កូរ៉េខាងជើង

កូរ៉េខាងជើង៖អ្នកទោស​គ្រូគង្វាល​ជនជាតិ​កាណាដា​រៀបរាប់​ពី​ជីវិត​ក្នុង​គុក

លោក Hyeon Soo-lim អ្នកទោស​គ្រូគង្វាល​ជនជាតិ​កាណាដា​រៀបរាប់​ពី​ជីវិត​ក្នុង​គុកកូរ៉េខាងជើង
លោក Hyeon Soo-lim អ្នកទោស​គ្រូគង្វាល​ជនជាតិ​កាណាដា​រៀបរាប់​ពី​ជីវិត​ក្នុង​គុកកូរ៉េខាងជើង Reuters

នៅ​ក្នុង​ទឹកដី​កូរ៉េខាងជើង អ្នកទោស​គ្រូគង្វាល​ជនជាតិ​កាណាដា​ដើម​កំណើត​កូរ៉េ​​លោក Hyeon Soo Lim បាន​ផ្តល់​បទ​សម្ភាសន៍​ឲ្យ​ទូរទស្សន៍ CNN។ នៅ​ក្នុង​បទសម្ភាសន៍​នោះ លោក Lim បាន​រៀបរាប់​ពី​ជីវិត​របស់​លោក​នៅ​ក្នុង​ពន្ធនាគារ ពិសេស​ពី​ការងារ​ជីករណ្តៅ​ប្រចាំ​ថ្ងៃ​នៅ​ក្នុង​គុក​មួយ​ដែល​លោក​ជា​អ្នក​ទោស​តែ​ម្នាក់​ឯង​គត់​នៅ​ក្នុង​គុក​នោះ។ គួរ​ជម្រាប​ជូន​ថា លោក Lim ត្រូវ​បាន​តុលាការ​កូរ៉េខាងជើង​កាត់ទោស​កាល​ពី​ធ្នូ ឆ្នាំ ២០១៥ ឲ្យ​ធ្វើ​ការងារ​ដោយ​បង្ខំ​អស់​មួយ​ជីវិត​ពី​បទ​មាន​បំណង​ផ្តួល​រំលំ​រដ្ឋាភិបាល​ក្រុងព្យុងយ៉ាង។

ផ្សាយពាណិជ្ជកម្ម

គឺ​ជា​បទសម្ភាសន៍​មួយ​ដែល​ត្រូវ​បាន​រៀបចំ​ឡើង​នៅ​ក្នុង​សណ្ធាគារ​មួយ​ស្ថិត​ក្នុង​ទីក្រុង​ព្យុងយ៉ាង។ មាន​អាយុ ៦០ឆ្នាំ និង​មាន​ស្រុក​កំណើត​ក្នុង​ទឹកដី​កូរ៉េខាងត្បូង លោក Lim ចេះ​និយាយ​ភាសា​អង់គ្លេស​យ៉ាង​ស្ទាត់​ជំនាញ តែ​នៅ​ក្នុង​បទសម្ភាសន៍​ដែល​រៀបចំ​ដោយ​របប​ក្រុង​ព្យុងយ៉ាង លោក Lim ដែល​មាន​សម្លៀកបំពាក់​ពណ៌​ប្រផេះ​ជា​អ្នក​ទោស​ត្រូវ​បាន​គេ​បង្ខំ​ឲ្យ​និយាយ​ជា​ភាសា​កូរ៉េ។ គួរ​ជម្រាប​ជូន​ថា លោក Lim ត្រូវ​បាន​រដ្ឋអំណាច​កូរ៉េខាងជើង​ឃាត់​ខ្លួន​ក្នុង​ខែ​មករា ឆ្នាំ ២០១៥ បន្ទាប់​ពី​លោក​បាន​ឆ្លង​ព្រំដែន​ពី​ប្រទេស​ចិន​ចូល​ក្នុង​ទឹកដី​កូរ៉េខាងជើង។

រដ្ឋអំណាច​ក្រុង​ព្យុងយ៉ាង​មិន​ដែល​បាន​លើក​យក​ហេតុផល​ទៅ​ពន្យល់​ឲ្យ​បាន​ច្បាស់លាស់​ពី​មូលហេតុ​នៃ​ការ​ចាប់​ខ្លួន​លោក Lim នោះ​ទេ តែ​វិហារ​កាតូលិក​ក្នុង​ទីក្រុង​តូរ៉ុងតូ​បាន​អះអាង​ថា បេសកកម្ម​របស់​លោក Lim ក្នុង​ទឹកដី​កូរ៉េខាងជើង​មាន​គោលដៅ​មនុស្សធម៌​សុទ្ធសាធ។ តែ​បញ្ហា​នៅ​ត្រង់​ថា របប​ក្រុង​ព្យុងយ៉ាង​មិន​បាន​យល់​ឃើញ​ដូច្នោះ​ទេ និង​បាន​ចោទ​លោក Lim ពី​បទ​បាន​ឃោសនា​ព្យាយាម​ផ្តួលរំលំ​របប​កុម្មុយនិស្ត​កូរ៉េខាងជើង។ រដ្ឋអំណាច​ក្រុង​ព្យុងយ៉ាង​ឲ្យ​ដឹង​ថា រូប​លោក Lim ខ្លួន​ឯង​ក៏​បាន​ទទួល​ស្គាល់​ពី​ទង្វើ​ចោទ​ប្រកាន់​ទាំង​អស់​នោះ​ដែរ។

នៅ​ទីបំផុត​នា​ខែ​ធ្នូ​កន្លង​ទៅ លោក Lim ត្រូវ​បាន​តុលាការ​ក្រុង​ព្យុងយ៉ាង​កាត់ទោស​ឲ្យ​ធ្វើ​ការងារ​ដោយ​បង្ខំ​អស់​មួយ​ជីវិត។ នៅ​ក្នុង​បទសម្ភាសន៍​ជាមួយ​ទូរទស្សន៍ CNN លោក Lim បាន​រៀបរាប់​ឲ្យ​ដឹង​ថា លោក​បាន​ធ្វើ​ការងារ​ចំនួន ៨ម៉ោង​ក្នុង​មួយ​ថ្ងៃ និង ៦ថ្ងៃ​ក្នុង​មួយ​សប្តាហ៍។ លោក​ថា​ជា​រៀងរាល់​ថ្ងៃ លោក​ត្រូវ​បាន​គេ​ប្រើ​ឲ្យ​ជីករណ្តៅ។ ជា​រៀងរាល់​ថ្ងៃ លោក​ទទួល​បាន​អាហារ​ចំនួន ៣ដង និង​ថ្នាំពេទ្យ។ ជា​រៀងរាល់​ថ្ងៃ លោក​បាន​បន់ស្រន់​ឲ្យ​កូរ៉េខាងជើង និង​ខាងត្បូង​រួបរួម​គ្នា និង​សុំ​កុំ​ឲ្យ​ស្ថានការណ៍​ដូច​លោក​កើត​មាន​ជា​ថ្មី។

នៅ​ក្រោយ​បញ្ចប់​បទសម្ភាសន៍​រយៈពេល​ជិត ១ម៉ោង ឆ្នាំគុក​កូរ៉េខាងជើង​ក៏​បាន​នាំ​លោក Lim ត្រឡប់​ចូល​ពន្ធនាគារ​វិញ តែ​ទន្ទឹម​គ្នា​នោះ ក៏​បាន​បង្ហាញ​រូប​អ្នកទោស​ជនជាតិ​អាមេរិកាំង​ដើមកំណើត​កូរ៉េ​ម្នាក់​ទៀត​ឈ្មោះ Kim Dong-Chul អាយុ ៦២ឆ្នាំ​ដែល​ចាប់​ខ្លួន​ក្នុង​ខែ​តុលា ឆ្នាំ ២០១៥ ពី​បទ​ចារកិច្ច។នេះ​ជា​រឿង​ដ៏​គួរ​ឲ្យ​ភ្ញាក់ផ្អើល ព្រោះ​ដំណឹង​អ្នក​ទោស​លោក Chul មិន​ត្រូវ​បាន​រដ្ឋអំណាច​អាមេរិក ឬ​កូរ៉េខាងជើង​ធ្លាប់​បាន​ប្រកាស​ឲ្យ​ដឹង​ទេ​នា​ពេល​កន្លង​មក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI