កម្ពុជា

អ្នក​ភូមិ​បុរី​កីឡា​ផ្ទុះ​ជម្លោះ​ជាមួយ​ក្រុមហ៊ុន ផាន អ៊ីម៉ិច ជា​ថ្មី​ទៀត​

បុរីកីឡា​​ជាទីដែល​អាជ្ញាធរ​សមត្ថកិច្ច​បង្រ្កាប​ដោយ​ហិង្សា​និងចាប់ឃុំខ្លួន​ក្រុម​អ្នកតរ៉ាដីធ្លី​ កាលពី​ពេល​កន្លងទៅ
បុរីកីឡា​​ជាទីដែល​អាជ្ញាធរ​សមត្ថកិច្ច​បង្រ្កាប​ដោយ​ហិង្សា​និងចាប់ឃុំខ្លួន​ក្រុម​អ្នកតរ៉ាដីធ្លី​ កាលពី​ពេល​កន្លងទៅ RFI/Siv Channa

អ្នក​ភូមិ​បុរី​កីឡា ប្រមាណ​ជា​១០០​នាក់ នៅ​ថ្ងៃ​សុក្រ​នេះ បាន​ផ្ទុះ​កំហឹង​ជាមួយ​ក្រុមហ៊ុន​ផាន អ៊ីម៉ិច ដោយសារ​អ្នក​ភូមិ​បាន​ចោទ​ប្រកាន់​ថា ក្រុមហ៊ុន​ធ្វើ​របង​គ្រោង​សង់​ឃ្លាំង​ស្តុក​អ្វី​មួយ នៅ​លើ​ដី​សាធារណៈ របស់​អ្នកភូមិ។ ពួក​អ្នកភូមិ​បាន​នាំ​គ្នា​វាយ​កម្ទេច​របង​នោះ។ យ៉ាងណាក៏ដោយ​គ្មាន​ការ​បង្ក្រាប​ទៅ​លើ​អ្នកភូមិ​ទេ។

ផ្សាយពាណិជ្ជកម្ម

អ្នក​ភូមិ​បុរី​កីឡា​ប្រមាណ​ជា ១០០នាក់ នៅ​ថ្ងៃ​សុក្រ​នេះ បាន​ព្រួត​គ្នា​វាយ​របង​របស់​ក្រុមហ៊ុន ផាន អ៊ីម៉ិច ដែល​សង់​នៅ​លើ​ដី​របស់​ពួកគេ។ អ្នកស្រី ហាស់ សុ​ចិន្តា តំណាង​អ្នកភូមិ​បុរី​កីឡា បាន​ប្រាប់​វិទ្យុ​បារាំង​អន្តរជាតិ​ថា នៅ​ប្រហែលជា​ម៉ោង ៨​ព្រឹក អ្នកស្រី​បាន​មើល​ពី​ចម្ងាយ ហើយ​ឃើញ​មាន​របង​មួយ​សាងសង់​នៅ​លើ​ដី​ផ្លូវ​របស់​ប្រជាពលរដ្ឋ។ ក្រុម​អ្នកភូមិ​ក៏​បាន​សម្រេច​វាយរបង​នោះ​ចោល​ភ្លាមៗ​តែ​ម្តង។

អ្នកស្រី​និយាយថា ក្រុម​អ្នកភូមិ​មិនបាន​ដឹងថា គេ​ចាប់ផ្តើម​ធ្វើ​របង​ពី​ពេលណា​នោះទេ ដោយសារ​តែ​ក្រុមហ៊ុន បាន​បិទផ្លូវ​ដើរ ចេញ-ចូល របស់​អ្នកភូមិ ប្រមាណ​ជា​កន្លះ​ខែ​មកហើយ។ បន្ទាប់ពី​រុះរើ​របង​នោះ​ហើយ ក្រុមហ៊ុន​ក៏​មិនបាន​ប្រតិកម្ម​អ្វី​ទេ ប៉ុន្តែ​លុះដល់​ម៉ោង​ប្រមាណ​ជា៣រសៀល មាន​កម្លាំង​សមត្ថកិច្ច ប្រមាណ​ជា ១០០នាក់ មិនដឹងថា​ពួកគេ​មកពីណា បាននាំគ្នា​មក​បោះបង្គោល នៅ​ទីតាំង​មាន​ជម្លោះ​ជាថ្មី ប៉ុន្តែ ត្រូវបាន​អ្នកភូមិ​ដក​បង្គោល​នោះ​ចោល​ទៀត។

នៅក្នុង​សន្និសីទកាសែត​មួយ​នៅ​ល្ងាច​ថ្ងៃ​សុក្រ​នេះ ក្រុម​អ្នកភូមិ​បានទាមទារ​ឲ្យ​ក្រុមហ៊ុន​ផ្អាក​សំណង់​ក្នុង​អាគារ​ទី៩ និង​ឈប់​ធ្វើ​សំណង់​ក្នុង​អាគារ​ទី១។ លើសពីនេះ អ្នកភូមិ ក៏​ស្នើសុំ​ឲ្យ​ក្រុមហ៊ុន​ដោះស្រាយ​សំណង​តាម​កិច្ចសន្យា ដែល​ក្រុមហ៊ុន​បានធ្វើ​ជាមួយ​អ្នកភូមិ កាលពីពេល​កន្លងទៅ។

មន្ត្រី​សម្របសម្រួល​កម្ម​វ​ធី​កំណែទម្រង់​ដីធ្លី​របស់​ម​ជ្ឃ​មណ្ឌល​សិទ្ធមនុស្ស​កម្ពុជា (CCHR) លោក វណ្ណ សូផាត បាន​ឲ្យ​ដឹងថា ទង្វើ​នេះ គឺជា​សញ្ញា​នៃ​ការបង្ក​ជម្លោះ​រវាង ក្រុមហ៊ុន និង​ក្រុម​អ្នកភូមិ។ មន្ត្រី​សិទ្ធិមនុស្ស​រូបនេះ​បាន​ស្តីបន្ទោស​ក្រុមហ៊ុន​ថា​មិន​ត្រឹមតែ​មិន​ផ្តល់​ដំណោះស្រាយ​ដល់​អ្នកភូមិ​ប៉ុណ្ណោះ​ទេ ប៉ុន្តែ​តែងតែ​បង្កបញ្ហា​និង​កេងចំនេញ​លើ​អ្នកភូមិជារឿយ។

គួរ​បញ្ជាក់​ថា នៅ​ក្នុង​គោលការណ៏​នយោបាយ​របស់​រដ្ឋាភិបាល​អណ្តតិ្ត​ទី​៥ រដ្ឋាភិបាល បាន​លើក​ទឹក​ចិត្ត​ឲ្យ​មាន​ការ​ការពារ និង​ដោះស្រាយ​បញ្ហា​ដី​ធ្លី​ដល់​ប្រជាពលរដ្ឋ​ឲ្យ​បានល្អ​ប្រសើរ ប៉ុន្តែ​រហូត​មក​ដល់​ពេល​នេះ នៅ​តែ​ពុំ​មាន​ចំណាត់​ការ​អ្វី​មួយ​សមស្រប​សម្រាប់​អ្នក​រងគ្រោះ​ដោយសារ​បញ្ហា​ដី​ធ្លី​នៅ​បូរី​កីឡា និង​នៅ​បឹងកក់​នៅ​ឡើយ​ទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI