កម្ពុជា

គ.ជ.ប.​ពន្យល់​នីតិវិធី​ចុះឈ្មោះ​បោះឆ្នោត​ទៅ​ស្ថានទូត ខណៈ​មាន​ការ​រិះគន់

តំណាង​គណៈកម្មាធិការ​ជាតិ​រៀបចំ​ការបោះឆ្នោត ក្នុង​ជំនួបជាមួយ​មន្រ្តី​ទូត​បរទេស
តំណាង​គណៈកម្មាធិការ​ជាតិ​រៀបចំ​ការបោះឆ្នោត ក្នុង​ជំនួបជាមួយ​មន្រ្តី​ទូត​បរទេស RFI/Channa Siv

កម្ពុជា​កំពុង​ដំណើរ​ការ​ធ្វើ​បច្ចុប្បន្ន​ភាព​បញ្ជី​ឈ្មោះ​បោះឆ្នោត។ នៅ​ថ្ងៃ​ពុធនេះ លោកស្រី ស៊ិន ជុំបូ អនុប្រធាន​គណៈកម្មាធិការ​ជាតិ​រៀបចំ​ការ​បោះឆ្នោត ហៅកាត់​ថា គ.ជ.ប. បាន​ជួប​ជាមួយ​បណ្តា​មន្ត្រី​ស្ថានទូត​ប្រចាំ​នៅ​កម្ពុជា ដើម្បី​ពន្យល់​​​បង្ហាញ​ពួកគេ​អំពី​នីតិវិធី​បោះឆ្នោត និង​លទ្ធផល​នៃ​ការ​រៀបចំ​ការបោះឆ្នោត​កន្លងមក។ កិច្ចប្រជុំ​នេះ​ធ្វើ​ឡើង ខណៈ​ពេល​ដែល​អង្គការ​ក្រៅ​រដ្ឋាភិបាលមួយ​ចំនួន និង​គណបក្ស​ប្រឆាំងកំពុងរិះគន់​ភាព​មិន​ប្រក្រតី​នៃ​ការ​ចុះ​ឈ្មោះ​បោះឆ្នោត​ និង​ការ​អំពាវនាវ​របស់​គណបក្ស​ប្រឆាំង ​ដើម្បី​រុះរើ​ថ្នាក់ដឹកនាំ​គ.ជ.ប.។

ផ្សាយពាណិជ្ជកម្ម

គណៈកម្មាធិការ​ជាតិ​រៀបចំ​ការ​បោះឆ្នោត​ហៅ​កាត់​ថា គ.ជ.ប. បាន​រៀបចំ​ជំនួប​មួយ​ជាមួយ​មន្ត្រី​ទូត​ចំនួន​១៣​ប្រចាំ​នៅ​កម្ពុជា​ នៅ​ព្រឹក​ថ្ងៃ​ទី​២៦​កញ្ញា​នេះ។ គោល​បំណង​នៃកិច្ច​ប្រជុំ​នេះ​គឺ​ដើម្បី​ពន្យល់ និង​បង្ហាញ​ដល់​មន្ត្រី​ទូត​ទាំង​អស់​នូវ​នីតិវិធី​នៃ​ដំណើរ​ការ​បោះឆ្នោត​នៅ​កម្ពុជា រួម​ទាំង​លទ្ធផល​នៃ​ការ​រៀបចំ​ការ​បោះឆ្នោត​នៅ​កម្ពុជា​ក្នុង​ពេល​កន្លង​មក​ផងដែរ។

ជា​ការ​ពិត ដោយសារ​តែ​កម្ពុជា​កំពុង​ស្ថិត​នៅ​ក្នុង​ដំណើរ​ការ​នៃ​ការ​ចុះ​ឈ្មោះ​បោះឆ្នោត និង​ការ​ធ្វើ​បច្ចុប្បន្នភាព​បញ្ជី​ឈ្មោះ​បោះឆ្នោត​ផង​នោះ លោកស្រី​ស៊ិន ជុំបូ អនុប្រធាន​នៃ​គ.ជ.ប. ក៏​មិន​បាន​ភ្លេច​និយាយ​អំពី​បញ្ហា​នេះ​ដែរ។ ថ្លែង​ប្រាប់​អ្នកកាសែត លោកស្រី​ស៊ិន ជុំបូ​បាន​បញ្ជាក់​ថា គ.ជ.ប.ត្រូវ​រៀបចំ​ជំនួប​នេះ​ដើម្បី​ពន្យល់ឲ្យ​​មន្ត្រី​អង្គទូត​យល់​ច្បាស់ ​អំពី​ដំណើរ​ការ​កសាង​បញ្ជី​ឈ្មោះ​បោះឆ្នោត និង​នីតិវិធី​នៃ​បោះឆ្នោត​នៅ​កម្ពុជា ខណៈ​មន្ត្រី​ទូត​មួយ​ចំនួន​​ទើប​មក​ដល់​កម្ពុជា​ថ្មី។ ហើយ​នៅ​ក្នុង​ជំនួប​នោះ លោកស្រី​តំណាង​គ.ជ.ប. ក៏​បាន​ស្នើ​អោយ​មន្ត្រី​ទូត​ចែក​រំលែក​យោបល់ និង​ពិសោធន៍​របស់​ប្រទេស​ពួកគេ​ជាមួយ​នឹង​គ.ជ.ប.ផងដែរ។

ការ​រៀបចំ​វេទិកា​ពន្យល់ និង​បង្ហាញ​អំពី​នីតិវិធី​នៃ​ការ​បោះឆ្នោត​របស់​កម្ពុជា​ដល់​មន្ត្រី​ស្ថានទូត​នៅ​ពេល​នេះ ធ្វើ​ឡើង​នៅ​ពេល​ដែល​គណបក្ស​ប្រឆាំង​កំពុង​ព្យាយាម​អំពាវនាវ​អោយ​រដ្ឋាភិបាល​ផ្លាស់ប្តូរ​រូបមន្ត​នៃ​ការ​ជ្រើសរើស​មេដឹកនាំ​គ.ជ.ប. ហើយ​អង្គការ​ក្រៅ​រដ្ឋាភិបាល​មួយ​ចំនួន​បាន​រិះគន់​ភាព​មិន​ប្រក្រតី​នៃ​ការ​ចុះ​ឈ្មោះ​បោះឆ្នោត។

សង្រ្គាម​ប៉ាកា​កំពុង​កើត​ឡើង​យ៉ាង​ខ្លាំង​ក្នុង​សំណុំរឿង​បោះឆ្នោត ខណៈ​ដែល​កម្ពុជា​នឹង​ត្រូវ​រៀបចំ​ការ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៥​ នៅ​ខែ​កក្កដា​ឆ្នាំ​២០១៣​ក្រោយ​នេះ។ ជា​ការ​បោះឆ្នោត​ដែល​សំដៅ​ដល់​ការ​ជ្រើសរើស​នាយករដ្ឋមន្ត្រី​ផង។

នៅ​ថ្ងៃ​នេះ​ដែរ គណបក្ស​ប្រឆាំង​ទាំងពីរ គឺ​គណបក្ស​សម រង្ស៊ី និង​គណបក្ស​សិទ្ធិមនុស្ស​ដែល​បាន​រួមគ្នា​បង្កើត​គណបក្ស​ថ្មី​នោះ នៅ​តែ​បន្ត​អំពាវនាវ​ជា​ថ្មី​ទៀត អោយ​រដ្ឋាភិបាល​ពិចារណា​លើ​នីតិវិធី​នៃ​ការ​ជ្រើសរើស​សមាសភាព​នៃគ.ជ.ប. និង​គណៈកម្មាធិការ​រៀបចំ​ការ​បោះឆ្នោត​គ្រប់​លំដាប់​ថ្នាក់។ សំណូម​ពរ​បែប​នេះ​ត្រូវ​បាន​គណបក្ស​ប្រឆាំង​ទាំងពីរ​ពន្យល់​ថា គឺ​ដើម្បី​អោយ​ការ​បោះឆ្នោត​ឆ្នាំ​ក្រោយ​នេះ មាន​យុត្តិធម៌ និង​អាចទទួលយកបាន​ពី​គ្រប់​គណបក្ស​នយោបាយ។ ប៉ុន្តែ​ សូម​រំលឹកថា សំណូមពរ​នេះ ត្រូវ​បាន​រដ្ឋាភិបាល​ជំទាស់​២​ដង​មកហើយ​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI