ព្រឹត្តិការណ៍អន្តរជាតិប្រចាំថ្ងៃ

ផ្កាយរណប​ចិន​ចាប់បាន​រូបភាព​​វត្ថុ​អណ្តែតទឹក​៣ដុំ​ អាចជា​បំណែក​របស់​យន្តហោះ​បូអ៊ីង​៧៧៧​ដែល​បាត់ខ្លួន​

សំឡេង ០៥:៣០
បុរស​ម្នាក់​កំពុង​មើល​រូបភាព​បង្ហាញពី​ជើងហោះហើរ​យន្តហោះ​​ផ្សេងៗ ដែល​ត្រូវ​ធ្វើដំណើរ​ចេញ​ពី​អាកាសយានដ្ឋាន​ក្រុងកូឡាឡុំពួរ។
បុរស​ម្នាក់​កំពុង​មើល​រូបភាព​បង្ហាញពី​ជើងហោះហើរ​យន្តហោះ​​ផ្សេងៗ ដែល​ត្រូវ​ធ្វើដំណើរ​ចេញ​ពី​អាកាសយានដ្ឋាន​ក្រុងកូឡាឡុំពួរ។ REUTERS/Damir Sagolj

នៅល្ងាច​ថ្ងៃ​ពុធ ម្សិលមិញ ចិន​បាន​​​ប្រកាស​ថា ផ្កាយរណប​ខ្លួន​​បានចាប់​បាន​រូបភាព​វត្ថុ​អណ្តែត​ទឹក​​ចំនួន​៣ដុំ អាច​ជា​បំណែក​របស់​យន្តហោះ​បូអ៊ីង​៧៧៧ ជើងហោះហើរ​លេខ​៣៧០ ដែល​បាន​បាត់ខ្លួន​​ ចន្លោះ​ប្រទេស​វៀតណាម​ និង​ម៉ាឡេស៊ី​ ​តាំង​ពី​ថ្ងៃ​សៅរ៍មក​។ តែ​​​រូបភាព​​សាតឺលីត​​បង្ហាញ​ពី​វត្ថុ​ទាំងនេះ ជារូបភាព​ថតបាន​​តាំង​ពី​ថ្ងៃ​អាទិត្យ​មក​ម្ល៉េះ។ អាជ្ញាធរ​វៀតណាម​ និង​ម៉ាឡេស៊ី​ បាន​ប្រញាប់ប្រញាល់​ចុះ​ទៅ​​រក​បំណែក​អណ្តែតទឹក​ទាំងនោះ​​ តែ​ប្រាប់ថា ​មិនបាន​រកឃើញ​​អ្វីទាំងអស់។ នាយករដ្ឋមន្ត្រីចិន​ លី ខឺឈាំង​ បានសន្យា​​បន្ត​ការរុករក​យន្តហោះ​តទៅទៀត ទោះជា​យូរ​ប៉ុណ្ណា​ក្តី ព្រោះថា​ក្តី​សង្ឃឹម​នៅ​តែមាន ទោះជា​តិចតួច​ក៏ដោយ​ចុះ។ ​

ផ្សាយពាណិជ្ជកម្ម

វត្ថុ​អណ្តែតទឹក​ទាំង៣ដុំ អាច​ជាបំណែក​យន្តហោះ​​បូអ៊ីង​៧៧៧​ដែល​បាន​បាត់ខ្លួន​តាំងពីថ្ងៃសៅរ៍

វត្ថុ​​អណ្តែតទឹក​៣ដុំ ដែល​ផ្កាយរណប​ចិន​ថត​រូបភាព​បាន​នោះ មានទំហំ​១៣x១៨ម ១៤x១៩ ម និង​២៤x២២ម។ យោងតាម​រូបភាព​ផ្កាយរណបចិន វត្ថុ​ទាំង​នេះ ស្ថិត​នៅ​​​ ​២០០គីឡូម៉ែត្រ​​​ ​ខាងកើតទី​​កន្លែង​ដែល​យន្តហោះ​​អោយ​ដំណឹង​ចុងក្រោយ​បំផុត​ មុនពេល​បាត់ស្រមោល​ទៅនោះ។ ដូច្នេះ បើគេគណនា​ទៅ ​ប្រសិន​បើ​យន្តហោះ​​ផ្ទុះ​ឆេះ​មែននោះ កំទេចកំទី​យន្តហោះ​គឺអាច​​ធ្លាក់​ក្នុង​ទីកន្លែងដែល​ផ្កាយរណប​ចិន​ថតរូបភាព​បាន​នេះហើយ។ គេឃើញថា ​កំទេចកំទី​​ទាំងនោះ​ ​ស្ថិត​នៅ​ក្បែរ​​ដែន​ទឹក​ ដែល​​អាជ្ញាធរ​​កំពុង​រុករក​យន្តហោះ​​ទៀត។ ដូច្នេះ គេគិតថា​ វាអាច​ជា​កំទេច​យន្តហោះ​ដែល​បាត់​ខ្លួន​​ទៅ​នោះហើយ។

ទោះយ៉ាងនេះ​ក្តី​ មជ្ឈមណ្ឌល​គ្រប់គ្រង​ទិន្នន័យ​និង​ដំណើរការ​អនុវត្តន៍​ផ្កាយរណបចិន ​ប្រាប់ថា នៅមិនទាន់​​បាន​ធ្វើការសន្និដ្ឋាន​ពី​កំទេចកំទីទាំង​​​នោះ​នៅឡើយទេ។ ​

​ថ្ងៃ​ព្រហស្បតិ៍​នេះ ជាថ្ងៃ​ទី​៦ហើយ ដែល​យន្តហោះបាត់ខ្លួន។ ថ្ងៃនេះ ​​​ប្រតិបត្តិការ​រុករក​យន្តហោះ​​បាន​ពង្រីក​​​ដល់​​សមុទ្រ​ អង់ដាម៉ាន់ លើ​ឆ្នេរ​ម៉ាឡេស៊ី​ បើគិតទៅ ​គឺឆ្ងាយ​ពី​គន្លង​​​ហោះហើរ​ដែល​​យន្តហោះ​ជើងហោះហើរ​លេខ​៣៧០ ​អាច​ប្រើ។ ​​បើគិត​ពីផ្ទៃក្រឡា​ដែន​ទឹក​រុករក​​ទៀតសោត នៅពេលនេះ គឺមាន​​ដល់​៩ម៉ឺនគីឡូម៉ែត្រ​ការេឯណោះ​ គឺ​ស្ទើរតែ​ស្មើ​​ផ្ទៃក្រឡា​​​ប្រទេស​ពរទុយហ្កាល់​មួយ​ទាំងមូល​ទៅហើយ។

​អ្នកជំនាញ​អាមេរិក​នានា​បាន​​អោយ​ដំណឹង​​ថា យន្តហោះ​នេះ​ប្រហែល​ជា​អាច​បន្ត​​ហោះហើរ​បាន​៤ម៉ោង​បន្ថែមទៀត ក្រោយពេល​បាន​ផ្តល់ព័ត៌មាន​ចុងក្រោយ​បំផុត ដល់​អាជ្ញាធរ​​ដែនអាកាស។ អ្នកជំនាញ​អាមេរិក​គិតថា អ្នកបើក​យន្តហោះ​ ​រឺក៏​អ្នកណា​ម្នាក់​ក្នុង​យន្តហោះ អាច​នឹង​បង្វែរ​ទិស​យន្តហោះ អោយ​ហោះ​​​ទៅកាន់​កន្លែង​សំងាត់ណាមួយ ក្រោយពេល​បាន​បិទ​ម៉ាស៊ីន​​​​អេឡិចត្រូនិក​យន្តហោះ​ ​ហៅថា Transpondeurនោះ​ ដើម្បី​ផ្តាច់ទំនាក់ទំនង​ជាមួយ​​អាជ្ញាធរ​​​ត្រួតពិនិត្យ​ដែនអាកាស។
 

រូបភាព​​ផ្កាយរណប​​ចិន បង្ហាញ​ពី​វត្ថុ​អណ្តែត​ទឹក​ ជារូបភាព​ថត​បាន​តាំង​ពី​ថ្ងៃ​អាទិត្យ

គេមិនដឹងពី​មូលហេតុ​ពិតប្រាកដ ពី​ការដែល​​​ចិន​ទើបតែ​​បង្ហាញ​រូបភាព​ផ្កាយរណប​​​ទាក់ទង​វត្ថុអណ្តែតទឹក​ទាំងនេះ​ នៅល្ងាច​ថ្ងៃ​ពុធ​ម្សិលមិញ​ទេ។ យោងតាម​អ្នកជំនាញ​​ ​ចិន​ប្រហែល​​ចង់បង្ហាញ​ពី​សមត្ថភាព និង​ការរីកចំរើន​ខ្ពស់​នៃ​​​ផ្កាយរណប​របស់ខ្លួន ក្នុង​ការ​ចាប់រូបភាព​​ទាំងនេះ។ ​ហើយ​ចិន​ក៏ប្រហែល​​ចង់ឆ្លើយតប​នឹង​ម៉ាឡេស៊ី​ ដែល​បញ្ចេញ​ប្រតិកម្ម​ការពារ​ខ្លួន​ពីការរិះគន់ផងដែរ។ ចិន​បាន​រិះគន់​ម៉ាឡេស៊ី​ តាំងតែ​​ពី​ថ្ងៃ​​យន្តហោះ​បូអ៊ីង​៧៧៧ បាត់​ខ្លួន​ដំបូង​ម្ល៉េះ។ គួររំលឹក​ថា ក្នុង​យន្តហោះ​​របស់​ក្រុមហ៊ុន​ម៉ាឡេស៊ី​អ៊ែរឡាញ អ្នកដំណើរ​ចិន​មានច្រើន​ជាងគេ ​រហូត​ដល់​ទៅ​១៥៣នាក់ ក្នុង​ចំណោម​មនុស្ស​សរុប​២៣៩​នាក់​ នៅ​លើ​យន្តហោះ​។ ​តាំងពី​ថ្ងៃ​ដំបូង សាច់ញាតិ​អ្នកដំណើរ​ចិន​ខឹងសម្បារ​ជាខ្លាំង​ និង​បរិហារ​ថា ​​ក្រុមហ៊ុន​ម៉ាឡេស៊ី​អ៊ែរឡាញ​​ មិនបាន​ផ្តល់​ព័ត៌មាន​អ្វីជាក់លាក់ ល្អិតល្អន់​ទេ។

ក្នុង​ពីរថ្ងៃ ដំបូង​ដែល​យន្តហោះ​នៅតែ​មិនទាន់​ត្រូវបាន​គេ​រកឃើញ ហើយ​ដែល​គ្រប់គ្នា​គិតថា អ្នកដំណើរ​ទាំងនោះ​ប្រហែល​ជា​អាច​នៅ​រស់រាន​មានអាយុជីវិតនោះ​ ​ប្រសិន​បើ​ចិន​បង្ហាញ​រូបភាព​ផ្កាយរណប​ ទាក់ទង​បំណែកវត្ថុ​ទាំង​នេះ ​អោយ​សាច់ញាតិ​អ្នកដំណើរ​ អាច​នឹង​ខឹងសម្បារកាន់តែ​ខ្លាំង អាច​បង្ក​ភាពច្របូកច្របល់​អ្វីមួយ​ក៏ថាបាន។

ម្យ៉ាងទៀត តាំងតែ​ពីថ្ងៃ​សៅរ៍ ពេល​យន្តហោះ​បាត់ខ្លួន​ដំបូង​មក ក្រៅពី​ម៉ាឡេស៊ី   អាមេរិក វៀតណាម រឺក៏បារាំង​ សុទ្ធ​តែ​បាន​បង្ហាញបំណង​ចូលរួម​ស៊ើបអង្កេត​រុករក​យន្តហោះ ហើយ​អាមេរិក​​ថែមទាំង​បាន​បញ្ជូន​នាវាពិឃាត​ខ្លួន​មកជួយ​រកទៀតផង។ ​ទង្វើ​នេះ​​ជាការ​ជំរុញ​អោយ​សាច់ញាតិ​​ជនរងគ្រោះ​ នៅតែ​មានទឹកចិត្តិ​ និង​​​​សង្ឃឹម​ថា អ្នកដំណើរ​អាច​នៅ​មានជីវិត។ ​

ចិន​មិនអាច​បង្ហាញ​រូបភាព​ផ្កាយរណប​ថតបាន​នៅថ្ងៃ​អាទិត្យ ​ភ្លាមៗ​នោះទេ ព្រោះជា​រូបភាព​​អាច​អោយ​គេ​ផ្តោតចិត្ត​ខ្លាំង​ លើ​ការសន្និដ្ឋាន​ថា ​យន្តហោះបូអ៊ីង​អាច​ផ្ទុះឆេះ​​។ ចិន​ត្រូវ​ទុកពេល​​អោយ​សាច់ញាតិ​​ជនរងគ្រោះ​ស្ងប់ចិត្ត​បន្តិច​សិន។

គ្រប់គ្នា​​នាំគ្នា​រិះគន់​ម៉ាឡេស៊ី​អាជ្ញាធរ​ម៉ាឡេស៊ី​យ៉ាងខ្លាំង​ ថា​ផ្តល់ព័ត៌មាន​ច្របូក​ច្របល់ ​បញ្ច្រាស​ទិស​គ្នា​​ ហើយ​នៅតែ​គ្មានលទ្ធភាព​ដឹង​ថា ​​យន្តហោះ​ស្ថិត​នៅ​កន្លែងណា​អោយពិត​ប្រាកដ។ ដោយ​រងការរិះគន់​នេះ​ខ្លាំងពេក​ នៅថ្ងៃ​ពុធ ម្សិលមិញ អាជ្ញាធរ​ម៉ាឡេស៊ី​បានចេញ​មុខ​​​ការពារ​ខ្លួន ប្រឈម​នឹង​ការរិះគន់។ ប្រហែល​ដោយសារ​មូលហេតុ​នេះហើយ ទើបចិន​ទប់ចិត្ត​មិនបាន ហើយ​បញ្ចេញ​រូបភាពផ្កាយរណប​ទាំងនេះមក​ ព្រោះថា​ ហេតុអ្វី​បានជា​អាជ្ញាធរ​ម៉ាឡេស៊ី​ដែល​ជា​អ្នកទទួល​បន្ទុក​​ដឹកអ្នកដំណើរ ហើយ​​គ្មាន​សមត្ថភាព​​រកឃើញ​យន្តហោះ​ដែលបាត់ខ្លួនផងនោះ បែរ​ជា​មិនបង្ហាញ​ជំហរ​ទទួល​ខុសត្រូវ​​ខ្ពស់ បែរជា​​​​ធ្វើការការពារ​ខ្លួន​នៅចំពោះ​មុខ​ការរិះគន់ទៅវិញ។

ដូច្នេះ ​ចិន​ប្រហែល​បញ្ចេញ​រូបភាពផ្កាយរណប​​នេះ ដើម្បី​អោយ​អាជ្ញាធរ​ម៉ាឡេស៊ី​បើកភ្នែក​មើលថា ប្រសិន​បើ​វត្ថុ​ទាំង៣ដុំ​ដែល​ផ្កាយរណប​ចាប់រូបភាព​បាននោះ ជា​បំណែក​យន្តហោះ​បូអ៊ីង​មែននោះ គឺមានន័យថា ​យន្តហោះ​នោះ​បាន​ផ្ទុះឆេះ​សម្លាប់​​ជីវិត​មនុស្ស២៣៩នាក់រួចទៅ​ហើយ។ ដូច្នេះ អាជ្ញាធរ​ម៉ាឡេស៊ី​គ្មានហេតុផលអ្វី​ត្រូវការពារ​ខ្លួន ​ចំពោះ​ការរិះគន់​នោះទេ។ ​

ក្នុងពេល​ការរុករក​យន្តហោះ​នៅតែ​បន្តធ្វើ​បែបនេះ រឿងរ៉ាវ​ខឹងគ្នា​នេះ ប្រហែល​ជា​មិនអាច​បញ្ចប់​បាន​ស្រួល​ឡើយ​ ព្រោះថា ថ្ងៃព្រហស្បតិ៍​នេះ ​ម៉ាឡេស៊ី​បាន​បដិសេធ​​ព័ត៌មាន​របស់​អាមេរិក ​ដែល​​ថា យន្តហោះ​បូអ៊ីង៧៧៧ អាច​នឹង​បន្ត​ហោះហើរ​ច្រើនម៉ោង​​ទៀត ក្រោយពេល​អាជ្ញាធរ​ទទួលបាន​ដំណឹង​ចុងក្រោយ​បំផុតនោះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI