អានតួអត្ថបទ
ថៃ

ពួកអាវក្រហម​ចុះញ៉ម​ក្រោយពី​ទាហាន​គំរាម​បាញ់​គ្រាប់​មែនទែន

ទាហានថៃ​បំពាក់ដោយ​អាវុធ​ទំនើបៗ នៅព័ទ្ធជុំវិញ​កន្លែង​បាតុកម្ម​អាវក្រហម
ទាហានថៃ​បំពាក់ដោយ​អាវុធ​ទំនើបៗ នៅព័ទ្ធជុំវិញ​កន្លែង​បាតុកម្ម​អាវក្រហម ©Reuters
ដោយ៖ សេង ឌីណា
១២ នាទី

បាតុករ​អាវក្រហម​បាន​សម្រេច​លុបចោល​គម្រោង​ដើរ​ដង្ហែរក្បួន នៅថ្ងៃ​អង្គារនេះ ក្រោយ​ពី​កងទ័ពថៃ​បាន​គំរាម​ច្បាស់ៗ​ថា នឹង​ប្រើ​គ្រាប់​កាំភ្លើង​មែនទែន​បាញ់​ទៅ​លើ​បាតុករ នៅ​ក្នុង​ការប៉ះទង្គិចគ្នា​លើក​ក្រោយ។ ក៏ប៉ុន្តែ ពួក​បាតុករ​កំពុង​តែ​ពង្រឹង​កម្លាំង​​​កាន់កាប់​ទីតាំង​ចាស់​របស់​ពួកគេ កុំ​ឲ្យ​ពួក​ទាហាន​ដណ្តើម​បាន។

ផ្សាយពាណិជ្ជកម្ម

១០​ថ្ងៃ​ក្រោយ​​ពីបរាជ័យ​ក្នុង​ការ​បង្រ្កាប​បាតុកម្ម បណ្តាល​ឲ្យ​មនុស្ស​​ជាង ២០​នាក់​ស្លាប់ និង​​ប្រមាណ ៨០០​នាក់​របួស រដ្ឋាភិបាល​ថៃ​បាន​ប្តូរផ្តាច់​ថា​នឹង​បញ្ចប់​បាតុកម្ម​អាវក្រហម​ឲ្យ​បាន បើ​ទោះជា​ត្រូវ​ប្រើ​គ្រាប់​កាំភ្លើង​មែនទែន​ក៏ដោយ។ ក៏ប៉ុន្តែ រដ្ឋាភិបាល​បាន​បដិសេធ​មិន​​បញ្ជាក់ថា តើ​កងទ័ព​នឹង​ចូល​ទៅ​បង្រ្កាប​​បាតុករ​នៅពេលណានោះទេ។

នៅ​ថ្ងៃ​ អង្គារនេះ ពួក​អាវក្រហម​គ្រោង​នាំ​គ្នា​ដង្ហែក្បួន ឆ្ពោះ​ទៅ​សង្កាត់​ជំនួញ​ ក្នុង​ក្រុងបាងកក។ ក៏ប៉ុន្តែ កងទ័ព និង​ប៉ូលិស​ថៃ ត្រូវ​បាន​​គេ​ដាក់ពង្រាយ នៅពេញ​សង្កាត់​ជំនួញ​នោះ​រួច​ទៅហើយ។ អ្នកនាំពាក្យ​កងទ័ពថៃ​បាន​ប្រកាស​ជា​សាធារណៈ​ថា ប្រសិន​បើ​​ពួក​បាតុករ​ហ៊ាន​ចូល​ទៅ​ក្នុង​សង្កាត់​ជំនួញនោះ ការប៉ះទង្គិច​គ្នា​នឹង​កើត​មាន​ឡើង​ជា​មួយ​​ទាហាន។ អ្នកនាំពាក្យ​រូបនេះ​បាន​ព្រមាន​ថា នៅ​ក្នុង​ករណី​មានការប៉ះទង្គិច​គ្នា​សាជាថ្មី​ទៀត ទាហាន​នឹង​ប្រើ​គ្រាប់​កាំភ្លើង​មែនទែន​បាញ់​ទៅលើ​បាតុករ។

ប្រឈមមុខ​ នឹង​ការគំរាម​ច្បាស់ៗ​បែបនេះ ពួក​អាវក្រហម​ក៏​បាន​លុបគម្រោង​ដើរ​ដង្ហែ​ក្បួននេះ​វិញ ហើយ​នាំ​គ្នា​ប្រមូល​ផ្តុំ​គ្នា​នៅ​តែ​មួយ​កន្លែង។ ក៏ប៉ុន្តែ ពួក​គេ​បាន​ចាប់​ផ្តើម​ពង្រឹង​សន្តិសុខ នៅ​កន្លែង ដែល​ពួក​គេ​កំពុង​កាន់កាប់​បច្ចុប្បន្ន ដោយ​បង្កើត​ជា​ក្រុម​រក្សា​សន្តិសុខ ពង្រាយ​នៅ​តាម​ច្រក​ចេញចូល​ទាំងអស់។

មេដឹកនាំ​អាវក្រហម​បាន​ព្រមាន​ ថា ប្រសិន​បើ​រដ្ឋាភិបាល​ធ្វើ​ការ​បង្រ្កាប​ជាថ្មីម្តងទៀត ពួក​គេ​ត្រៀម​ខ្លួន​រួចជាស្រេច​ ដើម្បី​ធ្វើ​ការ​វាយតបតវិញ ហើយ​សង្រ្គាមស៊ីវិល​អាច​នឹង​ផ្ទុះ​ឡើង។

យោងតាម​រូបភាព ដែល​ចុះផ្សាយ​ដោយ​កាសែតថៃ គេឃើញ​ពួក​អាវក្រហម​បាន​ប្រមូល​ដំបង​ឫស្សី​ដាក់ជា​គំនរ ហើយ​កំពុង​តែ​នាំ​គ្នា​សម្រួច​ចុងឫស្សី​ទាំងនោះ ដើម្បី​ទុក​​ធ្វើ​ជា​អាវុធ​ទប់ទល់​នឹង​កម្លាំង​រដ្ឋាភិបាល ដែល​សុទ្ធតែ​ជា​កងកម្លាំង​ពិសេស ហើយ​​បំពាក់ទៅ​ដោយ​អាវុធ​ទំនើបៗ។

នៅពេលនេះ លោក​ឆាវ៉ាលីត យ៉ុងឆៃយុត ប្រធាន​គណបក្ស​ភឿថៃ និង​លោក​ស៊ុម​ឆៃ វង្ស​សាវ៉ាត អតីត​នាយករដ្ឋមន្រ្តី និង​ត្រូវ​ជា​ប្អូនថ្លៃ​របស់​លោក​ថាក់ស៊ីន កំពុង​តែ​ព្យាយាម​សុំ​ជួប​ព្រះមហាក្សត្រ​ថៃ ដើម្បី​សុំ​ឲ្យ​ព្រះអង្គ​ធ្វើ​អន្តរាគមន៍​បញ្ចប់​វិបត្តិ​នយោបាយ​ បច្ចុប្បន្ន។

នៅ​ថ្ងៃ​នេះ លោក​ស៊ុទេព បាន​ថ្លែង​ថា ការសុំ​អន្តរាគមន៍​ពីព្រះមហាក្សត្រ​នេះ​ គឺ​ជា​រឿង​មិន​សមរម្យ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ