នយោបាយ​ប្រទេសថៃ​ផ្តល់​បច្ច័យ​មិនសូវល្អ​ដល់​កម្ពុជា

សំឡេង ០៣:៤៩
កងទ័ពថៃ​ប្រើ​រថពាសដែក​​​បុកបំបែក​ទីតាំង​របស់​ពួក​អាវក្រហម កាលពីថ្ងៃ​ពុធ
កងទ័ពថៃ​ប្រើ​រថពាសដែក​​​បុកបំបែក​ទីតាំង​របស់​ពួក​អាវក្រហម កាលពីថ្ងៃ​ពុធ ©Reuters

បរាជ័យ​របស់​ក្រុម​អាវ​ក្រហម​ថៃ​ ក្រោម​ទម្ងន់​ដៃ​នៃ​វិធានការ​ក្តៅ​​របស់​រដ្ឋាភិបាល​លោក​​អាប់ភីស៊ីត​​បាន​ ធ្វើ​ឲ្យ​ពលរដ្ឋ​ខ្មែរ​ជា​ច្រើន​ ដែល​បាន​តាមដាន​ព្រឹត្តិការណ៍​នយោបាយ ​​នៅ​ប្រទេស​ថៃ ​ជា​ច្រើន​ខែ​មក​នេះ​ មាន​ការ​រំជួល​ចិត្ត។ ​​ជា​ទូទៅ ​គេ​បាន​សង្កេត​ឃើញ​ថា​​ ពលរដ្ឋ​ខ្មែរ​ជា​ច្រើន​ហាក់​មាន​សមានចិត្ត​ទៅ​លើ​ក្រុម​បាតុករ​អាវ​ក្រហម ​​ដែល​ទីបំផុត​​ទទួល​រង​ការ​បង្ក្រាប​យ៉ាង​ហិង្សា។ ​​តើ​មាន​មូលហេតុ​អ្វី​ខ្លះ​ ដែល​នាំឲ្យ​ពលរដ្ឋ​ខ្មែរ​ចាប់​​អារម្មណ៍​លើ​ព្រឹត្តិការណ៍​នៅ​ប្រទេស​ថៃ? ​​តើ​ស្ថានការណ៍​នយោបាយ​ក្នុង​ប្រទេស​ថៃ​ផ្តល់​​ផលវិបាក​អ្វី​ខ្លះ​ដល់​ ប្រទេស​កម្ពុជា?​​

ផ្សាយពាណិជ្ជកម្ម

 

ទីក្រុង​បាងកក​កំពុង​វិល​ទៅ​រក​ស្ថានភាព​ស្ងប់ស្ងាត់​ជា​បណ្តើរ​ៗ​ឡើង​វិញ​ហើយ​​ បន្ទាប់​ពី​​ការ​បង្ក្រាប​ដោយ​អំពើ​ហិង្សា​ទៅ​លើ​ក្រុម​បាតុករ​អាវ​ក្រហម​ កាល​ពី​ថ្ងៃ​ពុធ​​ តែ​ពលរដ្ឋ​ខ្មែរ​​ជា​ច្រើន​ ដែល​បាន​ជក់ចិត្ត​នឹង​ការ​តាមដាន​ព្រឹត្តិការណ៍​នយោបាយ​ នៅ​ប្រទេស​ថៃ ​រយៈ​​ពេល​ប៉ុន្មាន​ខែ​ចុងក្រោយ​នេះ​​ ហាក់​រំជួល​ចិត្ត​ជាមួយ​នឹង​ព្រឹត្តិការណ៍​នេះ​យ៉ាង​ខ្លាំង។

ជាការ​ពិត​​ មាន​ពលរដ្ឋ​ខ្មែរ​ជា​ច្រើន​​ រាប់​ទាំង​អ្នក​នយោបាយ ​​អ្នក​សង្កេតការណ៍​​ អ្នកសារព័ត៌មាន​​ និង​ពលរដ្ឋ​សាមញ្ញ​មួយចំនួន​ផង ​​បាន​ចាប់​អារម្មណ៍ ​​និង​តាមដាន​យ៉ាង​​យកចិត្ត​ទុកដាក់ ​ទៅ​លើ​ការ​វិវឌ្ឍន៍​​នៃ​ព្រឹត្តិការណ៍ន​យោបាយ​ក្នុង​ប្រទេស​ថៃ។​​​ ការ​តាម​​ដាន​គឺជា​រឿង​មួយ ​​ប៉ុន្តែ​​ការ​បង្ហាញ​សមានចិត្ត​ទៅ​លើ​ក្រុម​បាតុករ​អាវ​ក្រហម ​​គឺជា​រឿង​​មួយ​ទៀត ​ដែល​គួរ​ចាប់អារម្មណ៍។​

សម្រាប់​ក្រសែ​ភ្នែក​ក្រុម​អ្នក​វិភាគ ​​មាន​មូលហេតុ​ច្រើន​យ៉ាង ​ដែល​គេ​អាច​លើក​​យក​មក​ពន្យល់​ អំពី​អារម្មណ៍​របស់​ពលរដ្ឋ​ខ្មែរ​​ ចំពោះ​បញ្ហា​នេះ​បាន។​ ទី១​​ គឺ​បណ្តាល​មក​​ពី​កត្តា​ភូមិសាស្រ្ត​នៃ​ប្រទេស​ទាំងពីរ​ ដែល​ជា​ប្រទេស​ភូមិ​ផង​របង​ជាមួយ។ ​​ជា​ធម្មតា ​​មនុស្ស​គ្រប់​គ្នា​តែង​ចាប់​អារម្មណ៍​ អំពី​រឿងរ៉ាវ​ដែល​កើត​ឡើង​នៅ​ក្បែរ​ផ្ទះ​របស់​ខ្លួន។ ដូច្នេះ​ ការ​ចាប់​អារម្មណ៍​របស់​ពលរដ្ឋ​ខ្មែរ​ទៅ​លើ​ព្រឹត្តិការណ៍​នយោបាយ​ប្រទេស​ថៃ ​​ដែល​ជា​ប្រទេស​ជិតខាង​មិន​មែន​ជា​រឿង​ចម្លែក​ឡើយ។​​ ទី២ ​​មិន​ត្រឹម​តែ​ជា​ប្រទេស​​ជិត​ខាង​ធម្មតា​ប៉ុណ្ណោះ​ទេ ​​កម្ពុជា​​ និង​ថៃ​ថែម​ទាំង​មាន​ទំនាស់​ផ្នែក​នយោបាយ​ការទូត​​យ៉ាង​ស្រួចស្រាវ​ទៀត​ផង​ ចាប់​តាំង​ពី​ជិត​ពីរ​ឆ្នាំ​មក​ហើយ។​​ ​ទី៣​​ ការ​ឈ្លានពាន​របស់​​ថៃ​មក​លើ​ព្រំដែន​ប្រាសាទ​ព្រះវិហារ​ គឺជា​ព្រឹត្តិការណ៍​សំខាន់​មួយ​ទៀត​ ដែល​បាន​​បំផុស​ឡើង​នូវ​គំនិត​ជាតិ​និយម​ដ៏ជ្រាល​ជ្រៅ​មួយ ​ក្នុង​ចំណោម​ពលរដ្ឋ​ខ្មែរ។ ​​គំនិត​ជាតិ​​និយម​នេះ​ឯង​ ដែល​ទាក់ទាញ​អារម្មណ៍​របស់​ពលរដ្ឋ​ខ្មែរ​ឲ្យ​ផ្តោត​ទៅ​លើ​ភាព​វឹកវរ​ក្នុង​​ប្រទេស​ថៃ។
 

រដ្ឋាភិបាលខ្មែរ​រំពឹង​ថា​​ការ​ផ្លាស់ប្តូរ​រដ្ឋាភិបាល​ថៃ​អាច​នឹង​បន្ធូរបន្ថាយ​ភាពតានតឹង​ការទូត​ជាមួយ​ខ្មែរ
រដ្ឋាភិបាលខ្មែរ​រំពឹង​ថា​​ការ​ផ្លាស់ប្តូរ​រដ្ឋាភិបាល​ថៃ​អាច​នឹង​បន្ធូរបន្ថាយ​ភាពតានតឹង​ការទូត​ជាមួយ​ខ្មែរ ©វណ្ណារ៉ា/RFI

និយាយ​ពី​បញ្ហា​ព្រះវិហារ​​ ពលរដ្ឋ​ខ្មែរ​ជា​ទូទៅ​ប្រាកដ​ជា​នឹក​ខឹង​សម្បារ​ជាមួយ​​រដ្ឋាភិបាល​របស់​លោក​អាប់ភីស៊ីត​វិចាជីវ៉ា ​​ដែល​ជា​អ្នក​ផ្តើម​រឿង​ឈ្លានពាន​ទឹកដី​ខ្មែរ។​ ហេតុការណ៍​នេះ​អាច​ឲ្យ​គេ​យល់​បាន​ថា ​​ហេតុ​អ្វី​បាន​ជា​ខ្មែរ​ច្រើន​មាន​សមានចិត្ត​ជា​មួយ​ក្រុម​អាវ​ក្រហម ​ដែល​ជា​អ្នក​តស៊ូ​ប្រឆាំង​រដ្ឋាភិបាល​​លោក​អាប់ភីស៊ីត។ ​​ដូច្នេះ​​ ជា​ធម្មតា​ទេ ​​នៅ​ពេល​ដែល​ក្រុម​​អាវ​ក្រហម​ចាញ់​នៅ​ក្នុង​រឿង​នេះ​​ ទោះ​តិច​ឬ​ច្រើន​​ វា​នាំ​ឲ្យ​ពលរដ្ឋ​ខ្មែរ​ទាំង​នោះ​រំជួល​ចិត្ត​ដោយ​ចៀស​មិន​ផុត។

បរាជ័យ​របស់​ក្រុម​អាវ​ក្រហម​​មិន​មែន​ត្រឹម​តែ​ធ្វើ​ឲ្យ​ប៉ះពាល់​អារម្មណ៍​របស់​​ពលរដ្ឋ​ខ្មែរ​មួយ​ចំនួន​ប៉ុណ្ណោះ​ទេ​​ ប៉ុន្តែ​​វា​ក៏ជា​សញ្ញា​នៃ​ការ​អូស​បន្លាយ​វិបត្តិ​នយោបាយ​​ការទូត​រវាង​ប្រទេស​ទាំងពីរ​ផង​ដែរ។​​ ជា​ការពិត​​ កម្ពុជា​មិន​បាន​លូក​លាន់​ចូល​កិច្ចការ​ផ្ទៃក្នុង​របស់​ថៃ​ឡើយ។​​ ប៉ុន្តែ ​​ការ​ជាប់​ពាក់ព័ន្ធ​គ្នា​រវាង​ប្រទេស​ទាំង​ពីរ ​អំពី​បញ្ហា​ព្រំដែន​​ ដែល​ថៃ​បាន​បំពាន​ចុង​ក្រោយ​នេះ​​ បាន​ធ្វើ​ឲ្យ​រដ្ឋាភិបាល​កម្ពុជា​អស់​សង្ឃឹម​រលីង ​ទៅ​លើ​ការ​ចរចា​រក​ដំណោះស្រាយ​ជាមួយ​រដ្ឋាភិបាល​ថៃ។ ​ក្នុង​បរិបទ​ជាប់គាំង​ផ្នែក​ការទូត​នេះ​​ មាន​តែ​ការ​ទន្ទឹង​រង់ចាំ​រដ្ឋាភិបាល​ថៃ​ថ្មី​មួយ​ប៉ុណ្ណោះ ​ដើម្បី​ចាប់ផ្តើម​ដោះស្រាយ​បញ្ហា​ដោយ​សន្តិវិធី​បាន។​​ ឥឡូវ​នេះ ​​អ្វីៗ​មិន​ដូច​ជា​ការ​ទន្ទឹង​រង់ចាំ​នោះ​ឡើយ។

យ៉ាងណា​ក៏ដោយ ​ព្រឹត្តិការណ៍​នយោបាយ​នៅ​ក្នុង​ប្រទេស​ថៃ​នៅ​តែ​ជា​រឿង​របស់​​ថៃ​ដដែល ​​រីឯ​អារម្មណ៍​របស់​ខ្មែរ​យ៉ាង​ណា​នោះ​ វា​ជា​រឿង​របស់​ខ្មែរ។​​ ប៉ុន្តែ​​ភាព​ពាក់ព័ន្ធ​​រវាង​ប្រទេស​​ និង​ពលរដ្ឋ​ទាំង​ពីរ​ ពិត​ជា​មាន​ចំណង​ទាក់ទង​គ្នា​ ដែល​ត្រូវ​ដោះស្រាយ។ ​នៅ​លើ​ទិដ្ឋភាព​នយោបាយ​ការទូត​​ រដ្ឋាភិបាល​កម្ពុជា ​​និង​ថៃ​ត្រូវ​តែ​ប្រញាប់​ដោះស្រាយ​​បញ្ហា​ព្រំដែន​ឲ្យ​បាន​ជ្រះ​ស្រឡះ​ ដោយ​ឈរ​លើ​ច្បាប់​អន្តរជាតិ​ ដែល​នៅ​ជា​ធរមាន។​​ ការ​អូស​បន្លាយ​ពេល​យូរ​​អាច​នឹង​ធ្វើ​ឲ្យ​បញ្ហា​នេះ​ក្លាយ​ទៅ​ជា​អធិករណ៍​កាន់​តែ​ធំ​ ក្នុង​​ការ​ដុត​កម្តៅ​កំហឹង​ជាតិសាសន៍ ​រវាង​ប្រជាជាតិ​ខ្មែរ​​ និង​ថៃ។​ កំហឹង​ជាតិ​សាសន៍​​ ដែល​បណ្តាល​មក​ពី​បញ្ហា​ព្រំដែន ​​អាច​ក្លាយ​ជា​បញ្ហា​​ដ៏​គ្រោះ​ថ្នាក់​មួយ​ទៅ​ថ្ងៃ​អនាគត៕​​​​​​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI