កម្ពុជា

ស្ថានភាព​អ្នក​កាសែត​កម្ពុជា នៅតែ​គួរ​ឲ្យ​បារម្ភ

លោក ខៀវ កញារឹទ្ធិ រដ្ឋមន្ត្រី​​ក្រសួង​ព័ត៌មាន​នៅ​ចំពោះ​មុខ​អ្នក​កាសែត
លោក ខៀវ កញារឹទ្ធិ រដ្ឋមន្ត្រី​​ក្រសួង​ព័ត៌មាន​នៅ​ចំពោះ​មុខ​អ្នក​កាសែត © សុវណ្ណារ៉ា/RFI

ស្ថានភាព​អ្នកកាសែត​រយៈពេល​មួយឆ្នាំចាប់ពី​ថ្ងៃ​ទី​៣ខែ​ឧសភាឆ្នាំ​២០០៩ដល់​ថ្ងៃ​ទី​៣ខែ​ឧសភាឆ្នាំ​២០១០សេរីភាព​សារព័ត៌មាននិង​ស្ថានភាព​អ្នកកាសែតនៅ​តែ​ជា​ប្រការ​គួរឲ្យ​បារម្ភ។ ចំណែក​បណ្តឹង​ចំពោះ​អ្នកកាសែតក៏​បាន​កើន​ឡើង​ចំនួន១០ករណីច្រើន​ជាង​ឆ្នាំ​មុនដែល​មាន​តែពីរ ​ករណី​ប៉ុណ្ណោះ។ នេះ​បើ​តាម​ របាយការណ៍​របស់​ក្លឹប​អ្នកកាសែត​កម្ពុជា។  

ផ្សាយពាណិជ្ជកម្ម

បទ​អន្តរាគមន៍​របស់ លី ម៉េងហួរ

តាម​ការសង្កេត​របស់​ក្លឹប​អ្នក​កាសែត​កម្ពុជា ក្នុង​រយៈ​ពេល​ពេញ​មួយ​ឆ្នាំ គិត​ពី​ថ្ងៃ​៣​ឧសភា ឆ្នាំ​២០០៩ មក​ដល់​ថ្ងៃ​នេះ សេរីភាព​សារព័ត៌មាន និង​ស្ថានភាព​អ្នកកាសែត​កម្ពុជា ស្ថិត​ក្នុង​សភាព​គួរ​ឲ្យ​បារម្ភ។ បារម្ភ ដោយសារ​តែ​បណ្តឹង​លើ​អ្នកកាសែត​កម្ពុជា មាន​ចំនួន ១០ ករណី គឺ​ច្រើន​ជាង​ឆ្នាំ​មុន ដែល​មាន​ការ​ប្តឹង​អ្នកកាសែត​តែ​ពីរ​ករណី​ប៉ុណ្ណោះ។

 

ក្នុង​ឆ្នាំ​កន្លង​មក​នេះ ក្លឹប​អ្នកកាសែត​កម្ពុជា បាន​កត់ត្រា​ថា ការ​ចាប់​ខ្លួន​អ្នកកាសែត បាន​កើន​ឡើង​រហូត​ដល់ ២៤ នាក់។ ក្នុង​នោះ អ្នកកាសែត​ខ្មែរ ២ នាក់ ត្រូវ​បាន​ចាប់​ខ្លួន​ដាក់​ពន្ធនាគារ ក្រោម​ការ​ចោទ​ប្រកាន់​ពី​បទ​បរិហារ​កេរ្តិ៍ និង​ផ្សាយ​ព័ត៌មាន​មិន​ពិត។ ក្នុង​ឆ្នាំ​កន្លង​មក​នេះ ក៏​មាន​ការ​បណ្តេញ​អ្នកកាសែត​យ៉ាង​ច្រើន គួរ​ឲ្យ​កត់​សម្គាល់ ពិសេស​នៅ​អង្គភាព​វិទ្យុ​អាស៊ី​សេរី។

បច្ចុប្បន្ន​នេះ អ្នកកាសែត​ក្នុង​ប្រទេស​កម្ពុជា នៅ​តែ​បន្ត​ប្រឈម​មុខ​នឹង​ការ​ធ្វើ​ទុក្ខ​បុក​ម្នេញ ការ​រុក​កួន អំពើ​ហិង្សា រហូត​ដល់​មាន​ការ​បាត់បង់​ជីវិត ខណៈ​ដែល​បទ​ចោទ​ប្រកាន់ ដែល​បង្កប់​គោលបំណង​នយោបាយ ត្រូវ​បាន​លើក​ឡើង ដើម្បី​ប្រឆាំង​អ្នកកាសែត។ នេះ​បើ​តាម​សេចក្តី​ថ្លែង​ការណ៍​របស់​មជ្ឈមណ្ឌល​សិទ្ធិ​មនុស្ស​កម្ពុជា ក្នុង​ឱកាស​ទិវា​សេរីភាព​សារព័ត៌មាន​ពិភពលោក ថ្ងៃ​៣​ឧសភា​នេះ។

 
មជ្ឈមណ្ឌល​សិទ្ធិមនុស្ស​កម្ពុជា ក៏​បាន​សម្តែង​នូវ​ការ​ព្រួយ​បារម្ភ​យ៉ាង​ខ្លាំង​អំពី​ស្ថានភាព​អ្នកកាសែត​កម្ពុជា និង​បាន​លើកឡើង​ថា ការ​ប្រើប្រាស់​ហួស​ប្រមាណ​នូវ​ច្បាប់ ដើម្បី​បង្ក្រាប និង​បរិយាកាស​ដ៏​គួរ​ឲ្យ​ភ័យខ្លាច ដែល​បង្ក​ឡើង​ដោយ​ទណ្ឌកម្ម និង​បទ​ចោទ​ប្រកាន់​ព្រហ្មទណ្ឌ ការ​ធ្វើ​ទុក្ខ​បុក​ម្នេញ និងការ​រុកកួន​លើ​អ្នកកាសែត បាន​រារាំង​ការ​បើក​ចំហ​វិជ្ជាជីវៈ​សារព័ត៌មាន ក្នុង​ប្រទេស​កម្ពុជា បង្ខំ​ឲ្យ​អ្នកកាសែត ដាក់​កម្រិត​លើ​ការបញ្ចេញ​មតិ​របស់​ខ្លួន ដើម្បី​កុំ​ឲ្យ​ប៉ះពាល់​ដល់​អ្នក​មាន​ទ្រព្យ​សម្បត្តិ និង​អ្នក​មាន​អំណាច។​

 
យ៉ាងណា​ក៏​ដោយ​ ក្លឹប​អ្នកកាសែត បាន​កត់សម្គាល់​ថា ចាប់​តាំង​ពី​ថ្ងៃ​៣​ឧសភា ឆ្នាំ​២០០៩ មក​ដល់​ថ្ងៃ​៣ ឧសភា ឆ្នាំ​២០១០​នេះ គ្មាន​អ្នកកាសែត​ខ្មែរ​ណា​ម្នាក់ ត្រូវ​បាន​សម្លាប់ ដោយសារ​មូលហេតុ​នៃ​វិជ្ជាជីវៈ ជា​អ្នកកាសែត​ទេ។ ក៏​ប៉ុន្តែ​នៅ​ជុំវិញ​ពិភពលោក មាន​អ្នកកាសែត​យ៉ាង​ហោច​ណាស់ ៤២ នាក់ ត្រូវ​បាន​ឃាតក ផ្តាច់​ជីវិត ដោយសារ​បុព្វហេតុ​ស្វែងរក​ការពិត។

 
ចំពោះមុខ​ស្ថានភាព​គួរឲ្យ​បារម្ភ​របស់​អ្នកកាសែត​កម្ពុជា និង​ដើម្បី​សាទរ​ទិវា​សេរីភាព​សារព័ត៌មាន​ពិភពលោក ក្រោម​ប្រធានបទ សិទ្ធិ​ដើម្បី​ដឹង នា​ថ្ងៃ​ទី​៣​ឧសភា​នេះ ក្លឹប​អ្នកកាសែត​កម្ពុជា របស់​លោក ប៉ែន សមិទ្ធិ បានចាត់​ទុក​ថា ជា​ឱកាស​សម្រាប់​អ្នកកាសែត​កម្ពុជា ពិនិត្យ និង​បង្ហាញ​ពី​សារសំខាន់​នៃ​សេរីភាព​បញ្ចេញមតិ នៅក្នុង​បរិបទ​វប្បធម៌ និង​សង្គម​នយោបាយ​ខ្មែរ។

 
ក្លឹប​អ្នកកាសែត​កម្ពុជា សង្ឃឹមថា អ្នកកាសែត​កម្ពុជា​ទាំងអស់ បន្ត​ការធ្វើ​សេចក្តី​រាយការណ៍​ព័ត៌មាន​ដោយ​គោរព​ការពិត។ ចំណែក​រដ្ឋាភិបាល ក៏​ត្រូវ​បើក​ទូលាយ​នូវ​ព័ត៌មាន ដើម្បី​ជា​តម្រូវការ​សង្គម និង​ជា​តម្រូវការ​នៃ​ការអភិវឌ្ឍន៍។​

 
រីឯ​សមាគម​កម្ពុជា ការពារ​អ្នកកាសែត របស់​លោក អ៊ុំ សារិន ក៏​បាន​ជម្រុញ​ដល់​ស្ថាប័ន​ពាក់ព័ន្ធ​នានា ព្រម​ទាំង​រដ្ឋាភិបាល​កម្ពុជា បង្ក​ភាព​ងាយ​ស្រួល​ឲ្យ​កាន់តែ​ខ្លាំង​ថែម​ទៀត ដល់​អ្នក​សារព័ត៌មាន ក្នុង​ការ​ទទួល​បាន​ព័ត៌មាន ការ​ចូល​យក​ព័ត៌មាន និង​មិន​ត្រូវ​មាន​ការ​រើស​អើងប្រឆាំង​នឹង​ស្ថាប័ន​ព័ត៌មាន​ណា​ឡើយ។ ចំណែក​អ្នក​កាសែត ក៏​ត្រូវ​គោរព​ក្រម​សីលធម៌​វិជ្ជាជីវៈ និង​ត្រូវមាន​ការ​ទទួល​ខុសត្រូវ​ខ្ពស់ ដោយ​ត្រូវ​ផ្សព្វផ្សាយ​ព័ត៌មាន​ពិត និង​មិន​លម្អៀង។

 
ចំណែក​មជ្ឈមណ្ឌល​សិទ្ធិមនុស្ស​កម្ពុជា ដែល​ជា​អង្គការ​ក្រៅ​រដ្ឋាភិបាល ក៏​បាន​អំពាវនាវ​ឲ្យ​រដ្ឋាភិបាល​លុប​ចោល នូវ​ការ​បិទមាត់​អ្នកកាសែត​កម្ពុជា ដើម្បី​ធានា​ឲ្យ​អ្នកកាសែត​កម្ពុជា អាច​អនុវត្ត​សិទ្ធិ​សេរីភាព​ជា​មូលដ្ឋាន​របស់​ខ្លួន ក្នុង​ការបញ្ចេញ​មតិ រួច​ផុត​ពី​ការ​ធ្វើ​ទុក្ខ​បុក​ម្នេញ និង​ការ​គំរាម​កំហែង​នានា។​

 
ក៏ប៉ុន្តែ​មន្ត្រី​ជាន់ខ្ពស់​រាជរដ្ឋាភិបាល លោក ទិត សុធា បាន​លើក​ឡើង​ថា សេរីភាព​សារព័ត៌មាន​នៅ​កម្ពុជា មាន​ភាព​ល្អ​ប្រសើរ និង​មាន​ការរីក​ចម្រើន​គួរ​ឲ្យ​ចាប់​អារម្មណ៍។ កម្ពុជា ក៏​ជា​ឋាន​សួគ៌ នៃ​សេរីភាព​សារព័ត៌មាន ដោយ​កម្ពុជា មាន​ទាំង​គណបក្ស​ប្រឆាំង មាន​ទាំង​កាសែត​វិទ្យុ​ប្រឆាំង និង​រហូតដល់​មាន​អង្គការ​ក្រៅ​រដ្ឋាភិបាល​ប្រឆាំង​ផង​ដែរ។

 
លោក ទិត សុធា អ្នក​នាំ​ពាក្យ​អង្គភាព​ព័ត៌មាន និង​ប្រតិកម្ម​រហ័ស​របស់​ទីស្តី​ការ​គណៈ​រដ្ឋមន្ត្រី បាន​លើក​ឡើង​ថា ចំពោះ​ការ​ប្តឹងផ្តល់​លើ​អ្នកកាសែត​កម្ពុជា ឡើង​តុលាការ ដែល​នាំ​ឲ្យ​មាន​ការ​ចោទ​ប្រកាន់​ថា មាន​ការ​រឹត​ត្បិត ឬ​គំរាមកំហែង​ដល់​សេរីភាព​សារព័ត៌មាន ក្នុង​ពេល​កន្លងមក​នោះ មិនមែន​កើត​ឡើង ដោយ​គ្មាន​ហេតុផល​នោះ​ទេ។ ការ​ប្តឹងផ្តល់ និង​ចាប់​អ្នកកាសែត ដាក់​ពន្ធនាគារ​នោះ ក៏​ដោយសារ​តែ​អ្នកកាសែត​នោះ មិន​គោរព​ក្រម​សីលធម៌ និង​វិជ្ជាជីវៈ ជា​អ្នកកាសែត​ខ្លួន​ឯង។

 
យ៉ាង​ណា​ក៏​ដោយ ក្នុង​ទិវា​សេរីភាព​សារព័ត៌មាន​ពិភពលោក ថ្ងៃ​៣​ឧសភា​នេះ មន្ត្រី​ជាន់ខ្ពស់​រដ្ឋាភិបាល លោក ទិត សុធា បាន​អំពាវនាវ​ផង​ដែរ ឲ្យ​អ្នកកាសែត ផ្តល់​ព័ត៌មាន ដោយ​បង្ហាញ​ពី​សច្ចៈភាព ការពិត និង​ត្រូវ​ពង្រឹង​នូវ​ការ​គោរព​ក្រម​សីលធម៌ វិជ្ជាជីវៈ​អ្នកកាសែត ដើម្បី​ជៀសវាង​ការ​ប្តឹងផ្តល់ ដោយសារ​តែ​ការងារ​របស់​ខ្លួន៕

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI