កម្ពុជា

អ្នក​មាន​ជម្លោះ​ដី​ធ្លី​នៅ​បុរី​កីឡា​តវ៉ា​ឲ្យ​អ​ភិបាល​រាជធានី​គោរព​ការ​សន្យា​

ក្រុមអ្នកតវ៉ាបញ្ហាដីធ្លី និង ក្រុមសមត្ថកិច្ចនៅមុខសាលារាជធានីភ្នំពេញ ថ្ងៃទី១៧ តុលា ឆ្នាំ២០១៣
ក្រុមអ្នកតវ៉ាបញ្ហាដីធ្លី និង ក្រុមសមត្ថកិច្ចនៅមុខសាលារាជធានីភ្នំពេញ ថ្ងៃទី១៧ តុលា ឆ្នាំ២០១៣ RFI/Siv Channa

ប្រជាពលរដ្ឋ​ប្រមាណ​ជាង១០០នាក់ ដែល​មកពី​សហគមន៍​អតីត​អ្នក​បុរី​កីឡា និង​មានការ​ចូលរួម​ពី​សហគមន៍​បឹងកក់ នៅ​ព្រឹក​ថ្ងៃ​ព្រហស្បតិ៍​នេះ ប្រមូលផ្តុំ​គ្នា​តវ៉ា​នៅខាងមុខ​សាលា​រាជធានី​ភ្នំពេញ ដើម្បី​ទាមទារ​រក​ដំណោះស្រាយ​ដីធ្លី ។ ជាការ​តវ៉ា ដើម្បី​ឲ្យ​លោក ប៉ា សុជាតិ​វង្ស អភិបាល​រាជធានី​ភ្នំពេញ ធ្វើតាម​ការសន្យា​ដែលថា លោក​នឹង​ដោះស្រាយ​បញ្ហាដីធ្លី ក្រោយ​លោក​ជាប់​ជា​អភិបាល​រាជធានី។ យ៉ាងណា ក្រុម​អ្នកភូមិ​តវ៉ា​បាន​ថ្លែង រហូតមកដល់​ពេលបច្ចុប្បន្ន​នេះ គ្មាន​ដំណោះស្រាយ​ណាមួយ​ឡើយ​ចំពោះ​បញ្ហាដីធ្លី​នៅក្នុង​ទីក្រុង​ភ្នំពេញ គឺ​មានតែ​ការសន្យា​ប៉ុណ្ណោះ។

ផ្សាយពាណិជ្ជកម្ម

វា​មិនមែនជា​លើកទីមួយ​ទេ ដែល​ប្រជា​សហគម​ន៏​បុរី​កីឡា អ្នកភូមិ​បឹងកក់ និង​សហគម​ន៏​ដីធ្លីផ្សេងៗទៀត​នៅក្នុង​រាជធានី​ភ្នំពេញ​បាននាំគ្នា​មក​តវ៉ា​នៅមុខ​សាលា​រាជធានី​ភ្នំពេញ ដើម្បី​ឲ្យ​ថ្នាក់ដឹកនាំ​ស្ថាប័ន​មួយ​នេះ​រក​ដំណោះស្រាយ​ដល់​ពួកគាត់​នោះ។

ក្រុមអ្នកតវ៉ា​មកពី​អតីត​សហគម​ន៏​បុរី​កីឡា និង​បឹ​កក​ក់ ដែលមាន​បញ្ហា​ដោយសារ​ទំនាស់​ដីធ្លី​អស់​ជាច្រើន​ឆ្នាំ​មកហើយ​នោះ បាន​បន្ត​ការតវ៉ា​របស់ខ្លួន​ជាថ្មីទៀត​នៅ​ព្រឹក​ថ្ងៃ​ព្រ​ហ​ស្ប​ត្តិ៍​នេះ នៅមុខ​សាលា​រាជធានី​ភ្នំពេញ ដោយ​ទាមទារ​ឲ្យ​លោក ប៉ា សុជាតិ​វង្ស អភិបាល​រាជធានី​ចេញមុខ​រក​ដំណោះស្រាយ​ពិតប្រាកដ​មួយ​ជូន​ពួកគាត់​តាម​ការសន្យា។

លោក ពេជ្រ លឹម​ឃុន តំណាង​សហគម​ន៏​បុរី​កីឡា​បាន​ថ្លែងថា លោក ប៉ា សុជាតិ​វង្ស ដែល​បាន​សន្យា​ក្រោយ​ការឡើង​កាន់តំណែង​ជា​អភិបាលក្រុង​តាំងពីដើម​ខែឧសភា ថា ស្វែងរក​ដំណោះស្រាយ​ដល់​អ្នក​បុរី​ឡា​ដែលមាន​បញ្ហា​ដី​ជាមួយ​ក្រុមហ៊ុន​ផាន​អ៊ី​ម៉ិច គឺ​លោក​មិនបាន​ធ្វើតាម​ការសន្យា​នោះទេ ដែលជា​ហេតុ​ធ្វើ​ឲ្យ​អ្នកភូមិ​បន្ត​រស់នៅ​គំនរ​សម្រាម និង​ក្រោម​ដំបូល​តង់​ធ្លុះធ្លាយ​យ៉ាង​វេទនា។

លោក​បញ្ជាក់ថា ការសន្យា​របស់លោក​អភិបាលក្រុង​បានធ្វើ​ឡើង​តាំងពី​មុនពេល​បោះឆ្នោត ប៉ុន្តែ​រហូតដល់​ក្រោយ​ការបោះឆ្នោត​នេះ​ទៀត ដំណោះស្រាយ​ក៏​នៅតែ​មិនមាន។ លោក​បន្តថា ប្រជាពលរដ្ឋ​រងគ្រោះ​អស់ជំនឿ​លើ​ការសន្យា​របស់លោក​អភិបាល ដោយ​ទាមទារ​ឲ្យ​មាន​ដំណោះស្រាយ​ជាក់លាក់​មួយ​ជាបន្ទាន់។

តំណាង​សហគមន៍​បុរី​កីឡា​បាន​បន្តរ​អោយដឹងទៀតថា កាលពីមុនៗ ក្រុម​សហគមន៍​ធ្លាប់​ស្វែងរក​ឲ្យ​មាន​ការធ្វើអន្តរាគមន៍​ពី​គ្រប់​ស្ថាប័ន ទាំង​រដ្ឋ ទាំង​សង្គម​ស៊ីវិល ប៉ុន្តែ​មិនទាន់​ទទួលបាន​ដំណោះស្រាយ​អ្វី​ឡើយ។ ហេតុដូច្នេះ​ក្តីសង្ឃឹម​តែមួយ​ចុងក្រោយ​របស់​អ្នកភូមិ​បុរី​កីឡា គឺ ធ្វើការ​តវ៉ា​នៅមុខ​សាលា​រាជធានី​ភ្នំពេញ ដើម្បី​សុំ​ដំណោះស្រាយ​ច្បាស់លាស់​មួយ​ពី​លោក​អភិបាល​រាជធានី​ភ្នំពេញ។

លោក ឡុង ឌី​ម៉​ង អ្នកនាំពាក្យ​សាលា​រាជធានី​ភ្នំពេញ​មិនអាច​ទាក់ទង​សុំ​ការពន្យល់​បានទេ​នៅ​ព្រឹក​ថ្ងៃ​ព្រ​ហ​ស្ប​ត្តិ៍​នេះ។

អតីត​អ្នក​បុរី​កីឡា អះអាងថា ពួកគេ៤៥គ្រួសារ​ក្នុងចំណោម ១០៧គ្រួសារ មិនទាន់​បានទទួល​សំណង​ពី​ក្រុមហ៊ុន​ផាន​អ៊ី​ម៉ិច ហើយ​កំពុង​រស់នៅ​កន្លែងចាស់ ដែល​ពួកគាត់​ធ្លាប់​រស់នៅ​មុនពេល​ក្រុមហ៊ុន បាន​បណ្ដេញចេញ​កាលពីដើមឆ្នាំ២០១២។
គួរ​បញ្ជាក់ថា ការតវ៉ា​របស់​អ្នកភូមិ​បុរី​កីឡា និង​បឹ​កក់​កាលពី​ព្រឹក​មិញ​នេះ មាន​កម្លាំង​សមត្ថកិច្ច​ចម្រុះ​ប្រដាប់​ដោយ​ខែល និង​ដំបងឆក់​ប្រមាណ​ជាង១០០នាក់ បាន​រា​រាំ​ក្រុមអ្នកតវ៉ា​ផងដែរ ប៉ុន្តែ​មិនមាន​ការប៉ះទង្គិច​គ្នា​នោះទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI