អានតួអត្ថបទ
កម្ពុជា-ច្បាប់

អាជ្ញាធរ​ដោះ​លែង​ក្រុម​យុវជន​ដែល​ចាក់​បញ្ចាំង​វីដេអូ​ឃាតកម្ម លោកបណ្ឌិត កែម ឡី ក្រោយសាក​សួរ​រយៈ​ពេល​ជិត​៤ ម៉ោង​

លោក មួង សូនី ប្រធានសមាគមសម្ព័ន្ធនិស្សិតបញ្ញវ័ន្តខ្មែរ នៅមុខទីស្នាក់ការរបស់ខ្លួន មុនពេលអាជ្ញាធរខណ្ឌឬស្សីកែវ ឃាត់ខ្លួនដើម្បីយកទៅសាកសួរនៅប៉ុស្តិ៍នគរបាលរដ្ឋបាលទួលសង្កែ នៅថ្ងៃទី ២១ មីនា។
លោក មួង សូនី ប្រធានសមាគមសម្ព័ន្ធនិស្សិតបញ្ញវ័ន្តខ្មែរ នៅមុខទីស្នាក់ការរបស់ខ្លួន មុនពេលអាជ្ញាធរខណ្ឌឬស្សីកែវ ឃាត់ខ្លួនដើម្បីយកទៅសាកសួរនៅប៉ុស្តិ៍នគរបាលរដ្ឋបាលទួលសង្កែ នៅថ្ងៃទី ២១ មីនា។ @FB/Sam Rainsy
១៧ នាទី

ក្រោយ​ឃាត់​ខ្លួន​និង​សាក​សួរជិត ៤ ម៉ោង អាជ្ញាធរ​ខណ្ឌ​ឬស្សី​កែវ បាន​សម្រេច​ដោះ​លែង ក្រុម​យុវជន​មក​ពី​សមាគម​សម្ព័ន្ធ​និស្សិត​បញ្ញាវ័ន្ត​ខ្មែរ បួនរូប ដែល​គ្រោង​បញ្ចាំង​វីដេអូ​របស់ទូរទស្សន៍​អាល់​ហ្សា​ហ្សឺរ៉ា ស្តី​ពី​ការ​ស៊ើប​អង្កេត​ជុំវិញ ឃាតកម្ម​លោក បណ្ឌិត កែម ឡី នៅទីស្នាក់​ការ​របស់​ខ្លួន នៅថ្ងៃទី ១២ មីនា នេះ។ យ៉ាង​ណា​ក៏​ដោយ​ក្រោយ​ការ​ដោះលែង អាជ្ញាធរ​បាន​បង្គាប់​ឲ្យ​យុវជន​ទាំង​បួន​រូប ចុះ​កិច្ច​សន្យា​ជា​លាយ​លក្ខ​អក្សរ​ថា​បញ្ឈប់​ការ​ចាក់​បញ្ចាំង​វីដេអូ​នេះ បើ​គ្មាន​ការ​អនុញ្ញាត​ពី​អាជ្ញាធរ​និង តម្រូវ​ឲ្យ​ពួក​គេ​ប្រគល់​វីដេអូ​ដែល​គ្រោង​ចាក់បញ្ចាំង​ទៅ​ឲ្យ​អាជ្ញាធរ​ផង។

ផ្សាយពាណិជ្ជកម្ម

មូល​ហេតុ​ដែល​ឈាន​ទៅ​ដល់​ការ​ឃាត់​ខ្លួន លោក មួង សូនី ប្រធាន​សមាគម​សម្ព័ន្ធ​និស្សិតបញ្ញាវ័ន្ត​ខ្មែរ និង សមាជិក​បី​រូប​ទៀត រូបមាន លោក លោក សួង នាគព័ន្ធ លោក សំណាងលោក ចាន់ ឡូត ត្រូវ​បាន​អាជ្ញាធរ​ខណ្ឌ​ឬស្សី​កែវ បញ្ជាក់​ថា ដោយ​សារ​តែ​ពួក​គេ មិន​បាន​សុំការ​អនុញ្ញាត​ចាក់​បញ្ចាំង​ពី​អាជ្ញាធរ​ជាមុន បើ​ទោះ​បី​ជា​អាជ្ញាធរ​បាន​ទៅ​ផ្តល់​ដំណឹង​មុន​មួយ​ថ្ងៃមុន​ការ​ចាប់​បញ្ចាំង​ឲ្យ​ពួក​គេ​ឲ្យ​សុំ​ការ​អនុញ្ញាត​ក៏​ដោយ។ ខណៈ​សំណុំ​រឿង​បណ្ឌិត កែម ឡី កំពុង​ស្ថិត​នៅ​ក្នុង​ដៃ​តុលាការ​នៅ​ឡើយ។

ចំណែក​ឯ​លោក ផៃ ស៊ីផាន អ្នក​នាំ​ពាក្យ​ទី​ស្តី​ការ​គណៈ​រដ្ឋ​មន្រ្តី បាន​ប្រតិកម្ម​នៅ​លើ​ទំព័រ​ហ្វេស​ប៊ុក​របស់​លោក​ថា យុទ្ធនាការ​របស់​ក្រុម​យុវជន​នេះ មាន​លទ្ធភាព​បង្ក ឬ​ញុះញ៉ង់ សាធារណៈ​ជន ឲ្យ​បាត់​បង់​ជំនឿ​លើ​សេចក្តី​សម្រេច ឬ​កិច្ច​ការងារ​នៃ​ដែន​សមត្ថកិច្ច​របស់​តុលាការ ដែល​កំពុង​បន្ត​នីតិវិធី ដូច​ចែង​នៅ​ក្នុង​មាត្រា​៥២៣ នៃ​ក្រម​ព្រហ្មទណ្ឌ នៃ​ព្រះរាជាណាចក្រ​កម្ពុជា។

អ្នក​នាំ​ពាក្យ​ដដែល សរសេរ​ថា ការ​ស្លាប់​របស់ លោក កែម ឡី គឺ​ជា​វត្ថុ​បំណង​នៃ​ក្រុម​ដែលទទួល​បាន​ផល​ប្រយោជន៍ ប្រជាប្រិយ នៃ​នយោបាយ​សង្រ្គោះ​ជាតិ និង​បរទេស​ដែល​មាននិន្នាការ​ប្រឆាំង​នឹង​រដ្ឋាភិបាល​តែ​ប៉ុណ្ណោះ។

ទោះ​បី​ជា​យ៉ាង​ណា​ក៏ដោយ លោក មួង សូនី ប្រធាន​សមាគម​សម្ព័ន្ធ​និស្សិត​បញ្ញវ័ន្ត​ខ្មែរ ចាត់ទុក​ថា ការ​ឃាត់​ខ្លួន​របស់​អាជ្ញាធរ​ទៅ​លើ​ក្រុម​យុវជន​នេះ​គឺ​ធ្វើ​ឡើង​ដើម្បី​គំរាម និង​បំបាក់ស្មារតី​របស់​អ្នក​ដែល​ព្យាយាម​រក​ការ​ពិត​លើ​ឃាតកម្ម​លោក​បណ្ឌិត​កែម​ឡី។

សមាគម​មួយ​នេះ សង្កត់ធ្ងន់ថា វីដេអូ​នេះ​ត្រូវ​បាន​ផ្សព្វ​ផ្សាយ​ជា​សាធារណៈ​ដោយ​ទូរទស្សន៍ អារ៉ាប់ អាល់ហ្សាហ្សឺរឺ ដែល​រៀប​រាប់​ពី​ឃាតកម្ម​លើលោក បណ្ឌិត កែមឡី នៅ​ក្នុង​បណ្តាញ​សង្គម​ហ្វេសប៊ុក និង យូធូប រួច​មក​ហើយ​កាល​ពី​ខែ មករា ឆ្នាំ ២០១៧ កន្លងទៅ។​ ដោយ​គ្រាន់តែ​សមាគម​សម្ព័ន្ធ​និស្សិត​បញ្ញាវ័ន្ត​ខ្មែរ យក​មក​បក​ប្រែ​ជា​ភាសាខ្មែរ​ប៉ុណ្ណោះ​។​ ជាង​នេះ​ទៅទៀត ការ​ចាក់​បញ្ចាំង​នេះ គឺ​ធ្វើ​ឡើង​នៅ​កន្លែង​ឯកជន ដែល​មិន​ធ្វើ​ឲ្យ​ប៉ះពាល់​ដល់ សន្តិសុខ សណ្តាប់​ធ្នាប់​សាធារណៈ​ឡើយ​។

ក្រោយ​សាក​សួរ​យៈ​ពេល​ជិត ៤ ម៉ោង មុន​ការ​ដោះលែង អាជ្ញាធរ​ខណ្ឌ​ឬស្សី បាន​បង្គាប់​ឲ្យក្រុម​យុវជន​ទាំង​បួន​រូប ចុះ​កិច្ច​សន្យា​ជា​លាយ​លក្ខអក្សរ​ថា​បញ្ឈប់​ការ​ចាក់​បញ្ចាំង​វីដេអូ​នេះ ដោយ​គ្មាន​ការ​អនុញ្ញាត​ពី​អាជ្ញាធរ​នោះ​ឡើយ និង តម្រូវ​ឲ្យ​ពួក​គេ​ប្រគល់​វីដេអូ​ដែល គ្រោងចាក់​បញ្ចាំង​ទៅ​អាជ្ញាធរ​ផង​។

សូម​បញ្ជាក់​ថា តាម​គម្រោង សមាគម​សម្ព័ន្ធ​និស្សិត​បញ្ញាវ័ន្ត​ខ្មែរ នឹង​ចាក់​បញ្ចាំង​វីដេអូ​ពីឃាតកម្ម លោក បណ្ឌិត កែម ឡី របស់​ទូរទស្សន៍​អាល់ហ្សា​ហ្សឺរ៉ា ព្រម​ទាំង​វីដេអូ ​ពាក់​ព័ន្ធ​នឹង​ឃាតកម្ម​បណ្ឌិត កែម ឡី នៅ​ស្តារ​ម៉ាត (Star Mart) កាល់តិច (Caltex) បូកគោ ដែល​ត្រូវ​បាន​គេ​បង្ហាញ​នៅ​តុលាការ កាល​ពី​ពេល​ថ្មី​ៗ​នេះ។ ក៏​ប៉ុន្តែ​មិន​ទាន់​ទាំង​បាន​ចាក់បញ្ចាំង​ផង​ ក៏​ត្រូវ​បានអាជ្ញាធរ​ខណ្ឌឬស្សី​កែវ ឃាត់​ខ្លួន​និង​នាំ​ទៅ​សាកសួរ​នៅប៉ុ​ស្តិ៍នគរបាល​រដ្ឋបាល​ទួល​សង្កែ​តែ​ម្តង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ