អានតួអត្ថបទ
ទស្សនៈព្រឹត្តិការណ៍ខ្មែរ

ឥទ្ធិពល​នៃ​បទ​បញ្ជា​របស់ «បុរស​ខ្លាំង» កម្ពុជា

សំឡេង ០៣:៥៣
លោក​​ហ៊ុន សែន នាយករដ្ឋមន្រ្តី​កម្ពុជា
លោក​​ហ៊ុន សែន នាយករដ្ឋមន្រ្តី​កម្ពុជា ©វណ្ណារ៉ា
ដោយ៖ ប៉ែន បូណា
២៤ នាទី

យុទ្ធនាការ​បង្រ្កាប​​បទ​ល្មើស​ព្រៃឈើ​ដែល​ធ្វើ​ឲ្យ​កក្រើក​ពេញ​ផ្ទៃ​ប្រទេស ​តាំង​ពី​​ពាក់​កណ្តាល​ខែ​មីនា​មក​​នោះ​ គឺ​ជា​ឧទាហរណ៍​មួយ​ទៀត​នៃ​ឥទ្ធិពល​ដ៏​ខ្លាំងក្លា​របស់​​លោក​នាយក​ រដ្ឋមន្ត្រី​ ហ៊ុន​ ​សែន ​ដ៏​មាន​អំណាច។​ បទបញ្ជា​របស់​ «បុរស​ខ្លាំង»​ គ្មាន​អ្វី​​ដែល​ថា​មិន​អាច​ធ្វើ​បាន​ឡើយ​ ទោះ​បី​ជា​បញ្ហា​នោះ​ស្មុគស្មាញ​យ៉ាង​ណា​ក៏​ដោយ។​ ​ប៉ុន្តែ​​ប្រទេស​កម្ពុជា​ដែល​លោក​នាយក​រដ្ឋមន្ត្រី​កំពុង​គ្រប់គ្រង​ កំពុង​ប្រឈម​មុខ​នឹង​បញ្ហា​ជា​ច្រើន​​ដែល​ដោះស្រាយ​មិន​ទាន់​ចេញ។​ តើ​ហេតុ​អ្វី​បាន​ជា​ដូច្នេះ?​​

ផ្សាយពាណិជ្ជកម្ម

មិន​ថា​បញ្ហា​តូច​​ធំ​​ ឬ​ស្មុគស្មាញ​យ៉ាង​ណា​ទេ​​ក្រោម​ទម្ងន់​នៃ​ «កណ្តាប់​ដៃ​ដែក»​ របស់​​លោក​នាយក​រដ្ឋមន្ត្រី​ ហ៊ុន​ ​សែន​ ​គ្មាន​អ្វី​ដែល​មិន​អាច​ធ្វើ​បាន​ឡើយ។​ ​ជាក់​ស្តែង​​​បទល្មើស​ព្រៃឈើ​ដ៏​ស្មុគស្មាញ​​ និង​ដុះស្លែ​ ដោះ​​ស្រាយ​មិន​ចេញ​រាប់​ទសវត្សរ៍​មក​ហើយ​​នោះ​​បែរ​ជា​ត្រូវ​បាន​បំបែក​តែ​ ក្នុង​រយៈ​ពេល​ប៉ុន្មាន​សប្តាហ៍​ប៉ុណ្ណោះ។

ទោះបី​ជា​គេ​មិន​ទាន់​អាច​និយាយ​ថា​​បទល្មើស​ព្រៃឈើ​ត្រូវ​បាន​បញ្ចប់​ទាំង​ ស្រុង​​ក៏ដោយ​ ​ក៏​ការ​បង្រ្កាប​ចុង​ក្រោយ​នេះ​បាន​ធ្វើ​ឲ្យ​ឈ្មួញ​រកស៊ី​ឈើ​​ និង​​មន្ត្រី​អ្នក​មាន​​អំណាច​ដែល​ជាប់​ពាក់ព័ន្ធ​កំពុង​ស្ថិត​ក្នុង​ ស្ថានភាព​ «ចុះ​ទឹក​ក្រពើ​ឡើង​លើ​ខ្លា» ដ៏​គួរ​ឲ្យ​​សង្វេគ។​ នេះ​មិនមែន​ជា​លើក​ដំបូង​ឡើយ​ដែល​លោក​នាយក​រដ្ឋមន្ត្រី​បាន​ចេញ​បញ្ជា​ដោយ​​ ផ្ទាល់​​ដើម្បី​ចាត់ការ​អំពើ​អសកម្ម​ ឬបទល្មើស​ផ្សេងៗ​ ប្រកប​ដោយ​​ប្រសិទ្ធិភាព​បំផុត។

គេ​ប្រាកដ​ជា​នៅ​ចាំ​បាន​អំពី​យុទ្ធនាការ​កណ្តាប់​ដៃ​ដែក​ប្រឆាំង​នឹង​ មន្ត្រី​តុលាការ​​ពុករលួយ​កាល​ពី​ប៉ុន្មាន​ឆ្នាំ​មុន​នេះ។​ យុទ្ធនាការ​ដែល​បាន​ធ្វើ​ឲ្យ​មន្ត្រី​តុលាការ​ជាច្រើន​​ធ្លាក់​ពី​តំណែង​​ ទទួល​ទណ្ឌកម្ម​ ​ឬ​ក៏​ត្រូវ​បាន​ផ្លាស់​ប្តូរ​មុខ​តំណែង។​ នេះ​នៅ​មិនទាន់​រាប់​បទញ្ជា​​បង្ក្រាប​ល្បែង​ភ្នាល់​បាល់​ ​និង​ការ​ប្រើប្រាស់​ផ្លាក​លេខ​ទាហាន​ ​និង​ប៉ូលិស​បែប​​អនាធិបតេយ្យ​។ល។​ និង។ល។​ផងទេ​ ពោល​គឺ​​បទ​បញ្ជា​របស់​លោក​នាយក​រដ្ឋមន្ត្រី​សុទ្ធតែ​​ទទួល​បាន​ផ្លែផ្កា​ ភ្លាមៗ​​ និង​យ៉ាង​មាន​ប្រសិទ្ធិភាព​បំផុត។

ប៉ុន្តែ​​ចំណោទ​នៅ​ត្រង់​ថា​​ប្រសិន​បើ​លោក​នាយក​រដ្ឋមន្ត្រី​មាន​អំណាច​ ខ្លាំង​បែប​​នេះ​ ​តើ​ហេតុ​អ្វី​បាន​ជា​បញ្ហា​ជាច្រើន​នៅ​តែ​កើត​ឡើង​ដដែលៗ​ ​និង​មិន​អាច​ដោះស្រាយ​​បាន?​ ដើម្បី​ឆ្លើយ​នឹង​សំណួរ​នេះ​​ យើង​សាក​ល្បង​ពិនិត្យ​មើល​បញ្ហា​មួយ​ចំនួន​ដូច​ខាង​​ក្រោម ៖

ជាបឋម​ ​អ្វីដែល​គេ​អាច​មើល​ឃើញ​ជា​ទូទៅ​នោះ​ គឺ​ការ​ឃុបឃិត​គ្នា​ជា​ប្រព័ន្ធ​នៃ​​មន្រ្តី​ក្រោម​ឱវាទ​របស់​នាយក​ រដ្ឋមន្ត្រី។​ ​ពិត​ហើយ​ថា​​នាយក​រដ្ឋមន្ត្រី​មាន​អំណាច​​ និង​​ចង់​ឲ្យ​រាល់​បញ្ហា​ត្រូវ​បាន​ដោះស្រាយ​ភ្លាមៗ។​​ ប៉ុន្តែ​​ប្រសិន​​បើ​មន្ត្រី​ក្រោម​ឱវាទ​ឃុបឃិត​​គ្នា​ដើម្បី​ផល​ប្រយោជន៍​ ដោយ​បិទ​បាំង​ពី​ភ្នែក​នាយក​រដ្ឋមន្ត្រីនោះ​បញ្ហា​នឹង​មិន​អាច​ដោះ​ស្រាយ​ បាន​ឡើយ។

ម្យ៉ាង​ទៀត​​​រដ្ឋបាល​ថ្នាក់​ក្រោម​ ​និង​អាជ្ញាធរ​មាន​សមត្ថកិច្ច​​គ្រប់​លំដាប់​ថ្នាក់​ដែល​​ជា​សេនាធិការ​ ​ឬ​ក៏ជា​ភ្នែក​ច្រមុះ​របស់​រដ្ឋាភិបាល​ ហាក់​ដូច​ជា​មិន​បាន​អនុវត្ត​ការងារ​​ប្រចាំ​ថ្ងៃ​របស់​ខ្លួន​ឲ្យ​បាន​ត្រឹម ​ត្រូវ​ឡើយ។​ ឧទាហរណ៍​​នៅ​ក្នុង​មូលដ្ឋាន​នីមួយៗ​​ អំពើ​​ល្មើស​ច្បាប់​តែង​កើត​ឡើង​ជា​ប្រចាំ​​ ប៉ុន្តែ​​សមត្ថកិច្ច​មិន​បាន​ចាត់​វិធានការ​ឡើយ។​ មាន​​ហេតុផល​បី​យ៉ាង​ដែល​អាច​ពន្យល់​បញ្ហា​នេះ​បាន។​ ទី១​​ គឺ​អសមត្ថភាព​របស់​​អាជ្ញាធរ​​ក្នុង​ការ​គ្រប់គ្រង​បទល្មើស។​ ទី២​ ​គឺ​បញ្ហា​ផល​ប្រយោជន៍​ដែល​ធ្វើ​ឲ្យ​អាជ្ញាធរ​មាន​​សមត្ថកិច្ច​ចិញ្ចឹម​ បទល្មើស​ ​និង​ទី៣​ ​គឺ​អ្នក​ប្រព្រឹត្ត​ល្មើស​ ​ឬ​ធ្វើ​ជា​ខ្នង​បង្អែក​ឲ្យ​ជនល្មើស​ ​គឺជា​មន្ត្រី​មាន​អំណាច​ដែល​ធ្វើ​ឲ្យ​កម្លាំង​សមត្ថកិច្ច​បង្ខំ​ចិត្ត​បិទ​ ភ្នែក​ បិទ​ត្រចៀក​នៅ​​ចំពោះ​មុខ​អំពើ​ល្មើស។

ក្នុង​បរិបទ​នេះ​​បទបញ្ជា​ «កណ្តាប់​ដៃ​ដែក»​ របស់​នាយក​រដ្ឋមន្ត្រី​ពិត​ជា​ចាំបាច់​​ក្នុង​ការ​កម្ចាត់​ភាព​អសកម្ម​​ ឬ​បទល្មើស​ផ្សេងៗ​ពីព្រោះ​មាន​តែ​បទបញ្ជា​បែប​នេះ​ទេ​​ដែល​អាច​ចាប់​បង្ខំ​ ឲ្យ​សមត្ថកិច្ច​បំពេញ​តួនាទី​របស់​ខ្លួន​បាន​ត្រឹម​ត្រូវ។​ ​ប៉ុន្តែ​​បញ្ហា​នៅ​​ត្រង់​ថា​​​ គេ​មិន​អាច​រង់ចាំ​តែ​បទបញ្ជា​របស់​នាយក​រដ្ឋមន្ត្រី​ដើម្បី​ដោះស្រាយ​រាល់​ បញ្ហា​​នោះ​ឡើយ។​​

ដំណោះស្រាយ​ដ៏​ល្អ​បំផុត​ដែល​អាច​ធានា​បាន​នូវ​និរន្តរភាព​នៃ​ការ​ប្រយុទ្ធ​ ប្រឆាំង​​នឹង​អំពើ​ល្មើស​គ្រប់​បែប​យ៉ាង​គឺ ​គ្មាន​អ្វី​ក្រៅ​ពី​ការ​អនុវត្តន៍​ច្បាប់​ដោយ​ម៉ឺងម៉ាត់​​ និង​​ស្មើភាព​របស់​អាជ្ញាធរ​ឡើយ។​ បទបញ្ជា​របស់​នាយក​រដ្ឋមន្ត្រី​នៅ​តែ​មាន​ការ​ចាំបាច់​​តែ​​សម្រាប់​ កិច្ចការ​ធំៗ​មួយ​ចំនួន​តែ​ប៉ុណ្ណោះ។​ រឿង​កំប៉ិក​កំប៉ុក​ខ្លះ​​មិន​គួរ​នឹង​ត្រូវ​រង់ចាំ​​បញ្ជា​របស់​នាយក​ រដ្ឋមន្ត្រី​ដើម្បី​ដោះស្រាយ​ឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ