ទស្សនៈព្រឹត្តិការណ៍ខ្មែរ

កម្តៅ​នយោបាយ​នឹង​ជះចំហាយ​អាក្រក់​ដល់​ការ​បោះឆ្នោត!

សំឡេង ០៤:៤២
រូបថត​អតីត​អ្នកទោស​នៅ​គុកទួលស្លែង ដែល​បច្ចុប្បន្ន​ក្លាយ​ជា​សារមន្ទីរ​ប្រល័យពូជសាសន៍
រូបថត​អតីត​អ្នកទោស​នៅ​គុកទួលស្លែង ដែល​បច្ចុប្បន្ន​ក្លាយ​ជា​សារមន្ទីរ​ប្រល័យពូជសាសន៍ RFI/Bona Pen

មាន​ព្រឹត្តិការណ៍​មួយចំនួន​ដែល​កើតឡើង​រយៈពេល​ចុងក្រោយ​នេះ​បានធ្វើ​ឲ្យ​ឆាកនយោបាយ​ប្រទេស​កម្ពុជា​ឡើងក​ម្តៅ​កាន់តែខ្លាំង។ ភ្លាមៗក្រោយពី​ការអំពាវនាវ​របស់លោក​នាយករដ្ឋមន្ត្រី ហ៊ុន សែន រដ្ឋសភា​កំពុង​ចាត់វិធានការ​យ៉ាង​ឆាប់រហ័ស​ក្នុងការ​បង្កើត​ច្បាប់​ដាក់ទោស​ជន​ណា​ដែល​មិន​ទទួលស្គាល់​អំពើ​ឧក្រិដ្ឋកម្ម​ក្នុង​របប​ខ្មែរក្រហម។ ទន្ទឹមនឹងនោះ មហា​បាតុកម្ម​ប្រឆាំង​លោក កឹម សុខា មេដឹកនាំបក្សប្រឆាំង​ក៏ត្រូវ​បាន​គេ​ត្រៀម​ធ្វើ​ផងដែរ។ ទាំងនេះ​គឺជា​កម្តៅ​នយោបាយ​ដែល​នឹង​ជះ​ចំហាយ​អាក្រក់​ដល់​ការបោះឆ្នោត​ប្រសិនបើ​គេ​មិន​ប្រញាប់​ពន្លត់​វា​​ទេនោះ។

ផ្សាយពាណិជ្ជកម្ម

កាលពី​ប៉ុន្មាន​ខែ​មុននេះ តំណាងរាស្ត្រ​ដ៏​មាន​វោហារសាសន៍​របស់​គណបក្ស​ប្រជាជន​កម្ពុជា​ម្នាក់​គឺ​លោក ឈាង វុន បានធ្វើ​ឲ្យ​ជនជាតិដើម​ភាគតិច​ព្នង​ខឹងសម្បារ​នៅពេលដែល​លោក​បាន​ហៅ​តំណាងរាស្ត្រ​បក្ស​ប្រឆាំង​ថា​មាន​ចរិត​ព្រៃផ្សៃ​ដូច«ព្នង»។ ពាក្យ​មួយ​ម៉ាត់​នេះ​បានធ្វើ​ឲ្យ​សហគមន៍​ជនជាតិដើម​ភាគតិច​ព្នង​ទាមទារ​ឲ្យ​លោក​តំណាងរាស្ត្រ​សុំទោស​នៅ​ចំពោះមុខ​មេកន្ទ្រាញ​ទៅតាម​ប្រពៃណី​របស់​ពួកគេ។ ទីបំផុត ពិធី​សុំ​ខ​មាល​ទោស​មួយ​ត្រូវ​បានរៀបចំ​ធ្វើឡើង​តាម​ការព្រម​ព្រៀ​ង​ រវាង​ភាគី​ទាំងសងខាង។

ឥឡូវនេះ​ដល់​វេន​លោក​កឹម សុខា ប្រធានស្តីទី​គណបក្ស​ស​ង្គ្រោះ​ជាតិ​វិញ​ម្តង​ដែល​ធ្វើ​ឲ្យ​ជនរងគ្រោះ​ក្នុង​របប​ខ្មែរក្រហម​ ជាពិសេស​អ្នក​ដែល​សេសសល់​ពី​ការស្លាប់​ក្នុង​គុក​ទួលស្លែង​ខឹងសម្បារ។ ការខឹង​សម្បារ​នេះ​បាន​កើតឡើង​បន្ទាប់ពី​មានការ​ផ្សព្វផ្សាយ​ខ្សែអាត់​សំឡេង​របស់លោក​កឹម សុខា ដែលថា«គុក​ទួលស្លែង​ជា​កន្លែង​សិប្ប​និមិត្ត»។ ស្របពេល​ជាមួយគ្នានេះដែរ ក្រុម​អ្នក «រាជានិយម» ក៏​កំពុង​ខឹងសម្បារ​នឹង​លោក គង់ គាំ ប្រធាន​គណបក្ស សម រង្ស៊ី ទាក់ទង​នឹង​ការអះអាង​របស់លោក​ ស្តីពី​រដ្ឋប្រហារ«សិប្ប​និមិត្ត» ក្នុងការ​ទម្លាក់​សម្តេច​ព្រះ នរោត្តម សីហនុ កាលពី​ថ្ងៃទី១៨មីនា ឆ្នាំ ១៩៧០។

ជាការ​ពិត រឿង​ទាំងអស់នេះ​សុទ្ធតែ​ត្រូវបាន​អ្នកនយោបាយ​បដិបក្ខ​បំពង​បន្ថែម​ ដើម្បី​គោលដៅ​នយោបាយ។ ប្រសិនបើ​មិន​ដូច្នោះ​ទេ វា​ប្រហែលជា​មិនអាច​ក្លាយជា​រឿង​ធំ​ដូច្នេះ​ឡើយ។ ការ​ឆ្លៀត​ចាប់កំហុស​គូបដិបក្ខ​មក​ធ្វើជា​ចំណុច​វាយបក​ ដើម្បី​បំបាក់មុខ​តាមរយៈ​ការប្រើប្រាស់​កំហឹង​មហាជន​ហាក់​កំពុង​ក្លាយជា​និន្នាការ​ថ្មី​មួយ​ សម្រាប់​អ្នកនយោបាយ​ខ្មែរ​នៅក្នុង​បរិបទ​ថ្មី​នៃ​ប្រជាធិបតេយ្យ​នៅ​កម្ពុជា។ ប៉ុន្តែ អ្វីដែល​គួរ​ឲ្យ​ព្រួយបារម្ភ​នោះ​គឺ នៅពេលដែល​បញ្ហា​មួយ​ត្រូវបាន​អូសទាញ​ឲ្យ​ទៅជា​រឿង​នយោបាយ បញ្ហា​នោះ​នឹង​ក្លាយជា​រឿង​ស្មុគស្មាញ​ពិបាក​ដោះស្រាយ​ ហើយ​វា​ច្បាស់​ជា​ក្លាយជា​ដុំ​ភ្លើង​ដុត​កម្តៅ​ឆាកនយោបាយ​ឲ្យ​ឆេះ​ក្តៅ​កាន់តែខ្លាំង។

ជាក់ស្តែង បញ្ហា​លោក កឹម សុខា ទំនងជា​មិនមែន​អាច​បញ្ចប់​បាន​ដោយងាយៗឡើយ។ មិន​ងាយ​នៅត្រង់ថា លោក កឹម សុខា បដិសេធ​មិន​ទទួលស្គាល់​ខ្សែអាត់​សំឡេង​ដែល​បញ្ចេញ​ដោយ​រដ្ឋាភិបាល​នោះទេ។ ដូច្នេះ លោក​ក៏​មិនបាន​ត្រៀមខ្លួន​សុំទោស​ដែរ។ ប៉ុន្តែ នៅឯ​ជ្រុង​ម្ខាង​ទៀត លោកនាយក​រដ្ឋមន្ត្រី ហ៊ុន សែន បាន​ចេញមុខ​ប្រកាសថា បាតុកម្ម​មហាជន​មួយ​ដែល​ដឹកនាំ​ដោយ​លោក ជុំ ម៉ី អតីត​អ្នកទោស​គុក​ទួលស្លែង​នឹង​កើតឡើង​នៅពេល​ខាងមុខ​ដើម្បី​ប្រឆាំង​លោក កឹម សុខា។

ទន្ទឹមនឹងនោះ លោកនាយក​រដ្ឋមន្ត្រី​ក៏បាន​ផ្តួចផ្តើម​ឲ្យ​រដ្ឋសភា​តា​ក់​តែង​ច្បាប់​ប្រឆាំង​ជន​ណា​ដែល​មិន​ទទួលស្គាល់​ឧក្រិដ្ឋកម្ម​ក្នុង​របប​ខ្មែរក្រហម​ទៀតផង។ ច្បាប់​នេះ​ទំនងជា​ត្រូវ​រដ្ឋសភា​អនុម័ត​ក្នុងពេល​ដ៏​ខ្លី​ខាងមុខ។ ឧបមា​ថា ច្បាប់​នេះ​គ្មាន​អានុភាព​ធាក់​ថយក្រោយ ​ដើម្បី​ដាក់ទោស​លោក កឹម សុខា ក៏ដោយចុះ ក៏​វត្តមាន​ដ៏​តក់ក្រហល់​របស់​ច្បាប់​នេះ​នឹង​ក្លាយជា​សម្ពាធ​ថ្មី​មួយទៀត​ទៅលើ​បក្សប្រឆាំង​ ពីព្រោះ​សូម​កុំ​ភ្លេច​ថា ប្រធានបទ​សំខាន់​មួយ​សម្រាប់​ការឃោសនា​នយោបាយ​រប​ស់​បក្សប្រឆាំង​ គឺ​បញ្ហា​ខ្មែរក្រហម ជាពិសេស​ ការប្រឆាំង​ថ្ងៃ៧មករា។

សរុប​មកវិញ កម្តៅ​នយោបាយ​ហាក់​កំពុងតែ​ក្តៅ​ឡើងជា​លំដាប់​ពី​ពេលនេះ​ដល់​ការបោះឆ្នោត។ កម្តៅ​នេះ​ប្រសិនបើ​នៅតែ​បន្ត​នឹង​ជះ​ចំហាយ​អាក្រក់​យ៉ាងខ្លាំង​ដល់​ការបោះឆ្នោត​ថ្ងៃទី២៨ កក្កដា​ខាងមុខ។ មេរៀន​ដែល​គេ​អាច​ទាញ​ចេញពី​បញ្ហា​នេះ​គឺ ទី១ អ្នកនយោបាយ​គួរតែ​បង្កើន​ការទទួលខុសត្រូវ​ឲ្យ​បាន​ខ្លាំង​ជាង​នេះ​ចំពោះ​ពាក្យសម្តី​ឃោសនា​របស់ខ្លួន ​ពីព្រោះ​កំហុសឆ្គង​ណាមួយ​មិន​ខុសពី​ការ​ហុច​ដង​ដាវ​ឲ្យ​គូបដិបក្ខ​ ដើម្បី​វាយប្រហារ​មកលើ​ខ្លួន​វិញ​នោះឡើយ។ ទី២ អ្នកនយោបាយ​គួរ​បង្ហាញ​ភាពចាស់ទុំ​ជាង​នេះ​នៅក្នុង​ការឆ្លើយឆ្លងគ្នាទៅវិញទៅមក។

ក្នុងន័យនេះ ការ​ជ្រុលជ្រួស​ខ្លះ ឬ​ទស្សនៈ​នយោបាយ​ផ្ទុយ​ពី​ខ្លួន​គឺជា​រឿង​ធម្មតា​មួយ​ប៉ុណ្ណោះ​ក្នុងសង្គម​ប្រជាធិបតេយ្យ​តែ​វា​មិនមែនជា​កម្មវត្ថុ​នៃ​ការដាក់ទោស​ទេ។ ប៉ុន្តែ បើ​យោងតាម​អ្វីដែល​កំពុង​កើតឡើង​ពេលនេះ និន្នាការនយោបាយកម្ពុជា​ត្រូវគេ​មើលឃើញថា កំពុង​ឈានទៅរក​ស្ថានភាព​​កាន់តែអាក្រក់ឡើងគួរឲ្យព្រួយបារម្ភ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI