កម្ពជា-នយោបាយ

អតីត​មន្ត្រី​បក្ស​ប្រឆាំង​អំពាវនាវ​ឲ្យ​មាន​ការ​ស៊ើប​អង្កេត​ បន្ទាប់​ពី​មន្ត្រី​របស់​ខ្លួន​ត្រូវ​គេវាយ​ឲ្យ​រង​របួស​ក្បាល​ធ្ងន់ធ្ងរ​

លោក ហេង ច័ន្ទសុទ្ធី អតីត​សមាជិក​ក្រុម​ប្រឹក្សា​ខណ្ឌពោធិ៍សែនជ័យ​នៃ​គណបក្ស​ប្រឆាំង ​
លោក ហេង ច័ន្ទសុទ្ធី អតីត​សមាជិក​ក្រុម​ប្រឹក្សា​ខណ្ឌពោធិ៍សែនជ័យ​នៃ​គណបក្ស​ប្រឆាំង ​ FB: Morn Phalla

អតីត​មន្ត្រី​គណបក្ស​សង្រ្គោះ​ជាតិ​ម្នាក់​ទៀត​ហើយ ដែល​ត្រូវ​បាន​ជន​មិន​ស្គាល់​មុខ​លប​វាយ​បណ្តាល​ឲ្យ​រង​របួស​ក្បាល​កាល​ពីថ្ងៃ​ទី២១​ ខែ​ធ្នូ​។​ សកម្មភាព​នេះ ត្រូវ​បាន​អតីត​មន្ត្រី​អតីតបក្ស​ប្រឆាំង​អំពាវនាវ​ឲ្យ​អង្គការ​ជាតិ និង​អន្តរជាតិ​ជួយ​ស៊ើប​អង្កេត​។ គិត​មក​ដល់​ថ្ងៃ​នេះ សកម្មជន​អតីត​បក្ស​ប្រឆាំង ក្នុង​រាជធានី​ភ្នំពេញ ត្រូវ​បាន​គេ​លបវាយ​ឲ្យ​របួស​ចំនួន​១៣​នាក់​ហើយ​។

ផ្សាយពាណិជ្ជកម្ម

អតីត​សមាជិក​ក្រុម​ប្រឹក្សា​ខណ្ឌ​ពោធិ៍សែន​ជ័យ​នៃ​គណបក្ស​ប្រឆាំង លោក ហេង ច័ន្ទសុទ្ធី ត្រូវ​បាន​ជន​មិន​ស្គាល់​មុខ​លប​វាយ​បណ្តាល​ឲ្យ​រង​របួស​បែក​ក្បាល និង​សន្លប់ កាល​ពីថ្ងៃទី​២១ ខែ​ធ្នូ។ នេះ​បើ​តាម​មន្ត្រី​អតីត​គណបក្ស​សង្រ្គោះ​ជាតិ​ លោក ហូ វណ្ណ និង​សកម្មជន​មូល​ដ្ឋាន​។

លោក ហេង ច័ន្ទសុទ្ធី ជា​អតីត​មន្ត្រី​គណបក្ស​សង្រ្គោះ​ជាតិ​ម្នាក់​ ក្នុង​ចំណោម​មនុស្ស​ជាង​៨០​នាក់ ដែល​ត្រូវ​បាន​ចាប់​ខ្លួន និង​ចោទ​ប្រកាន់​ពី​បទ «រួម​គំនិត​ក្បត់» ក្នុង​ការ​ប៉ុនប៉ង​ផ្ដួល​រំលំ​រដ្ឋាភិបាល ប៉ុន្តែ​ត្រូវ​បាន​ដោះ​លែង​ឲ្យ​នៅ​ក្រៅឃុំ​ជា​បណ្តោះ​អាសន្ន កាល​ពីថ្ងៃទី​១៥ ខែ​វិច្ឆិកា ឆ្នាំ​២០១៩ ក្រោយ​ពី​លោក​នាយក​រដ្ឋ​មន្ត្រី ហ៊ុន សែន បាន​បញ្ជា​ផ្ទាល់​មាត់​ទៅ​ក្រសួង​យុត្តិធម៌​ឱ្យ​ធ្វើ​ការ​ជា​មួយ​តុលាការ ដើម្បី​ដោះលែង​អ្នក​គាំទ្រ​អតីត​បក្ស​ប្រឆាំង​ក្រោយ​ព្រឹត្តិ​ការណ៍​ថ្ងៃទី ០៩ វិច្ឆិកា​។

លោក ហូ វណ្ណ មន្ត្រី​ជាន់​ខ្ពស់​នៃ​អតីត​គណបក្ស​សង្រ្គោះ​ជាតិ តាម​រយៈ​ទំព័រហ្វេស​ប៊ុក​ផ្ទាល់​ខ្លួន​របស់​លោក​ បាន​អំពាវនាវ​អង្គការ​ជាតិ និង​អន្តរ​ជាតិ ក៏​ដូច​ជា​អង្គការ​សហ​ប្រជាជាតិ​ប្រចាំ​កម្ពុជា​ជួយ​ស៊ើប​អង្កេត​ករណី​នេះ និង​ថ្កោល​ទោស​ចំពោះ​ការ​វាយ​ប្រហារ​មក​លើ​សកម្មជន​អតីត​គណបក្ស​ប្រឆាំង​ខាង​លើ​នេះ​។

វិទ្យុ​បារាំង​អន្តរ​ជាតិ​មិន​អាច​ទាក់ទង​សុំការ​បំភ្លឺ​ពី​អតីត​ប្រធាន​ប្រតិបត្តិ​អតីត​បក្ស​សង្គ្រោះជាតិ​ប្រចាំ​រាជធានី​ភ្នំពេញ​បាន​ទេ នៅ​ថ្ងៃទី២២ ខែ​ធ្នូ​នេះ។ ប៉ុន្តែ​តាម​រយៈហ្វេស​ប៊ុក​ផ្ទាល់​ខ្លួន កាល​ពីថ្ងៃទី​២១ ខែ​ធ្នូ លោក​ ម៉ន ផល្លា បាន​ឲ្យ​ដឹង​ថា គិត​មក​ដល់​ថ្ងៃ​នេះ សកម្មជន​អតីតបក្ស​ប្រឆាំង ក្នុង​រាជធានី​ភ្នំពេញ ត្រូវ​បាន​គេ​លប​វាយ​ឲ្យ​របួស​ដង​ខ្លួន និង​របួស​ក្បាល​ចំនួន​១៣​នាក់​ហើយ​។ ប៉ុន្តែ​លោក​បាន​បញ្ជាក់​ថា អាជ្ញាធរ​ក្រុង​ភ្នំពេញ មិន​ដែល​ចាប់​ខ្លួន ជន​ដៃដល់ យក​មក​ផ្តន្ទាទោស​បាន​ម្តង​ណាទេ។​

លោក ឆាយ គឹមខឿន អ្នក​នាំ​ពាក្យ​អគ្គស្នង​ការ​នគរ​បាល​ជាតិ​គូស​បញ្ជាក់​ប្រាប់វិទ្យុ​បារាំង​អន្តរ​ជាតិ​ថា ជា​ទូទៅ កាល​ណា​ពលរដ្ឋ​របស់​ខ្លួន​មាន​រង​គ្រោះ​ដោយ​អំពើ​ហិង្សា​នោះ​សមត្ថកិច្ច​នឹង​រៀប​ចំ​សំណុំ​រឿង ដើម្បី​ស្វែង​រក​មុខ​ជន​ដៃ​ដល់​។ លោក​បន្ត​ថា​ពលរដ្ឋ​ខ្លះ​ក៏​ប្តឹង ហើយ​ពល​រដ្ឋ​ខ្លះ​ក៏​មិន​បាន​ប្តឹង ប៉ុន្តែ​យ៉ាង​ណា​ក៏សមត្ថកិច្ច​នៅ​តែ​សុំ​ឲ្យ​គាត់​ដាក់​ពាក្យ​បណ្តឹង​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI