កម្ពុជា

ប្រតិភូ​សហភាព​អឺរ៉ុប​ផ្តើម​ទស្សនកិច្ច​ស្វែងយល់​ពី​បញ្ហានយោបាយ​នៅ​កម្ពុជា

កិច្ច​ជំនួប​រវាង​គណៈ​ប្រតិ​ភូសហភាព​អ៊ឺរ៉ុប និង​លោក ស្រី ឃួន​​សុដារី អនុ​ប្រធានទី២​​របស់​រដ្ឋសភា។
កិច្ច​ជំនួប​រវាង​គណៈ​ប្រតិ​ភូសហភាព​អ៊ឺរ៉ុប និង​លោក ស្រី ឃួន​​សុដារី អនុ​ប្រធានទី២​​របស់​រដ្ឋសភា។ @rfi/channa
ដោយ៖ ស៊ុន មេសា
២២ នាទី

គណៈប្រតិភូ​សហភាព​អឺរ៉ុប​បាន​ផ្តើម​ទស្សនកិច្ច​របស់ខ្លួន​នៅ​ថ្ងៃ​ពុធ​នេះ ដោយ​ជួប​ជាមួយ​មន្ត្រី​រដ្ឋសភា មន្ត្រីជាន់ខ្ពស់​រដ្ឋាភិបាល និង​គណបក្សកាន់អំណាច រួមទាំង​គណបក្សប្រឆាំង។ ក្នុងជំនួប​ជាមួយ​សមាជិក​រដ្ឋសភា ប្រតិភូ​សហភាព​អឺរ៉ុប​បាន​ចោទសួរ​សំណួរ​មួយចំនួន​ទៅកាន់​មន្ត្រី​រដ្ឋសភា​កម្ពុជា​ទាក់ទង​នឹង​បញ្ហានយោបាយ​ក្រោយ​ការបោះឆ្នោត។ ដោយឡែក​ក្នុងជំនួប​ជាមួយ​បក្ស​សង្គ្រោះ​ជាតិ អ៊ឺរ៉ុប​គាំទ្រ​ឱ្យ​សំណើរ​របស់​បក្សប្រឆាំង​ស្តីពី​ឯករាជ្យភាព​នៃ​គ.ជ.ប រួមទាំង​ការស្វែងរក​ភាពយុត្តិធម៌​នៃ​ការបោះឆ្នោត​ផងដែរ។

ផ្សាយពាណិជ្ជកម្ម

ដំណើរការ​របស់​រដ្ឋ​សភា​ដោយ​គ្មាន​វត្តមាន​តំណាងរាស្ត្រ​បក្សប្រឆាំង និង​លទ្ធផល​នៃ​កិច្ចចរចា​រវាង​គណបក្ស​ជាប់ឆ្នោត​ទាំងពីរ​គឺជា​សំណួរ​សំខាន់​ដែល​គណៈប្រតិភូ​សហភាព​អឺរ៉ុប​ចោទសួរ​ទៅកាន់​មន្ត្រី​រដ្ឋសភា​កម្ពុជា។ សំណួរ​ទាំងពីរ​នេះ​ត្រូវបាន​គណៈប្រតិភូ​សហភាព​អឺរ៉ុប​លើកឡើង​ក្នុងជំនួប​ជាមួយ​លោកស្រី ឃួន សុ​ដា​រី អនុប្រធាន​ទី២របស់​រដ្ឋសភា​នៅ​ថ្ងៃ​ពុធ​នេះ​នៅឯ​មន្ទីរ​រដ្ឋសភាជាតិ។

យោងតាម​សេចក្តីប្រកាស​ព័ត៌មាន​របស់​រដ្ឋសភា​ដែល​ត្រូវបាន​ចែក​ផ្សាយ​នៅក្រោយ​ជំនួប​នោះ លោកស្រី ឃួន សុ​ដា​រី អនុប្រធាន​ទី២នៃ​រដ្ឋសភា បាន​ឆ្លើយតប​ថា រដ្ឋសភា​កម្ពុជា​ត្រូវបាន​បង្កើតឡើង​ដោយ​ស្របតាម​រដ្ឋធម្មនុញ្ញ​ទាំងស្រុង និង​កំពុងដំណើរការ​ដោយ​គ្មាន​ឧបសគ្គ​ទេ។ ពហិការ​របស់​តំណាងរាស្ត្រ​គណបក្ស​សង្គ្រោះ​ជាតិ​មិនបាន​ធ្វើ​ឲ្យ​ប៉ះពាល់​ដល់​ដំណើរការ​របស់​រដ្ឋសភា​ឡើយ។ ចំណែកឯ​កិច្ចចរចា​រវាង​គណបក្ស​ទាំងពីរ​ក៏ត្រូវ​បាន​អនុប្រធាន​ទី២របស់​រដ្ឋសភា​អះអាងថា បានទទួល​លទ្ធផល​មួយចំនួន​រួចហើយ ប៉ុន្តែ គណបក្សប្រឆាំង​បានប្រកាស​ផ្អាក​ការចរចា​បន្ទាប់ពី​ជំនួប​លើកចុងក្រោយ​កាលពី​ថ្ងៃទី ២៤ មីនា។

ដោយឡែក កាលពី​រសៀល​ថ្ងៃ​ពុធ​នេះដែរ ប្រតិភូ​សភាព​អ៊ឺរ៉ុប​ដែលមាន​គ្នា៧រូប បាន​បន្ត​ជួប​ជាមួយ​មេដឹកនាំ​គណបក្ស​សង្គ្រោះ​ជាតិ លោក សម រង្ស៊ី និង លោក​កឹម សុខា និង លោកស្រី​មួរ សុខ​ហួរ។ ក្រោយ​កិច្ចប្រជុំ​នៅ​ស្នាក់ការ​ស្ថានទូត​របស់​សហភាព​អ៊ឺរ៉ុប​ប្រចាំ​នៅ​កម្ពុជា រយៈពេល១ម៉ោង មក​ប្រធាន​គណបក្ស​សង្គ្រោះ​ជាតិ បាន​និយាយ​ទៅកាន់​អ្នកសារព័ត៌មាន​ពី​ក្នុង​ឡាន​មក​ថា “សហភាព​អ៊ឺរ៉ុប​ជំរុញឱ្យមាន​ការបោះឆ្នោត​ដោយ​សេរី និង យុត្តិធម៌។

ចំណែកឯ​លោកស្រី មួរ សុខ​ហួរ បាន​ប្រាប់​ទៅកាន់​អ្នកសារព័ត៌មាន​បន្ថែម​ថា សមាជិកសភា​សហគម​ន៍​អ៊ឺរ៉ុប គាំទ្រ​សំណើរ​របស់​គណបក្ស​ស​ង្គ្រោះ​ជាតិ​ចំនួន៣ចំណុច ក្នុងនោះ​មាន ឯករាជ្យភាព​នៃ​គណៈកម្មាធិការ​ជាតិ​រៀបចំ​ការបោះឆ្នោត និង​ជ្រើសរើស​គ.ជ.ប​ដោយ​សម្លេង​ពី​សមាជិកសភា ២ភាគ៣ និង​ការធានា​សិទ្ធមនុស្ស និង លទ្ធិប្រជាធិបតេយ្យ រួមទាំង​ការស៊ើបអង្កេត​លើ​ការបាត់បង់​ដីធ្លី និង​អាជីវកម្ម​ស្ករអំពៅ​របស់លោក​ឧក​ញ៉ា លី​យ៉ុង​ផាត់ ដែល​នាំចូល​ទៅកាន់​សភាព​អ៊ឺរ៉ុប​ជាដើម។

សូមបញ្ជាក់ថា គណៈប្រតិភូ​សភា​សហភាព​អឺរ៉ុប​ដែលមាន​គ្នា ៧ នាក់​បានមក​ដល់​ភ្នំពេញ​កាលពី​ល្ងាច​ថ្ងៃ​អង្គារ​ដើម្បី​បំពេញ​ទស្សនកិច្ច​ផ្លូវការ​រយៈពេល ៤ ថ្ងៃ​នៅ​កម្ពុជា។ ដំណើរ​ទស្សនកិច្ច​នេះ​គឺ​ដើម្បី​សិក្សា​អំពី​ទំនាក់ទំនង​កិច្ចសហប្រតិបត្តិការ​រ​វាង​សភា​សហគមន៍​អឺរ៉ុប​និង​កម្ពុជា និង​ក៏​ដើម្បី​ស្វែងយល់​អំពី​គម្រោង​ទាំងឡាយ ដែល​ទ្រទ្រង់​ថវិកា​ដោយ​សហគមន៍​អឺរ៉ុប ដូចជា​សាលាក្តី​ខ្មែរក្រហម ការរៀបចំ​ការបោះឆ្នោត​សកល ដំណោះស្រាយ​ដីធ្លី និង​បញ្ហា​លទ្ធិប្រជាធិបតេយ្យនៅ​កម្ពុជា​ជាដើម។

សមាជិកសភា​អឺរ៉ុប ក៏ត្រូវ​ស្វែងយល់​ពី​ផលប៉ះពាល់​ទាំងឡាយ ដែល​កើតចេញពី​គម្រោង​ផលិត​ទំនិញផ្សេងៗ ដើម្បី​យកទៅលក់​នៅលើ​ទីផ្សារ​អឺរ៉ុប ព្រមទាំង​ផលប៉ះពាល់​នៃ​គម្រោង​អភិវឌ្ឍន៍​ទៅលើ​ប្រជាពលរដ្ឋ ក្នុង​សហគមន៍​នានា​ផងដែរ។ នេះ​បើតាម​ការបញ្ជាក់​ក្នុង​សេចក្តីប្រកាស​ព័ត៌មាន​របស់​រដ្ឋសភា​កម្ពុជា​កាលពី​ថ្ងៃទី ២៤ មីនា។

ដើម្បី​ស្វែងយល់​ពី​បញ្ហា​ទាំងនោះ គណៈប្រតិភូ​សភា​អឺរ៉ុប ត្រូវ​ជួបពិភាក្សា​ការងារ​ជាមួយ​មន្ត្រី​នយោបាយ​កំពូល និង​ថ្នាក់ដឹកនាំសំខាន់ៗមកពី​បក្ស​កាន់អំណាច មាន​ជាអាទិ៍ លោកស្រី ឃួន សុ​ដា​រី អនុប្រធាន​ទី២ រដ្ឋសភា  លោក ឈាង វុន ប្រធាន​គណៈកម្មការ​កិច្ចការបរទេស​រដ្ឋសភា អគ្គលេខា​គណបក្ស​ប្រជាជន​កម្ពុជា លោក សាយ ឈុំ រដ្ឋមន្ត្រី​ក្រសួងមហាផ្ទៃ​លោក ស ខេង និង​លោក សុខ អាន រដ្ឋមន្ត្រី​ទទួលបន្ទុក​ទីស្តីការគណៈរដ្ឋមន្ត្រី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI