អានតួអត្ថបទ
ទស្សនៈព្រឹត្តិការណ៍ខ្មែរ

រដ្ឋ​សភា​នឹង​ក្លាយ​ជា​«​សមរភូមិ​ក្តៅ​»​!

សំឡេង ០៤:៥៩
សម័យប្រជុំពេញ​អង្គ​របស់​រដ្ឋសភានៃ​ព្រះរាជាណាចក្រ​​កម្ពុជា
សម័យប្រជុំពេញ​អង្គ​របស់​រដ្ឋសភានៃ​ព្រះរាជាណាចក្រ​​កម្ពុជា ©ភក្រ្តា/RFI
ដោយ៖ ប៉ែន បូណា
២៨ នាទី

អំណឹះ​ត​ទៅ ​រដ្ឋ​សភា​​ទំនង​ជា​​មិន​មែន​ជា​​ទី​កន្លែង​​ស្ងប់​ស្ងាត់​​ដូច​​មុន​​ទៀត​​ទេ​។ ​តំណាង​រាស្ត្រ​​គណបក្ស​​សង្គ្រោះ​ជាតិ​​ទាំង ​៥៥ ​នាក់​​ដែល​​នឹង​​ចូល​ទៅ​​បង្គ្រប់​​កៅអី ​១២៣ ​របស់​​រដ្ឋ​សភា​ច្បាស់​​ជា​​ត្រូវ​​រូត​រះ​​បញ្ចេញ​​សកម្មភាព​​ដើម្បី​​បង្ហាញ​​ប្រាប់​​អ្នក​គាំ​ទ្រ​​របស់​ខ្លួន​​ថា ​ពួក​គេ​​មិន​មែន​​ចូល​ទៅ​​សម្ងំ​ស្ងៀម​​ដូច​​ការ​សង្ស័យ​​នោះ​ទេ​។​ នៅ​ក្នុង​​ស្ថានភាព​​បែប​នេះ ​រដ្ឋ​សភា​​ច្បាស់​​ជា​​នឹង​​ក្លាយ​ទៅ​ជា​«​សមរភូមិ​ក្តៅ​»​ រវាង​​គណបក្ស​​ទាំង​ពីរ​​យ៉ាង​ពិត​​ប្រាកដ​។​ «សមរភូមិ»​នេះ​​អាច​​នឹង​​ផ្តល់​​ផល​​ល្អ​​ឬ​​អាក្រក់​​អាស្រ័យ​ទៅ​លើ​​គោល​ដៅ​​របស់​​អ្នក​នយោបាយ​​នៃ​​គណបក្ស​​ទាំង​ពីរ​។នេះ​​គឺ​ជា​​វិញ្ញាសា​​ដ៏​​សំខាន់​​សម្រាប់​​វាស់​​ស្ទង់​​ភាព​ចាស់​ទុំ​​ខាង​​ប្រជា​ធិបតេយ្យ​​របស់​​អ្ន​ក​នយោ​បាយ​​ខ្មែរ​។​

ផ្សាយពាណិជ្ជកម្ម

ដំណើរ​ចូលទៅ​អង្គុយ​ក្នុង​រដ្ឋសភា​របស់​តំណាងរាស្ត្រ​គណបក្ស​សង្គ្រោះ​ជាតិ៥៥នាក់​គឺជា​ការបញ្ចប់​ភាព​តានតឹង​នយោបាយ​ដែល​បានអូសបន្លាយ​ពេញ​មួយឆ្នាំ។ ប៉ុន្តែ វា​មិនមែនជា​ដំណឹង​ល្អ​សម្រាប់​អ្នកគាំទ្រ​គណបក្ស​សង្គ្រោះ​ជាតិ​ជាច្រើន​ដែល​ប្រាថ្នា​ចង់ឃើញ​ការផ្លាស់ប្តូរ​នោះទេ។ ប្រឈម​នឹង​ការរិះគន់​ដូច​ទឹកបាក់​ទំនប់ គណបក្ស​សង្គ្រោះ​ជាតិ​ប្រាកដជា​មិនអាច​សម្ងំស្ងៀម​បានឡើយ។

ពួកគេ​ច្បាស់​ជា​មិន​បង្អង់​យូរ​ឡើយ​ក្នុងការ​បញ្ចេញ​សកម្មភាព​ដើម្បី​បង្ហាញ​អ្នកគាំទ្រ​របស់ខ្លួន​ថា​ពួកគេ​ចូលក្នុង​សភា​មិនមែន​ដើម្បី​បង្គ្រប់​កៅអី​ឲ្យ​ស្ថាប័ន​នីតិប្បញ្ញត្តិ​ដែល​ដឹកនាំ​ដោយ​គណបក្ស​ប្រជាជន​កម្ពុជា​នោះទេ ប៉ុន្តែ ពួកគេ​ចូល​សភា​ដើម្បី​តតាំង​ជាមួយ​គណបក្សកាន់អំណាច។ រហូតមកទល់​ពេលនេះ គណបក្ស​ប្រជាជន​កម្ពុជា​ហាក់​បានបង្ហាញ​ជំហរ​ទន់ភ្លន់​និង​សម្របសម្រួល​ច្រើន​ជាមួយ​គណបក្ស​សង្គ្រោះ​ជាតិ​ដើម្បី​ឲ្យ​គណបក្ស​នេះ​មាន​ទំនុកចិត្ត​ក្នុងការ​ចូលទៅ​អង្គុយ​ក្នុង​រដ្ឋសភា។ ប៉ុន្តែ គេ​មិនដឹងថា បន្ទាប់ពី​បក្សប្រឆាំង ចូលទៅ​អង្គុយ​ក្នុង​សភា​រួចហើយ ការស្រុះស្រួល​គ្នា​អាច​នឹង​កើតមាន​បន្តទៀត​ឬ​យ៉ាងណា​នោះទេ?

មាន​សម្មតិកម្ម​ពីរ​ដែល​អាច​កើតឡើង​ចំពោះមុខ៖ ទី១ ប្រសិនបើ​គណបក្ស​ប្រជាជន​កម្ពុជា​ចង់«ខ្ចីដៃ»គណបក្ស​សង្គ្រោះ​ជាតិ​ដើម្បី​សម្រេច​គោលដៅ​កំណែទម្រង់​របស់ខ្លួន បក្ស​កាន់អំណាច​ប្រហែលជា​អាច​ផ្តល់​កិច្ចសហការ​ល្អជា​មួ​យគ​ណ​បក្សប្រឆាំង​ពីព្រោះ​ការលុបបំបាត់​បាតុភាព​អសកម្ម​នានា​ដែល​កើតឡើង​គឺជា​បេសកកម្ម​សំខាន់​ណាស់​ក្នុង​ការស្តារ​ប្រជាប្រិយភាព​របស់​ខ្លួនឡើងវិញ​របស់​បក្ស​កាន់អំណាច។ ក្នុងករណីនេះ កម្តៅ​ក្នុង​រដ្ឋសភា​ទំនងជា​អាច​កាត់បន្ថយ​បាន ហើយ​ផលប្រយោជន៍​នឹង​បាន​ទៅ​ភាគី​ទាំងសងខាង​ជាពិសេស​បាន​ទៅ​ប្រជាជន​ខ្មែរ​ទូទាំងប្រទេស។

ទី២ ប្រសិនបើ​គណបក្ស​ប្រជាជន​កម្ពុជា​នៅតែ​ចង់​រក្សា​គោលការណ៍​ដឹកនាំ​ប្រទេស​តាមរបៀប​ចាស់​ហើយ​គណបក្សប្រឆាំង ខិតខំ​ទាមទារ​នូវ​អ្វីដែល​ខ្លួន​ចង់បាន​ដើម្បី​ផ្គាប់ចិត្ត​អ្នកគាំទ្រ​របស់ខ្លួន​នោះ ការប៉ះទង្គិច​គ្នា​ក្នុង​រដ្ឋសភា​នឹងមាន​សភាព​ខ្លាំងក្លា​ដែល​អាច​នឹង​បង្ក​ការគំរាមកំហែង​សារជាថ្មី​ដល់​ស្ថិរភាព​នយោបាយ​ជាមិនខាន។

ជាការ​ពិតណាស់ ពី​ការតវ៉ា​តាម​ដងផ្លូវ​ទៅកាន់​ការតវ៉ា​ក្នុង​រដ្ឋសភា​គឺជា​របត់ផ្លូវ​ទ័ល​ដែល​គណបក្ស​សង្គ្រោះ​ជាតិ​របស់លោក សម រង្ស៊ី និង​លោក កឹម សុខា មិនអាច​ចៀសវាង​បាន​បន្ទាប់ពី​បាន​ចំណាយពេល​តវ៉ា​តាម​ដងផ្លូវ​អស់​រយៈពេល​ពេញ​មួយឆ្នាំ។ មេដឹកនាំ​បក្សប្រឆាំង​ដែល​ធ្លាប់​បានបង្ហាញ​ជំហរ​រឹង​ដូច​ដែក​នោះ ទីបំផុត​ក៏​ព្រម​ទទួលស្គាល់ថា គ្មាន​ជម្រើស​អ្វី​ល្អ​ជាង​ការតវ៉ា​ដោយ​សន្តិវិធី​ក្នុង​រដ្ឋសភា​ទេ។

ប៉ុន្តែ ដោយ​ឈរលើ​បទពិសោធ​អតីតកាលថ្មីៗផង និង​ដោយ​ត្រូវ​ប្រឈមមុខ​ជាមួយ​សម្ពាធ​ពី​អ្នកគាំទ្រ​ផង បន្ទប់​ប្រជុំ​រដ្ឋសភា​ទំនងជា​មិន​ត្រឹមតែ​ជាទី​លាន​តស៊ូ​មតិ​ប៉ុណ្ណោះ​ទេ តែ​វា​ក៏​នឹង​ក្លាយជា​ទីលាន​ដណ្តើម​ប្រជាប្រិយភាព​នយោបាយ​ផងដែរ។ ដូច្នេះ អំណឹះតទៅ ភាព​តានតឹង​នៅតាម​ដងផ្លូវ​អាច​ស្ងប់ស្ងាត់​មួយរយៈ​មែន ប៉ុន្តែ រដ្ឋសភាជាតិ​នឹង​ក្លាយជា«សមរភូមិ​ក្តៅ»វិញ​ម្តង។ បើទោះបីជា​បន្ទប់​ប្រជុំ​បំពាក់​ដោយ​ម៉ាស៊ីនត្រជាក់​ក៏ដោយ ក៏​ពេលខ្លះ​ចំហាយ​ម៉ាស៊ីនត្រជាក់​ទំនងជា​មិនអាច​ទប់​ញើស​ដែល​ហូរ​ចេញពី​ថ្ងាស​របស់​អ្នកតំណាងរាស្ត្រ​គណបក្ស​ទាំងពីរ​បានដែរ។

សម្រាប់​ប្រទេស​ដែល​ប្រកាន់​របប​ប្រជាធិបតេយ្យ វា​ជា​រឿង​ធម្មតា​ទេ​ដែល​អ្នកតំណាងរាស្ត្រ​ត្រូវ​តតាំង​គ្នា​យ៉ាង​ក្តៅគគុក​នៅក្នុង​រដ្ឋសភា។ ប៉ុន្តែ សម្រាប់​ប្រទេស​ដែល​ប្រជាធិបតេយ្យ​នៅ​ក្មេងខ្ចី ជាពិសេស​ប្រទេសមួយ​ដែល​ផ្នត់គំនិត​អ្នកនយោបាយ​នៅតែ​ជោគជាំ​ដោយ​វប្បធម៌«អញ​និយម»យ៉ាងខ្លាំង​នៅឡើយ​នោះ កម្តៅ​នយោបាយ​នៅក្នុង​រដ្ឋសភា​ងាយ​នឹង​ផ្ទុះ​ឆេះ​រាលដាល​ដែល​អាច​នឹង​បំផ្លាញ​ស្ថិរភាព​នយោបាយ​ដ៏​ផុយស្រួយ​ឲ្យ​ខ្ទេចខ្ទាំ​ទៅវិញ​យ៉ាង​ឆាប់រហ័ស​ក៏​ថា​បាន។

ដូច្នេះ ដើម្បី​ទប់​កុំ​ឲ្យ​កម្តៅ​ក្នុង​រដ្ឋសភា​ឆេះ​រោលរាល​ខ្លាំងពេក គណបក្ស​ទាំងពីរ​គួរតែ​បង្ហាញ​ភាពចាស់ទុំ​ខាង​ប្រជាធិបតេយ្យ​បាន​ច្រើន​បំផុត។ ពួកគេ​គួរតែ​ប្រែក្លាយ«សមរភូមិ​ក្តៅ»នៅក្នុង​រដ្ឋសភា​ឲ្យ​ទៅជា​ផលប្រយោជន៍​សម្រាប់​ប្រទេសជាតិ​និង​ប្រជាជន។ សូម​កុំភ្លេចថា រយៈពេល៤ឆ្នាំ​ខាងមុខនេះ គណបក្ស​ប្រជាជន​កម្ពុជា ក៏ដូចជា​គណបក្ស​សង្គ្រោះ​ជាតិ​ដែរ​សុទ្ធតែ​ត្រូវ​ការស្តា​រនិង​ពង្រឹង​ប្រជាប្រិយភាពរៀងៗខ្លួន​សម្រាប់​ការបោះឆ្នោត​សភា​លើក​ក្រោយ។ ក្នុងន័យនេះ តើ​គណបក្ស​ទាំងពីរ​អាច​អង្គុយ​ធ្វើការ​ជាមួយគ្នា​ក្នុង​រដ្ឋសភា​បានយូរ​ប៉ុណ្ណា? ចម្លើយ​នឹង​បង្ហាញ​ច្បាស់​ក្នុង​រយៈពេល​មិនយូរប៉ុន្មាន​ខាងមុខនេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ