កម្ពុជា

ការជួបជុំ​របស់​គណបក្ស​សង្គ្រោះជាតិ​អាចត្រូវ​រំខាន​ដោយ​ភ្លៀង

ក្រុមបាតុករ​​គណបក្ស​សង្គ្រោះ​ជាតិ​​នៅទីលានប្រជាធិបតេយ្យ​នាពេលកន្លងមក
ក្រុមបាតុករ​​គណបក្ស​សង្គ្រោះ​ជាតិ​​នៅទីលានប្រជាធិបតេយ្យ​នាពេលកន្លងមក Siv Channa/RFI

គម្រោង​នៃ​ការ​ជួប​ជុំ​របស់​គណបក្ស​សង្គ្រោះជាតិ​ នៅ​លើ​ទីលាន​ប្រជាធិបតេយ្យ​នៅ​រសៀល​ថ្ងៃ​អាទិត្យ​ទី​៦​តុលា​នេះ​មិន​ផ្លាស់​ប្តូរ​ឡើយ។ តាម​គម្រោង មនុស្ស​ប្រមាណ​២​ម៉ឺន​នាក់​ត្រូវបាន​អំពាវនាវ​អោយ​ចូលរួម​​ក្នុ​វេទិកា​មហាជន​របស់​គណបក្ស​នេះ​ ប៉ុន្តែ​មន្ត្រី របស់​គណបក្ស​នេះ​ព្រួយ​បារម្ភ​អំពី​ភ្លៀង​ធ្លាក់​ដែល​អាចរំខាន​ដល់​ការ​ជួបជុំរវាង​អ្នកគាំទ្រ និង​មេដឹកនាំ​គណបក្ស​សង្គ្រោះជាតិ។

ផ្សាយពាណិជ្ជកម្ម

ដោយសារ​តែ​អាកាសធាតុ​មិនអំណោយផល ដោយ​មាន​ភ្លៀងធ្លាក់​រាល់ថ្ងៃ​ ក្នុង​រយៈពេល​ប៉ុន្មានថ្ងៃ​ចុងក្រោយនេះ មន្ត្រី​ជាន់ខ្ពស់​គណបក្ស​សង្គ្រោះជាតិ​បាន​ស្នើ​សុំ​ ទៅ​សាលារាជធានី​ភ្នំពេញ​ដើម្បី​ពួកគេ​អាច​សាងសង់​រោង​ពី​រល្វែង​ នៅ​លើ​ទីលាន​ប្រជាធិបតេយ្យ ​​​សម្រាប់​អោយ​អ្នកចូលរួមសមាជ​មហា​ជនបាន​​ជ្រក​ភ្លៀង ក្នុង​ករណី​ដែល​មាន​ភ្លៀង​ធ្លាក់​ នៅ​រសៀល​​​ថ្ងៃ​អាទិត្យ​នេះ។

តំណាងរាស្ត្រ​គណបក្ស​សង្គ្រោះជាតិ​មណ្ឌល​រាជធានី​ភ្នំពេញ លោក​ហូ វ៉ាន់​ដែល​ជាអ្នក​ទទួល​បន្ទុក​​ក្នុង​ការ​រៀបចំ​ការងារ​ជួបជុំមហាជន​នេះ​​ បាន​ប្រាប់​វិទ្យុបារាំង​អន្តរជាតិ នៅ​​ព្រឹក​ថ្ងៃ​អាទិត្យ​​ថា សាលារាជធានីភ្នំពេញ​បាន​អនុញ្ញាត​អោយ​សង់រោង​​នៅ​លើទីលាន​ប្រជាធិបតេយ្យ​ហើយ។ លោក​ហូ វ៉ាន់​ ដែល​បានសំដែង​ការ​ព្រួយ​បារម្ភអំពី​ការ​​​រំខាន​ដល់​​វេទិកា​ជួប​ជុំ​នៅ​រសៀល​ថ្ងៃអាទិត្យ​នេះ​ដោយសារ​ភ្លៀង​ធ្លាក់​នោះ​ បាន​បញ្ជាក់ថា គណបក្ស​សង្គ្រោះជាតិបាន​សង់​រោង​វែង​ពីរ​ ​អម​ជាមួយ​ដើមឈើ ​នៅ​សងខាង​ លើ​ទីលាន​ប្រជាធិបតេយ្យ។

នៅ​រសៀល​ថ្ងៃអាទិត្យ​នេះ គណបក្ស​សង្គ្រោះជាតិ​ត្រូវ​រៀបចំ​សមាជ​មហាជន​ដែលនឹង​ចាប់ផ្តើម​នៅម៉ោង​២​។ មនុស្ស​២​ម៉ឺន​នាក់​ត្រូវ​បាន​គេ​រំពឹង​​ថា​ នឹង​មក​ជួបជុំ​គ្នា​នៅ​លើទីលាន​ប្រជាធិបតេយ្យនេះ​ដើម្បី​ស្តាប់ជំហរ និង​សេចក្តី​សម្រេច​របស់​គណបក្ស​សង្គ្រោះជាតិ​ក្នុងយុទ្ធនាការ​​មួយដែល​គណបក្ស​ជំទាស់ហៅ​ថា ការ​ស្វែង​រក​យុត្តិធម៌​ជូន​ម្ចាស់​ឆ្នោត​។

នៅ​ក្នុង​វេទិកា​មហាជន​ដែល​នឹង​ត្រូវ​បិទ​បញ្ចប់​នៅ​ម៉ោង​៦​ល្ងាច​នោះ អ្នកចូលរួម​ជា​តំណាង​កម្មករ កសិករ និស្សិត អាជីវករ មន្ត្រីរាជការ និង​ព្រះសង្ឃ​​នឹង​ត្រូវ​ឡើង​សំដែង​មតិ​ជុំវិញ​គោល​ជំហរ​របស់​គណបក្ស​សង្គ្រោះជាតិ។

គួរ​រម្លឹកថា ក្រៅពី​វេទិកា​មហាជន​នៅ​ថ្ងៃ​នេះ គណបក្ស​សង្គ្រោះជាតិ​ ក៏​រៀបចំ​ការ​ជួបជុំ​មួយ​ទៀត​ នៅ​ថ្ងៃទី​២៣​តុលា​ដើម្បី​អំពាវនាវ​អោយ​ប្រទេស​ហត្ថលេខី​នៃ​កិច្ច​ព្រមព្រៀង​ទីក្រុង​ប៉ារីស​ស្តីពី​កម្ពុជា ពិនិត្យ​​ឡើង​វិញ​នូវ​ការ​អនុវត្តន៍​កិច្ច​ព្រមព្រៀង​នេះ ទាក់ទង​នឹង​ការ​បោះឆ្នោត ការ​គោរព​​សិទ្ធិមនុស្ស និង​បូរណភាពទឹក​ដី​ជាដើម។​ នេះ​បើតាម​ការ​រៀបរាប់​របស់​លោក​ហូ វ៉ាន់ តំណាងរាស្ត្រ​របស់​គណបក្ស​សង្គ្រោះជាតិ៕ 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI