កម្ពុជា

សភា​ឯកបក្ស​បោះ​ឆ្នោត​ជ្រើស​រើស​សមាជិក​គណៈកម្មការ​ទាំង៩​រួចរាល់​

លោក​ ហ៊ុន សែន និង តំណាងរាស្រ្ត​ ក្នុងកិច្ចប្រជុំសភា និតិកាលទី៥
លោក​ ហ៊ុន សែន និង តំណាងរាស្រ្ត​ ក្នុងកិច្ចប្រជុំសភា និតិកាលទី៥ RFI-ចាន់ណា

ដូច​ការ​គ្រោង​ទុក រដ្ឋសភា​ដែល​មាន​តែ​សមាជិក​មក​ពី​គណបក្ស​ប្រជាជន​កម្ពុជា​បាន​បើក​កិច្ចប្រជុំ​នៅព្រឹក​ថ្ងៃព្រហស្បតិ៍​ទី ១០ តុលានេះ​ដើម្បី​រៀប​ចំ​រចនាសម្ពន្ធ័​គណៈកម្មការជំនាញ​ទាំង៩​របស់ខ្លួន។ សមាជិក​សភា ៦៥ នាក់​បាន​សម្រេច​បោះឆ្នោត​ជ្រើស​រើស​ សមាជិក​គណៈកម្មការ​រួចរាល់ហើយ។ យ៉ាងណាក៏ដោយ គណបក្ស​ប្រជាជន​កម្ពុជា​នៅតែ​រក្សា​រចនាសម្ពន្ធ័​ដឹកនាំ​សភាមួយចំនួន​ទុកជូន​គណបក្សសង្គ្រោះជាតិ​ដដែល។

ផ្សាយពាណិជ្ជកម្ម

 

សមាជិក​រដ្ឋសភា ៦៥ រូបក្នុងចំណោម ៦៨ រូប​មក​ពី​គណបក្ស​ប្រជាជន​កម្ពុជា​ដែល​បាន​ចូលរួម​ក្នុង​កិច្ច​ប្រជុំ​រដ្ឋសភា​នៅ​ព្រឹក​ថ្ងៃ​ព្រហស្បតិ៍​នេះ បាន​បោះឆ្នោត​ជា​ឯកច្ឆ័នជ្រើសរើស​សមាស​ភាព​​សមាជិក​គណៈកម្មការ​ជំនាញ​ទាំង​៩របស់​រដ្ឋសភា​។ លោក ហេង សំរិន ប្រធាន​រដ្ឋសភា​ចាស់​អាណត្តិ​ថ្មី​បាន​ដឹកនាំ​កិច្ចប្រជុំ​សភា​លើកទី១ អាណត្តិទី៥ នេះ ហើយ​បាន​ប្រើ​រូបមន្ត​បោះឆ្នោត​ជា​កញ្ចប់​និង​ជា​សម្ងាត់។

​បន្ទាប់​ពី​ការ​បោះឆ្នោត​រួច​ហើយ គណៈកម្មការ​ជំនាញ​នីមួយៗ​ក៏​បាន​បើក​កិច្ច​ប្រជុំ​រៀងៗ​ខ្លួន​ដើម្បី​ជ្រើស​តាំង​លេខាធិការ​មួយរូប​ដើម្បី​បំពេញ​តាម​លក្ខខណ្ឌ​តម្រូវ។ ក៏ដូចជាកិច្ច​ប្រជុំ​ដំបូង​ដែរ តំណាងរាស្ត្រ​ទាំង ៥៥ នាក់​របស់​គណបក្ស​សង្គ្រោះជាតិ​បាន​បន្ត​ធ្វើពហិការ​មិន​ចូល​ប្រជុំ​ទេ។ យ៉ាងណាក៏ដោយ រដ្ឋសភា​នៅ​តែ​រក្សា​ទុក​តំណែង​និង​តួនាទីមួយ​ចំនួន​ជូន​ដល់​គណបក្សសង្គ្រោះជាតិ​ដដែល។ លោក ហេង សំរិន បានថ្លែង​ឲ្យដឹងថា ទ្វារនៅតែ​បើក​ចំហ​សម្រាប់​គណបក្ស​សង្គ្រោះជាតិ​ដដែល ហើយ​សមាស​ភាព​គណៈកម្មការ​សភា​នឹង​មាន​ការ​ផ្លាស់ប្តូរ​ប្រសិន​បើ​តំណាង​រាស្ត្រ​គណបក្សសង្គ្រោះជាតិយល់​ព្រម​វិល​ចូល​សភា​វិញ​នៅ​ពេល​ខាង​មុខ​នេះ។

គួរ​បញ្ជាក់​ថា គណបក្ស​ប្រជាជន​កម្ពុជា​ត្រៀម​ប្រគល់​តំណែង​អនុ​ប្រធាន​សភា​មួយ​រូប ប្រធាន​គណៈកម្មការ៤ និង​អនុប្រធាន​គណៈកម្មការ​៥ ដល់​គណបក្ស​សង្គ្រោះជាតិ។ ប៉ុន្តែ បក្សប្រឆាំង​បាន​ទាមទារ​យក​តំណែង​ប្រធាន​រដ្ឋសភា និង​សមាស​ភាព​ភាគ​ច្រើននៅ​ក្នុង​គណៈអចិន្ត្រៃយ៍។ ការ​ទាម​ទារ​នេះ​ក្នុង​ហេតុផល​ថា ដើម្បី​ធ្វើ​ឲ្យ​មាន​តុល្យភាព​អំណាច​ជា​មួយ​គណបក្ស​ប្រជាជន​កម្ពុជា។ ក្រៅ​ពី​នោះ​ គណបក្ស​សង្គ្រោះ​ជាតិ​ក៏​នៅតែ​ទាមទារ​ឲ្យ​មាន​ការ​ស៊ើប​អង្កេត​ឯករាជ្យ​អំពី​ភាព​មិន​ប្រក្រតី​នៃ​ការ​បោះឆ្នោត​ដដែល។

ប៉ុន្តែ គណបក្ស​ប្រជាជន​មិន​យល់​ព្រម​ប្រគល់​ស្ថាប័ន​នីតិបញ្ញត្តិ​នេះ​ឲ្យ​ទៅ​បក្ស​ប្រឆាំងគ្រប់គ្រង​ទេ។ លោកនាយករដ្ឋមន្ត្រី ហ៊ុន សែន ធ្លាប់​បាន​ប្រកាស​ថា គ្មានប្រទេស​ណា​មួយ​ដែល​ផ្តល់​តួនាទី​ប្រធាន​សភា​ឲ្យ​ទៅ​គណបក្ស​ដែល​មាន​សំឡេង​ភាគ​តិច​នោះ​ទេ​។ ហើយ​ការ​ធ្វើ​ដូច្នេះ​នឹង​ធ្វើ​ឲ្យ​រដ្ឋសភា​ជាប់គាំង​មិន​អាច​ដំណើរ​ការ​បាន​ឡើយ។

លោក ស ខេង ឧបនាយក​រដ្ឋមន្ត្រី និង​ជា​រដ្ឋមន្ត្រី​ក្រសួង​មហាផ្ទៃ​បាន​ប្រាប់​អ្នក​កាសែត​កាល​ពី​ថ្ងៃ​ពុធ​ថា ចុង​ក្រោយ​នេះ​លោក សម រង្ស៊ី បាន​បោះ​បង់​ការ​ទាម​ទារ​យក​តំណែងប្រធាន​រដ្ឋសភា​ហើយ តែ​នៅ​តែ​ចង់​បាន​ការ​គ្រប់​គ្រង​គណៈ​អចិន្ត្រៃយ៍​សភា​ដដែល។ ប៉ុន្តែ ព័ត៌មាននេះ​ត្រូវ​បាន​គណបក្ស​សង្គ្រោះ​ជាតិ​បដិសេធ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI