កម្ពុជា-ថៃ

កម្ពុជា​និង​ថៃ​ណាត់​ជួបគ្នា​នៅ​ទីស្នាក់ការ​អង្គការ​យូណេស្កូ​ទីក្រុង​ប៉ារីស​នៅ​ខែ​ឧសភា

ប្រាសាទ​ព្រះវិហារ​កំពុង​ប្រឈមមុខ​នឹង​គ្រោះថ្នាក់ ក្នុងពេល​ភាពតានតឹងផ្នែក​យោធា​រវាង​កម្ពុជា​និង​ថៃ​កំពុង​មាន​កម្រិត​ខ្ពស់
ប្រាសាទ​ព្រះវិហារ​កំពុង​ប្រឈមមុខ​នឹង​គ្រោះថ្នាក់ ក្នុងពេល​ភាពតានតឹងផ្នែក​យោធា​រវាង​កម្ពុជា​និង​ថៃ​កំពុង​មាន​កម្រិត​ខ្ពស់ ©AFP

កម្ពុជា​និង​ថៃ​ព្រមព្រៀង​ជួបគ្នា​នៅ​ទី​ស្នាក់​ការ​អង្គការ​យូណេស្កូ​ ទីក្រុង​ប៉ារីស​ នៅ​ខែ​ឧសភា​ខាងមុខ​នេះ។ នេះ​ជា​លើក​ទីមួយ​ហើយ​ដែល​ប្រទេស​ទាំងពីរ​ជួប​ទល់​មុខ​គ្នា ​និយាយ​គ្នា ​អំពី​ប្រាសាទ​ព្រះវិហារ ​បន្ទាប់​ពី​មាន​ការ​បាញ់​គ្នា​​ទ្រង់ទ្រាយ​ធំ​ កាល​ពី​ដើម​ខែ​កុម្ភៈ​កន្លង​​មក។

ផ្សាយពាណិជ្ជកម្ម

សេចក្តី​រាយការណ៍​របស់​ គី សុខលីម ពី​ភ្នំពេញ

សេចក្តី​ប្រកាស​ព័ត៌មាន​របស់​អង្គការ​យូណេស្កូ​ ដែល​មាន​មូលដ្ឋាន​នៅក្នុង​ប្រទេស​បារាំង​ បាន​អោយ​ដឹង​ថា ប្រទេស​កម្ពុជា​និង​ប្រទេស​ថៃ​គ្រោង​នឹង​ជួបគ្នា​ នៅ​ទីក្រុង​ប៉ារីស ​នៅ​ថ្ងៃ​ទី​២៥​ខែ​ឧសភា​ខាង​មុខ​នេះ​ ដើម្បី​ជជែក​គ្នា​អំពី​ការ​ជួយ​សង្គ្រោះ​ប្រាសាទ​ព្រះវិហារ។

នេះ​ជា​លើក​ទី​មួយ​ហើយ​ដែល​ប្រទេស​ទាំង​ពីរ​គ្រោង​អង្គុយ​ទល់​មុខ​គ្នា ​ជជែក​គ្នា ​អំពី​ប្រាសាទ​ព្រះវិហារ​ ក្រោយ​ពី​ប្រាសាទ​ទទួល​រង​ការខូចខាត​យ៉ាង​ដំណំ​ ដោយសារ​ការ​ផ្ទុះ​អាវុធ​ទ្រង់ទ្រាយ​ធំ ​រវាង​កង​ទ័ព​ខ្មែរ​និង​កងទ័ព​ថៃ​ កាល​ពី​ដើម​ខែ​កុម្ភៈ​កន្លងមក។

សេចក្តី​ប្រកាស​ព័ត៌មាន​ដដែល​បាន​បន្ថែម​ទៀត​ថា ជំនួប​រវាង​គណៈ​ប្រតិភូ​កម្ពុជា​និង​ថៃ​ នៅ​ទីក្រុង​ប៉ារីស ​នៅ​ចុង​ខែ​ឧសភា​ខាង​មុខ​នេះ ​នឹង​​មាន​គោល​ដៅ​រក​មធ្យោបាយ​ល្អ​ ដើម្បី​ការពារ​និង​ថែ​រក្សា​ប្រាសាទ​ព្រះវិហារ។ កិច្ច​ប្រជុំ​នេះ​គ្រោង​នឹង​រៀប​ចំ​ឡើង​បន្ទាប់​ពី​បេសកជន​ពិសេស​របស់​អង្គការ​យូណេស្កូ គូអ៊ីឆីរ៉ូ ម៉ាត់ស៊ូអ៊ូរ៉ា (Koichiro Matsuura) បាន​ទៅ​បំពេញ​ទស្សន​កិច្ច​នៅ​ក្នុង​ប្រទេស​កម្ពុជា​និង​ប្រទេស​ថៃ​ កាល​ពី​សប្តាហ៍​កន្លងមក។ នៅ​ក្នុង​ដំណើរ​ទស្សន​កិច្ច​នោះ លោក គូអ៊ីឆីរ៉ូ ម៉ាត់ស៊ូអ៊ូរ៉ា បាន​ជួប​ពិភាក្សា​ជាមួយ​លោក​នាយក​រដ្ឋមន្ត្រី​ថៃ​ អាប់ភីស៊ីត​ និង​លោក​នាយក​រដ្ឋ​មន្រ្តី​ខ្មែរ ហ៊ុន សែន ជុំវិញ​ប្រធាន​បទ​ប្រាសាទ​ព្រះវិហារ។

លោកស្រី អ៊ីរីណា បូកូវ៉ា (Irina Bokova) អគ្គនាយក​នៃ​អង្គការ​យូណេស្កូ​បាន​និយាយ​នៅក្នុង​សេចក្តី​ប្រកាស​ព័ត៌មាន​ថា លោក​ស្រី​មាន​ការ​សប្បាយ​ចិត្ត​យ៉ាង​ខ្លាំង​ចំពោះ​ជោគជ័យ​នៃ​បេសកកម្ម​របស់​លោក គូអ៊ីឆីរ៉ូ ម៉ាត់ស៊ូអ៊ូរ៉ា។ កិច្ច​ពិភាក្សា​របស់​បេសកជន​ពិសេស​រូប​នេះ​ ជាមួយ​ប្រមុខ​រាជរដ្ឋាភិបាល​នៃ​ប្រទេស​កម្ពុជា​និង​ថៃ​ បាន​បើក​ផ្លូវ​អោយ​មាន​កិច្ច​សន្ទនា​ ស្តី​ពី​ការ​អភិរក្ស​ប្រាសាទ​ព្រះវិហារ។ ការ​អភិរក្ស​ប្រាសាទ​ព្រះវិហារ​​ គឺ​ជា​ប្រធាន​បទ​ចម្បង​មួយ​ នៅ​ក្នុង​កិច្ច​ប្រជុំ​ នៅ​ទី​ក្រុងប៉ារីស ​នៅ​ថ្ងៃ​ទី​២៥​ខែ​ឧសភា​ខាងមុខ​នេះ។

សេចក្តី​ប្រកាស​ព័ត៌មាន​បាន​បញ្ជាក់​បន្ថែម​ទៀត​ថា លោកស្រី អ៊ីរីណា បូកូវ៉ា បាន​ធ្វើការ​ទាក់ទង​ជា​អចិន្ត្រៃយ៍​ ជា​មួយ​លោក​អគ្គលេខាធិការ​អង្គការសហប្រជាជាតិ បាន គីមូន និង​អគ្គលេខាធិការដ្ឋាន​នៃ​សមាគម​អាស៊ាន​ ស្តី​ពី​ការ​ប្រែប្រួល​ថ្មី​ៗ​ក្នុង​សំណុំ​រឿង​ប្រាសាទ​ព្រះវិហារ​នេះ។

ប្រាសាទ​ព្រះវិហារ​ខ្មែរ​​ត្រូវ​បាន​ចុះបញ្ជី​ជា​សម្បត្តិ​បេតិកភណ្ឌ​ពិភពលោក ​​កាលពី​ថ្ងៃ​ទី​៧​ខែ​កក្កដា​ឆ្នាំ​២០០៨​កន្លងមក។ មួយ​សប្តាហ៍​ក្រោយ​ការចុះបញ្ជី ទាហាន​ថៃ​បាន​ចូល​ឈ្លានពាន​ទឹក​ដី​កម្ពុជា។ ការ​ឈ្លានពាន​របស់​ថៃ​បាន​បង្ក​អោយ​ប្រទេស​ទាំងពីរ​វាយ​ប្រយុទ្ធ​គ្នា​ជា​ច្រើន​លើក​ច្រើន​សា​ ដែល​បង្ក​អោយ​មាន​មនុស្ស​ស្លាប់​ច្រើន​នាក់ ​និង​ខូចខាត​ដល់​ប្រាសាទ​ព្រះវិហារ​យ៉ាង​ដំណំ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI