អានតួអត្ថបទ
កម្ពុជា

គណៈ​កម្មការ​ទី​១​ រដ្ឋ​សភា ​ទទួល​បណ្តឹង​ដី​ធ្លី ​៥៧ ​បណ្តឹង

ពលរដ្ឋបាននាំគ្នាមកតវ៉ារកដំណោះស្រាយពីបញ្ហាដីធ្លីនាពេលកន្លងមក។
ពលរដ្ឋបាននាំគ្នាមកតវ៉ារកដំណោះស្រាយពីបញ្ហាដីធ្លីនាពេលកន្លងមក។ RFI/ Ly Meng Hour
ដោយ៖ លី ម៉េងហួរ
១៥ នាទី

គិត​ចាប់​តាំង​ពី​ខែ​សីហា ​រហូត​ដល់​ពាក់​កណ្តាល​ខែ​កញ្ញា​នេះ ​គណៈ​កម្មការ​​ទី​១ ​រដ្ឋ​សភា ​គឺ​គណៈ​កម្មការ​សិទ្ធិ​មនុស្ស ​ទទួល​ពាក្យ​បណ្តឹង ​អង្កេត ​និង​ទំនាក់​ទំនង​រដ្ឋសភា ​ព្រឹទ្ធសភា ​បាន​ទទួល​ពាក្យ​បណ្តឹង​ដី​ធ្លី ​ចំនួន​ ៥៧ ​បណ្តឹង។ ​អ្នក​តំណាង​រាស្ត្រ ​ជា​សមាជិក​គណៈ​កម្មការ​ទី​១ ​មក​ពី​គណបក្ស​ប្រជាជន​កម្ពុជា ​និង​គណបក្ស​សង្គ្រោះ​ជាតិ ​នៅ​សប្តាហ៍​ក្រោយ ​នឹង​ចុះ​ទៅ​ដី​ជម្លោះ ​ដើម្បី​ស្វែង​រក​ដំណោះ​ស្រាយ​មុន​គេ ​លើ​ករណី​ជម្លោះ​ដី​រវាង​ប្រជា​ពលរដ្ឋ​ឡពាង​ នៅ​ខេត្ត​កំពង់​ឆ្នាំង​ និង​ក្រុម​ហ៊ុន​ KDC។

ផ្សាយពាណិជ្ជកម្ម

ក្នុង​រយៈ​ពេល​ប្រហែល​ជា ​១ ​ខែ​សោះ ​គណៈ​កម្មការ​សិទ្ធិ​មនុស្ស ​ទទួល​ពាក្យ​បណ្តឹង​ អង្កេត និង​ទំនាក់​ទំនង​រដ្ឋសភា ​ព្រឹទ្ធសភា ​របស់​រដ្ឋសភា ​ទទួល​បាន​ពាក្យ​បណ្តឹង ​៥៧ ​បណ្តឹង។ ​គណៈ​កម្មការ​ទី​១ ​ដឹក​នាំ​ដោយ​គណបក្ស​សង្គ្រោះ​ជាតិ ​និង​មាន​សមាជិក​ជា​អ្នក​តំណាង​រាស្ត្រ ​មក​ពី​គណបក្ស​ប្រជាជន​កម្ពុជា ​និង​គណបក្ស​សង្គ្រោះ​ជាតិ ​បាន​បើក​ការ​ស៊ើប​អង្កេត ​ស្វែង​រក​ដំណោះ​ស្រាយ​មុន​គេ ​លើ​ករណី​ជម្លោះ​ដី ​រវាង​ប្រជា​ពលរដ្ឋ ​និង​ក្រុមហ៊ុន ​KDC​ នៅ​ភូមិ​ឡ​ពាង​ ខេត្ត​កំពង់​ឆ្នាំង។

ចាប់​តាំង​ពី​ដើម​ខែ​កញ្ញា ​ក្នុង​ករណី​ជម្លោះ​ដី​នៅ​ឡ​ពាង ​គណៈ​កម្មការ​​ទី​១ ​បាន​ជួប​ជា​មួយ​តំណាង​ប្រជា​ពលរដ្ឋ​ ភាគី​ក្រុមហ៊ុន ​និង​អង្គការ​សង្គម​ស៊ីវិល។ ​លោក​ ជា ប៉ូច ​អ្នក​តំណាង​រាស្ត្រ​គណបក្ស​សង្គ្រោះ​ជាតិ ​និង​លោក​ស្រី ​ឡោក ​ខេង​ អ្នក​តំណាង​រាស្ត្រ​ មក​ពី​គណបក្ស​ប្រជាជន​កម្ពុជា​ ជា​សមាជិក​គណៈ​កម្មការ​ទី​១ ​របស់​រដ្ឋសភា ​ទទួល​បន្ទុក​ដោះ​ស្រាយ​ជម្លោះ​ដី​នៅ​ឡ​ពាង។

លោក​ ជា​ ប៉ូច​ បាន​ឲ្យ​ដឹង​ថា ​នៅ​ពេល​មាន​ការ​យល់​ព្រម​ពី​ប្រធាន​រដ្ឋសភា ​តាម​រយៈ​លិខិត​របស់​ប្រធាន​គណៈ​កម្មការ​ទី​១ ​គឺ​អាច​នៅ​សប្តាហ៍​ក្រោយ​នេះ ​លោក​ និង​លោក​ស្រី ​ឡោក​ ខេង​ នឹង​ចុះ​បេស​កកម្ម​ទៅ​ដី​ជម្លោះ ​នៅ​ឡពាង​ ដើម្បី​ស៊ើប​អង្កេត​ ព្រម​ទាំង​ជួប​ប្រជា​ពលរដ្ឋ ​ក្រុមហ៊ុន ​KDC ​និង​អាជ្ញាធរ​មូលដ្ឋាន។

លោក ​ជា ប៉ូច ​បាន​បញ្ជាក់​ថា ​ប្រជា​ពលរដ្ឋ​ឡពាង​ និង​ក្រុមហ៊ុន ​KDC​ បាន​បង្ហាញ​ឆន្ទៈ​ សម្រប​សម្រួល ​ដោះ​ស្រាយ​ ដូច្នេះ​គណៈ​កម្មការ​ទី​១ ​នឹង​សំរប​សំរួល​រក​ច្រក​ចេញ ​ឲ្យ​គ្រប់​ភាគី​ពាក់ព័ន្ធ​ ទទួល​យក​បាន។

ជា​ជំហ៊ាន​បន្ទាប់​ លោក​តំណាង​រាស្ត្រ ​ជា ​ប៉ូច ​បាន​បញ្ជាក់​ថា ​គណៈ​កម្មការ​ទី​១ ​រដ្ឋ​សភា ​នឹង​ដោះ​ស្រាយ​ករណី​ជម្លោះ​ដី ​នៅ​បុរី​កីឡា ​និង​នៅ​តំបន់​បឹង​កក់ ​ក្នុង​រាជធានី​ភ្នំពេញ។​ ចំណែក​ករណី​ជម្លោះ​ដី​ធ្លី​ នៅ​ខេត្ត​បន្ទាយ​មាន​ជ័យ​ លើ​អតីត​យោធិន​ពិការ​ ដែល​បាន​ឡើង​មក​តវ៉ា ​និង​ស្នាក់​នៅ​វត្ត​ស្ទឹង​មាន​ជ័យ ​ត្រូវ​បាន​លោក​ជា​ប៉ូច​ អះ​អាង​ថា ​ប្រធាន​គណៈ​កម្មការ​ទី​១ ​តាម​រយៈ​ប្រធាន​រដ្ឋ​សភា ​បាន​សរសេរ​លិខិត ​ជំរុញ​ឲ្យ​អាជ្ញាធរ​ខេត្ត​បន្ទាយ​មាន​ជ័យ​ ដោះ​ស្រាយ​ ហើយ​អាជ្ញាធរ​ខេត្ត​បន្ទាយ​មាន​ជ័យ ​ក៏​បាន​ជួប​ប្រជា​ពលរដ្ឋ​រួច​ហើយ​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ