កម្ពុជា-បារាំង

កម្ពុជា​ស្នើ​អោយ​ចិន​បង្ហាញ​ភស្តុតាង​ស្តីពី​ការ​ឃាត់​ខ្លួន​ជនជាតិ​បារាំង​

លោក Patrick Devillers រស់នៅក្នុងគេហដ្ឋាននៅភ្នំពេញ​ជាច្រើនឆ្នាំមកហើយ​
លោក Patrick Devillers រស់នៅក្នុងគេហដ្ឋាននៅភ្នំពេញ​ជាច្រើនឆ្នាំមកហើយ​ Photo AFP/Tang Chhin Sothy

សំណុំរឿង​​ចាប់​​ខ្លួន​​ពលរដ្ឋ​បារាំង​​ ​Patrick Devillers​នៅ​​ភ្នំពេញ​កំពុង​​ធ្វើ​​អោយ​​កម្ពុជា​​ស្ថិត​​ក្នុង​​ស្ថានភាព​​លំបាក​​មួយ​​រវាង​​ចិន​​​និង​​បារាំង​​​ដែល​​ជា​​មិត្ត​​ជិត​ស្និទ្ធ​​ទាំង​ពីរ។​ ដោយសារ​​តែ​​បារាំង​​ទាមទារ​​អោយ​​កម្ពុជា​​បង្ហាញ​​មូលហេតុ​​ច្បាស់លាស់​​នៃ​​ការ​​ចាប់​ឃុំ​​ខ្លួន​​ពលរដ្ឋ​​ខ្លួន​​នេះ ​កម្ពុជា​​ក៏​​ទាមទារ​​អោយ​​ចិន​​ដែល​​ស្នើ​​អោយ​​មាន​​ការ​​ចាប់​ខ្លួន​​នេះ​ បង្ហាញ​​ភស្តុតាង​​ជាក់លាក់​​ដែរ​នៅ​ពេល​​ដែល​​អាជ្ញាធរ​​ចិន​​គឺ​​ជា​​អ្នក​​ស្នើ​​អោយ​​កម្ពុជា​​ចាប់​​ខ្លួន​​ពលរដ្ឋ​​បារាំង ​Patrick Devillers។

ផ្សាយពាណិជ្ជកម្ម

រដ្ឋាភិបាល​បារាំង​ បាន​ទាមទារ​អោយ​កម្ពុជា​បង្ហាញ​មូលហេតុ​ផ្លូវច្បាប់​ជាក់លាក់​ដែល​បញ្ជាក់​អំពី​ការ​ចាប់ឃុំ​ខ្លួន​ពលរដ្ឋ​បារាំង​លោក Patrick Devillers នៅ​ថ្ងៃ​ទី​១៣​មិថុនា​នោះ។ទីភ្នាក់ងារ​ព័ត៌មាន​បារាំង​ AFP ​បាន​ផ្សាយ​អោយ​ដឹង​ថា នៅពេល​នេះ​កម្ពុជា​ក៏​កំពុង​ស្នើ​អោយ​រដ្ឋាភិបាល​ចិន​ផ្តល់​ភស្តុតាង​ច្បាស់លាស់​ដែល​បញ្ជាក់​អំពី​សំណើ​ចាប់​ខ្លួន​ស្ថាបត្យករ​បារាំង​ដែរ។ គឺ​ចិន​ដែល​ជា​អ្នក​ស្នើ​អោយ​កម្ពុជា​ចាប់​ខ្លួន​ពលរដ្ឋ​បារាំង​Patrick Devillers។

 

និយាយ​ប្រាប់​ទីភ្នាក់ងារ​ព័ត៌មាន​បារាំង​ AFP ​អំពី​ករណី​ពលរដ្ឋ​បារាំង​នោះ អ្នក​នាំពាក្យ​ក្រសួង​មហាផ្ទៃ លោក​ឧត្តមសេនីយឯក​ខៀវ សុភ័គ​បាន​បញ្ជាក់​ថា៖«ប្រសិនបើ​គ្មាន​ភស្តុតាង​ច្បាស់​លាស់​​ទេ គាត់​នឹងត្រូវ​ដោះលែង។ នៅ​កម្ពុជា គាត់​ឥតមាន​បាន​ប្រព្រឹត្ត​បទល្មើស​អ្វី​ឡើយ»។

ជនជាតិ​បារាំង​រូប​នេះ​ ត្រូវ​បាន​គេ​ដឹង​ថា​មាន​ទំនាក់ទំនង​ស្និទ្ធ​ជាមួយ​អតីត​អ្នកនយោបាយ​ជាន់ខ្ពស់​ចិន​ដែល​បាត់បង់​អំណាច​ឈ្មោះ ប៉ូ ស៊ី​ឡៃ និង​ភរិយា​របស់លោក។ លោក​ប៉ូ ស៊ី​ឡៃ ដែល​​ជា​អតីត​សមាជិក​ការិយាល័យនយោបាយនៅទីក្រុង​ធំ​ក្នុង​ភាគ​និរតី​របស់​ប្រទេស​ចិន​ ឈ្មោះ Chongqing កំពុង​ត្រូវបាន​ស៊ើបអង្កេត​នៅក្នុង​សំណុំរឿង​ពុករលួយ។ រីឯ​ភរិយា​របស់​លោក​​ក៏ត្រូវ​ចាប់ខ្លួន​ក្នុង​សំណុំរឿង​ពាក់ព័ន្ធ​នឹង​ការស្លាប់​អ្នកជំនួញ​ជនជាតិ​អង់គ្លេស​ម្នាក់​កាល​ពី​​ឆ្នាំមុន​ដែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI