អានតួអត្ថបទ
កម្ពុជា

ACU​ ចាប់​ខ្លួន​​អធិការ​​ខណ្ឌ​​ម្នាក់​​រឿង​​កិប​កេង​​ប្រាក់​​ជិត​៧០​ម៉ឺន​​ដុល្លារ​

លោក​ ហ៊ី ​ណារិន​ អធិការ​នៃ​អធិការ​ដ្ឋាន​ខណ្ឌ​មាន​ជ័យ​ ត្រូវ​បាន​អង្គភាព​ប្រឆាំង​អំពើ​ពុក​រលួយ​ចាប់​ខ្លួន​ទៅតុលាការ​។​
លោក​ ហ៊ី ​ណារិន​ អធិការ​នៃ​អធិការ​ដ្ឋាន​ខណ្ឌ​មាន​ជ័យ​ ត្រូវ​បាន​អង្គភាព​ប្រឆាំង​អំពើ​ពុក​រលួយ​ចាប់​ខ្លួន​ទៅតុលាការ​។​ RFI/ Siv Channa
ដោយ៖ វណ្ណ សុគន្ធា
១៦ នាទី

អង្គភាព​​ប្រឆាំង​​អំពើ​ពុក​រលួយ​(ACU)​ បាន​​ចាប់​ខ្លួន​​​អធិការ​​នៃ​​អធិការ​ដ្ឋាន​​ខណ្ឌ​មាន​ជ័យ​ លោក​ ហ៊ី ​ណារិន ​ដែល​​បាន​​កិប​កេង​​ទឹក​ប្រាក់​​ជិត ​៧០ ​ម៉ឺន​​ដុល្លារ​​អាមេរិក ​ឫ ​ជិត ​៣ ​ពាន់​​លាន​​រៀល​(២,៧១២,២៣៦,០០០រៀល)​។ ​នេះ​​បើ​តាម​​សេចក្តី​ប្រកាស​​ព័ត៌មាន​​របស់​​អង្គភាព​​ប្រឆាំង​​អំពើ​ពុក​រលួយ​​កាល​ពី​​យប់​​ថ្ងៃ​​ពុធ​។ ​សង្គម​​ស៊ីវិល​​ដែល​​ធ្វើ​ការ​​ប្រយុទ្ធ​ប្រឆាំង​​អំពើ​ពុក​រលួយ ​បាន​​សាទរ​​ចំពោះ​​ការ​ចាប់​ខ្លួន​​នេះ​ ហើយ​​ថា​ វា​​ជា​​ជំហាន​​មួយ​​ឆ្ពោះ​ទៅ​មុខ​​បន្ថែម​ទៀត ​ដើម្បី​​លុប​បំបាត់​​អំពើ​ពុក​រលួយ​​នៅ​​កម្ពុជា​។​

ផ្សាយពាណិជ្ជកម្ម

ការចាប់ខ្លួន​នេះ បានធ្វើ​ឡើង​កាលពី​ថ្ងៃទី៣០ កញ្ញា បន្ទាប់ពី​អង្គភាព​ប្រឆាំង​អំពើពុករលួយ​បានទទួល​ពាក្យបណ្តឹង​ចំនួន៥ លើក​ប្រឆាំងនឹង​មន្ត្រី​ប៉ូលីស​រូបនេះ​អំពី​ការប្រព្រឹត្ត​អំពើពុករលួយ។ ហើយ​មុន​ការចាប់ខ្លួន អង្គភាព​នេះ​ក៏បាន​សុំ​ឲ្យ​លោក​ហ៊ី ណារិន ធ្វើការ​បំភ្លឺ និង ស្នើ​ឲ្យ​មានការ​កែលម្អ​ចំនួន២លើក​មកហើយ ប៉ុន្តែ​ជនសង្ស័យ​ហាក់​ព្រងើយកន្តើយ និង​នៅតែ​ប្រព្រឹត្ត​អំពើ​ខុសច្បាប់​ដដែល។

សេចក្តីប្រកាស​ព័ត៌មាន​របស់​អង្គភាព​ប្រឆាំង​អំពើពុករលួយ​កាលពី​ថ្ងៃ​ពុធ បាន​ឲ្យ​ដឹងថា អង្គភាព​ប្រឆាំង​អំពើពុករលួយ​បាន​ចំណាយពេល​ស៊ើបអង្កេត​អស់​រយៈពេល៨ ខែ និង​បាន​ប្រមូល​ព័ត៌មាន​ពី​មន្ត្រី​ប៉ូលីស​ធ្វើការ​ក្នុង​អធិការដ្ឋាន​ខណ្ឌមានជ័យ៤១នាក់​មុន​ឈានដល់​ការឃាត់ខ្លួន​ជនសង្ស័យ។ បើតាម​សេចក្តីប្រកាស​ព័ត៌មាន​ដដែល ជនសង្ស័យ ​ហ៊ី ណារិន ត្រូវបាន​រកឃើញ​ការប្រព្រឹត្ត​បទល្មើស​ចំនួន ៨ ករណី ដែល​រួមមាន​ដូចជា ការបើក​យកប្រាក់​ខែ​របស់​មន្ត្រីនគរបាលដែលអវត្តមាន ការ​កេង​យកប្រាក់​ឧបត្ថម្ភ​កម្លាំង​ហ្វឹកហាត់​ការពារ​បាតុកម្ម ការតម្រូវ​ឲ្យ​មេ​ល្បែងស៊ីសង ម្ចាស់​អាជីវកម្ម រោងចក្រ និង​មន្ត្រី​មួយចំនួន​បង់ប្រាក់​ជា​រៀងរាល់ខែ​ជាដើម។

ជនសង្ស័យ ហ៊ី ណារិន តាមរយៈ​សេចក្តីប្រកាស​ព័ត៌មាន​នោះ បាន​ឆ្លើយ​សារភាពថា ពិតជា​បាន​ប្រព្រឹត្ត​ខុសច្បាប់​មែន ​ដោយបាន​កិបកេង​ទឹកប្រាក់​ប្រមាណ ៧០ ម៉ឺន​ដុល្លារ​អាមេរិក ឫ ជិត ៣ ពាន់​លាន​រៀល(២,៧១២,២៣៦,០០០រៀល)។

លោក ឱម យិនទៀង ប្រធាន​អង្គភាព​ប្រឆាំង​អំពើពុករលួយ​មិនបាន​ផ្តល់ព័ត៌មាន​លម្អិត​ជុំវិញ​ការចាប់ខ្លួន​មន្ត្រី​ប៉ូលីស​នេះនោះ​ទេ ដោយលោក​ឆ្លើយតាមខ្សែទូរសព្ទថា កំពុង​ជាប់រវល់។

យ៉ាងណាក៏ដោយ អង្គការ​តម្លាភាព​កម្ពុ​ជា​ដែល​ធ្វើ​យ៉ាងសកម្ម​ក្នុងការ​លុបបំបាត់​អំពើពុករលួយ​នៅក្នុង​ប្រទេស​កម្ពុជា បាន​ស្វា​គម​ន៏​ចំពោះ​ចាប់ខ្លួន​នេះ។ លោក ព្រាប កុល នាយក​ប្រតិបត្តិ​អង្គការ​តម្លាភាព​កម្ពុជា បាន​ថ្លែងប្រាប់​វិទ្យុ​បារាំង​អន្តរជាតិ​ថា ការចាប់ខ្លួន​មន្ត្រី​ប្រព្រឹត្ត​ពុករលួយ​នេះ គឺជា​ស្នាដៃ​ថ្មី​មួយទៀត​របស់​អង្គភាព​ប្រឆាំង​អំពើពុករលួយ​ក្នុងការ​អនុវត្ត​ច្បាប់​ប្រឆាំងនឹង​អំពើពុករលួយ​នៅក្នុង​ប្រទេស​កម្ពុជា។

សូមបញ្ជាក់ថា នេះ​មិនមែនជា​លើកទីមួយ​ទេ​ដែល​អង្គភាព​ប្រឆាំង​អំពើពុករលួយ​បាន​ចាប់ខ្លួន​មន្ត្រី​ខិត​ខូច​ពូកែ​ខាង​កិបកេង​ប្រាក់ ​បញ្ជូន​ឲ្យ​តុលាការ​ផ្តន្ទាទោស​តាមច្បាប់​នោះ។ កន្លងមក​អង្គភាព​មួយ​នេះ បាន​ចាប់ខ្លួន​ទាំង​មន្ត្រី​តុលាការ និង ស្ថាប័ន​មួយ​រដ្ឋ​មួយចំនួន​ផងដែរ​ពាក់ព័ន្ធ​អំពើពុករលួយ​នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ