​ឆ្នាំ ១៩៥០ និង​ឆ្នាំ ១៩៥៣។

តាម​ក្រសួង​ការពារ​ជាតិ​កូរ៉េខាងត្បូង សេអ៊ូល​សុខចិត្ត​ផ្អាក ឈប់​ចាក់​ផ្សាយ សំឡេង​ឃោសនា នៅ​តាម​ព្រំដែន​មែន ប៉ុន្តែ ទាហាន​កូរ៉េខាងត្បូង នៅ​តែ​បន្ត ឈរ ប្រុងជើង ជានិច្ច នៅ​តាម​ព្រំដែន ដើម្បី តាមដាន ឃ្លាំមើល​សកម្មភាព​ទ័ព​របស់​កូរ៉េខាងជើង។ កិច្ច​ព្រមព្រៀង រកឃើញ នៅ​ថ្ងៃ​អង្គារ​ត្រូវ​បាន​គេ​មើលឃើញ​ថា នឹង​ជួយ​កាត់បន្ថយ ភាពតានតឹង មួយ​កម្រិត នៅ​ខណៈ​ពេល​ដែល​កូរ៉េ​ទាំងពីរ​កំពុង​តែ​ត្រៀមខ្លួន ធ្វើ​សង្រ្គាម​ដាក់គ្នា​រួច​ទៅហើយ​នោះ។

ភាព​តានតឹង​នៅឧបទ្វីប​កូរ៉េ បាន​កើនឡើង​ខ្លាំង នៅ​មួយរយៈ​ចុងក្រោយ​នេះ បន្ទាប់ពី ក្រសួងការពារ​ជាតិ​កូរ៉េខាងត្បូង​បាន​រកឃើញ ថា ទៅតាម​បញ្ជា​ធ្វើ​សង្រ្គាម​របស់​មេដឹកនាំ​គីម ជុងអ៊ុន កូរ៉េខាងជើង​បាន​បញ្ចេញ​ នាវា​មុជទឹក ជាង​១០​គ្រឿង ទៅ​ក្នុង​សមុទ្រ​កូរ៉េ និង​បង្កើន​កម្លាំងទ័ព នៅ​តាម​ព្រំដែន។ កូរ៉េខាងត្បូង និង​អាមេរិក ដែល​មាន​កងទ័ព​របស់ខ្លួន​ប្រចាំការ​នៅ​កូរ៉េខាងត្បូង ប្រមាណ ៣ម៉ឺន​នាក់​បាន​​ឆ្លើយតបវិញ ដោយ​បានពង្រាយ​ទ័ព កាន់តែច្រើន និង បញ្ជូន​យន្តហោះ​ចម្បាំង ទៅហោះឆ្វែល ​នៅ​តាម​ព្រំដែន​កូរ៉េ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI