កម្ពុជា-ច្បាប់

ខូប​៥ឆ្នាំ​នៃ​មរណ​ភាព​លោក​ឈុត វុទ្ធី៖ អង្គការ​សង្គម​ស៊ីវិល​ធ្វើ​ខួប និង​រំពឹង​រក​យុត្តិធម៌

លោកឈុត វុទ្ធី អតីតប្រធានអង្គការការពារធនធានធម្មជាតិ។
លោកឈុត វុទ្ធី អតីតប្រធានអង្គការការពារធនធានធម្មជាតិ។ សហការី

នៅ​ថ្ងៃ​ទី​២៦ ខែ​មេសា ខាង​មុខ​នេះ គឺ​ជា​ថ្ងៃ ដែល​ឃាតករ​បាញ់​សម្លាប់​លោក​ឈុត វុទ្ធី កាល​ពី​រយៈ​ពេល​៥ឆ្នាំ​។​ ក្រុម​អង្គការ​សង្គម​ស៊ីវិល ដែល​ចាត់​ទុក​លោក​ឈុត វុទ្ធី ជា «វីរបុរស​ព្រៃ​ឈើ» នឹង​នាំ​គ្នា​រំឭក​វិញ្ញាណ​ខន្ត និង​វីរៈ​ភាព​របស់​លោក តាម​រយៈ​យុទ្ធនាការ​ដាក់​រូបភាព​របស់​លោក​តាម​បណ្តាញ​សង្គម ជួប​ជុំ​គ្នា​មើល​វីដេអូឯកសារ​សកម្មភាព​របស់​លោក និង​ការ​ធ្វើ​ពិធី​សាសនា​ផង។​

ផ្សាយពាណិជ្ជកម្ម

លោក​សេង សុខ​ហេង ជា​អ្នក​សម្រប​សម្រួល​លេខាធិការដ្ឋាន​នៃ​បណ្ដាញ​សហគមន៍​ព្រៃឡង់​បាន​ប្រាប់​វិទ្យុបារាំង​អន្តរ​ជាតិ​ថា ដើម្បី​រំឭក​វិញ្ញាណ​ខន្ត និង​វីរភាព​របស់​លោក​ឈុត វុទ្ធី បណ្តាញ​សហគមន៍​នឹង​រៀប​ចំ​ធ្វើកម្ម​វិធីនៅ​ពីរ​ទីតាំង​ផ្សេង​គ្នា គឺ​នៅ​ក្នុង​ព្រៃ​ឡង់​នៃ​ខេត្ត​ព្រះវិហារ និង​នៅ​រាជធានី​ភ្នំពេញ​។

លោក​សេង សុខ​ហេង​បញ្ជាក់​ថា នៅ​ក្នុង​ខេត្ត​ព្រះវិហារ​នឹង​ធ្វើ​យុទ្ធការ​ក្នុង​ព្រៃឡង់ ដែល​មាន​អ្នក​ចូល​រួម​ពី​៣០០​នាក់​ទៅ​៤០០​នាក់ ហើយ​មាន​ការ​ដាក់​រូប​ថត​របស់​លោក​នៅ​ក្នុង​ព្រៃ​ថែម​ទៀត​ផង។ ក្រៅ​ពី​នេះ​ក៏​មានយុទ្ធនាការ​តាម​បណ្តាញ​សង្គម​ហ្វេស​ប៊ុក​ដែរ​។ ចំណែក​នៅ​រាជធានី​ភ្នំពេញ​វិញ លោក​បាន​ឲ្យ​ដឹង​ថា​នឹង​មានការ​រៀប​ចំ​ពិធី​រំឭក​វិញ្ញាណ​ក្ខន្ធ​របស់​លោក​នៅ​ទី​តាំង​ណា​មួយ តែ​ពេល​នេះ​លោក​មិន​ទាន់​ដឹង​ច្បាស់​នៅឡើយ​ទេ។​

យុទ្ធនាការ​រំឭក​ខួប​៥​ឆ្នាំ នៃ​ការ​បាញ់​សម្លាប់​លោក​ឈុត វិទ្ធីនេះ គឺ​ធ្វើ​ឡើង​ដើម្បី​បង្ហាញ​សាធារណៈជន​ឲ្យ​បាន​ដឹង​ថា​លោក​ឈុត វុទ្ធី ជា​ប្រធាន​អង្គ​ការ​ការពារ​ធន​ធាន​ធម្មជាតិ ត្រូវ​បាន​បាញ់​សម្លាប់ ហើយ​មក​ដល់ពេល​នេះ មិន​ទាន់​ត្រូវ​បាន​ផ្តល់​យុត្តិធម៌​ទៅ​លោក ឬ​ក្រុម​គ្រួសារ​របស់​លោក​នៅ​ឡើយ​ទេ។ នេះ​បើ​តាមលោក​សេង ​សុខហេង​។

លោកទឹម ម៉ាឡៃ ប្រធាន​បណ្ដាញ​យុវជន​កម្ពុជា​បាន​ប្រាប់​វិទ្យុ​បារាំង​អន្តរជាតិ​នៅ​ថ្ងៃ​ទី​២៣ ខែ​មេសា ថា​ក្រុមយុវជន​របស់​លោក បាន​នឹង​កំពុង​ធ្វើ​យុទ្ធនាការ​ផ្លាស់​ប្តូរ​រូប​ភាព Profile តាម​បណ្តាញ​សង្គម​ហ្វេស​ប៊ុក ដើម្បីរំឭក​គុណ​របស់​លោក​ក្នុង​ការ​លះ​បង់​ជីវិត ដើម្បី​ការ​ការពារ​ព្រៃ​ឈើ និង​ធន​ធាន​ធម្មជាតិ​។​

លោក​បញ្ជាក់​ថា នៅ​ម៉ោង​៥​ល្ងាច​ថ្ងៃ​ទី២៦ ខែមេសា​ខាង​មុខ​នេះ មាន​អ្នក​ចូល​រួម​ប្រមាណ​២០០នាក់ នៅ​ខាងមុខ​ព្រះ​បរម​រាជ​វាំង ដោយ​ម្នាក់​ៗ​មាន​ទូរស័ព្ទ​ដៃ ដើម្បី​មើល​វីដេអូ​ឯកសារ “I AM CHHUT VUTHY”។ យុទ្ធនាការ​នេះ​ធ្វើ​ឡើង ដើម្បី​បង្ហាញ​ថា​ការ​ស្លាប់​របស់​លោក​ឈុត វុទ្ធី មិន​ទាន់​បាន​ទទួល​យុត្តិធម៌​នៅ​ឡើយ​។​ បើតាម​លោក​ទឹម ម៉ាឡែ ការ​ជួប​ជុំ​របស់​លោក​មិន​បាន​សុំ​ការ​អនុញ្ញាត​ពី​សាលា​ក្រុង​ភ្នំពេញ​ទេ ដោយ​លោកអះ​អាង​ថា​នៅ​ក្នុង​សង្គម​ប្រជាធិបតេយ្យ​ការ​ជួប​ជុំ​មិន​មាន​ការ​ហាម​ប្រាម​ពី​ច្បាប់​ទេ​។​

លោក​ម៉េត មាសភក្តី អ្នក​នាំ​ពាក្យ​សាលា​ក្រុង​ភ្នំពេញ បាន​ឆ្លើយ​តប​យ៉ាង​ខ្លី​ថា សង្គម​ប្រជាធិបតេយ្យ​មិន​មែនសង្គម​អនាធិបតេយ្យ​ទេ ហើយ​លោក​ថា​ការ ដែល​ជួប​ជុំ​គ្នា​ដោយ​គ្មាន​ច្បាប់​ទម្លាប់​នេះ​ហើយ ហៅ​ថា​សង្គម​អនា​ធិបតេយ្យ​។ លោក​បញ្ជាក់​ថា​រហូត​មក​ដល់​ពេល​នេះ សាលា​ក្រុង​ភ្នំពេញ​មិន​ទាន់​បាន​ទទួល​លិខិត​សុំអនុញ្ញាត​ណា​មួយ​ពី​បណ្ដាញ​យុវជន​កម្ពុជា​នៅ​ឡើយ​ទេ ហើយ​សាលា​ក្រុង​នឹង​ហាម​ឃាត់​ចំពោះ​សកម្មភាពជួប​ជុំ​ណា​ដែល​គ្មាន​ការ​អនុញ្ញាត​។

សូម​ជម្រាប​ជូន​ថា លោក ឈុត វុទ្ធី ​ប្រធាន​អង្គការ​ការពារ​ធនធាន​ធម្មជាតិ​ ត្រូវ​បាន​បាញ់​សម្លាប់​កាល​ពី​ថ្ងៃ​ទី​២៦​ខែ​មេសា​ឆ្នាំ​២០១២​ នៅ​ភូមិ​វាលបី​ ឃុំ​បាក់ខ្លង​ ស្រុកមណ្ឌល​សីមា​ ខេត្ត​កោះកុង​ ក្នុង​ពេល​ដែល​លោក​បាន​ជូន​ផ្លូវ​ក្រុម​អ្នក​កាសែត​២​រូប​របស់​កាសែត ​The Cambodia Daily ​ចុះ​យក​ព័ត៌មាន​នៅ​ជិត​ដែន​ព្រៃ​ការពារ​ក្នុង​ខេត្ត​កោះកុង​ ជា​ទី​កន្លែង​ដែល​លោក​ធ្លាប់​ព្យាយាម​ជា​ច្រើន​ដង​ ដើម្បី​បើក​កកាយ​សំណុំ​រឿង​កាប់ព្រៃ​ឈើ​ខុសច្បាប់​ ដែល​មាន​ទាក់ទង​នឹង​មន្ត្រីយោធា៕ ​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI