កម្ពុជា

ក្រសួង​ព័ត៌មាន​អនុញ្ញាត​ឱ្យ​មាន​ការ​ផ្សាយ​បន្ត​វិទ្យុបរទេស​ជា​ខេមរភាសាឡើងវិញ

RFI/Bunthoeun

ទីបំផុត​ទៅ ក្រសួង​ព័ត៌មាន​បាន​លុបចោល​នូវ​បម្រាម​ ហាមវិទ្យុ​FM ក្នុង​ស្រុក​ទាំងអស់មិន​ឱ្យ​ផ្សាយ​បន្ត​នូវ​កម្មវិធី​ព័ត៌មាន​របស់​វិទ្យុបរទេស​ជា​ខេមរភាសា រួម​មាន​ វិទ្យុអាស៊ីសេរី វិទ្យុ​វីអូអេ វិទ្យុបារាំង​ RFI និង​វិទ្យុអូស្ត្រាលី។ សេចក្តី​សម្រេច​នោះ ត្រូវ​បាន​ប្រកាស​កាល​ពី​យប់​ថ្ងៃទី២៩ មិថុនា​តាម​កញ្ចក់​ទូរទស្សន៍​ជាតិ។ មូលហេតុ ត្រូវ​បាន​ក្រសួង​ព័ត៌មាន លើក​ឡើង​ថា​មក​ពី​មាន​សំណូមពរ​ពីម្ចាស់​ស្ថានីយវិទ្យុ។

ផ្សាយពាណិជ្ជកម្ម

ប៉ុន្តែ​ក្រសួង​ព័ត៌មាន​ក៏​មិន​ភ្លេច រម្លឹក​ឱ្យ​ម្ចាស់​ស្ថានីយ​វិទ្យុ​ទាំងអស់ គោរពនូវសេចក្តីប្រកាសរបស់​ខ្លួនចុះថ្ងៃទី​២១ មិថុនា។ នោះ​គឺ​ការ​គោរព​នូវ​បទបញ្ជា និង​នីតិវិធី​ដោយ​ជៀសវាងការផ្សព្វផ្សាយ​ព័ត៌មាន​ណា​ដែល​នាំឱ្យ​ប៉ះពាល់​ដល់​ដំណើរ​រៀបចំការបោះឆ្នោត ដូច​ជា ការ​ផ្សាយ​នូវ​ការ​ស្ទង់​មតិមហាជន អំពី​ការបោះឆ្នោត​ជាដើម។

 
នៅ​ព្រឹក​ព្រលឹម​ថ្ងៃអាទិត្យ​ទី៣០ មិថុនា​នេះ គេ​អាច​ស្តាប់ ឮ​ឡើង​វិញ​ហើយ​នូវ​ការផ្សាយ​ព័ត៌មាន​របស់វិទ្យុអាស៊ីសេរី និងវិទ្យុវីអូអេ តាមវិទ្យុFM នៅភ្នំពេញ និង​នៅ​តាម​បណ្តា​ខេត្ត​នានា មាន​ដូច​ជា វិទ្យុសំបុកឃ្មុំ FM105 វិទ្យុFM 102 និងវិទ្យុ FM 93.5 ជាដើម។
 

ជា​ការ​កត់សម្គាល់ វិធាន​ការ​របស់​ក្រសួងព័ត៌មាន ដែល​បាន​បញ្ជា​ឱ្យ​បិទការ​ផ្សាយ​បន្ត​វិទ្យុ​បរទេស ជា​ខេមរភាសា ក្នុង​អំឡុង​ពេល​ឃោសនា​បោះឆ្នោត និង​ថ្ងៃ​បោះឆ្នោត ដែល​មាន​រយៈពេល ៣១​ថ្ងៃ ចាប់​ថ្ងៃ​ទី​២៨ មិថុនា​ម្សិលមិញ គឺ​មាន​ប្រតិកម្ម​យ៉ាង​ខ្លាំង​ក្លា ពី​មហាជន អង្គការ​វិជ្ជាជីវៈ​សារព័ត៌មាន និង​សកម្មជន​សិទ្ធិមនុស្ស​មក​ពី​គ្រប់​ទិសទី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI