សមត្ថកិច្ចស្រុកគីរីវង្សរឹតបណ្តឹងសន្តិសុខអ្នករត់កាត់ស៊ី និងអ្នកដំណើរមកភ្នំពេញ
ចុះផ្សាយនៅថ្ងៃ៖
អ្នកបើករថយន្តតាក់ស៊ី និងអ្នកដំណើរមួយចំនួននៅឃុំចំនួនពីរ ក្នុងស្រុកគីរីវង្សខេត្តតាកែវ ត្រូវបានកម្លាំងសមត្ថកិច្ចចម្រុះរារាំង មិនឲ្យបើកធ្វើដំណើរ នៅលើបណ្តោយផ្លូវជាតិលេខ២ មកកាន់ទីក្រុងភ្នំពេញ។ សមត្ថកិច្ចបានលើកមូលហេតុថា គេបារម្ភខ្លាចមានប្រជាពលរដ្ឋចូលរួមសមាជរបស់គណបក្សសង្គ្រោះជាតិ ហើយសមត្ថកិច្ចក៏ប្រាប់ផងដែរថា ការរារាំងនេះ ធ្វើឡើង ដើម្បីស្រាវជ្រាវរកអាវុធជាតិផ្ទុះ។ នេះបើតាមសាក្ខីកម្មអ្នករត់តាក់ស៊ី និងអ្នកដំណើរ។
បន្ទាប់ពីពិធីបុណ្យភ្ជុំបិណ្ឌធំ បានបិទបញ្ចប់ កាលពីថ្ងៃសុក្រ គឺនៅថ្ងៃអាទិត្យនេះ ប្រជាពលរដ្ឋដែលរស់នៅ និងអ្នកធ្វើការងារផ្សេងៗនៅទីក្រុងភ្នំពេញ បានចាប់ផ្តើមវិលត្រឡប់មកពីស្រុកកំណើត នៅតាមបណ្តាខេត្តនានាវិញហើយ។
ដោយឡែកនៅតាមផ្លូវជាតិលេខ២ ចាប់ពីស្រុកគីរីរង្ស ខេត្តតាកែវ មកកាន់រាជធានីភ្នំពេញ ក្រុមអ្នករត់តាក់ស៊ី ក្នុងឃុំចំនួនពីរ គឺឃុំ ព្រៃអំពក និងឃុំ តាអូ ដែលត្រូវដឹកអ្នកដំណើរ ពិសេសកម្មករោងចក្រ មកធ្វើការនៅភ្នំពេញវិញនោះ ត្រូវបានសមត្ថកិច្ចដាក់រនាំង ដើម្បីស្ទាក់ត្រួតពិនិត្យជាច្រើនកន្លែង រារាំង និងឲ្យវិលត្រឡប់ទៅផ្ទះវិញ។
លោក ចាន់ ធឿន អាយុ៣៥ឆ្នាំ អ្នករត់តាក់ស៊ីពីស្រុកគីរីវង្ស មកកាន់ទីក្រុងភ្នំពេញបានសម្តែងការងឿងឆ្ងល់ ពេលដែលឃើញមានសមត្ថកិច្ចជាច្រើនក្រុម បានស្ទាក់រាំងផ្លូវ និង តាមច្រកចេញចូល មួយចំនួនទៀត នៅម្តុំផ្សារទន្លាប់ នៅផ្លូវជាតិលេខពីរ។ លោកបញ្ជាក់ថា សមត្ថកិច្ចបានបញ្ជាឲ្យគាត់ដឹកអ្នកដំណើរត្រឡប់ទៅផ្ទះរៀងៗខ្លួនវិញ ដែលអ្នកជិះក្នុងរថយន្តរបស់លោកភាគច្រើនជាកម្មករ ដោយត្រូវត្រឡប់ចូលធ្វើការវិញ នៅថ្ងៃចន្ទស្អែកនេះ។ លោកបន្តថា សមត្ថកិច្ចគ្រាន់តែប្រាប់លោកថា គេទទួលបញ្ជារពីថ្នាក់លើ មិនឲ្យអ្នករត់ឡានឈ្នួលដឹកអ្នកដំណើរទៅកាន់ទីក្រុងភ្នំពេញវិញទេ នៅថ្ងៃអាទិត្យ។ លោកថា នេះជាបទបញ្ជាដាច់ខាត។
លោក វ៉ាន់ ថាត កម្មកររោងចក្រដែលជិះក្នុងរថយន្តនោះបានប្រាប់ថា បើលោកមិនបានទៅដល់ភ្នំពេញវិញនៅថ្ងៃនេះ លោកមិនអាចចូលធ្វើការរោងចក្រវិញឡើយ នៅថ្ងៃស្អែក ហើយនឹងត្រូវខាងរោងចក្រកាត់លុយឈ្នួលរបស់លោក១០ដុល្លារ ក្នុងមួយថ្ងៃ។ ដូច្នេះវា ជាការប៉ះពាល់មួយធ្ងន់ធ្ងរដល់ការងារ និងជីវភាពរបស់លោក។
អ្នករត់ឡានឈ្នួលម្នាក់ទៀត លោក ទៀង ហាក់ ដែលត្រូវបានសមត្ថកិច្ចរារាំងដែរនោះ បានថ្លែងថា សមត្ថកិច្ចបាននិយាយប្រាប់លោកដោយត្រង់ថា ពួកគេទទួលបញ្ជាពីថ្នាក់លើឲ្យឃាត់អ្នកដំណើរ និងអ្នករត់តាក់ស៊ី មិនឲ្យចេញពីភូមិ ទៅកាន់ទីក្រុងភ្នំពេញឡើយ។ សមត្ថកិច្ចបានប្រាប់លោកថា ការរារាំងនេះគឺបារម្ភខ្លាចអ្នកដំណើរទាំងអស់នោះចូលរួមប្រជុំសមាជប្រជាពលរដ្ឋរបស់គណបក្សសង្គ្រោះជាតិ ដែលត្រូវធ្វើឡើង នៅល្ងាចថ្ងៃអាទិត្យនេះ។
បើទោះបីជាលោក ទៀង ហាក់ និងអ្នកដំណើរជាកម្មករចំនួន៥នាក់ បានពន្យល់ប្រាប់សមត្ថកិច្ចថា ពួកគេត្រូវចូលធ្វើការនៅរោងចក្រវិញ នៅថ្ងៃចន្ទស្អែក ហើយបញ្ជាក់ថា មិនពាក់ព័ន្ធនឹងការជួបជុំរបស់គណបក្សក៏ដោយ ក៏ក្រុមសមត្ថកិច្ចមិនអនុញ្ញាតដែរ។
យ៉ាងណាក៏ដោយ លោក សាយ ចន្ទី អធិការស្តីទីស្រុកគីរីរង្សបានថ្លែងដោយខ្លីថា នេះជាបទបញ្ជាដែលលោកទទួលពីថ្នាក់លើ ឲ្យរឹតបណ្តឹងសន្តិសុខធ្វើដំណើរ។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានថ្លែងទទួលស្គាល់ការលើកឡើងពីផលវិបាកនៃការធ្វើដំណើរបស់ប្រជាពលរដ្ឋមែន ប៉ុន្តែលោកបញ្ជាក់ថា សមត្ថកិច្ចត្រួតពិនិត្យច្រើនកន្លែង តាមដងផ្លូវនានានោះគឺ ដើម្បីការពារសន្តិសុខជូនប្រជាពលរដ្ឋតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ