អានតួអត្ថបទ
អាមេរិក

សេត​វិមាន៖ លោក​ដូណាល់​ ត្រាំ​នឹង​ជួប​មេដឹង​នាំ​អូតង់​នៅ​ខែ​ឧសភា

លោកប្រធានាធិបតីដូណាល់ ត្រាំ
លោកប្រធានាធិបតីដូណាល់ ត្រាំ AP
ដោយ៖ សឿង ភារៈ
១៣ នាទី

លោក​ប្រធានាធិបតី​ថ្មី ដូណាល់ ត្រាំ នឹង​ជួប​មេ​ដឹក​នាំ​អង្គការ​អូតង់​នៅ​ក្នុង​ខែ​ឧសភា ខាង​មុខនេះ​។ នេះ​បើ​តាម​ការ​បញ្ជាក់​របស់​សេត​វិមាន​កាល​ពី​ថ្ងៃ​អាទិត្យ ក្រោយ​ពី​លោក​ ដូណាល់ ត្រាំ​បាន​ពិភាក្សាតាម​ទូរស័ព្ទ​ជា​មួយ​នឹង​លោក​អគ្គ​លេខាធិការ​អង្គការ​អូតង់ Jens Stoltenberg។

ផ្សាយពាណិជ្ជកម្ម

 

លោក​ប្រធានា​ធិបតី​ដូណាល់ ត្រាំ បាន​បញ្ជាក់​ថា​លោក​នឹង​គាំទ្រ​យ៉ាង​ពេញ​ទំហឹង​ចំពោះ​អង្គការ​អូតង់​។ ប៉ុន្តែ​លោក​ក៏​អំពាវនាវ​ឲ្យ​សមា​ជិក​មក​ពី​អឺរ៉ុប​ចូល​រួម​បន្ថែម​ទៀត​ ដើម្បី​ចូល​រួម​ចំណែក​ក្នុង​បក្ស​សម្ព័ន្ធ​នេះ។ នេះ​បើតាម​សេចក្តី​ប្រកាស​របស់​សេត​វិមាន​។ ក្នុង​សេច​ក្តី​ប្រកាស​ដដែល​នោះ បាន​បញ្ជាក់​ថា​លោក​ដូណាល់​ ត្រាំ នឹង​ជួប​ប្រជុំ​មេ​ដឹក​នាំ​អង្គការ​អូតង់​នៅ​ក្នុង​ទឹក​ដី​អឺរ៉ុប​នា​អំឡុង​ខែ​ឧសភា ឆ្នាំ​២០១៧​ខាង​មុខ​នេះ។

ក្នុង​សេច​ក្តី​ថ្លែង​ការណ៍​របស់​សេត​វិមាន​ថ្លែងថា​: «បក្ស​សម្ព័ន្ធ​អូតង់​បាន​យល់​ព្រម បន្ត​ការ​សម្រប​សម្រួល​ និងសហ​ប្រតិបត្តិ​យ៉ាង​ជិត​ស្និទ្ធ ដើម្បី​ដោះ​ស្រាយ​បញ្ហា​សន្ដិ​សុខ ដែល​អូតង់​កំពុង​តែ​ប្រឈម​មុខ»។ កន្លង​មកសហ​រដ្ឋ​អាមេរិក​បាន​ផ្ដល់​មូល​និធិ​ជា​បន្ត​បន្ទាប់​ទៅ​បក្ស​សម្ព័ន្ធ​អូតង់ ហើយ​លោក​ដូណាល់​ត្រាំ​ក៏​ធ្លាប់​បានជំរុញ​ឱ្យ​ប្រទេស​ជា​សមា​ជិក​របស់​អូតង់​ទាំង​អស់ បង្កើន​នូវ​ការ​រួម​ចំណែក​បរិច្ចាគ​ថិវកា​របស់​ខ្លួន​បន្ថែម ដើម្បីឲ្យ​អង្គការ​នេះ ប្រតិបត្តិការ​បន្ត​សកម្ម​ភាព​របស់​ខ្លួន​ដោយ​រលូន​។

សូម​ជម្រាប​ជូន​ថា​កន្លង​មក​ថ្នាក់​ដឹក​នាំ​អឺរ៉ុប​ក៏​បាន​បង្ហាញ​ការ​ព្រួយ​បារម្ភ​អំពី​ការ​រិះគន់​យ៉ាង​ខ្លាំង​ពី​លោក​ដូណាល់​ ត្រាំ​ទៅ​លើ​អង្គការ​អូតង់​។ សេច​ក្តី​ថ្លែង​ការណ៍​របស់​សេត​វិមាន​ក៏​បាន​ឲ្យ​ដឹង​ដែរ ថា​បក្ស​ម្ព័ន្ធ​អូតង់​ក៏នឹង​ជជែក​ពី​សក្តានុពល លើ​ការ​ដោះ​ស្រាយ​ជម្លោះ​ដែល​កំពុង​តែ​កើត​ឡើង​នៅ​តាម​ព្រំដែន​របស់​ប្រទេស​អ៊ុយក្រែន​ដែរ​។

ទីក្រុង​គៀវ និង​លោក​ខាង​លិច​បាន​ចោទ​ប្រកាន់​ប្រទេស​រុស្ស៊ី​ថា​គឺ​ជា​អ្នក​នៅ​ពី​ក្រោយ​ពួក​ឧទ្ទាម​ក្នុងប្រទេសអ៊ុយ​ក្រែន និង​បាន​ពង្រាយ​កង​ទ័ព​ទៅ​តាម​តំបន់​ជម្លោះ។ ប៉ុន្តែ​ក្រុង​មូស្គូ​បាន​បដិសេធ​ចំពោះ​ការ​ចោទ​ប្រកាន់នេះ​។

សូម​បញ្ជាក់​ថា​លោក​ដូណាល់ ត្រាំ បាន​ចូល​កាន់​តំណែង​ចំពេល ដែល​ទំនាក់​ទំនង​រវាង​អាមេរិក និង​រុស្ស៊ី​នៅកម្រិត​ទាប​បំផុត ក្រោយ​ពី​មាន​ការ​ចោទ​ប្រកាន់​ដោយ​ទី​ភ្នាក់​ងារ​ស៊ើប​ការណ៍​សម្ងាត់​របស់​អាមេរិក​ថា​វិមានក្រឹម​ឡាំង​បាន​ជ្រៀត​ជ្រែក​ការ​បោះ​ឆ្នោត​នៅ​អាមេរិក៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ