អានតួអត្ថបទ
កម្ពុជា

សង្គម​​ស៊ីវិល​​មួយ​ចំនួន​​ស្នើ​​ឲ្យ​​រដ្ឋ​សភា ​លុប​ចោល​​សារាចរ​​របស់​​ប្រធាន​រដ្ឋ​សភា​​ថ្ងៃ​១២​កញ្ញា​

តំណាង​ក្រុម​អង្គការ​សង្គម​ស៊ីវិល​ ធ្វើ​សន្និសីទ​កាសែត​ស្តី​ពី​សារាចរ​របស់​ប្រធាន​រដ្ឋ​សភា​
តំណាង​ក្រុម​អង្គការ​សង្គម​ស៊ីវិល​ ធ្វើ​សន្និសីទ​កាសែត​ស្តី​ពី​សារាចរ​របស់​ប្រធាន​រដ្ឋ​សភា​ RFI /សហការី
ដោយ៖ លី ម៉េងហួរ
១៦ នាទី

យ៉ាង​ហោច​ណាស់​​មាន​​តំណាង​​អង្គការ​​សង្គម​​ស៊ីវិល​ ចំនួន ​១៣ ​ស្ថាប័ន ​បាន​ចេញ​​សេចក្តី​ថ្លែង​​ការណ៍​​រួម​ នៅ​​ថ្ងៃ​ទី​២​តុលា​​នេះ ​ដើម្បី​​ស្នើ​​ឲ្យ​​លោក​​ហេង ​សំរិន ​ប្រធាន​រដ្ឋ​សភា​ លុប​ចោល​​នូវ​​សារាចរ​​របស់​ខ្លួន​​ចេញ​​ថ្ងៃ​ទី​១២​កញ្ញា​។ ​សារាចរ​​ណែ​នាំ​​របស់​​ប្រធាន​រដ្ឋសភា ​​ដែល​​កំណត់​​រាល់​​កិច្ច​ការ​​នា​នា​​នៅ​ក្នុង​​រដ្ឋ​សភា ​រាប់​ទាំង​​អ្នក​​ចេញ​ចូល​​រដ្ឋ​សភា ​ត្រូវ​មាន​​ការ​យល់​ព្រម​​ពី​​ប្រធាន​រដ្ឋ​សភា​ ត្រូវ​បាន​​អង្គការ​​សង្គម​​ស៊ីវិល​ អះ​អាង​ថា ​មិន​​ស្រប​តាម​​ក្រប​ខណ្ឌ​​ច្បាប់​ និង​​គោលការណ៍​​ប្រសិទ្ធភាព​ តម្លាភាព ​និង​​ប្រជាធិបតេយ្យ​។​

ផ្សាយពាណិជ្ជកម្ម

ក្រុម​អង្គការ​សង្គម​ស៊ីវិល នៅ​កម្ពុជា ចំនួន ១៣ ស្ថាប័ន រួមមាន​អង្គការ​ខុមហ្វ្រែល អាដហុក និង​អង្គការ​នី​ក​ហ្វិ​ក ជាដើម បាន​យល់ឃើញថា សារាចរ​ណែនាំស្តីពី បែបបទ​ការងារ ស្តីពី គណៈកម្មការ​នានា​នៃ​រដ្ឋសភា ចុះ​ថ្ងៃទី១២កញ្ញា ចេញ​ដោយ​ប្រធានរដ្ឋសភា គឺ​មិន​ស្របតាម​គោលការណ៍​ប្រជាធិបតេយ្យ តម្លាភាព ប្រសិទ្ធភាព ពិសេស​គឺ​មិន​ស្របតាម​រដ្ឋធម្មនុញ្ញ និង​ផ្ទុយ​ពី​បទបញ្ជាផ្ទៃក្នុង​នៃ​រដ្ឋ​សភា។

តាម​សេចក្តីថ្លែងការណ៍​រួម រដ្ឋធម្មនុញ្ញ និង​បទបញ្ជាផ្ទៃក្នុង​រដ្ឋសភា មិន​មានចែង​មាត្រា​ណាមួយ ផ្តល់​អំណាច​ឲ្យ​ប្រធានសភា​ចេញ សារាចរ ឬ​បទបញ្ជា​ឯក​ត្ត​ភូត តាមតែ​ការនឹកឃើញ ដើម្បី​កំណត់​សិទ្ធិអំណាច និង​បែបបទ​ការងារ​ផ្ទៃក្នុង​របស់​គណៈកម្មកា​រ​ជំនាញ​នានា​នៃ​រដ្ឋសភា។ សារាចរ​ណែនាំ​របស់​ប្រធានរដ្ឋសភា​នោះ ក៏បាន​ដកសិទ្ធិ​គណៈកម្មការ​ជំនាញ​របស់​រដ្ឋសភា ដែល​ចែងថា គណៈកម្មការ​ពុំ​ត្រូវ​អញ្ជើញ​សង្គម​ស៊ីវិល ឬ​សាធារណៈជន មក​ចូលរួម​ប្រជុំ​របស់ខ្លួន​ឡើយ។

ក្នុង​សន្និសីទកាសែត នៅ​អង្គការ​ខុមហ្វ្រែល នា​ព្រឹក​ថ្ងៃទី២តុលា​នេះ តំណាង​អង្គការ​សង្គម​ស៊ីវិល ជា​ហត្ថលេខី​ទាំង ១៣ ស្ថាប័ន លោក គល់ ​បញ្ញា លោក អ៊ូ​ វីរៈ និង​លោក នី​ ចរិយា បាន​លើកឡើងថា សារាចរ​របស់​ប្រធានរដ្ឋសភា​នោះ កាន់តែ​ធ្វើ​ឲ្យ​ប្រធានរដ្ឋសភា មាន​តួនាទី​ច្រើន ហើយ​សំខាន់​ធ្វើ​ឲ្យ​ប្រធានរដ្ឋសភា ក្លាយជា​អ្នកយាម​នៅ​ខ្វោងទ្វារ ដើម្បី​មើល​អ្នក​ចេញចូល​រដ្ឋសភា​ទៅវិញ។

លោក គល់ បញ្ញា នាយក​ប្រតិបត្តិ​អង្គការ​ខុមហ្វ្រែល ចាត់ទុកថា សារាចរ​របស់​ប្រធានរដ្ឋសភា គ្រាន់តែ​ជាការ​ត្រួតត្រា​សកម្មភាព​របស់​គណបក្សប្រឆាំង នៅពេលដែល​គណបក្សប្រឆាំង កាន់កាប់​គណៈកម្មការ​ច្រើន​នៅ​រដ្ឋសភា។ សង្គម​ស៊ីវិល នឹង​ស្នើ​ជា​លាយលក្ខណ៍​ដល់​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ ដើម្បី​ឲ្យ​លោក​ហេង ​សំរិន លុបចោល​សារាចរ ដែល​រំលោភ​រដ្ឋធម្មនុញ្ញ​នោះ។

ជុំវិញ​ការលើកឡើង​ខាងលើ លោក ឈាង វុន អ្នកនាំពាក្យ​រដ្ឋសភា បានទាមទារ​ឲ្យ​សង្គម​ស៊ីវិល បកស្រាយ​ឲ្យ​ច្បាស់​ថា សារាចរ​របស់​ប្រធានរដ្ឋសភា រំលោភ​រដ្ឋធម្មនុញ្ញ ត្រង់​មាត្រា​ណា?។ មួយវិញទៀត តាម​លោក ឈាង វុន ការលុបចោល​សារាចរ​របស់​ប្រធានរដ្ឋសភា មិនមែនជា​ភារកិច្ច​របស់​សង្គម​ស៊ីវិល​ទេ តែ​ជា​ភារកិច្ច​របស់​គណៈកម្មាធិកា​រ​អចិន្ត្រៃយ៍​រដ្ឋសភា៕
 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ