កម្ពុជា

មន្ត្រី​ជាន់ខ្ពស់​ក្រសួង​បរិស្ថាន​ផ្តួចផ្តើម​គំនិត​បង្កើត​យុទ្ធនាការ​ដើរ​ប្រមូល​សំរាម​នៅ​តាម​ផ្លូវ​ក្នុង​ក្រុង​

យុវជន​ និង​អាជ្ញាធរ​ នាំ​គ្នា​រើស​សំរាម​នៅ​ថ្ងៃ​ទិវា​បរិស្ថាន ​៥ ​មិថុនា​
យុវជន​ និង​អាជ្ញាធរ​ នាំ​គ្នា​រើស​សំរាម​នៅ​ថ្ងៃ​ទិវា​បរិស្ថាន ​៥ ​មិថុនា​ @Long Dimanche

រដ្ឋ​លេខាធិការ​ក្រសួង​បរិស្ថាន បាន​អះអាង​នៅ​ថ្ងៃទី​១៥ ខែ​ធ្នូ​នេះ​ថា លោក​មាន​បំណង​បង្កើត​ក្រុម​យុវជន​ស្ម័គ្រ​ចិត្ត​មួយ​ក្រុម ដើម្បី​ដើរ​រើស​សំរាម​នៅ​តាម​ដង​ផ្លូវ​ទាំង​អស់​នៅ​ក្នុង​ក្រុង​ភ្នំពេញ​។ ជា​យុទ្ធនាការ ដែល​គ្រោង​ធ្វើ​ឡើង ដើម្បី​អប់រំ​ពលរដ្ឋ និង​សម្អាត​បរិស្ថាន​នៅ​ក្នុង​ក្រុង​ផង។

ផ្សាយពាណិជ្ជកម្ម

លោក នេត្រ ភក្ត្រា ជា​អ្នក​នាំពាក្យ និង​រដ្ឋ​លេខាធិការ​ក្រសួង​បរិស្ថាន បាន​អះអាង​ថា​យុទ្ធនាការ​នេះ​គឺ​ជា​ការ​ផ្តួច​ផ្តើម​គំនិត​ឡើង​ ដើម្បី​សម្អាត​អនាម័យ​បរិស្ថាន​ ដោយ​យក​ថ្ងៃ​សៅរ៍-អាទិត្យ ដើរ​រើស​សំណល់​សំរាម​ប្លាស្ទិក​ ដែល​រាយប៉ាយ​នៅ​តាម​ដង​ផ្លូវ​ក្នុង​ក្រុង​ភ្នំពេញ​។ ជា​ការ​ថ្លែង​នៅ​ថ្ងៃទី១៥ ខែ​ធ្នូ​នេះ ក្នុង​វេទិកា​យុវជន ស្តីពី​"ទណ្ឌកម្ម​ប្លាស្ទិក" នៅ​សាលា​អន្តរ​ទ្វិប​អាមេរិច​កាំង(AIS) ដែល​រៀប​​ដោយ​អង្គការ​កម្មវិធី​អភិវឌ្ឍន៍​ធនធាន​យុវជន។

តាម​រយៈវិទ្យុ​បារាំង​អន្តរជាតិ​លោក​បាន​បន្ថែម​ថា បច្ចុប្បន្ន​នេះ​ទោះ​បី​ជា​មាន​ការ​ចូល​រួម​ពី​ប្រជាពល​រដ្ឋ​ក្តី ​ប៉ុន្តែ​លោក​ឃើញ​ថា​សំណល់​ប្លាស្ទិក​នៅ​តែ​បន្ត​រាយប៉ាយ​នៅ​តាម​ដង​ផ្លូវ​ក្នុង​រាជធានី ដូច្នេះ​ការ​បង្កើត​យុទ្ធការ​ប្រមូល​សំរាម​នៅ​តាម​ដង​ផ្លូវ គឺ​ជា​សកម្មភាព​សង្គម ក៏​ដូច​ជា​ការ​ផ្ញើសារ​អប់រំ​ទៅ​សាធារណជន​ផង ហើយ​ចូល​រួម​សម្អាត​នៅ​តាម​ដង​ផ្លូវ​ផង​។

រដ្ឋ​លេខាធិការ​ក្រសួង​បរិស្ថាន​រូប​នេះ បាន​ឲ្យ​ដឹង​ថា នៅ​ប្រទេស​កម្ពុជា សំណល់​សំរាម ដែល​បាន​បង្កើត​ឡើង​នៅ​ក្នុង​មួយ​ឆ្នាំ​មាន​​ប្រមាណ​ជាង ៤លាន​តោន ក្នុង​នោះ​ប្រមាណ ២០% ជា​សំណល់​ប្លាស្ទិក​។ ខេត្ត​រាជធានីធំ​ៗ ដែល​បង្កើត​បរិមាណ​សំរាម​ច្រើន​រួមមាន​៖ រាជធានី​ភ្នំពេញ​ប្រមាណ​ជា ៣ ០០០ តោន​ក្នុង​មួយ​ថ្ងៃ​ដែល​នៅ​ក្នុង​នោះ ២០% ជា​សំណល់​ប្លាស្ទិក​។

ក្នុង​មួយ​ថ្ងៃ រាជធានី​ភ្នំពេញ​ប្រើ​ប្រាស់​ថង់​ប្លាស្ទិក​ប្រមាណ​ជាង ១០ លាន​ថង់​។ ចំណែក​នៅ​ក្រុង​ព្រះសីហនុ​ មាន​បរិមាណ​សំរាម​ប្រមាណ ​៧០០ តោន​ក្នុង​មួយ​ថ្ងៃ និង​ក្រុង​សៀមរាប មាន​ប្រមាណ ​៤០០ តោន​ក្នុង​មួយ​ថ្ងៃ​។ តាម​ការ​ប៉ាន​ប្រមាណ ភាគ​រយ​នៃ​ប្លាស្ទិក​ដែល​ប្រមូល​បាន​តាម​រយៈការ​បោស​សម្អាត នៅ​តាម​ផ្លូវ​ក្នុង​ក្រុង​សៀមរាប​មាន​ ២០,៧% និង ៣៤% ក្នុង​ខេត្ត​ព្រះសីហនុ​។ យោង​តាម​ការ​សិក្សា​ស្រាវជ្រាវ ប្រជា​ពលរដ្ឋ​នៅ​ទីក្រុង​ម្នាក់​បាន​ប្រើប្រាស់​ថង់​ប្លាស្ទិក​ច្រើន​ជាង​ ២០០០ ថង់ នៅ​ក្នុង​មួយ​ឆ្នាំ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI