អានតួអត្ថបទ
នាទីសុខភាពនិងអនាម័យ

ទិវា​ពិភពលោក​គ្មាន​ថ្នាំ​ជក់​ឆ្នាំ​២០១០

សំឡេង ០៨:៣៤
អង្គការ​សុខភាព​ពិភពលោក​បរិហារ​ឈ្មួញថ្នាំ​ជក់​ដែល​កំពុង​ទាក់​ទាញ​ស្ត្រី​ឲ្យ​ជក់​បារី
អង្គការ​សុខភាព​ពិភពលោក​បរិហារ​ឈ្មួញថ្នាំ​ជក់​ដែល​កំពុង​ទាក់​ទាញ​ស្ត្រី​ឲ្យ​ជក់​បារី MK2 Diffusion
ដោយ៖ អៀង សុខម៉ិញ
២៧ នាទី

ថ្នាំជក់ គឺជាឃាតករសម្លាប់មនុស្ស ជាបុព្វហេតុនាំឲ្យខូចសុខភាពទាំងអ្នកជក់ និង​អ្នក​ស្រូប​ផ្សែង​ពី​គេ ប៉ុន្តែ​ក្រុមហ៊ុន​ផលិត​បារី បាន​ខិតខំ​កែច្នៃ​ផលិតផល​ថ្មីៗ មាន​រសជាតិ ទម្រង់​ដើម​បារី ប្លែកៗ​គ្នា រូបភាព​កញ្ចប់​បារី​ទៀត​សោត​ត្រូវ​បាន​សម្អិតសម្អាង យ៉ាង​ពិសេស គួប​ផ្សំ​នឹង​ពាក្យ​ឃោសនា​បោក​បញ្ឆោត​ជាច្រើន។ នេះ​ជា​ការ​បរិហារ​របស់​អង្គការ​សុខភាព​ពិភពលោក OMS ក្នុង​ឱកាស​ទិវា​ពិភពលោក​គ្មាន​ថ្នាំ​ជក់ ថ្ងៃ​ទី​៣១​ ឧសភា ឆ្នាំ​២០១០។  ចុះ​នៅ​ប្រទេស​កម្ពុជា​ តើ​កម្ពុជា​មាន​នយោបាយ​យ៉ាង​ណា​ខ្លះ​ក្នុង​ការ​ប្រយុទ្ធ​ប្រឆាំង​នឹង​ថ្នាំ​ ជក់​ នេះ ?! សូមរង់​ចាំ​ស្តាប់​បទ​សម្ភាសន៍​របស់ អៀង សុខម៉ិញ ជាមួយ​នឹង​លោក​វេជ្ជបណ្ឌិត ឃុន សូគ្រីន ប្រធានមជ្ឈមណ្ឌល​ជាតិ​លើក​កម្ពស់​សុខភាព​​ ក្រសួង​​សុខាភិបាល​​​​កម្ពុជា។ 

ផ្សាយពាណិជ្ជកម្ម

ជារៀងរាល់ឆ្នាំ នៅថ្ងៃទី ៣១ ឧសភា អង្គការសុខភាពពិភពលោក រួម​ជាមួយ​បណ្តា​ប្រទេស​​​ជា​សមាជិក តែង​រៀបចំ​ទិវាពិភពលោក​គ្មាន​ថ្នាំ​ជក់ ក្រោម​ប្រធានបទ​ផ្សេងៗ​គ្នា ដើម្បី​ការពារ​សុខភាព​បណ្តាជន​ទូទៅ។ បារី​ជា​ឃាតករ​សម្ងាត់​សម្លាប់​ជីវិត​មនុស្ស ដោយ​អាថ៌​កំបាំង​បំផុត និង​ច្រើន​ជាង​មនុស្ស​ស្លាប់​ព្រោះ​ជំងឺ​ស៊ីដា របេង បូក​ជាមួយ​ជំងឺ​របេង គ្រោះ​ថ្នាក់​ចរាចរណ៍ ទារក​ស្លាប់​ពេល​កើត ​និង​ឃាតកម្ម ... ទៅទៀត។ ការ​ស្លាប់​នេះ បាន​ធ្វើ​ឲ្យ​ឈ្មួញ​ធ្វើ​ពាណិជ្ជកម្ម​ថ្នាំ​ជក់ ខិត​ខំ​ធ្វើ​គ្រប់​បែប​យ៉ាង​ដើម្បី​ទាក់​ទាញ​រក​ភ្ញៀវ​ថ្មី ឬ​ជន​រង​គ្រោះ​ ថ្មី។ ជនរងគ្រោះថ្មី គឺស្ត្រី។ ហេតុ​ដូច្នេះ​ហើយបាន​ជា​ឆ្នាំ​នេះ អង្គការ​សុខភាព​លោក​ផ្តោត​អារម្មណ៍​ជា​ពិសេស​ទៅ​លើ​ស្ត្រី និង​យុវតី។

អង្គការ​សុខភាពពិភពលោក​ បាន​សន្និដ្ឋាន​ថា ពី​ពេល​នេះ រហូត​ដល់​ឆ្នាំ ២០២០ ថ្នាំ​ជក់ (បារី) នឹង​ក្លាយ​ជា​បុព្វហេតុ​​ចម្បង​បំផុត​នៃ​ការ​ស្លាប់ និង​អសមត្ថភាព​របស់​មនុស្ស។ ព្រោះ​ក្នុង​មួយ​ឆ្នាំៗ មាន​ជន​រង​គ្រោះ​ព្រោះ​ថ្នាំ​ជក់​ដល់​ទៅ​ជាង ១០​លាន​នាក់។

 
កម្ពុជា​ក៏​ដូច​ជា​បណ្តា​ប្រទេស​ជា​សមាជិក​អង្គការ​សុខភាព​ពិភពលោក OMS ផ្សេង​ទៀត ដែរ ​បាន​ចូល​រួម​យ៉ាងសកម្ម​ក្នុង​ការ​ប្រយុទ្ធ​ប្រឆាំង​នឹង​ថ្នាំជក់។

នៅ​ថ្ងៃ​ទី ៣១ ឧសភា​២០១០ ដែល​ជា​ទិវា​ពិភពលោក​គ្មាន​ថ្នាំ​ជក់ ឆ្នាំ​នេះ មាន​ប្រធានបទ​”Gender និង​ស្ត្រី” ដោយ​ផ្តោត​ទៅ​លើ “ការ​ផ្សាយ​ពាណិជ្ជកម្ម និង​លក់​ដូរ​ថ្នាំ​ជក់​ទៅ​ឲ្យ​ស្ត្រី”។ និយាយ​ឲ្យ​ចំ​ គឺ​ការ​ប្រយុទ្ធប្រឆាំង​នឹង​យុទ្ធសាស្ត្រ​នៃ​ការ​ផ្សាយ​ពាណិជ្ជកម្ម ដែល​ជា​បច្ចេកទេស​មួយ​ជម្រុញ​ឲ្យ​ស្ត្រី​ចង់​ជក់​បារី។

សារព្រមាន​ដើម្បី​សុខភាព​នឹង​មាន​ដាក់​នៅ​កញ្ចប់​បារី
សារព្រមាន​ដើម្បី​សុខភាព​នឹង​មាន​ដាក់​នៅ​កញ្ចប់​បារី រូបថត : OMS

 
តាម​ពិត​​អ្នក​ជក់​បារី​ភាគ​ច្រើន​ជា​បុរស ស្ត្រី​អ្នក​ជក់​បារី​មាន​ប្រមាណ​តែ​ជាង​បី​ភាគ​រយ​ ប៉ុណ្ណោះ​ហេតុ​ដូច្នេះ​ហើយ​បាន​ឧស្សាហកម្ម​បារី ឈ្មួញ​បារី តែង​ខិត​ខំ​រក​មធ្យោបាយ​គ្រប់​បែប​យ៉ាង​ ដើម្បី​ទាក់​ទាញ​ស្រ្តី​ចំណុច​ស៊ីប​ថ្មី ឲ្យ​ក្លាយ​ជា​ភ្ញៀវ​ជក់​បារី​ថ្មី មក​ជំនួស​អ្នក​ជក់​បារី​មុនៗ ដែល​បាន​ស្លាប់​ព្រោះ​បារី។ បើ​គ្មាន​ការ​ទប់​ស្កាត់​ឲ្យ​ទាន់​ពេល​វេលា​ទេ នោះ​ចំនួន​ស្ត្រី​ជក់​បារី​នឹង​កើន​ឡើង​ប្រមាណ​២០% នៅ​ឆ្នាំ​២០២៥។ គឺ​ដោយ​យល់​ពី គ្រោះ​ថ្នាក់​នេះ​ទើប​ អង្គការ​សុខភាព​ពិភពលោក​បាន​ជ្រើសរើស​ប្រធានបទ​នេះ​ឡើង។

សូម​ជម្រាប​ជូន​ថា គ្រោះ​ថ្នាក់​ដែល​បង្ក​ឡើង​ដោយ​ថ្នាំ​ជក់​ ដោយ​ការ​ជក់​បារី ឬ​ដោយ​ការ​ស្រូប​ផ្សែង​បារី មានដូច​គ្នា​មិន​ថា​ចំពោះ​ស្ត្រី​ ឬ​បុរស​ទេ។ បារី​ងាយ​នឹង​បង្ក​ឲ្យ​មាន​ជំងឺ​មហារីក​សួត ហើម​សួត រលាក​ផ្លូវ​ដង្ហើម ជំងឺ​សសែ​ឈាម ។ល។ និង​។ល។ ចំពោះ​ស្ត្រី​គ្រោះ​ថ្នាក់ អាច​មាន​ច្រើន​លើស​ពី​នេះ​ទៅ​ទៀត​ ព្រោះ​ស្រ្តី​អាច​ផ្តល់​គ្រោះ​ថ្នាក់​ដល់​ទារក​ក្នុង​ផ្ទៃ​ដែល​មិន​ដឹង​ក្តី ធ្វើ​ឲ្យ​ទារក​ស្លាប់​ក្នុង​ពោះ រលូត សម្រាល​មុន​កំណត់ ខ្វះ​ទម្ងន់ ...

សូម​ចង​ចាំ​ថា ថ្នាំ​ជក់​ទោះ​ឋិត​ក្នុង​ទម្រង់​ណា មាន​បច្ចេកវិទ្យា​ផលិត​ទំនើប​បែប​ណា បារី​សម្រាប់​ស្ត្រី​ក្តី បារី​សម្រាប់​បុរស បារី​ថ្នាំ​ខ្លាំង បារីស្រាលក៏​ដោយ សុទ្ធ​តែ​​ផ្តល់​គ្រោះ​ថ្នាក់​ដល់​សុខភាព​​ដូច​គ្នា​ទាំង​អស់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ