អានតួអត្ថបទ
កូរ៉េខាងត្បូង-អាមេរិក

កូរ៉េខាងត្បូង-អាមេរិក៖លោកចន ឃ៊ែរី​ព្រមាន​ដាក់​​ទ័ណ្ឌកម្ម​ថ្មី​ប្រឆំាង​នឹង​កូរ៉េខាងជើង

លោក​ប្រមុខ​ការទូត​អាមេរិក​ចន ឃ៊ែរី និង​​សមភាគី​កូរ៉េខាងត្បូង​លោកយុន យ៉ុងសេ ក្នុង​ទីក្រុង​សេអ៊ូល
លោក​ប្រមុខ​ការទូត​អាមេរិក​ចន ឃ៊ែរី និង​​សមភាគី​កូរ៉េខាងត្បូង​លោកយុន យ៉ុងសេ ក្នុង​ទីក្រុង​សេអ៊ូល Reuters
១៧ នាទី

បន្ទាប់​ពី​ប្រទេស​ចិន លោក​ប្រមុខ​ការទូត​អាមេរិក​ចន ឃ៊ែរី​បាន​ទៅ​បំពេញ​ទស្សនកិច្ច​ក្នុង​ទឹកដី​កូរ៉េខាងត្បូង​នៅ​ថ្ងៃ​ចន្ទ ទី១៨ ឧសភា​នេះ។ នៅ​ក្នុង​សន្និសីទ​កាសែត​រួម​គ្នា​ជាមួយ​សមភាគី​កូរ៉េខាងត្បូង​លោក​យុន យ៉ុងសេ លោក​ឃ៊ែរី​បាន​ព្រមាន​ដាក់​ទ័ណ្ឌកម្ម​ថ្មី​ប្រឆំាង​នឹង​កូរ៉េខាងជើង ប្រសិន​បើ​របប​ក្រុង​ព្យុងយ៉ាង​បន្ត​ធ្វើ​ការ​សាកល្បង​នុយក្លេអ៊ែរ​ជា​ថ្មី។ ទន្ទឹម​គ្នា​នេះ ប្រមុខ​ការទូត​អាមេរិក​ក៏​បាន​អំពាវនាវ​ឲ្យ​សហគមន៍​អន្តរជាតិ​បន្ត​ចាត់​វិធានការ​លើ​ទង្វើ​រំលោភ​សិទ្ធិមនុស្ស​យ៉ាង​កម្រោល​របស់​មនុស្សខ្លំាង​កូរ៉េខាងជើង គីម ជុនអ៊ុន។

ផ្សាយពាណិជ្ជកម្ម

វត្តមាន​របស់​លោក​ប្រមុខ​ការទូត​អាមេរិក​ចន ឃ៊ែរី​ក្នុង​ទឹកដី​កូរ៉េខាងត្បូង​ពេល​នេះ​បាន​ធ្វើ​ឡើង បន្ទាប់​ពី​កូរ៉េខាងជើង​បាន​បាញ់​សាកល្បង​គ្រាប់មីស៊ីល​ចេញ​ពី​នាវា​មុជទឹក និង​ការ​ប្រហារ​ជីវិត​រដ្ឋមន្រ្តី​ការពារជាតិ​ឧត្តមសេនីយ Hyon Yong-Chol។ លោក​ឃ៊ែរី​បាន​យល់​ឃើញ​ថា បើ​កូរ៉េខាងជើង​អាច​អភិវឌ្ឍន៍​កម្មវិធី​គ្រាប់មីស៊ីល​បាញ់​ចេញ​ពី​នាវាមុជទឹក​បាន ១០០% នោះ ការ​គំរាម​នុយក្លេអ៊ែរ​មិន​ត្រឹម​មាន​តែ​ចំពោះ​កូរ៉េខាងត្បូង​ក្បែរ​ខាង​ប៉ុណ្ណោះ​ទេ តែ​អាច​នឹង​ឆ្លង​រាតត្បាត​ផុត​ពី​ឧបទ្វីប​កូរ៉េ​ទៅ​ទៀត។ សម្រាប់​លោក​ចន ឃ៊ែរី ទង្វើ​បាញ់​សាកល្បង​គ្រាប់មីស៊ីល​ចេញ​ពី​នាវាមុជទឹក​របស់​កូរ៉េខាងជើង​ជា​ភស្តុតាង​ថ្មី​មួយ​ទៀត​ដែល​បញ្ជាក់​ថា របបក្រុង​ព្យុងយ៉ាង​មិន​បាន​ត្រៀម​ខ្លួន​ដើម្បី​រួមរស់​ជាមួយ​សហគមន៍​អន្តរជាតិ​ទេ និង​ថា វា​ជា​ទង្វើ​រំលោភ​លើ​ច្បាប់​អន្តរជាតិ។

អ៊ីចឹង​ហើយ​បាន​ជា​លោក​ឃ៊ែរី​បាន​អំពាវនាវ​ឲ្យ​សហគមន៍​អន្តរជាតិ​បន្ត​ដាក់​គំនាប​លើ​កូរ៉េខាងជើង​ដើម្បី​ឲ្យ​របបកុម្មុនិស្ត​ស្តាលីននិយម​មួយ​នេះ​ផ្លាស់ប្តូរ​ឥរិយាបទ​របស់​ខ្លួន។ អ្វី​ដែល​លោក​ឃ៊ែរី​ចង់​បាន​នៅ​ចំពោះ​មុខ គឺ​ការ​​ដាក់​ទ័ណ្ឌកម្ម​ថ្មី​ប្រឆំាង​កូរ៉េខាងជើង ឬ​មួយ​ក៏​វិធានការ​ផ្សេង​ទៀត។ នា​ពេល​បំពេញ​ទស្សនកិច្ច​ក្នុង​ប្រទេស​ចិន លោក​ឃ៊ែរី​បាន​លើក​ឡើង​ពី​ក្តី​សង្ឃឹម​ក្នុង​ការ​យក​កិច្ចព្រមព្រៀង​នុយក្លេអ៊ែរ​ជាមួយ​អ៊ីរ៉ង់​ទៅ​ធ្វើ​ជា​គំរូ​សម្រាប់​ដំណោះស្រាយ​នុយក្លេអ៊ែរ​កូរ៉េខាងជើង ដោយ​បាន​ជម្រុញ​ឲ្យ​មាន​ការ​ចាប់​ផ្តើម​ជា​ថ្មី​នូវ​កិច្ចចរចា ៦ភាគី។ កិច្ចចរចា​ដែល​សំដៅ​ឲ្យ​កូរ៉េខាងជើង​បោះបង់​ចោល​កម្មវិធី​នុយក្លេអ៊ែរ​ជា​ថ្នូរ​នឹង​ជំនួយ​សេដ្ឋកិច្ច ព្រម​ទំាង​ការ​ធានា​សន្តិសុខ។ តែ​កិច្ចចរចា​ត្រូវ​បាន​ផ្អាក​តំាង​ពី​ខែ​ធ្នូ ឆ្នំា ២០០៨ មក​ម្ល៉េះ។

ក្រៅ​ពី​បញ្ហា​នុយក្លេអ៊ែរ លោក​ឃ៊ែរី​ក៏​បាន​លើក​ឡើង​ពី​បញ្ហា​រំលោភ​សិទ្ធិមុនុស្ស​នៅ​កូរ៉េខាងជើង​ដែរ ពិសេស​ទាក់ទង​នឹង​ការ​ប្រហារ​ជីវិត​រដ្ឋមន្រ្តី​ក្រសួង​ការពារជាតិ​ថ្មីៗ​នេះ។ ព័ត៌មាន​ផ្តល់​ដោយ​ក្រសួង​ស៊ើបការណ៍សម្ងាត់​កូរ៉េខាងត្បូង​ឲ្យ​ដឹង​ថា បើ​គិត​តំាង​ពី​ដើម​ឆ្នំា ២០១៥ នេះ​មក មាន​មន្រ្តី​កូរ៉េខាងជើង​សរុប ១៥នាក់​ត្រូវ​បាន​គេ​សម្លាប់​ចោល​ពី​បទ​មាន​គំនិត​ក្បត់​នឹង​អគ្គមគ្គុទេសក៍​វ័យក្មេង​គីម ជុងអ៊ុន។ លោក​ឃ៊ែរី​បាន​បញ្ជាក់​ថា វា​ជា​រឿង​ចំាបាច់ និង​បន្ទាន់​បំផុត​ដែល​សហគមន៍​អន្តរជាតិ​ត្រូវ​ស្វែង​យល់​ពី​ទង្វើ​រំលោភ​សិទ្ធិមនុស្ស​នៅ​កូរ៉េខាងជើង។ គួរ​រម្លឹក​ជូន​ថា​ថ្មីៗ​នេះ របាយការណ៍​ស្តីពី​សិទ្ធិមនុស្ស​នៅ​កូរ៉េខាងជើង​ដែល​ចេញ​ផ្សាយ​ដោយ​អង្គការ​សហប្រជាជាតិ​បាន​ទាមទារ​ឲ្យ​បញ្ជូន​កូរ៉េខាងជើង​ទៅ​កាត់​ទោស​នៅ​តុលាការ​ព្រហ្មទ័ណ្ឌ​អន្តរជាតិ​ក្រុង​ឡាអេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ