អានតួអត្ថបទ
កម្ពុជា

រដ្ឋាភិបាល​ឆ្លើយតប​បក្សប្រឆាំង​លើការងារ​រ៉ែប្រេងកាត​និងឧស្ម័ន​ប៉ុន្តែមិនទទួល​បាន​ការពេញចិត្ត​

​រដ្ឋាភិបាល​​កម្ពុជា​​​ឆ្លើយ​បំភ្លឺ​ការបង់​​កម្រៃ​២៨​​លាន​​ដុល្លារ​​របស់​ក្រុមហ៊ុន​​ប្រេង​​តូតាល់​​ឲ្យ​ រដ្ឋាភិបាល​
​រដ្ឋាភិបាល​​កម្ពុជា​​​ឆ្លើយ​បំភ្លឺ​ការបង់​​កម្រៃ​២៨​​លាន​​ដុល្លារ​​របស់​ក្រុមហ៊ុន​​ប្រេង​​តូតាល់​​ឲ្យ​ រដ្ឋាភិបាល​ ©Reuters )
ដោយ៖ បូលីន ដាវីដ
២៣ នាទី

មន្ត្រី​គណបក្ស​ប្រឆាំង​បាន​ថ្លែង​នៅ​ថ្ងៃ​ នេះ​ថា ​ខ្លួន​មិន​ទាន់​ពេញ​ចិត្ត​ចំពោះ​អ្វី​ដែល​រដ្ឋាភិបាល​កម្ពុជា​បាន​ឆ្លើយ​តប ​នឹង​ការស្នើ​ឆ្លើយ​បំភ្លឺ​របស់​ខ្លួន​លើ​បញ្ហា​ពាក់ព័ន្ធ​នឹង​ការងារ​រ៉ែ​ ប្រេងកាត​និង​ឧស្ម័ន ​ព្រម​ទាំង​ការបង់​កម្រៃ​២៨​​លាន​ដុល្លារ​របស់​ក្រុមហ៊ុន​ប្រេង​តូតាល់​ឲ្យ​ រដ្ឋាភិបាល​ទេ​។​ ការ​មិន​ពេញ​ចិត្ត​ដោយ​សារ​ចម្លើយ​ទាំង​នោះ​មិន​បាន​គ្រប់​ជ្រុង​ជ្រោយ​ និង​មិន​ទាន់​មាន​តម្លាភាព។​ ប៉ុន្តែ​រដ្ឋាភិបាល​ថា​អ្វីៗ​បាន​ធ្វើ​ឡើង​ដោយ​តម្លាភាព។

ផ្សាយពាណិជ្ជកម្ម

សេចក្តីរាយការណ៍របស់​ នេត្រ ភក្រ្តា

ក្រុម​មន្ត្រី​គណបក្ស​ប្រឆាំង​បាន​ថ្លែង​នៅ​ថ្ងៃ​នេះ​ថា​ ខ្លួន​នឹង​បន្ត​ធ្វើ​ការ​សិក្សា​ស្រាវជ្រាវ​និង​ស្វែង​រក​ឲ្យ​មាន​តម្លាភាព​កាន់​តែ​ច្រើន​ឡើង​ថែម​ទៀត​ចំពោះ​ការ​ចំណាយ​ដែល​នឹង​បាន​មក​ពី​ធនធាន​រ៉ែប្រេងកាត​និង​ឧស្ម័ន​ព្រម​ទាំង​ការ​ប្រើ​ប្រាស់​មូលនិធិ​អភិវឌ្ឍន៍​សង្គម​បាន​មក​ពី​ក្រុម​ហ៊ុន​​ប្រេងនានា។​ ការថ្លែង​របស់​លោក​តំណាង​រាស្ត្រ​ យឹម​ សុវណ្ណ ​អ្នក​នាំពាក្យ​គណបក្ស​សម រង្ស៊ី​ ធ្វើ​ឡើង​ដើម្បី​បង្ហាញ​ពីការ​មិន​ពេញចិត្ត​ចំពោះ​ចម្លើយ​របស់​មន្ត្រី​រដ្ឋាភិបាល​កម្ពុជា​ចំពោះ​សំណួរ​ចោទ​ឡើង​ដោយ​លោក​តំណាង​រាស្ត្រ ​សុន​ ឆ័យ​ទាក់​ទង​នឹង​ការងារ​រ៉ែ​ប្រេង​កាត​និង​ឧស្ម័ន​និង​ការ​ប្រើប្រាស់​មូលនិធិ​អភិវឌ្ឍន៍​សង្គម​។

 
លោក​យឹម​ សុវណ្ណ ​បាន​បន្ត​ថា​ការ​ឆ្លើយ​តប​របស់​រដ្ឋាភិបាល​ មិនទាន់​ច្បាស់​នៅ​ឡើយ​ទេ​ ហើយ​ក៏គ្មាន​តម្លាភាព​ដែល​អនុញ្ញាត​ឲ្យ​មាន​ការ​ប្រព្រឹត្តិ​អំពើ​ពុក​រលួយ​។​ លោក​បាន​បញ្ជាក់​ថា ​គណបក្ស​ប្រឆាំង​នឹង​សហការ​ជា​មួយ​នឹង​អង្គការ​ក្រៅ​រដ្ឋាភិបាល​ជាតិ​និង​អន្តរជាតិ​ដើម្បី​ប្រឆាំង​រឿងនេះ។​ រដ្ឋាភិបាល​កម្ពុជា​តាមរយៈ​លោក​ឧបនាយក​រដ្ឋមន្ត្រី​សុខ​ អាន​រដ្ឋមន្ត្រី ​ទទួល​បន្ទុក​ទីស្តីការ​គណៈ​រដ្ឋមន្ត្រី​បាន​ឆ្លើយ​តប​ទៅ​នឹង​សំណួរ​របស់​តំណាង​រាស្ត្រ​បក្សប្រឆាំង​តាមរយៈ​លិខិត​ជាលាយ​លក្ខណ៍​អក្សរ​មួយ​អំពី​បញ្ហា​រ៉ែ​ប្រេងកាត​និង​ឧស្ម័ន​ព្រម​ទាំង​ការ​បង់​កម្រៃ​ជា​ប្រាក់​២៨​លាន​ដុល្លារ​អាមេរិក​របស់​ក្រុម​ហ៊ុន​តូ​តាល់​មក​ឲ្យ​រដ្ឋាភិបាល​កម្ពុជា។

នៅ​ក្នុង​លិខិត​ទទួល​បាន​នៅ​ថ្ងៃ​នេះ​លោក​សុខ​ អាន​ បាន​ឲ្យ​ដឹង​ថា​ រហូត​មក​ទល់​ពេល​នេះ​ រដ្ឋាភិបាល​កម្ពុជា​មិន​ដែល​ឲ្យ​អាជ្ញាប័ណ្ណ​ដល់​ក្រុម​ហ៊ុន​ប្រេង​កាត​ណា​ទេ​ ប៉ុន្តែ​ធ្លាប់​បាន​ចុះ​កិច្ច​ព្រមព្រៀង​ប្រេងកាត​ជា​មួយ​គ្នា​សម្រាប់​ឲ្យ​ក្រុមហ៊ុន​ធ្វើ​ការ​សិក្សា​ស្រាវជ្រាវ​សែ្វង​រុក​រក​ធនធាន​​ប្រេង​កាត​និង​ឧស្ម័ន។​ បើ​តាម​លោក​សុខ​ អាន​ក្រុម​ហ៊ុន​ដែល​ទទួល​បាន​កិច្ច​ព្រមព្រៀង​ប្រេង​កាត​ពី​រដ្ឋាភិបាល​កម្ពុជា​កន្លង​មក​និង​បច្ចុប្បន្ន​មាន​ប្រមាណ​២៤​ក្រុមហ៊ុន​ ប៉ុន្តែ​ក្រុមហ៊ុន​ខ្លះ​បាន​ចាក​ចេញ​ពី​កម្ពុជា​ទៅហើយ​ ដោយ​សារ​ធនធាន​ប្រេងកាត​និង​ឧស្ម័ន​កម្ពុជា​មិន​អាច​អភិវឌ្ឍ​បាន​ក្នុង​លក្ខណៈ​ពាណិជ្ជកម្ម​។

លោក​ឧបនាយក​រដ្ឋមន្ត្រី​សុខ​ អាន​ បាន​ពន្យល់​ទៀតថា​ ក្រុមហ៊ុន​មិន​ត្រូវ​បាន​ឲ្យ​បង់​កម្រៃ​អ្វី​ទាំងអស់​មុន​ទទួល​បាន​កិច្ច​ព្រមព្រៀង​ប្រេង​កាត​ទោះបី​ថ្លៃ​ពាក្យសុំ​ក៏​ដោយ​ ខណៈ​ដែល​ប្រទេស​ផ្សេង​ទៀត​តែង​តែ​យក។​ ប៉ុន្តែ​ពេល​បាន​កិច្ច​ព្រមព្រៀង​ក្រុម​ហ៊ុន​អាច​នឹង​ត្រូវបង់​កម្រៃ​ខ្លះ​ដូច​ជា​ប្រាក់​រង្វាន់​ចុះ​ហត្ថលេខា​និង​មូលនិធិ​អភិវឌ្ឍន៍​សង្គម​ ប៉ុន្តែ​មិន​មែន​ជា​កាតព្វកិច្ច​ចាំបាច់​ដែល​ត្រូវ​តែ​បង់ទេ។​ នេះ​អាស្រ័យ​លើការ​ចរចា​ដោយ​ផ្អែក​លើ​សក្តានុពល​ប្រេង​ប៉ាន់​ស្មាន​ក្រោម​ដី​ ហើយ​ថវិកា​ដែល​បាន​មក​ត្រូវ​បាន​គ្រប់​គ្រង​រួម​គ្នា​ដោយ​ក្រសួង​សេដ្ឋកិច្ច​​និង​អាជ្ញាធរ​ប្រេងកាត​ជាតិ​កម្ពុជា។​ នេះ​គឺជា​ការ​គួស​បញ្ជាក់​របស់​លោក​សុខ​ អាន​ នៅ​ក្នុង​លិខិត​ឆ្លើយ​បំភ្លឺ។​ លោក​ក៏​បាន​គូស​បញ្ជាក់​ថា​ គ្មាន​ការ​បង់​កម្រៃ​ណា​មួយ​ឲ្យ​ទៅ​បុគ្គល​ជា​មន្ត្រី​រាជ​រដ្ឋាភិបាល​ដោយ​ផ្ទាល់​ទេ​ អ្វីៗ​ត្រូវធ្វើ​ឡើង​ដោយ​កិច្ច​ព្រមព្រៀង​ និង​ចូល​ទៅ​ក្នុង​គណនី​ដែល​កំណត់​ដោយ​រដ្ឋាភិបាល៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ