អានតួអត្ថបទ
កម្ពុជា

ក្រុម​​អ្នក​ភូមិ​បឹង​កក់ តវ៉ា​បិទ​ផ្លូវ​មុខសាលា​ក្រុង ទាមទារ​ដំណោះ​ស្រាយ

ក្រុម​អ្នក​ភូមិ​បឹង​កក់ និង​ព្រះសង្ឃ តវ៉ា​បិទ​ផ្លូវ​នៅ​មុខ​សាលា​រាជធានី​ភ្នំពេញ ព្រឹក​ថ្ងៃ​ទី​២៣​ធ្នូ ឆ្នាំ​២០១៣។
ក្រុម​អ្នក​ភូមិ​បឹង​កក់ និង​ព្រះសង្ឃ តវ៉ា​បិទ​ផ្លូវ​នៅ​មុខ​សាលា​រាជធានី​ភ្នំពេញ ព្រឹក​ថ្ងៃ​ទី​២៣​ធ្នូ ឆ្នាំ​២០១៣។ RFI/Im Rachna
ដោយ៖ អ៊ឹម រចនា
១៦ នាទី

ក្រុម​អ្នក​​ភូមិ​បឹង​កក់ ទាំង​អ្នក​បាន​សំណង​រួច និង​មិន​ទាន់​ទទួល​បាន​សំណង ព្រម​ទាំង​​ព្រះ​សង្ឃ​ប្រមាណ​៥០​នាក់​និង​អង្គ បាន​ជួប​ជុំ​គ្នា​តវ៉ា​នៅ​មុខ​សាលា​ក្រុង សា​ជា​ថ្មី​នៅ​ព្រឹក​ថ្ងៃ​ទី​២៣ធ្នូ​នេះ។ ការ​តវ៉ា​ទាមទារ​រក​ដំណោះ​ស្រាយ ដែល​មាន​ទាំង​ការ​បិទ​ផ្លូវ​ព្រះ​មុនីវង្ស បណ្ដាល​ឲ្យ​ការ​ធ្វើ​ចរាចរ​ណ៍​តាម​ផ្លូវ​នេះ កក​ស្ទះ​អស់​ពេល​យ៉ាង​យូរ។ ក្រុម​អ្នក​ភូមិ​និង​ព្រះ​សង្ឃ អះអាង​ថា នឹង​បិទ​ផ្លូវ​តវ៉ា​រហូត​ទាល់​តែ​លោក​អភិបាល​សាលា​រាជធានី​ភ្នំពេញ ចេញ​មក​ជួប​ពួក​គាត់។

ផ្សាយពាណិជ្ជកម្ម

ក្រុម​អ្នក​ភូមិ​បឹង​កក់ ព្រម​ទាំង​ព្រះសង្ឃ ​ប្រមាណ​ជា​៥០​នាក់​និង​អង្គ ​បាន​ឈរ​​​តវ៉ា​បិទ​ផ្លូវ​នៅ​មុខ​សាលា​រាជធានី​ភ្នំពេញ តាំងពី​ម៉ោង​៩​ព្រឹក ថ្ងៃ​ចន្ទ​ទី​២៣​ធ្នូ។ ការ​តវ៉ា​របស់​​​អ្នក​ភូមិ​បឹង​កក់​នេះ ធ្វើ​ឡើង​ដើម្បី​ទាមទារ​ឲ្យ​សាលា​រាជធានី​ភ្នំពេញ ដោះ​ស្រាយផ្ដល់​សំណង និង​ប័ណ្ណ​កម្មសិទ្ធិ​ដី​ធ្លី​ជូន​ពួក​គាត់ ឲ្យ​បាន​ឆាប់។

ក្រុម​អ្នក​ភូមិ​បឹង​កក់ ដែល​ឈរ​តវ៉ា​នៅ​ព្រឹក​ថ្ងៃ​ចន្ទ​នេះ រួម​មាន​ទាំង​អតីត​អ្នក​ភូមិ​បឹង​កក់​ដែល​បាន​ទទួល​សំណង​រួច និង​អ្នក​ភូមិ​បឹង​កក់​ដែល​មិន​ទាន់​បាន​ទទួល​សំណង។ អតីត​អ្នក​ភូមិ​បឹង​កក់ ដែល​បាន​ទទួល​សំណង​រួច អះអាង​ថា សំណង​ចំនួន​៨ពាន់​ដុល្លារ ដែល​ខ្លួន​បាន​ទទួល​នោះ មិន​អាច​ឲ្យ​ពួក​គាត់​រក​បាន​ទី​លំនៅ​បាន​សមរម្យ នៅ​ក្នុង​ទី​ប្រជុំជន​ទេ។ ហើយ​ការ​តវ៉ា​របស់​ពួក​គាត់​ថ្ងៃ​នេះ គឺ​ចង់​បាន​សំណង​បន្ថែម​ទៀត។ ចំណែក​អ្នក​ភូមិ​បឹង​កក់​ដែល​មិន​ទាន់​បាន​ទទួល​សំណង បាន​ទាមទារ​ឲ្យ​សាលា​រាជធានី​ភ្នំពេញ ពន្លឿន​ការ​វាស់​វែង​ដី និង​ផ្ដល់​ប័ណ្ណ​កម្មសិទ្ធិ​ដី​ធ្លី​ជូន​ពួក​គាត់ ឲ្យ​បាន​ឆាប់​រហ័ស។

​ក្រុម​អ្នក​ភូមិ​បឹង​កក់ និង​ព្រះសង្ឃ បាន​បន្ត​ការ​តវ៉ា​បិទ​ផ្លូវ​​រហូត​ដល់​ម៉ោង​១០​និង​៣០​នាទី ទើប​យល់​ព្រម​បើក​ផ្លូវ​ឲ្យ​មាន​ការ​ចរាចរ​ណ៍​ដូច​ដើម​វិញ បន្ទាប់​​សាលា​រាជធានី​ភ្នំពេញ អនុញ្ញាត​ឲ្យ​តំណាង​អ្នក​ភូមិ​ចំនួន​៧​នាក់ ចូល​ជួប​ពិភាក្សា​ជាមួយ​តំណាង​សាលារាជធានី។

លោក ឡុង ឌីម៉ង់ អ្នក​នាំ​ពាក្យ​សាលា​រាជធានី​ភ្នំពេញ​ បាន​បញ្ជាក់​ប្រាប់​វិទ្យុ​បារាំង​អន្ដរជាតិ​ថា ការ​ជួប​ពិភាក្សា​នោះ មិន​បាន​ប្រព្រឹត្ត​ទៅ​ទេ ព្រោះតំណាង​​​ក្រុម​អ្នក​ភូមិបឹង​កក់​ង៉ក់ងរ មិន​ព្រម​ជួប​ជាមួយ​​លោក​ឃួន ស្រេង អភិបាលរង​សាលា​រាជធានី​ភ្នំពេញ ដោយ​ទាមទារ​ជួប​ជាមួយ​ អភិបាល​សាលា​រាជធានី​ភ្នំពេញ លោក ប៉ា សុជាតិវង្ស។  បើ​តាម​លោក​ឡុង ឌីម៉ង់​ដដែល លោក​ប៉ា សុជាតិវង្ស ក្រោយ​មក​បាន​យល់​ព្រម​ជួប​ជាមួយ​តំណាង​ក្រុម​អ្នក​ភូមិ​បឹង​កក់ តែ​ពួក​គាត់​បែរ​ជា​ប្ដូរ​ជំហរមិន​ព្រម​ចូល​ជួប ហើយ​ទាមទារ​ឲ្យ​លោក​អភិបាល​សាលា​រាជធានី​ភ្នំពេញ ចេញ​មក​ជួប​ពួកគាត់​នៅ​ខាង​មុខ​សាលា​រាជធានី​វិញ។

ក្រុម​អ្នក​ភូមិ​បឹង​កក់​និង​ព្រះ​សង្ឃ បាន​បិទ​ផ្លូវ​សា​ជា​ថ្មី ដើម្បី​តវ៉ា ទាមទាររក​​ដំណោះ​ស្រាយ​។ តំណាង​អ្នក​ភូមិ​បឹង​កក់ លោក​ស្រី​សុង ស្រីលាភ បាន​អះអាង​ប្រាប់​វិទ្យុ​បារាំង​អន្ដរជាតិ​នៅ​ម៉ោង​១២​ថ្ងៃ​ត្រង់​ថា ក្រុម​អ្នក​ភូមិ​និង​ព្រះ​សង្ឃ នឹង​បិទ​ផ្លូវ​តវ៉ា​រហូត​ទាល់​តែ​លោក​អភិបាល​សាលា​រាជធានី​ភ្នំពេញ ចេញ​មក​ជួប​ពួក​គាត់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ