កម្ពុជា

សហជីព​កម្មករ​កាត់ដេរ​ចំនួន​ ២​ ដឹក​នាំ​កម្មករ​ធ្វើ​កូដកម្ម​នៅ​ព្រឹក​ថ្ងៃ​ពុធ​នេះ​

លោក រ៉ុង​ឈុន ប្រធាន​​សហភាព​សហជីព​កម្ពុជា
លោក រ៉ុង​ឈុន ប្រធាន​​សហភាព​សហជីព​កម្ពុជា © អ៊ឺម ណាវិន

សហជីព​កម្មករ​កាត់​ដេរ​ចំនួន២ ប្រកាស​បន្ត​គម្រោង​កូដកម្ម​ដែល​ចាប់​ផ្តើមធ្វើ​ពីថ្ងៃ​ទី១២ មីនា​នេះ ដល់​ថ្ងៃ១៩ មីនា បើទោះបីជា សហជីព​កម្មករ​និង​សមាគម​ភាគច្រើន ព្រមព្រៀង​ពន្យារពេល​កូដកម្ម ទៅធ្វើ​នៅក្រោយ​បុណ្យចូលឆ្នាំ​ខ្មែរ​វិញ​ក៏ដោយ។នេះ​បើតាម​ប្រធាន​សហភាព​សហជីព​កម្ពុ​ជា ដែល​បាន​អះ​អាង​ថា​ខ្លួន​​មិន​អាច​​ទ្រាំ​​ពន្យារ​ពេល​​អោប​ដៃ មើល​ទុក្ខលំបាក​របស់​កម្មករ។  

ផ្សាយពាណិជ្ជកម្ម

សហជីព​ចំនួន​ពីរបាន​ចាប់​ផ្តើមធ្វើ​កូដកម្ម​នៅ​ថ្ងៃទី ១២មីនា​នេះ ជា​កូដកម្ម​ដែល​កម្មករនិយោជិត​សំរាក​នៅផ្ទះ ហើយ​មិន​ចូលធ្វើការ​នៅតាម​រោងចក្រ​នានា។ សហជីព​ចំនួន​ពីរ​នេះ រួមមាន​សហជីព​រប​ស់ លោក រ៉ុង ឈុន និង​សហជីព​របស់លោក វ៉ា​សាលី ។នេះ​បើ​យោងតាម លោក រ៉ុង ឈុន ប្រធាន​សហភាព​សហជីព​កម្ពុជា។

 
លោក​បាន​បញ្ជាក់ថា លោក​មិន​យល់​ស្របតាម​ការសម្រេច​របស់​សហជីព ភាគច្រើន ដែល​បាន​ចូលរួម​ប្រជុំ​សម្រេច លើក​ពេលធ្វើ​កូដកម្ម​ទៅក្រោយ​បុណ្យចូលឆ្នាំ​ខ្មែរ​វិញ​នោះទេ ហើយ​សហជីព​របស់ លោក នឹងមិន​រាថយ​ក្នុងការ​ទាមទារ​សេរីភាព ឲ្យ​អ្នក ដែល​កំពុងតែ​ជាប់ឃុំ​ទាំង ២១នាក់ ក្នុង​ពន្ធនាគារ​នោះឡើយ ហើយ​និង​ទាមទារ​ប្រាក់ខែ​គោល ដល់​កម្មករ​រោងចក្រ​ឲ្យ​បាន ១៦០ ដុល្លា​ក្នុង​មួយខែ។

ការប្រកាស​បន្តរ​ការ​ធ្វើ​កូដកម្ម​តាម​គម្រោង​របស់​ក្រុម​សហជីព​ទាំង២នេះ បាន​ធ្វើឡើង​បន្ទាប់ពី កិច្ចប្រជុំ​មួយ រវាង សហជីព​កម្មករ​កាត់​ដេរ ចំនួន ៨ និង​អង្គការ​សមាគម​មួយចំនួនទៀត កាលពី​នៅ​ថ្ងៃទី១១មីនា ម្សិល​ម៉ិ​ញ។ ក្នុង​កិច្ចប្រជុំ​នោះ​សហជីព​និង​សមាគម​ភាគច្រើន បាន  សម្រេច​ពន្យា​ពេលធ្វើ​កូដកម្ម ទៅក្រោយ​បុណ្យចូលឆ្នាំ​ខ្មែរ ។

សូមបញ្ជាក់ថា នៅ​ថ្ងៃទី ១១មីនា ម្សិល​ម៉ិ​ញ ក្រុម​សហជីព​និង សមាគម​ភាគច្រើន​បាន​ព្រមព្រៀងគ្នា ពន្យារ​ពេលធ្វើ​កូដកម្ម ក្រោម​សំណូមពរ​ពី​កម្មករ ដោយ​មូលហេតុ​បុណ្យចូលឆ្នាំ​ខ្មែរ។ ហើយ​សំរេច​ថា កូដកម្ម​មិន​ទៅធ្វើ​ការ ដោយ​សំរាក​នៅផ្ទះ​នេះ នឹងធ្វើ​ឡើង​ក្រោយ​ចូលឆ្នាំ​ខ្មែរ ដោយ​ចាប់ពី​ថ្ងៃទី ១៧ មេសា​ដល់​ថ្ងៃទី ២៣ មេសា​វិញ ។

លោក អាត់ ធន់ ប្រធាន​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា ដែល​ព្រមព្រៀង​លើក​ពេលធ្វើ​កូដកម្ម​បាន​សង្ឃឹមថា ក្នុងអំឡុងពេល​ធ្វើបាតុកម្ម​នាពេល​ខាងមុខនេះ នឹងមាន​កម្មករ​យ៉ាង​ហោចណាស់​ពី ៦០%ទៅ៧០%ចូលរួម ពីព្រោះ​ពួកគេ​ទទួលបាន​ឱកាស​ឈប់សំរាក​បាន​ច្រើន។ គោលដៅ​ចំបង​នៃ​កូដកម្ម​របស់​កម្មករ​គឺ​ដើម្បី​ដាក់​គំនាប​ដល់​រដ្ឋាភិបាល និង​សមាគម​ថៅកែ​រោងចក្រ​កាត់ដេរ​ឲ្យ​ដំឡើង​ប្រាក់​ឈ្នួល​អប្បបរមា ១៦០ ដុល្លា​ដល់ក​ម្មករ និង​ទាមទារ​ឲ្យ​ដោះលែង​អ្នក​ជាប់ឃុំ​ទាំង ២១ នាក់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI