នួន ជា និង ខៀវ សំផន ត្រូវបានតុលាការផ្តន្ទាទោសដាក់ពន្ធនាគារមួយជីវិត
អតីតមេដឹកនាំកំពូលខ្មែរក្រហមពីររូបគឺ នួន ជា និង ខៀវ សំផន ត្រូវបានសាលាក្តីខ្មែរក្រហមសម្រេចផ្តន្ទាទោសឲ្យជាប់ពន្ធនាគារអស់មួយជីវិតក្នុងសំណុំរឿង ០០២ វគ្គទី១ ។ សាលក្រមផ្តន្ទាទោសជនជាប់ចោទទាំងពីរត្រូវបានប្រកាស នៅព្រឹកថ្ងៃព្រហស្បតិ៍ទី ៧សីហានេះ។ សាលក្រមសំណុំរឿង ០០២ វគ្គទី១ ជាប់ពាក់ព័ន្ធនឹងបទឧក្រិដ្ឋកម្មប្រឆាំងមនុស្សជាតិក្នុងពេលជម្លៀសប្រជាជនដោយបង្ខំចេញពីទីក្រុង និងការសម្លាប់រង្គាលទៅលើទាហាន លន់ នល់ នៅទួលពោធិ៍ជ្រៃក្នុងខេត្តពោធិសាត់។
ចុះផ្សាយនៅថ្ងៃ៖
សាលក្រមផ្តន្ទាទោសជនជាប់ចោទទាំងពីរត្រូវបានប្រកាស នៅព្រឹកថ្ងៃព្រហស្បតិ៍ទី៧សីហានេះ ដោយលោកចៅក្រម និល ណុន ប្រធានអង្គជំនុំជម្រះសាលាដំបូងនៃសាលាក្តីខ្មែរក្រហមនៅចំពោះមុខជនជាប់ចោទនិងអ្នកចូលរួមស្តាប់យ៉ាងច្រើនកុះករ។ «អង្គជំនុំជម្រះសម្រេចផ្តន្ទាទោសនួន ជា ឲ្យជាប់ពន្ធនាគារអស់មួយជីវិត។ អង្គជំនុំជម្រះសម្រេចផ្តន្ទាទោស ខៀវ សំផន ឲ្យជាប់ពន្ធនាគារអស់មួយជីវិត»
នួន ជា អតីតអនុលេខាបក្សកុំក្មុយនិស្តកម្ពុជា អាយុ ៨៨ ឆ្នាំ និងខៀវ សំផន អតីតប្រមុខរដ្ឋកម្ពុជាប្រជាធិបតេយ្យអាយុ ៨៣ ឆ្នាំ ត្រូវបានតុលាការរកឃើញថាជាអ្នកទទួលខុសត្រូវចំពោះបទឧក្រិដ្ឋកម្មប្រឆាំងមនុស្សជាតិ និងការសម្លាប់រង្គាលទៅលើទាហាន លន់ នល់ ក្នុងអំឡុងពេលដែលខ្មែរក្រហមឡើងកាន់អំណាច។
សូមបញ្ជាក់ថា នេះគឺជាសាលក្រមផ្តន្ទោទោសនៃសំណុំរឿង ០០២វគ្គទី១ដែលជាប់ពាក់ព័ន្ធនឹងបទចោទប្រកាន់អំពីបទឧក្រិដ្ឋកម្មប្រឆាំងមនុស្សជាតិនៅពេលជម្លៀសប្រជាជនចេញពីទីក្រុងកាលពីខែមេសាឆ្នាំ ១៩៧៥ និងការជម្លៀសប្រជាជនចេញពីតំបន់ផ្សេងៗទៀតក្នុងអំឡុងពេលដែលខ្មែរក្រហមកាន់អំណាច និងបទចោទប្រកាន់ស្តីពីការសម្លាប់រង្គាលទៅលើទាហាន លន់ នល់ នៅទួលពោធិជ្រៃខេត្តពោធិសាត់។
ការបំបែកសំណុំរឿង០០២ ជាពីរផ្នែកត្រូវបានធ្វើឡើងក្រោមហេតុផលថាជនជាប់ចោទក្នុងសំណុំរឿងនេះសុទ្ធតែមានវ័យចាស់ជរានិងមានជំងឺប្រចាំកាយថែមទៀត។ ជាក់ស្តែង អៀង សារី អតីតរដ្ឋមន្ត្រីការបរទេសខ្មែរក្រហមបានទទួលមរណភាព ខណៈដែលលោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចមានជំងឺបាត់ការចងចាំដែលមិនអាចទទួលការកាត់ទោសបាន។ សាលក្រមសំណុំរឿង ០០២ វគ្គទី១នេះអាចចាត់ទុកថាជាការផ្តន្ទាទោសជនជាប់ចោទនៅពេលដែលពួកគេកំពុងមានជីវិតនិងមានកាយសម្បទារគ្រប់គ្រាន់នៅឡើយ។
ភ្លាមៗក្រោយពីការប្រកាសសាលក្រមនេះ លោក សុខ អានរដ្ឋមន្ត្រីទីស្តីការគណៈរដ្ឋមន្ត្រី និងជាតំណាងភាគីរដ្ឋាភិបាលកម្ពុជានៃសាលាក្តីខ្មែរក្រហមបានប្រកាសពីជោគជ័យរបស់សាលាក្តីកូនកាត់មួយនេះ។ លោក សុខ អាន បានហៅការប្រកាសសាលក្រមសំណុំរឿង ០០២ វគ្គទី១នេះថាជាជោគជ័យដ៏ធំធេងជាប្រវត្តិសាស្ត្រ និងបានហៅតុលាការខ្មែរក្រហមថាជាតុលាការដែលមានកម្រិតស្តង់ដារអន្តរជាតិ។ តំណាងភាគីសហប្រជាជាតិ លោក ដេវីដ ឆេហ្វ័រ ក៏បានសាទរចំពោះសាលក្រមនេះដែរ។ លោកបានបញ្ជាក់ថា ជាមួយជោគជ័យថ្មីនេះ ប្រទេសជាមិត្តនឹងបន្តជួយគាំទ្រថវិកាដល់សាលាក្តីនេះរហូតដល់ទីបញ្ចប់។
ប៉ុន្តែ មេធាវីការពារក្តីឲ្យជនជាប់ចោទមិនសប្បាយចិត្តចំពោះសាលក្រមនេះទេ ។ ពួកគេបានហៅតុលាការខ្មែរក្រហមថាបានបង្កើតអំពើអយុត្តិធម៌យ៉ាងធ្ងន់ធ្ងរដោយសារតែអ្នកបង្កើតចលនាខ្មែរក្រហមនិងអ្នកគាំទ្ររបបនេះទាំងខ្មែរនិងបរទេសមិនត្រូវបាននាំខ្លួនមកកាត់ទោសទេ។
នេះជាសាលក្រមលើកទី២ហើយបន្ទាប់ពីការផ្តន្ទាទោស កាំងហ្គិចអ៊ាវ ហៅឌុច អតីតប្រធានគុកទួលស្លែងឲ្យជាប់ពន្ធនាគារអស់មួយជីវិតក្នុងសំណុំរឿង ០០១ កាលពីខែកុម្ភៈឆ្នាំ ២០១២។ បន្ទាប់ពីបិទបញ្ចប់សំណុំរឿង ០០២ វគ្គទី១ សាលាក្តីខ្មែរក្រហមកំពុងដំណើរការសវនាការសំណុំរឿង ០០២ វគ្គទី២ជាបន្តទៀតដែលមានជនជាប់ចោទពីរនាក់ដដែលគឺ នួន ជា និង ខៀវ សំផន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ