កម្ពុជា

ទី​ភ្នាក់ងារ​បញ្ជូនព​លករ​ទៅ​ក្រៅ​ប្រទេស​ត្រូវ​បាន​តម្រូវ​ឲ្យ​គោរព​បទ​បញ្ញតិ​ថ្មី​

ពលករ​ចំណាក​ស្រុក​កម្ពុជា​​
ពលករ​ចំណាក​ស្រុក​កម្ពុជា​​ ©rfi-ម៉េងហូរ

វគ្គ​បណ្តុះ​បណ្តាល​ស្តី​ពី​បទ​ប​ញ្ញ​តិ​ថ្មី ​ស្តី​ពី​ការ​គ្រប់គ្រង​ការ​បញ្ជូន​ពលករ​កម្ពុ​ជា​ទៅ​ធ្វើការ​នៅក្រៅ​ប្រទេស ​ត្រូវ​បាន​បើក​ធ្វើ​ឡើង​ជា​លើក​ដំបូង​ ជូន​​ភ្នាក់ងារ​បញ្ជូន​ពលករ​។ ​វគ្គ​បណ្តុះ​បណ្តាល​ដែល​រៀប​ចំ​ឡើង​ដោយ​អង្គការ​ការងារ​អន្តរជាតិ(​ILO)​ បាន​បើក​ធ្វើ​ឡើង​នៅ​ព្រឹក​ថ្ងៃ​អង្គារ​ ទី​២៥មីនា ​នេះ ​នៅ​ទីក្រុង​ភ្នំពេញ ​និង​ស្រប​ពេល​ដែល​ពល​ករក​ម្ពុ​ជា​ដែល​ត្រូវ​បាន​បញ្ជូន​ទៅ​ធ្វើ​ការ​នៅ​ក្រៅ​ប្រទេស ​តាម​រយៈ​ទីភ្នាក់ងារ​ជ្រើសរើស​ឯកជន​ តែងតែ​ជួប​បញ្ហា​មិន​ចេះ​ចប់។

ផ្សាយពាណិជ្ជកម្ម

ប​ញ្ញ​តិ​ថ្មី​សម្រាប់​ទី​ភ្នា​ក់​ជ្រើសរើស​ពលករ​ឯកជន ​ក្នុង​ការ​បញ្ជូន​ពលករ​ទៅ​ធ្វើ​ការ​នៅ​ក្រៅ​ប្រទេស​ត្រូវ​បាន​ផ្សព្វផ្សាយ​នៅ​ក្នុង​វគ្គ​បណ្តុះ​បណ្តាល​មួយ ​ដែល​បើក​ធ្វើ​ថ្ងៃ​អង្គារ​ទី ២៥ មីនា​នេះ​នៅ​សណ្ឋាគារ ​Imperial​ Hotel​ Garden​ទីក្រុង​ភ្នំពេញ​។ ​គោល​បំណង​នៃ​វគ្គ​បណ្តុះ​បណ្តាល​នេះ គឺ​ដើម្បី​បង្កើន​ការ​ការពារ​ដល់​ពលក​រ​ចំណាក​ស្រុក​  កាត់​បន្ថយ​ការ​កេងចំណេញ​កម្លាំង​ពលកម្ម ​ពលកម្ម​ដោយ​បង្ខំ ​និង​ការ​ជួញ​ដូរ​មនុស្ស​។

វគ្គ​បណ្តុះ​បណ្តាល​នេះ​បាន​ធ្វើ​ឡើង​ខណៈដែល​ពល​ករ​កម្ពុជា​ដែល​ត្រូវបាន​បញ្ជូន​ឲ្យ​ទៅធ្វើ​ការ​នៅក្រៅ​ប្រទេស​តាមរយៈ​ទីភ្នាក់ងារ​ជ្រើសរើស​ពលករ​ឯក​ជន ​តែង​តែ​ជួប​បញ្ហា​ការ​រំលោភ​សិទ្ធិ​ ការ​កេង​កម្លាំង​ពលកម្ម​ និង​ ការ​ជួញ​ដូរ​ជា​ដើម​។ អង្គការ​ការងារ​អន្តរជាតិ ILO និង សមាគម​ទីភ្នាក់ងារ​ជ្រើសរើស​ពលករ​កម្ពុជា បាន​សហការ​រៀបចំ​បើក​វគ្គ​បណ្តុះបណ្តាល​នេះ​ដល់​បណ្តា​ទី​ភា្ន​ក់​ងារ​ដែល​ជ្រើសរើស​ពលករ​ឯកជន​ទៅ​ធ្វើ​ការ​នៅ​ក្រៅ​ប្រទេស​ ។

លោក អ៊ិត សំហេង រដ្ឋមន្ត្រីក្រសួង​ការងារ និង បណ្តុះបណ្តាល​វិជ្ជាជីវៈ បាន​មានប្រសាសន៍ថា គ្រប់​ទី​ភ្នាក់ងារ​ជ្រើសរើស​ពលករ​ឯកជន​ទាំងអស់​ត្រូវតែ​ប្រតិបត្តិ​តាម​ខ្លឹមសារ​នៃ​សេចក្តីប្រកាស​ទាំង​៨ ដែល​ចេញ​ដោយ​ក្រសួង​ការងារ និង អនុ​ក្រឹ​ត​ស្តី​ពី​ការ​គ្រប់គ្រង​ការបញ្ជូន​ពលករ​កម្ពុ​ជា​ទៅ​ធ្វើការ​នៅក្រៅ​ប្រទេស។ លោក​រដ្ឋមន្ត្រី​បាន​សង្កត់​ធ្ងន់ថា ទីភ្នាក់ងារ​ជ្រើសរើស​ពលករ​ឯកជន​​ដែល​មិន​បាន​គោរព​តាម​សេចក្តីប្រកាស​នេះ​នឹងត្រូវ​ផ្អាក​ប្រតិបត្តិការ​រហូត​ទាល់តែ​ពួកគេ​ឆ្លើយតប​តាម​សេចក្តី​ប្រកាស​របស់​ក្រសួង។

សួ​ម​បញ្ជាក់ថា កាលពី​ខែ កញ្ញា ឆ្នាំ២០១៣ កន្លងទៅ ក្រសួង​ការងារ​បានចេញ​សេចក្តី​ប្រកាស​ថ្មី​ចំនួន​៨​ដែល​បំពេញបន្ថែម​អនុក្រឹត្យ​លេខ១៩០ ស្តីពី​កា​រប​ញ្ជួ​ន​ពលករ​ខ្មែរ​ទៅធ្វើ​ការ​នៅ​បរទេស។​ សេចក្តីប្រកាស​នេះ​តម្រូវ​ឲ្យ​ទីភ្នាក់ងារ​ជ្រើសរើស​ពលករ​ឯកជន​ទទួលខុសត្រូវ​លើ​ប្រព្រឹត្ត​កម្ម តាមរយៈ​ការធ្វើ​អធិការកិច្ច​យ៉ាង​ទៀងទាត់ និង​យន្តការ​ដោះស្រាយ​បណ្តឹង។​ ទីភ្នាក់ងារ​​ជ្រើសរើស​ពលករ​ឯកជន​ក៏​ត្រូវតែ​ដោះស្រាយ​បណ្តឹង​ពលករ​ឲ្យ​បាន​ក្នុង​រយៈពេល​១០​ថ្ងៃ​ក្រោយពី​ទទួលបាន​បណ្តឹង។

កាលពី​ឆ្នាំ២០១៣ កន្លងមក ពលករ​កម្ពុជា​ដែល​ធ្វើ​ចំណាកស្រុក​ស្របច្បាប់​ទៅធ្វើ​ការ​នៅក្រៅ​ប្រទេស​មាន​ចំនួន​ប្រមាណ​ជាជាង ២ម៉ឺន​​នាក់ គឺ​បាន​ថយចុះ៣៦ ភាគរយ បើ​ធៀប​ទៅនឹង​ឆ្នាំ ២០១២ ។ ប្រទេស​ដែល​ពលករ​កម្ពុជា​ទៅធ្វើ​ការរួម​មាន ប្រទេស​ថៃ កូរ៉េខាងត្បូង ជប៉ុន ម៉ាឡេស៊ី និង​សិង្ហ​បុរី ។ នេះ​បើ​យោងតាម​ទិន្នន័យ​របស់​ក្រសួង​ការងារ និងបណ្តុះបណ្តាល​វិជ្ជាជីវៈ។ ជារឿយៗ ពលករ​ខ្មែរ​មួយចំនួន​បាន​រងគ្រោះ​ដោយ​ការរំលោភបំពាន ឬ​ការជួញដូរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI