កម្ពុជា-រុស្ស៊ី

ទំនាក់ទំនង​កម្ពុជា-រុស្ស៊ី​បន្ត​អភិវឌ្ឍ​លើ​វិស័យ​ទេសចរណ៍

លោក​ថោង ខុន ក្នុង​ពិធី​ចុះ​ហត្ថលេខា​ជាមួយ​អនុរដ្ឋមន្រ្តី​ទេសចរណ៍​រុស្ស៊ី
លោក​ថោង ខុន ក្នុង​ពិធី​ចុះ​ហត្ថលេខា​ជាមួយ​អនុរដ្ឋមន្រ្តី​ទេសចរណ៍​រុស្ស៊ី ©ឆាយា

ក្នុងក្របខ័ណ្ឌ​​​នៃ​ការ​អភិវឌ្ឍន៍​នេះ នៅ​ក្រុង​ម៉ូស្គូ ទើបមាន​​ប្រព្រឹត្តទៅ​ពិធី​ចុះហត្ថលេខា​លើ “ផែនការ​សកម្មភាព​រួម​​សំរាប់​ឆ្នាំ​២០១២-២០១៤” រវាង​ក្រសួង​ទេសចរណ៍​កម្ពុជា និង​ទីភ្នាក់ងារ​​សហព័ន្ធ​រុស្ស៊ី​ខាង​ទេសចរណ៍។ តាំងពីម្សិលមិញ​ដែរ កម្ពុជា​​តាំង​ពិព័រណ៍​ខ្លួន នៅ “ទីផ្សារ​ទេសចរណ៍​អន្តរជាតិ” ហៅថា “INTOURMARKET- ឆ្នាំ២០១១” ដោយមាន​​ការចូលរួម​នៃ ១៤៥​ប្រទេស។

ផ្សាយពាណិជ្ជកម្ម

សេចក្តីរាយការណ៍​របស់ កែវ ឆាយា ពីម៉ូស្គូ

ហត្ថលេខា​បានត្រូវចុះ​ដោយ​លោក​រដ្ឋមន្ត្រី​ក្រសួង​ទេសចរណ៍​កម្ពុជា ថោង ខុន និង ដោយ​​អនុប្រធាន​នៃ ទីភ្នាក់ងារ​សហព័ន្ធរុស្ស៊ី​ខាង​ទេសចរណ៍ លោក Alexandre Radkov  ឋានៈ​នេះ​ ខាង​ភាគី​រុស្ស៊ី គឺ​ស្មើនឹង​អនុរដ្ឋមន្ត្រី​ទេសចរណ៍។

ថ្លែង​ស្វាគម​ចំពោះ​ភ្ញៀវ​ជាន់ខ្ពស់​កម្ពុជា អនុរដ្ឋមន្ត្រី​រុស្ស៊ី​បាន​លើកឡើង​ថា រុស្ស៊ី​តែង​បាន​និង​បន្ត​ចាត់ទុក​កម្ពុជា​​ជាមិត្ត​របស់​ខ្លួន ដែល​ជាមួយ​មិត្ត​នេះ រុស្ស៊ី​ពង្រីក​ទំនាក់ទំនង​លើ​វិស័យ​ជាច្រើន មាន​វិស័យ​ទេសចរណ៍​ជាដើម។ គាត់​ក៏​ប្រាថ្នា​ឃើញ​អ្នក​ទេសចរ​ខ្មែរ​មក​ទស្សនា​ប្រទេស​រុស្ស៊ី​ដែរ ព្រមទាំង​ពង្រីក​ទេសចរណ៍​រវាង​រុស្ស៊ី និង កម្ពុជា​ឲ្យ​រាលដាល​ដល់​ថ្នាក់​តំបន់​ទៅផង គឺ​រវាង​ខេត្ត​និង​ខេត្ត។

លោក​ថោង ខុន​ រដ្ឋមន្រ្តី​ទេសចរណ៍​កម្ពុជា​បាន​ឆ្លៀតឱកាស​សំដែង​អំណរគុណ​យ៉ាង​ជ្រាលជ្រៅ​ទៅកាន់​រដ្ឋាភិបាល​និង​ប្រជាជន​រុស្ស៊ី​ជាមិត្ត ចំពោះ​ជំនួយ​ដែល​ផ្តល់ទៅ​កម្ពុជា​តាំងពី​សម័យ​ដែល​កម្ពុជា​ស្ថិតនៅ​បាត​ដៃ​ទទេ ក្រោយ​ថ្ងៃ​រំដោះ​ ៧មករា​ ឆ្នាំ១៩៧៩​មក ក្នុង​ស្ថានភាព​សង្គ្រាម​ផង សន្តិភាព​ផង ហើយ​ជំនួយ​នេះ​នៅតែ​បន្ត​ផ្តល់​ទៅ​កម្ពុជា ទាំង​បច្ចុប្បន្ន​កាល។​ លោក​ក៏​បាន​រំលឹក​ថា សុខសន្តិភាព​ពេញលេញ​បាន​កើតមាន​នៅ​កម្ពុជា ក្នុង​ឆ្នាំ​១៩៩៨ ដោយសារ​នយោបាយ “ឈ្នះ-ឈ្នះ” របស់​លោក​នាយក​រដ្ឋមន្ត្រី ហ៊ុន សែន។

តាមប្រសាសន៍​លោក​រដ្ឋមន្ត្រី ថោង ខុន​ វិស័យ​ទេសចរណ៍​ត្រូវបាន​រដ្ឋាភិបាល​កម្ពុជា កំណត់​ជា​អាទិភាព​មួយ​នៃ​ការអភិវឌ្ឍន៍​សេដ្ឋកិច្ច​ជាតិ គឺ​ថា ៖ ខណៈ​ដែល​អង្ករ​ត្រូវ​ចាត់ទុក​ជា”មាស ស” នោះ វិស័យ​ទេសចរណ៍​ត្រូវ​ចាត់ទុក​ជា “មាស បៃតង”។ ឆ្នាំទៅមិញ វិស័យ​ទេសចរណ៍នាំ​ចំណូល បាន ១.៨០០លាន​ដុល្លារ​អាមេរិក​ដល់​ថវិកា​ជាតិ ឬ​ស្មើនឹង ១២%​ឯណោះ​នៃ​ផលិតផល​សរុប​ក្នុង​ស្រុក​ ហៅថា GDP របស់​កម្ពុជា។

ដោយអំពាវនាវ​ឲ្យ​ពួក​វិនិយោគិន​រុស្ស៊ី​បោះទុន​កាន់តែ​ក្រាស់ក្រែល​ឡើង ទៅក្នុង​សេដ្ឋកិច្ច​កម្ពុជា លោក ថោងខុន បាន​លើកយក​តួលេខ​​មក​បង្ហាញ​ថា៖ ក្នុង​ឆ្នាំ២០១០​កន្លងទៅ កម្ពុជា​បាន​ទទួល​ទេសចរ​អន្តរជាតិ ២លាន៥សែន​នាក់ គឺ​កើនឡើង ជាង​១៦% ក្នុងនោះ ទេសចរ​ពី​រុស្ស៊ី គឺ​ដល់ទៅ​ជិត​៤ម៉ឺន​នាក់ កើនឡើង​ដល់ ៧៦% ធៀបនឹង​ឆ្នាំ​២០០៩។ គ្រាន់តែ​ក្នុង​១ខែ​មករា​ឆ្នាំនេះ កម្ពុជា​បាន​ទទួល​ទេសចរ​រុស្ស៊ី ជិត ១ម៉ឺននាក់ កើនឡើង ១០២% ឯណោះ ហេតុ​ដែលនាំ​ឲ្យ​កម្ពុជា​ប្រមាណ​ថា ទៅ​ទល់​ចុង​ឆ្នាំ​នេះ គឺ​អាច​ស្ទុះ​ដល់ ១០ម៉ឺននាក់។ ចំនួននេះ​ញ៉ាំង​កម្ពុជា​ឲ្យ​ស្នើ​មក​ភាគី​រុស្ស៊ី​ជាថ្មី ថា​គប្បី​បើក​ឲ្យ​មាន​ជើង​យន្តហោះ​ត្រង់​ផ្ទាល់​ពី​ម៉ូស្គូ ទៅ​ភ្នំពេញ​តែម្តង​ទៅ។ សំណើ​នេះ តាមការ​រំពឹងទុក​នៃ​ភាគី​រុស្ស៊ី គឺ​នឹង​ត្រូវ​ដោះស្រាយ​ក្នុង​សម័យប្រជុំ​លើកទី៦ នៃ “គណៈកម្មការ​អន្តរ​រដ្ឋាភិបាល​រុស្ស៊ី-កម្ពុជា” ដែល​នឹង​ប្រព្រឹត្ត​ទៅ នៅរុស្ស៊ី​ក្នុង​ឆ្នាំ​នេះ។

លើកនេះ ជា​លើកទី​៤ ដែល​កម្ពុជា​តាំង​ពិព័រណ៍​ខ្លួន នៅ “ទីផ្សារ​ទេសចរណ៍​អន្តរជាតិ” ក្នុង​រដ្ឋធានី​រុស្ស៊ី។ ទីផ្សារ​លើកនេះ​មាន​ឈ្មោះ​ថា “INTOURMARKET-ឆ្នាំ២០១១” ចូលរួម​ដោយ ១.៣០០ ក្រុមហ៊ុន​ទេសចរ តំណាង​ឲ្យ ១៤៥​ប្រទេស។ ការងារ​ទីផ្សារ​ធំសំបើម​នេះ​នឹង​ពន្យារ​ទៅ​រហូតដល់​ថ្ងៃ ១៥មីនា​ខាងមុខ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI