សមត្ថភាព​អាស៊ាន​ត្រូវបាន​វាស់ស្ទង់​តាមរយៈ​វិញ្ញាសា​នៃ​ជម្លោះ​កម្ពុជា-ថៃ

សំឡេង ០៤:១០
គោលការណ៍​មិនជ្រៀតជ្រែក​កិច្ចការផ្ទៃក្នុង​រដ្ឋ​សមាជិក​អាច​ជា​ឧបសគ្គ​របស់​អាស៊ាន​ក្នុង​ការ​ដោះស្រាយ​បញ្ហា​រវាង​កម្ពុជា និង​ថៃ
គោលការណ៍​មិនជ្រៀតជ្រែក​កិច្ចការផ្ទៃក្នុង​រដ្ឋ​សមាជិក​អាច​ជា​ឧបសគ្គ​របស់​អាស៊ាន​ក្នុង​ការ​ដោះស្រាយ​បញ្ហា​រវាង​កម្ពុជា និង​ថៃ ©AFP

រយៈ​ពេល​ជាង​មួយខែ​បាន​កន្លង​ផុត​ទៅ​ហើយ​ចាប់តាំង​ពី​កិច្ច​ប្រជុំ​ លើក​ដំបូង​កាលពី​ថ្ងៃ​ទី២២​កុម្ភៈ​នៅ​ទីក្រុង​ហ្សាការតា​ដើម្បី​សម្រប​ សម្រួល​បញ្ហា​ព្រំដែន​រវាង​កម្ពុជា​និង​ថៃ​ដោយ​ប្រើប្រាស់​យន្តការ​អាស៊ាន។ ប៉ុន្តែ​កិច្ច​ព្រមព្រៀង​ដែល​គេ​បាន​ប្រកាស​ក្នុង​កិច្ចប្រជុំ​នោះ​នៅ​បន្ត​ ជាប់​គាំង​និង​គ្មាន​ដំណោះស្រាយ​អ្វី​ទាំង​អស់។ ​រដ្ឋាភិបាល​ក្រុង​បាងកក​មិន​ខ្ចី​ឆ្លើយ​តប​នឹង​សំណើ​របស់​ឥណ្ឌូនេស៊ី ​ហើយ​បាន​អូស​បន្លាយ​ពេល​រហូត​ដល់​សព្វថ្ងៃ។ ​អាស៊ាន​ដែល​គេ​មើល​ឃើញ​តាំង​ពី​ដើមទី​ថា ​គ្មាន​សាច់ដុំ​ដើម្បី​ដោះស្រាយ​ជម្លោះ​ព្រំដែន​កម្ពុជា​ថៃ​ទេ​នោះ​បាន​ បង្ហាញ​ពី​ភាព​កម្សោយ​របស់​ខ្លួន​កាន់តែ​ច្បាស់។

ផ្សាយពាណិជ្ជកម្ម

 

សមាគម​អាស៊ាន​កំពុង​តែ​បង្ហាញ​ឱ្យ​គេ​ឃើញ​កាន់តែ​ច្បាស់​ឡើង​នូវ​សមត្ថភាព​ដ៏​ទន់​ខ្សោយ​របស់​ខ្លួន​ចំពោះ​ការ​សម្រប​សម្រួល​បញ្ហា​ផ្ទៃក្នុង​របស់​រដ្ឋ​ជា​សមាជិក។ ​ភាព​កម្សោយ​នេះ​ត្រូវ​បាន​វាស់ស្ទង់​តាមរយៈ​វិញ្ញាសា​នៃ​ជម្លោះ​ព្រំដែន​កម្ពុជា​ថៃ​ដែល​ប្រធាន​អាស៊ាន​បាន​ដើរ​តួនាទី​ជា​អ្នក​សម្រប​សម្រួល​រយៈពេល​ជាង​មួយខែ​កន្លង​ទៅ​នេះ។

ជាបឋម ​គេ​គួរ​រំលឹក​ថា ​បន្ទាប់​ពី​ទទួល​បាន​អាណត្តិ​ពី​ក្រុម​ប្រឹក្សា​សន្តិសុខ​អង្គការ​សហប្រជាជាតិ​ រដ្ឋមន្ត្រី​ការបរទេស​ឥណ្ឌូនេស៊ី ​លោក ​Marty Natalegawa ​ដែល​ជា​ប្រធាន​អាស៊ាន​បាន​កោះ​ប្រជុំ​រដ្ឋមន្ត្រី​ការបរទេស​កម្ពុជា​និង​ថៃ​នៅ​ថ្ងៃទី​២២​កុម្ភៈ​នៅ​ទីក្រុង​ហ្សាការតា។ ​កិច្ច​ប្រជុំ​នេះ​បាន​សម្រេច​លទ្ធផល​សំខាន់​ពីរ​យ៉ាង​បើ​ទោះបី​ជា​លទ្ធផល​នោះ​ត្រូវ​គេ​មើល​ឃើញ​ថា​កើត​ឡើង​ដោយសារ​តែ​ស្ថានភាព​បង្ខំ​ច្រើន​ជាង​សុឆន្ទៈ​របស់​ថៃ​ក៏​ដោយ​ចុះ។

លទ្ធផល​ទាំងពីរ​គឺ៖ ​ទី១ ​កម្ពុជា​និង​ថៃ​បាន​យល់​ព្រម​ទទួល​យក​អ្នកសង្កេតការណ៍​ឥណ្ឌូនេស៊ី​ដើម្បី​មក​ពិនិត្យ​មើល​បទ​ឈប់​បាញ់​គ្នា​ជា​អចិន្ត្រៃយ៍​រវាង​ប្រទេស​ទាំងពីរ​ស្រប​តាម​ការ​ចង់​បាន​របស់​ក្រុមប្រឹក្សា​សន្តិសុខ​អង្គការ​សហប្រជាជាតិ។ ​ទី២ ​ភាគី​ទាំងពីរ​ក៏​ឯកភាព​ថា​នឹង​ជួប​ប្រជុំ​គ្នា​នៅ​ក្នុង​ប្រទេស​ទី៣​ក្រោម​ការ​សម្រប​សម្រួល​របស់​អាស៊ាន​ដើម្បី​ពិភាក្សា​ដោះស្រាយ​បញ្ហា​ព្រំដែន​ព្រះវិហារ។

ក៏ប៉ុន្តែ ​លទ្ធផល​ដែល​មិន​ទាន់​ទាំង​បាន​បញ្ជាក់​ពី​សមត្ថភាព​របស់​អាស៊ាន​ផង​នោះ​បាន​ជាប់​គាំង​រហូត​មក​ទល់​នឹង​សព្វថ្ងៃ​។ ​ម្តងហើយ​ម្តងទៀត ​ថៃ​បាន​ព្យាយាម​រក​លេស​នេះ​លេស​នោះ​ដើម្បី​គេច​វេះ​ពី​ការ​ទទួល​យក​អ្នកសង្កេតការណ៍​ឥណ្ឌូនេស៊ី​ដើម្បី​មក​ត្រួត​ពិនិត្យ​បទ​ឈប់​បាញ់​គ្នា​នៅ​តាម​ជាយដែន។ ​ជាង​មួយខែ​បាន​កន្លង​ផុត​ទៅ​ រដ្ឋាភិបាល​ក្រុង​បាងកក​នៅ​តែ​មិន​ទាន់​ឆ្លើយ​តប​ជាផ្លូវការ​នៅ​ឡើយ​ទៅ​កាន់​ឥណ្ឌូនេស៊ី​អំពី​លក្ខខណ្ឌ ​និង​សំណុំ​បែបបទ​ការងារ​ទាក់ទង​នឹង​អ្នកសង្កេតការណ៍​ឥណ្ឌូនេស៊ី ​ខណៈ​ដែល​កម្ពុជា​បាន​ប្រើ​ពេល​មិន​លើស​ពី​២៤​ម៉ោង​ឡើយ​សម្រាប់​ធ្វើការ​ឆ្លើយ​តប។

មិន​ត្រឹម​តែ​មិន​ឆ្លើយ​តប​ប៉ុណ្ណោះ​ទេ ​ក៏ប៉ុន្តែ ​មេទ័ព​ថៃ​ថែម​ទាំង​បាន​ព្រលយ​ឱ្យ​ដឹង​ថា​ ពួកគេ​មិន​ត្រូវការ​អ្នកសង្កេតការណ៍​ឥណ្ឌូនេស៊ី​ឡើយ​ពីព្រោះ​តែ​ពួកគេ​បារម្ភ​ពី​ការ​បែក​ធ្លាយ​ការ​សម្ងាត់​យោធា។ ​រីឯ​ការ​កោះ​ប្រជុំ​គណៈកម្មការ​ចម្រុះ​ព្រំដែន ​និង​គណៈកម្មការ​ព្រំដែន​ទូទៅ​នៅ​ទីក្រុង​បូហ្គ័រ​ប្រទេស​ឥណ្ឌូនេស៊ី​នា​ថ្ងៃទី​៧​និង​ទី៨​មេសា​ខាង​មុខ​នេះ​ក៏​ថៃ​នៅតែ​មិន​ទាន់​ឆ្លើយ​តប​ដែរ​បើ​ទោះបី​ជា​កាល​បរិច្ឆេទ​កាន់តែ​ខិត​ជិត​មក​ដល់​ក្តី។ ​សំណួរ​ដែល​សំខាន់​នៅ​ទីនេះ​គឺ​ ប្រសិន​បើ​ក្នុង​អំឡុង​ពេល​នេះ ​ជម្លោះ​ប្រដាប់​អាវុធ​កើត​ឡើង​ជាថ្មី ​តើ​អ្នកណា​ទទួល​ខុស​ត្រូវ?

និយាយ​ពី​ឥណ្ឌូនេស៊ី​វិញ​ ក្នុង​ឋានៈ​ជា​ប្រធាន​អាស៊ាន​ ក៏​នៅ​មិន​ទាន់​បាន​ចាត់​វិធានការ​ជាក់ស្តែង​ណាមួយ​ដើម្បី​ដាក់​គំនាប​លើ​ថៃ​ឱ្យ​គោរព​លទ្ធផល​កិច្ច​ប្រជុំ​កាលពី​ថ្ងៃ​ទី​២២​កុម្ភៈ​នោះ​ឡើយ។ ​ផ្ទុយ​ទៅ​វិញ​ ឥណ្ឌូនេស៊ី​ហាក់​បង្ហាញ​ថា​ខ្លួន​សុខ​ចិត្ត​ដើរ​តាម​ពីក្រោយ​ថៃ​ជាជាង​ដើរ​តួនាទី​ជា​អ្នក​នាំមុខ​ថៃ។ ​គេ​ក៏​មិន​ដឹង​ថា​ទីក្រុង​ហ្សាការតា​ត្រូវ​ទន្ទឹង​រង់ចាំ​ការ​ឆ្លើយ​តប​របស់​ថៃ​រហូត​ដល់​ពេល​ណា​ដែរ។ ​ការ​អូស​បន្លាយ​ពេល​វេលា​តាម​ថៃ​បែប​នេះ​បាន​ធ្វើ​ឱ្យ​ថៃ​បាន​ដៃ​និង​បន្ត​ក្រឡុក​អាស៊ាន​គ្មាន​ញញើត។

ចុងក្រោយ​នេះ ​រដ្ឋមន្ត្រី​ការពារ​ជាតិ​ថៃ​បាន​អះអាង​ថា ​កិច្ច​ប្រជុំ​នៅ​បូហ្គ័រ​នៅ​ដើម​ខែ​មេសា​ខាង​មុខ​មិន​ត្រូវ​មាន​ការ​ចូល​រួម​ពី​ឥណ្ឌូនេស៊ី​ទេ។ ​តើ​នេះ​មិន​មែន​ជា​ការ​បដិសេធ​តួនាទី​របស់​អាស៊ាន​ពី​សំណាក់​ថៃ​ទេ​ឬ? ​ហើយ​តើ​អាស៊ាន​អាច​ធ្វើ​អ្វី​បាន​ខ្លះ​ចំពោះ​ភាព​រឹងរូស​របស់​ថៃ? ចម្លើយ​គឺ​ប្រាកដ​ជា​មិន​អាច​ធ្វើអ្វី​បាន​ឡើយ​ក្រៅពី​ការ​ទន្ទឹង​រង់ចាំ​ក្រែង​លោ​ថ្ងៃណា​មួយ​ថៃ​សុខ​ចិត្ត​ចូល​នឹម​ដោយ​ខ្លួន​ឯង។

ប្រសិន​បើ​គ្មាន​ថ្ងៃ​នោះ​ទេ​ អាស៊ាន​នឹង​ច្បាស់​ជា​គ្មាន​មធ្យោបាយ​ណា​ក្រៅតែ​ពី​ការ​បោះបាល់​នៃ​ជម្លោះ​ព្រំដែន​កម្ពុជា​ថៃ​ទៅ​ឱ្យ​ក្រុមប្រឹក្សា​សន្តិសុខ​អង្គការ​សហប្រជាជាតិ​វិញ​នោះ​ឡើយ។ ​នេះ​ជា​សេណារីយោ​ដែល​ក្រុម​អ្នកវិភាគ​បាន​គូស​វាស​រួច​ជា​ស្រេច​ទៅ​ហើយ។ ​ប្រសិន​បើ​ដូច្នោះ​មែន ​ការ​ផ្តល់​អាណត្តិ​ឱ្យ​អាស៊ាន​ដើម្បី​ដោះស្រាយ​ជម្លោះ​កម្ពុជា​ថៃ​មិន​ខុស​អ្វី​ពី​ការ​ផ្តល់​ឱកាស​ឱ្យ​ថៃ​អូស​បន្លាយ​មហិច្ឆតា​ឈ្លានពាន​របស់​ខ្លួន​នោះ​ឡើយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI