កម្ពុជា

សមត្ថ​កិច្ច​​កំពុង​​សាក​​សួរ​​ជន​​សង្ស័យ​​១០​​នាក់​​ពី​​បទ​​គ្រោង​​ផ្តួល​​រំលំ​​រដ្ឋា​​ភិបាល​

ជនសង្ស័យ ដែលជាសមាជិករណសិរ្សរំដោះជាតិខ្មែរ ដែលត្រូវបានសមត្ថកិច្ច ចាប់ខ្លួនកាលពីយប់ថ្ងៃទី២២ តុលា និង ព្រឹកថ្ងៃទី២៣ តុលាឆ្នាំ ២០១៤។
ជនសង្ស័យ ដែលជាសមាជិករណសិរ្សរំដោះជាតិខ្មែរ ដែលត្រូវបានសមត្ថកិច្ច ចាប់ខ្លួនកាលពីយប់ថ្ងៃទី២២ តុលា និង ព្រឹកថ្ងៃទី២៣ តុលាឆ្នាំ ២០១៤។ អគ្គស្នងការនគរបាលជាតិ

ជន​សង្ស័យ​១០​នាក់​ដែល​ជា​សមា​ជិក​រណ​សិរ្ស​រំដោះ​ជាតិ​ខ្មែរ​ដែល​ត្រូវ​បាន​សមត្ថ​កិច្ច ចាប់​ខ្លួន​កាល​ពី​យប់​ថ្ងៃ​ទី​២២ តុលា និង ព្រឹក​ថ្ងៃ​ទី​២៣ តុលា ម្សិល​មិញ កំពុង​ត្រូវ​បាន​សមត្ថ​កិច្ច​ធ្វើ​ការ​សាក​សួរ ដើម្បី​កសាង​សំណុំរឿង​បញ្ជូន​ទៅ​កាន់​តុលា​ការ។ រណសិរ្យ​រំដោះ​ជាតិ​ខ្មែរ បាន​អំពាវ​នាវ​ឲ្យ​មាន​ការ​ដោះ​លែង​សមា​ជិក​របស់​ខ្លួន​ជា​បន្ទាន់ រីឯ​សង្គម​ស៊ីវិល​ដែល​ធ្វើ​ការ​ការពារ​សិទ្ធ​មនុស្ស​នៅ​កម្ពុជា បាន​ត្រៀម​មេធាវី​សម្រាប់​ជួយ​ការពារ​ក្តី​ឲ្យ​ជន​សង្ស័យ​ទាំង​១០​នាក់​នោះ​។

ផ្សាយពាណិជ្ជកម្ម

នៅ​ពេល​នេះ​សមត្ថ​កិច្ច​នគរ​បាល​ជាតិ​កំពុង​ធ្វើ​ការ​ស៊ើប​អង្កេត និង​សាកសួរ​ជន​សង្ស័យ​ទាំង​១០ នាក់​នោះ​បន្ថែម​ទៀត ដើម្បី​កសាង​សំណុំ​រឿង​បញ្ជូន​ទៅកាន់​តុលាការ។ ជន​សង្ស័យ​ទាំង​នេះ ត្រូវ​បាន​ចាប់​ខ្លួន​កាល​ពី​យប់​ថ្ងៃ​ទី​២២ តុលា និង នៅ​ព្រឹក​ថ្ងៃ​ទី​២៣​តុលា នៅ​ក្នុង​ខណ្ឌ​មាន​ជ័យ និង ខណ្ឌ​ចំការ​មន រាជ​ធានី​ភ្នំពេញ​។

លោក គៀត ច័ន្ទ​ថា​រិទ្ធ អ្នក​នាំ​ពាក្យ​អគ្គ​ស្នង​ការ​នគរ​បាល​ជាតិ បាន​ឲ្យ​ដឹង​ថា សមត្ថ​កិច្ច​បាន​ដក​ហូត​ភស្តុតាង​មួយ​ចំនួន​ពី​ជន​សង្ស័យ​ដូច​ជា ខិត​ប័ណ្ណ សៀវ​ភៅ និង មួក ជា​ដើម ដែល​សុទ្ធ​សឹង​តែ​មាន​អត្ថ​ន័យ​ញុះ​ញង់​បង្ក​ឲ្យ​មាន​អំពើ​ហិង្សា​នៅ​ក្នុង​ទី​ក្រុង​ភ្នំ​ពេញ។ ជន​សង្ស័យ​ទាំង​១០ នាក់​នោះ​ដែល​ភាគ​ច្រើន​មាន​មុខរ​បរ​ជា​កសិក​រ ត្រូវ​បាន​សមត្ថ​កិច្ច​ចោទ​ប្រកាន់​ពីបទ​គ្រោង​ធ្វើ​សកម្មភាព​ផ្តួល​រំលំ​រដ្ឋា​ភិបាល។ ក៏ប៉ុន្តែ​តាមរយៈ​សេចក្តី​ថ្លែងការណ៍​របស់​ខ្លួន​កាលពី​ថ្ងៃ​ព្រហស្បតិ៍ រណ​សិ​រ្យ​រំដោះ​ជាតិខ្មែរ បាន​ឲ្យ​ដឹងថា សមាជិក​របស់ខ្លួន​ទាំងនោះ មាន​គម្រោង​រៀបចំ​ធ្វើបាតុកម្ម​នៅមុខ​ស្ថានទូត​វៀតណាម​ក្នុង​រាជធានី​ភ្នំពេញ​នៅ​ថ្ងៃទី ២៣ តុលា​ឆ្នាំ២០១៤ ដើម្បី​ឲ្យ​ប្រទេស​វៀតណាម​គោរព​កិច្ចព្រមព្រៀង​សន្តិភាព​ទីក្រុង​បារី​ស២៣តុលា។

លោក គៀត ច័ន្ទ​ថា​រិ​ទ្ធ បាន​បញ្ជាក់ថា ជនសង្ស័យ​ទាំងនោះ​នឹងត្រូវ​បញ្ជូន​ទៅកាន់​តុលាការ​បន្ទាប់ពី​សមត្ថ​កិច្ចបញ្ចប់​ការសាកសួរ។ ប៉ុន្តែ​លោក​មិនបាន​បង្ហាញ​ទេ​ថា នឹងត្រូវ​បញ្ចូនទៅ​នៅពេលណា​នោះឡើយ។

យ៉ាងណាក៏ដោយ អង្គការ​សង្គម​ស៊ីវិល​មួយចំនួន​ដែល​ធ្វើការ​ការពារ​សិទ្ធមនុស្ស​នៅ​កម្ពុជា បាន​ត្រៀម​មេធាវី ដើម្បី​ជួយ​ការពារ​ក្តី​ដល់​ជនសង្ស័យ ប្រសិនបើ​មានការ​ស្នើសុំ។ លោក ចាន់ សុ​វ៉េ​ត អនុប្រធាន​ផ្នែក​ស៊ើបអង្កេត​របស់​សមាគម​អាដហុក បាន​ប្រាប់​វិទ្យុ​បារាំង​អន្តរជាតិ​ថា ប្រសិនបើ​សាច់ញាតិ​របស់​ជនសង្ស័យ​ត្រូវការ​មេធាវី​នោះ អាដហុក​បាន​ត្រៀម​រួចរាល់​ហើយ​សម្រាប់​ផ្តល់​ឲ្យ​ដើម្បី​ការពារ​ក្តី​ឲ្យ​ជនសង្ស័យ។

សម្រាប់​លោក​ចាន់ សុ​វ៉េ​ត ករណី​ចាប់ខ្លួន​នេះ អាច​ជាប់​ពាក់ព័ន្ធ​នឹង​រឿង​នយោបាយ ហើយ​មើល​តាម​ស្ថានភាព​ជនសង្ស័យ​ទាំងនោះ ហាក់​មិន​ស័ក្តិ​សមជា​អ្នកមាន​គម្រោង​ផ្តួលរំលំ​រដ្ឋាភិបាល​នោះទេ។  

រណ​សិ​រ្យ​រំដោះ​ជាតិខ្មែរ បាន​អំពាវនាវ​ដល់​ស្ថាប័ន​សិទ្ធិ​មនុស្សជាតិ និង អន្តរជាតិ រួមទាំង​អង្គ​សហប្រជាជាតិ​ផងដែរ ឲ្យ​ជួយ​អន្តរាគមន៍ ដើម្បី​ឲ្យ​រដ្ឋាភិបាល​កម្ពុជា​ដោះលែង​សមាជិក​ទាំង១០នាក់​របស់ខ្លួន៕
 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI