កម្ពុជា-សង្គម

លោក​ ហ៊ុន​ សែន​ ដក​តំណែង​អភិបាល​រង​ខេត្ត​ព្រះ​សីហនុ​ពីរ​រូប​ បន្ទាប់​ពី​បង្រ្កាប​ពលរដ្ឋ​លើ​ទំនាស់​ដីធ្លី​

ទិដ្ឋភាពជម្លោះដីធ្លីនៅខេត្តព្រះសីហនុថ្ងៃទី២៤មករា២០១៩
ទិដ្ឋភាពជម្លោះដីធ្លីនៅខេត្តព្រះសីហនុថ្ងៃទី២៤មករា២០១៩ @RFI

អភិបាល​រង​ខេត្ត​ព្រះសីហនុ​ចំនួន​ពីរ​រូប​ត្រូវ​បាន​​ប្រមុខ​រដ្ឋាភិបាល ​លោក ហ៊ុន សែន សម្រេច​បញ្ចប់​មុខ​តំណែង​នៅថ្ងៃ​សុក្រ​នេះ ​បន្ទាប់​ពី​មាន​ការ​បង្រ្កាប​លើ​ទំនាស់​ដីធ្លី​ដោយ​ហិង្សា​មួយ​កន្លែង​នៅ​ខេត្ត​ទេសចរណ៍​ជាប់មាត់​សមុទ្រ​មួយ​នេះ កាលពី​ចុង​ខែ​មករា​។​ អភិបាល​រង​ខេត្ត​ទាំង​ពីរ​រូប​នេះ​ គឺ​ស្ថិត​ក្នុង​ចំណោម​មន្រ្តីជាន់​ខ្ពស់​ខេត្ត​នេះចំនួន​៣​នាក់ ​ដែល​ត្រូវ​បាន​លោក ​ហ៊ុន ​សែន ​ព្រមាន​ដក​តំណែង​ កាលពី​ម្សិលមិញ​ខណៈ​លោក​ដឹក​នាំ​កិច្ច​ប្រជុំ​ឧត្តម​ក្រុម​ប្រឹក្សា​ពិគ្រោះ​យោបល់ ​។

ផ្សាយពាណិជ្ជកម្ម

យោង​តាម​អនុក្រឹត្យ លោក​នាយក​រដ្ឋមន្រ្តី ហ៊ុន សែន បានសម្រេច​បញ្ចប់​មុខ​តំណែង​អភិបាល​រង​ខេត្ត​ព្រះ​សីហនុ​ចំនួន​ពីរ​រូប គឺ​លោក ស្រ៊ុន ស្រ៊ន់ និង លោក ផៃ ប៊ុនវណ្ណៈ។ លោក ផៃប៊ុន វណ្ណៈ ដែលបានដឹក​នាំ​កម្លាំង​ចម្រុះ ៣០០​នាក់ ​រាប់​ទាំង​កម្លាំង​យោធាផង​ ​ចុះ​ទៅ​អនុវត្ត​សាល​ដីកាក្នុង​ជម្លោះ​ដី​ធ្លី​នៅ​ ឃុំបិត​ទ្រាំង ស្រុក​ព្រៃនប់ ដើម្បី​វាស់វែង​ដី​ឲ្យ​អ្នកស្រី ហុង សួន ភរិយា​របស់​ឧកញ៉ា ស៊ីវ គង់ទ្រីវ​។​ ជា​ការចុះ​អនុវត្ត​សាល​ដីកា ធ្វើ​ឲ្យ​ពលរដ្ឋ​រាប់​រយ​នាក់​តវ៉ា ដុត​កង់​ឡាន​និង​បិទផ្លូវ ​ហើយ​ក៏​មាន​ហិង្សា​បណ្តាលពលរដ្ឋ​ម្នាក់​រង​របួស​ដោយ​គ្រាប់​កាំ​ភ្លើង​។

ត្បិត​តែ​លោក ហ៊ុន សែន មិន​បាន​បញ្ជាក់​ចំៗ​ពី​មូល​ហេតុ​នេះ​ក៏​ដោយ​ តែ​នៅលើ​ទំព័រ​ហ្វេស​ប៊ុក​របស់លោក​បាន​សរសេរថា «ថ្ងៃនេះ​ខ្ញុំ​បង្ខំ​ចិត្ត​អនុវត្តន៍​អភិក្រម​ទី​៥​គឺការ​វះកាត់​ដោយ​ដក​អភិបាលរង​ខេត្ត​ព្រះសីហនុ​ពីរ​រូប​ចេញ​ពី​តំណែង​។​ខ្ញុំ​ត្រូវ​តែ​យក​គ្រាប់​គ្រួស​និង​ខ្សាច់​ចេញ​ពី​ស្បែក​ជើង​ទើប​អាច​ដើរទៅ​មុខទៀត​បាន»។​ សារ​នេះគឺ​ដូចគ្នា​នឹង​អ្វី​ដែល​លោក​ប្រមុខ​រដ្ឋា​ភិបាល​ថ្លែង​នៅក្នុង​ពិធីបើកការដ្ឋាន​សាង​សង់មន្ទីរពេទ្យ​«មិត្តភាពកម្ពុជា-ចិនត្បូងឃ្មុំ»នៅព្រឹក​ថ្ងៃសុក្រ​នេះ​ដែរ។​

បើតាម​ លោក ហ៊ុន សែន លោកបានប្រើអំណាចរបស់លោក ដើម្បីដក​ចេញពី​តំណែង​ហើយ ឯការងារបន្ដ គឺជាភារកិច្ចរបស់​អង្គភាពប្រឆាំងអំពើពុករលួយ និងក្រសួង​មហា​ផ្ទៃ។​

សូមរំឭក​ថា នៅ​ក្នុង​កិច្ច​ប្រជុំ​ជាមួយ​សមាជិក​ឧត្តម​ក្រុមប្រឹក្សា​ពិគ្រោះ និង​ផ្តល់យោបល់ ​កាលពី​ថ្ងៃព្រហស្បតិ៍ ​លោក ហ៊ុន សែន បាន​បញ្ជា​ផ្ទាល់​មាត់​ឲ្យ​សិក្សាពី​លទ្ធភាព​ដក​តំណែង​មន្ត្រី​ជាន់ខ្ពស់ ​៣​រូប គឺ​អភិបាល​រង​ពីរ​រូប ​និង​មេបញ្ជាការ​យោធា ​ខេត្ត​ព្រះសីហនុ ម្នាក់​ទៀត ពាក់ព័ន្ធ​នឹង​ការ​ចុះ​អនុវត្ត​សាលដីកា​លើ​ទំនាស់​ដីធ្លី​នៅ​ខេត្ត​ទេសចរណ៍​មួយ​នេះ​ដែល​បង្ក​ឲ្យ​ពល​រដ្ឋរ​ងរបួ​ស​ដោយ​គ្រា​ប់​កាំភ្លើ​ង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI