កម្ពុជា

គណបក្ស​ថ្មី​របស់​សម្តេច​ក្រុម​ព្រះ​ប្រកាស​ជា​ផ្លូវ​ការ

សម្តេច​ក្រុមព្រះ នរោត្តម រណ ឫទ្ធិ ប្រកាស​បង្កើត​គណបក្ស​ "សង្គម​រាស្ត្រ​រាជាធិបតេយ្យ"
សម្តេច​ក្រុមព្រះ នរោត្តម រណ ឫទ្ធិ ប្រកាស​បង្កើត​គណបក្ស​ "សង្គម​រាស្ត្រ​រាជាធិបតេយ្យ" @ rfi/channa

ក្រោយ​ផ្អាក​សកម្មភាព​ក្នុង​ឆាកនយោបាយ​អស់​មួយរយៈ​ពេល​វែង ព្រះអង្គម្ចាស់​នរោត្តម រណឫទ្ធិ នៅ​ថ្ងៃទី១៦ មីនា នេះ​បានប្រកាស​បង្កើត​គណបក្ស​នយោបាយ​ថ្មី​មួយទៀត ដើម្បី​ចូលរួម​ប្រកួត​ក្នុង​ឆាកនយោបាយ​កម្ពុជា។ គណបក្ស​ថ្មី​របស់​សម្តេចក្រុមព្រះ​ដែល​ឈ្មោះថា សង្គម​រាស្ត្រ​រាជាធិបតេយ្យ នឹង​ចុះបញ្ជី​ជា​ផ្លូវការ​នៅ​ថ្ងៃទី១៧ មីនា​ស្អែក​នេះ។ សម្តេចក្រុមព្រះ​នរោត្តម ​រណឫទ្ធិ​ដែលជា​បុត្រា​ច្បង​របស់​សម្តេចឪ អតីត​ព្រះមហាវីរៈក្សត្រ បញ្ជាក់ថា​គណបក្ស​រប​ស់​ព្រះ​អង្គជា​អ្នករាជានិយម សីហនុ​និយម។ យ៉ាងណាក៏ដោយ​អ្នកវិភាគ​នយោបាយ អះអាងថា ព្រះអង្គម្ចាស់​នរោត្តម រណឫទ្ធិ ​អាច​លំបាក​ក្នុង​ការស្តារ​ព្រះ​កិ​ត្ត​នាម​របស់​ព្រះអង្គ។

ផ្សាយពាណិជ្ជកម្ម

ចាប់ពីពេលនេះ​តទៅ គណបក្សនយោបាយ​ថ្មី​របស់​សម្តេចក្រុមព្រះ​នរោត្តម រណឫទ្ធិ នឹង​បង្ហាញ​វត្តមាន​ក្នុង​ឆាកនយោបាយ​កម្ពុ​ជាមួយ​បន្ថែម​ទៀតហើយ។ នោះ​គឺ​គណបក្ស​ដែល មាន​ឈ្មោះថា សង្គម​រាស្ត្រ​រាជាធិបតេយ្យ ដែលជា​គណបក្ស​ទី៣ របស់​ព្រះអង្គម្ចាស់​នរោ​ត្តម​រណឫទ្ធិ ​ដែល​បុត្រា​ច្បង​សម្តេចឪ នរោត្តម សីហនុ។ សម្តេចក្រុមព្រះ​ធ្លាប់​ធ្វើជា​ប្រធាន​គណបក្ស​ហ្វ៊ុនស៊ិនប៉ិច និង​គណបក្ស​នរោត្តម​រណឫទ្ធិ។

ក្នុង​ពិធី​សំណេះសំណាល​ជាមួយ​អ្នកគាំទ្រ​ប្រមាណ២៣០នាក់ ដែល​ភាគច្រើន​ជា​មនុស្ស​វ័យ​ចំណាស់ នៅឯ​សណ្ឋាគារ​សាន់វ៉េ​ក្នុង​ទីក្រុង​ភ្នំពេញ ព្រះអង្គម្ចាស់​រណឫទ្ធិ​ដែលមាន​អាយុ​ជាង​៧០ ព្រះវស្សា​ទៅហើយនោះ បានប្រកាស​បង្កើត​គណ​បក្ស​ថ្មី​ដើម្បី​ចូលរួម​ឆាក​នយោ​បាយ​​ប្រកួតប្រជែង​ក្នុងការ​បោះឆ្នោត​អសកល​ឆ្នាំ២០១៧ និង ការបោះឆ្នោត​សកល ២០១៨។

 
យ៉ាងណាក៏ដោយ ព្រះអង្គម្ចាស់​នរោត្តម រណឫទ្ធិ ដែលជា​អ្នកនយោបាយ​ជើងចាស់​មួយ​ព្រះអង្គ បាន​ថ្លែង​បញ្ជាក់​ស្តីពី​វិ​ប​ត្ត​នយោបាយ​នៅ​កម្ពុជា​អស់​រយៈពេល​ជាង៨ខែ​នេះ​មក​ថា ការ​តវ៉ា​ស្តីពី​បញ្ហា​គ.ជ.ប គណៈកម្មាធិកា​ជាតិ​រៀបចំ​ការបោះឆ្នោត​នោះ ដែល​គណបក្ស​សង្គ្រោះ​​ជាតិ​ទាមទារ​ ​ដើម្បី​ដោះស្រាយ​បញ្ហា​សង្គមនោះគឺ​មិន​គ្រប់​គ្រាន់​នោះ​ទេ។

បើតាម​សម្តេចក្រុមព្រះ បញ្ហា​សង្គម​មាន​ច្រើន​ក្នុងនោះ​រួមមាន បញ្ហា​ព្រំដែន​ដែលជា​បញ្ហារ​ស៊ើប បញ្ហា​អំពើពុករលួយ​ក្នុង​ប្រព័ន្ធយុត្តិធម៌ បញ្ហាដីធ្លី និង​ការមិន​គោរព​ច្បាប់​នៅក្នុង​សង្គម​ជាដើម។ ដែល​នេះ​សម្តេចក្រុមព្រះ​បាន​ថ្លែងថា ព្រះអង្គ​នឹង​ដឹកនាំ​គណបក្ស​ថ្មី​មួយ​នេះ​ដើម្បី​ធ្វើឱ្យ​កម្ពុជា​ទាំងមូល​ទៅជា​ប្រទេស​នីតិរដ្ឋ។ សម្តេចក្រុមព្រះ​ដែល​គេ​ធ្លាប់​ដឹងថា ជា​គណបក្ស​នយោបាយ​ដៃគូរ​ជាមួយ​គណបក្សកាន់អំណាច​របស់លោក​នាយ​រករ​ដ្ឋ​មន្ត្រី​ហ៊ុន សែន នោះ ​បានប្រកាស​ទៅកាន់​អ្នកសារព័ត៌មាន​ថា គណបក្ស​ថ្មី​របស់​ព្រះអង្គ​មិនមាន​ជា​គណបក្ស​ដើម្បី​បំបែក​សំឡេង​ពី​គណបក្សសង្គ្រោះជាតិ​​របស់លោក សម រង្ស៊ី និង​លោក កឹម សុខា​នោះទេ។

គណបក្ស​ថ្មី​របស់​ព្រះអង្គម្ចាស់​នរោត្តម​រណ ឫទ្ធិ នឹងដាក់​លិខិត​ស្នើសុំ​ចុះបញ្ជី​​គណបក្ស​ទៅ​ក្រសួង​មហា​ផ្ទៃ​នៅ​ថ្ងៃទី១៧ មីនា​ស្អែក​នេះ ដោយមាន​សមាជិក​បណ្តោះ​អាសន្ន៧រូប​ផ្សេង​ទៀត ប៉ុន្តែ​​មិនមាន​សែ​រាជវង្ស​នោះទេ។ គណបក្ស​ទី៣របស់​សម្តេចក្រុមព្រះ​គឺ​ព័ទ្ធ​ដោយ​រង្វង់​មូល​ពណ៌​​បៃតង ស លឿង និង​ព៌​ណ​ផ្ទៃមេឃ​ខាងក្នុង​រួមទាំង​កាំ​ពន្លឺ​ចំនួន​២៥ ដែលជា​តំណាង​ខេត្តរបស់​កម្ពុជាផងដែរ។ គណបក្ស​នេះ មាន បាវចនាថា រាស្ត្រ​ធិបតេយ្យ សាសនា រាជបល្ល័ង្ក។  

សម្រាប់​លោក បណ្ឌិត សុខ ទូច អ្នកវិភាគ​នយោបាយ​នៅ​កម្ពុជា ការបង្កើត​គណបក្ស​ថ្មី​របស់​ព្រះអង្គ​ម្ចាស់​​នរោត្តម រណឫទ្ធិ​នេះ គឺ​ដើម្បី​ជាកា​ស្តារ​​ព្រះ​កិ​ត្តិ​នាម​របស់​ព្រះអង្គ​ឡើងវិញ​តែ​ប៉ុណ្ណោះ​​ក្នុងនាម​ជា​អ្នកនយោបាយ​ជើងចាស់។ ប៉ុន្តែ​យ៉ាងណាក៏ដោយ លោក សុខ ទូច បាន​រិះគន់ថា សម្តេចក្រុមព្រះ​នៅតែ​ប្រើ​នយោបាយ​យក​ព្រះកិត្តិនាម​របស់​បី​តា​ខ្លួន​ជា​ឈ្នាន់​នយោបាយ​ដដែល ហើយ ថា​សម្តេចក្រុមព្រះ​នឹង​លំបាក​ក្នុង​ការស្ដារ​ព្រះ​កិ​ត្ត​នាម​របស់​ព្រះអង្គ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI